MAGADAN

Usa ka dapit duol sa Dagat sa Galilea diin si Jesus miadto human sa iyang milagrosong pagpakaon sa mga 4,000 ka lalaki. (Mat 15:39; ang mas bag-ong mga manuskrito mabasa dinhi nga “Magdala.”) Si Marcos (8:10), sumala sa labing maayong Gregong mga manuskrito, naghisgot sa samang teritoryo ingong “Dalmanuta.”​—Tan-awa ang DALMANUTA.

Karong adlawa walay dapit nga nailhang Magadan diha sa rehiyon palibot sa Dagat sa Galilea. Bisan pa niana, gituohan sa ubang mga eskolar nga ang Magadan mao ra usab ang Magdala. Ang nagpaluyo niini nga panglantaw mao ang kamatuoran nga sa Aramaiko ang letrang l sagad hulipan sa letrang n sa Hebreohanong mga pulong. Busa ang Magadan lagmit nahimong Magdala. Gituohan sa uban nga ang “Magdala” lagmit milutaw diha sa mas bag-ong mga kopya sa Gregong teksto tungod kay gihunahuna nga ang Magadan mao ra usab ang modernong Majdal.

Ang Magdala (lagmit ang Magadan) gituohan nga mao ang modernong Majdal (Migdal), mga 6 km (3.5 mi) sa AAK sa Tiberias duol sa Dagat sa Galilea. Maayong pagkapuwesto kini nga dapit kay nahimutang duol sa kinasang-an sa dalan nga ubay sa Dagat sa Galilea gikan sa Tiberias ug sa dalan nga padulhog gikan sa kasadpang kabungtoran. Ang mga kagun-oban sa bubag-o pang torre nga nakaplagan didto nagpakita nga ang Majdal nanalipod kanhi sa habagatang agianan paingon sa Patag sa Genesaret. Ang Majdal ug ang Magdala (usa ka porma sa Hebreohanong migh·dalʹ) nagkahulogang “Torre.” Kini nga dapit sagad gituohan nga mao ang pinuy-anan ni Maria Magdalena.