PLATA
Usa ka bililhon, puti nga elementong metal nga mapasinaw pag-ayo. Sanglit panagsa rang makakaplag ug lunsayng plata, ang mineral niini nga anaa pa sa bato kinahanglang tunawon ug lunsayon aron makuha ang plata ug malain gikan sa mga bato, yamukmok, ug lawoglawog, ug aron malain usab kini gikan sa ubang mga metal sama sa tingga. (Sal 12:6; Pr 27:21; Eze 22:20-22; Mal 3:3) Usahay, ang Hebreohanong termino alang sa plata (keʹseph) gihubad nga “salapi” ug ang Gregong termino alang sa plata (ar·gyʹri·on) gihubad nga “salaping plata” o mga “pirasong plata.”—Gen 17:12, ftn sa Rbi8; Mat 25:18; 26:15; tan-awa ang SALAPI.
Ang dinalisay nga plata adunay duha ka pangunang kagamitan. (1) Kini gigamit nga sukdanan sa bahandi ug ingong pangbayad. Si Abraham, nga migamit niini ingong pangbayad, mipalit ug luna sa yuta nga magsilbing lubnganan sa pamilya. (Gen 13:2; 23:15-18) Ang pagbayad gihimo pinaagi sa pagtimbang, sanglit ang mga sensilyo ayha pa namugna mga kasiglohan sa ulahi. (2) Ang mga pahiyas ug mga dayandayan gigama gikan niini nga metal sukad pa sa mga adlaw sa mga patriarka. (Gen 24:53; 44:2; Ex 11:2; 12:35) Ang plata gigamit sa paggama sa duha ka trompeta sa Israel (Num 10:2), sa pagtukod sa tabernakulo (Ex 26:19, 21, 25, 32; 27:10, 11, 17), ug sa templo ni Solomon (1Cr 28:15-17). Gigamit usab kini sa paghimog mga idolo.—Ex 20:23; Os 13:2; Hab 2:19; Buh 19:24.
Ang plata gipabilhan sa tanang kanasoran kanhi. (2Sa 8:10, 11; 2Cr 9:14) Ubos sa pagmando ni Solomon, dili lamang ang plata kondili ang bulawan usab dagaya kaayo sa Jerusalem nga tungod niana ang plata giisip nga “ingon sa wala lamay bili,” “ingon sa mga bato.” (1Ha 10:21, 27; 2Cr 9:20; itandi ang Dan 2:32.) Kausa sa matag tulo ka tuig ang mga barko magdalag mga kargamento nga plata gikan sa Tarsis (lagmit ang Espanya, nga sa pagkakaron prodyuser gihapon ug plata).—1Ha 10:22; 2Cr 9:21; Jer 10:9; Eze 27:12.
Kasukwahi sa lumalabay nga bili sa plata, ug mas angayng pabilhan nga labaw pa, mao ang kaalam, disiplina, ug pagsabot nga naggikan kang Jehova. (Pr 3:13, 14; 8:10, 19; 16:16) Dugang pa, gigamit sa Kasulatan ang plata diha sa daghang simbolikong mga diwa.—Ecc 12:6; Isa 60:17; Dan 2:32; 1Co 3:12.