NOEMI

[Akong Kahimuot].

Ugangang babaye ni Ruth, nga katigulangan ni David ug ni Jesu-Kristo.​—Mat 1:5.

Si Noemi maoy asawa ni Elimelek, usa ka Epratahanon nga taga-Betlehem sa Juda, sa mga adlaw sa mga Maghuhukom. Sa panahon sa usa ka grabeng gutom siya ug ang iyang bana ug ang ilang duha ka anak nga lalaki, si Malon ug Kilion, milalin ngadto sa Moab. Didto namatay si Elimelek. Unya ang iyang mga anak naminyo sa mga babayeng Moabihanon, kang Ruth ug Orpa, apan mga napulo ka tuig sa ulahi kini nga mga anak namatay nga walay anak.​—Ru 1:1-5.

Ang namatyan nga si Noemi nakahukom nga mopauli sa Juda. Ang iyang duha ka umagad nga babayeng balo mikuyog kaniya, apan si Noemi miawhag kanila nga mopauli sa ila ug magminyo didto sa ilang kaugalingong yuta, kay si Noemi “tigulang na kaayo aron makabaton ug bana” ug dili na makahatag ug mga anak aron mahimong ilang mga bana. Si Orpa mipauli, apan si Ruth nagpabilin uban kang Noemi, tungod sa iyang paghigugma kang Noemi ug sa iyang Diyos nga si Jehova.​—Ru 1:6-17.

Pag-abot sa Betlehem, si Noemi miingon sa mga babayeng mitimbaya kaniya: “Ayaw ako tawga ug Noemi [Akong Kahimuot]. Tawga ako ug Mara [Mapait], kay ang Labing Gamhanan naghimong mapait kaayo alang kanako.” (Ru 1:18-21) Sanglit panahon kadto sa pagpangani sa sebada, gikalipay ni Ruth nga manghagdaw aron masuportahan si Noemi ug ang iyang kaugalingon, ug wala tuyoa nga nahiadto siya sa uma ni Boaz. (Ru 2:1-18) Sa dihang iyang gisugilon kang Noemi kon kang kinsang uma siya nanghagdaw, naamgohan ni Noemi ang pagtultol ni Jehova, sanglit si Boaz maoy suod nga paryente ni Elimelek ug busa usa sa ilang manlulukat. Iyang gidasig si Ruth nga ipadangat kining butanga sa pagtagad ni Boaz. (Ru 2:19–​3:18) Dali nga misanong si Boaz sa pagtuman sa nabatasang legal nga paagi sa paglukat sa katigayonan ni Elimelek gikan kang Noemi. Dayon si Ruth nahimong asawa ni Boaz alang kang Noemi nga subay sa balaod sa pagminyo sa kabanay sa namatayng bana, o sa bayaw nga lalaki. Sa dihang sila nakabaton ug usa ka anak nga lalaki, ang silingang mga babaye nagngalan niini nga Obed, nga nag-ingon: “Natawo alang kang Noemi ang usa ka lalaki.” Busa si Obed nahimong legal nga manununod sa Judeanhong balay ni Elimelek.​—Ru 4:1-22.