TIGTALA

Usa ka sinaligan kaayong opisyal sa palasyo sa hari sa Israel. Kini nga titulo gihubad gikan sa usa ka porma sa Hebreohanong pulong nga za·kharʹ (hinumdom) ug sa literal nagkahulogang “tigpahinumdom.” (2Sa 8:​16, ftn sa Rbi8) Ang iyang mga buluhaton wala hisgoti sa Bibliya, apan mopatim-awng siya mao ang opisyal nga tigtala sa kasaysayan sa gingharian, nga magtagana sa hari ug impormasyon labot sa mga panghitabo diha sa gingharian ug usab magpahinumdom kaniya sa importanteng mga butang nga angay niyang tagdon, nga maghatag kaniyag mga impormasyon labot niini.

Usahay ang tigtala maoy maghawas sa hari sa importanteng mga kalihokan sa nasod. Si Joa nga anak nga lalaki ni Asap maoy usa sa mga opisyal ni Haring Ezequias nga migula aron makigsulti sa Asiryanhong si Rabsake sa dihang gihulga niini ang Jerusalem. (2Ha 18:​18, 37) Ang laing tigtala, si Joa nga anak nga lalaki ni Joahaz, nagdumala sa pag-ayo sa templo. (2Cr 34:8) Usa ka tigtala ang ginganlan usab taliwala sa mga nag-alagad sa palasyo ni David ug Solomon.​—2Sa 8:16; 20:24; 1Ha 4:3; tan-awa ang KALIHIM SA SIYUDAD.