LABDANUM

Usa ka humokon, itom o itom-kapehon nga tagok nga mogawas gikan sa mga dahon ug mga sanga sa ubay-ubayng matang sa Cistus, o rockrose. Kini nga tagok maoy pait apan humot. Kini gigamit sa mga pahumot ug, sa usa ka higayon, gigamit usab pag-ayo diha sa medisina. Maylabot niini nga substansiya, ang karaang Gregong historyador nga si Herodotus (III, 112) misulat: “Kini gikuha gikan sa mga bungot sa mga laking kanding, diin kini mipilit sama sa tagok, sa dihang ang mga kanding maningaon gikan sa mga kalibonan. Kini gigamit diha sa daghang matang sa panghaplas [mga pahumot], ug kasagarang sunogon sa mga Arabo ingong insenso.”​—Hubad ni G. Rawlinson.

Gigamit ang Hebreohanong pulong nga nekhoʼthʹ alang niini ingong lakip sa mga butang nga gidala sa usa ka nagapanaw nga panon sa mga Ismaelinhon nga maoy gibaligyaan kang Jose ug usa kini sa maayong mga produkto nga gisulti ni Jacob nga dad-on sa iyang mga anak nga lalaki ingong usa ka gasa ngadto sa magmamando sa Ehipto. (Gen 37:25; 43:11) Ang nekhoʼthʹ gihubad sa lainlaing paagi ingong “yerbang-paalimyon” (KJ), “tagok” (AT, RS), “tragacanth” (Da), “salong” (Mo), ug, ingon sa paghubit ni Koehler ug Baumgartner, “labdanum” (NW).​—Lexicon in Veteris Testamenti Libros, Leiden, 1958, p. 615.