ORPA

Ang Moabihanon nga asawa ni Kilion, ug sama kang Ruth, umagad nga babaye ni Noemi. (Itandi ang Ru 1:3-5 sa 4:10.) Human mamatay ang mga bana nilang tulo, ang walay anak nga mga balo, si Noemi, Orpa, ug Ruth, misugod sa pagpanaw gikan sa Moab paingon sa Betlehem. Samtang nagpanaw giawhag ni Noemi ang iyang duha ka umagad nga babaye sa pagpauli ngadto sa panimalay sa ilang inahan ug magminyo sa Moab, apan silang duha nagpadayon sa pag-ingon kang Noemi, “Dili, apan kami mopauli uban kanimo ngadto sa imong katawhan.” Si Orpa nagmaluloton sa iyang ugangang babaye, nga kaniya si Orpa dayag nga may dakong pagmahal. (Ru 1:8-10) Ang iyang tinguha nga magpabilin uban kang Noemi lagmit sa usa ka bahin maoy tungod kay iyang nagustohan ang pagkinabuhi diha sa usa ka Israelinhong pamilya. Apan gipasiugda ni Noemi nga kon magpabilin kining duha ka balong Moabihanon uban kaniya dako gayod ang posibilidad nga sila magkinabuhing balo sa Juda, sanglit diyutay ra ang purohan nga maminyo pa pag-usab si Noemi ug makapatunghag mga anak; ug bisan pag mahitabo kini, siya nakatino nga si Orpa ug Ruth dili na makahulat sa pagdako niini nga mga anak aron makigminyo niining Moabihanong mga balo agig pagsunod sa kahikayan nga minyoan nila ang nabiyudang mga asawa. Ang pagmahal ug pagpabili ni Orpa dili ra kaayo dako aron mopadayon siya sa pagkuyog bisan pa sa maong posibleng palaaboton, ug human sa hilabihang paghilak, nanamilit siya kang Noemi ug Ruth ug mipauli “sa iyang katawhan ug sa iyang mga diyos.”​—Ru 1:3-15.