LAKING BINAW

[Heb., yach·murʹ].

Ang laki sa usa ka gamayng matang sa osa nga kaamgid sa gasela. Ang laking binaw (Capreolus capreolus) may barog nga kapin sa 0.6 m (2 p) taman sa abaga ug ang gitas-on sa lawas maoy mga 1.2 m (4 p). Ang mga laki lamang ang may mga sungay, ug kini mailisdan kada tuig. Ang balhibo sa laking binaw panahon sa ting-init maoy pulahon-kape, ug lagmit mao kini ang pasukaranan sa Hebreohanong ngalan niini nga yach·murʹ, nga gituohang naggikan sa lintunganayng pulong nga nagkahulogang “mapula.” Kini nga hayop dili tigpanon. Ang gamayng pundok nga tinagutlo o tinagup-at, ang laki, ang baye, ug ang usa o duha ka nati niini, lagmit makita nga dungang maningaon. Ang laking binaw adunay usa lamang ka bayeng kaparis sa tibuok kinabuhi.

Tungod kay nagapangusap sa kinaon ug pikas ang kuko, ang laking binaw mahimong kan-on sumala sa Moisesnong Balaod. (Deu 14:​5, 6) Ang unod niini nga linalang maoy usa sa mga karne nga kanunayng gitagana alang sa lamesa ni Haring Solomon.​—1Ha 4:​22, 23.