PARAT NGA HILBA

[Heb., mal·luʹach].

Kini nga termino kausa lamang hisgoti sa Kasulatan ingong pagkaon nga gikaon sa mga timawa. (Job 30:4) Ang orihinal nga pulong gituohan nga naggikan sa usa ka lintunganayng pulong nga nagkahulogang “asin,” ug gihubad usab kini nga “parat nga tanom” (AS, AT, Da), “cress” (Fn), “balili” (Dy), ug “(mga) malba” (KJ, Le, RS). Ang hubad nga “mga malba” lagmit maoy tungod sa pagkaamgid sa Hebreohanong pulong nga mal·luʹach ug sa Gregong pulong nga mo·loʹkhe, nga gituohang nalangkit sa Cebuanong pulong nga “malba.” Apan, sa Job 30:4 ang mga maghuhubad sa Gregong Septuagint wala mogamit sa mo·loʹkhe kondili sa haʹli·ma (“parat nga mga hilba,” LXX, Bagster), ug ang haʹli·ma, sama sa mal·luʹach, gituohang nagtumong sa kaparat sa tanom o kaha sa kaparat sa dapit diin kini mitubo.

Ang tanom nga sagad gituohang maoy katumbas sa mal·luʹach sa Bibliya mao ang asiman sa dagat o kahoykahoy nga orache (Atriplex halimus). Kini nga kahoykahoy kasagarang moabot sa gitas-on nga 1 hangtod sa 2 m (3 hangtod sa 6.5 p). Kini nga tanom may gagmay, baga, aslom nga mga dahon, ug sa tingpamulak, kini may gagmayng mga bulak nga purpura. Kini motubo sa asinon nga yuta.