MIRA, II

Usa ka dakong siyudad sa lalawigan sa Licia. Nahimutang duol sa baybayon sa HK sa Asia Minor, ang Mira nahiluna sa usa ka bungtod nga mga 3 km (2 mi) pailaya duol sa suba sa Andracus. Ang dapit nailhan karong adlawa nga Demre. Ang karaang ngalan nga Mira lagmit naglakip sa siyudad ug sa maayo kaayong dunggoanan niini.

Ingong usa ka binilanggo nga padulong sa Roma, si apostol Pablo nakaabot sa Mira gikan sa Cesarea agi sa Sidon. Didto, siya ug ang iyang mga kaubanan sa panaw kinahanglang mobalhin pagsakay ngadto sa usa ka barko nga nagkarga ug mga lugas gikan sa Alejandria nga molawig paingon sa Italya. (Buh 27:1-6, 38) Ang Mira nahimutang sa A mismo sa Alejandria ug busa lagmit kini maoy regular nga ruta sa mga barko gikan nianang Ehiptohanong siyudad. O, tingali tungod sa kasungsongon sa hangin (Buh 27:​4, 7) ang barko gikan sa Alejandria napugos sa pag-usab sa ruta niini ug mipondo sa Mira.

Sa Buhat 21:1 ang ubang karaang mga teksto nagdugang sa “ug Mira” human sa “Patara.” (Tan-awa ang mga ftn sa JB, NE, RS.) Bisan tuod kini nga pagdugang maoy kaharmonya sa uban nga asoy, walay igong ebidensiya aron matino kon ang ngalang Mira makita ba diha sa orihinal nga manuskrito.