GABAS

Usa ka himan nga gigamit sa pagputol o pagtabas nga ang ohas may mga ngipon ug may usa o duha ka kuptanan. Ang kanhing mga gabas dili makatabas sa duha ka direksiyon; ang uban gidisenyo nga makatabas nga paatras lang; ang uban, paabante. Ang kadaghanan sa mga gabas sa Ehipto maoy gama sa bronse ug sagad ang mga ngipon naghandag paingon sa kuptanan. Kini nga gabas makatabas nga paatras. Ang ohas niini isuksok diha sa kuptanan o itaod nganha niini pinaagig higot nga panit. Ang duhay-kuptanan nga mga gabas nga puthaw ang mga ohas maoy gigamit sa mga Asiryanhon. Ang Hebreohanong mga panday migamit sa gabas sa pagtabas ug kahoy, ug ang ilang mga kantero migamit ug mga gabas nga makatabas ug bato.​—Isa 10:15; 1Ha 7:9.

Gipatrabaho ni David ang nabihag nga mga Ammonhanon sa pagpanggabas ug mga bato. (2Sa 12:29-31) Ang ilang mga himan naglakip sa “mga atsa,” o, sa literal, “mga gabas sa bato,” sumala sa Masoretikong teksto sa 1 Cronicas 20:3. Sa ubang mga kahimtang mopatim-aw nga ang mga gabas nga may ohas nga tumbaga ug may mga ngipon nga bato maoy gigamit sa pagtabas ug bato. Apan lagmit nga usahay butangan ug igpahait sama sa pinulpog nga ismeril ang sulab sa gabas nga tumbaga o bronse aron mas dali ang pagtabas sa bato.

Ang paglutos sa matinumanong mga saksi ni Jehova sa wala pa ang panahon sa mga Kristohanon usahay pintas kaayo nga ang uban kanila gipatay pa gani pinaagi sa ‘pagputol pinaagig gabas.’ (Heb 11:​37, 38) Sumala sa tradisyon, si Isaias gipapatay sa daotan nga si Haring Manases pinaagi sa maong hilabihan kasakit nga paagi, bisan tuod ang Kasulatan wala mag-ingon niana.