DALMANUTA

Usa ka dapit diin miadto si Jesus sakay sa usa ka sakayan uban sa iyang mga tinun-an human sa milagrosong pagpakaon sa 4,000 ka lalaki duol sa Dagat sa Galilea. (Mar 8:1-10) Bisan tuod daghang dapit ang gituohan nga mao ang Dalmanuta, kini nga ngalan wala hisgoti diha sa ubang Biblikanhon o dili-Biblikanhon nga mga reperensiya, mao nga ang tukmang nahimutangan niini nagpabiling wala mahibaloi. Gituohan sa pipila ka eskolar nga ang Dalmanuta lagmit maoy resulta sa kausaban nga gihimo sa magkokopya, sanglit ang samang asoy sa Mateo 15:29-39 migamit sa “Magadan” ug ang pipila ka karaang mga manuskrito sa asoy ni Marcos migamit usab sa “Magadan” o “Magdala” imbes nga Dalmanuta. Bisan pa niana, sanglit ang labing kasaligan nga mga manuskritong Grego migamit man sa Dalmanuta, imbes nga isipong sayop kini nga termino, mas maayo nga ipabilin ang Dalmanuta. Lagmit nga ang Dalmanuta maoy lain lamang nga ngalan sa Magadan, o tingali kini usa ka kasikbit nga dapit diin ang ngalan niini, bisan tuod wala kaayo gamita o wala kaayo mailhi, apan gipreserbar alang kanato diha sa Ebanghelyo ni Marcos.