LEOPARDO

[Heb., na·merʹ; Aramaiko, nemarʹ; Gr., parʹda·lis].

Usa sa mga dagkong iring, nga sagad hilawng-kape ang bulok ug may itom, dili tibuok nga mga puntikpuntik. (Jer 13:23) Ang mga leopardo sagad nga 1.2 m (4 p) ang gitas-on, walay labot ang ikog. Bisan tuod sa dili pa dugayng mga katuigan ubay-ubayng mga leopardo ang gipamatay duol sa Jerusalem, dayag nga daghan kaayo niini nga mga linalang ang makaplagan sa karaang Palestina. (Aw 4:8) Ang cheetah, o ang tigpangayam nga leopardo, nga lakip sa kinatulinan sa mga hayop nga sus-an, makaplagan usab sa Palestina, ug ang Hebreohanong pulong nga na·merʹ lagmit nga naglakip niini nga hayop ug sa leopardo usab. Ang cheetah lahi sa tinuod nga leopardo sanglit ang mga kuyamoy niini dili kaayo makuko ug tibuok ang mga puntikpuntik niini.

Diha sa Kasulatan, gihisgotan ang katulin sa leopardo (Hab 1:8) ug ang paagi sa pag-atang niini duol sa mga lungsod, nga andam sa pag-atake sa moagi nga mga binuhing hayop. (Jer 5:6; Os 13:7) Kasukwahi gayod niini nga kahimtang, ang leopardo ug ang nating kanding gihulagway nga mohigda nga magkauban diha sa kalinaw sa panahon sa pagmando sa Mesiyas.​—Isa 11:6.

Sa Daniel 7:​6, ang upat ug pako, upat ug ulo nga leopardo naghulagway sa Gresyanhong Gahom sa Kalibotan, nga nagpukan sa Medo-Persia sama sa katulin sa leopardo. Dugang pa, ang mapintas nga mananap nga migimaw sa dagat nga nakita diha sa panan-awon ni apostol Juan sa panguna maoy sama sa usa ka leopardo.​—Pin 13:​1, 2; tan-awa ang MANANAP, SIMBOLIKO NGA MGA.

Ang Hebreohanong pulong nga laʹyish, nga gihubad nga “leyon” (Job 4:11; Pr 30:30), gihubad nga “leopardo” sa Isaias 30:6 (NW), sanglit ang “leyon” (la·viʼʹ) gihisgotan na sa maong teksto.