GABRIEL

[Usa nga Lig-on ug Lawas nga Iya sa Diyos].

Ang bugtong balaan nga manulonda nga ginganlan sa Bibliya gawas pa kang Miguel; ang bugtong nagmateryalisar nga manulonda nga nagpaila sa iyang ngalan. Duha ka higayon nga nagpakita si Gabriel kang Daniel: ang una, duol sa Suba sa Ulai “sa ikatulo ka tuig sa paghari ni Belsazar” aron ipatin-aw kang Daniel ang panan-awon maylabot sa laking kanding ug sa laking karnero (Dan 8:​1, 15-26); ug ang ikaduha, “sa unang tuig ni Dario” nga Medianhon, aron ipahayag ang tagna maylabot sa “kapitoan ka semana.” (Dan 9:​1, 20-27) Ngadto kang Zacarias nga saserdote, si Gabriel nagdalag maayong balita nga siya ug ang iyang edarang asawa nga si Elisabet makabaton ug usa ka anak nga lalaki, si Juan (nga Tigbawtismo). (Luc 1:11-20) Ngadto kang Maria, ang babayeng ulay nga sinayoran kang Jose, si Gabriel miingon: “Maayong adlaw, usa nga pinaboran kaayo, si Jehova nagauban kanimo.” Dayon iyang gisulti kaniya nga siya manganak ug usa ka anak nga lalaki, si Jesus​—siya “pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, . . . ug walay pagkatapos ang iyang gingharian.”​—Luc 1:26-38.

Sumala sa rekord sa Bibliya atong nahibaloan nga si Gabriel maoy usa ka linalang nga manulonda nga taas ug ranggo ug suod nga nalangkit sa langitnong korte, ang usa “nga nagtindog duol sa atubangan sa Diyos”; nga siya mao ang usa nga “gipadala” sa Diyos aron ipahayag ang linaing mga mensahe alang sa mga alagad ni Jehova dinhi sa yuta (Luc 1:​19, 26); nga ang iyang personal nga dagway o materyalisadong lawas, nga haom sa kahulogan sa iyang ngalan, maoy “sama sa usa ka tawo nga lig-on ug lawas.”​—Dan 8:15.