TOPASYO

Ang matang sa topasyo nga gigamit alang sa mga mutya maoy usa ka gahi, sihag, samag-kristal nga mineral nga gilangkoban sa aluminum fluosilicate. Mas gahi kini kay sa kuwarso ug sagad nga makaplagan sa mga lungag sa mga batong graniso. Ang ubang topasyo walay bulok, apan ang uban adunay nagkadaiyang mga bulok nga naglakip sa puti, dalag, hayag nga kape, pulahon, ug usahay sa lusparong berde o asul. Ang labing popular niini mao ang samag-bino nga pagkadalag. Ang ngalang topasyo naggikan sa Gregong pulong nga to·paʹzi·on, nga nagtumong sa Pulo sa Topaz nga nahimutang sa Pulang Dagat diin nakuha sa mga Grego ang mga topasyo nga pamilyar kang Pliny nga Magulang ug sa ubang unang mga magsusulat. Gilangkit sa basahon ni Job ang topasyo ngadto sa Cus, usa ka rehiyon nga maoy utlanan sa Pulang Dagat.

Ang topasyo maoy usa sa bililhong mga bato diha sa “tabon sa dughan sa paghukom” nga gisul-ob sa Hataas nga Saserdoteng si Aaron. Kini nga bato gipahimutang diha sa tunga sa unang laray sa mga mutya, ug gikulit diha niini ang ngalan sa usa sa 12 ka tribo sa Israel. (Ex 28:​2, 15, 17, 21; 39:10) Ang mga pundasyon sa “balaang siyudad, ang Bag-ong Jerusalem, nga nanaog gikan sa langit gikan sa Diyos . . . gidayandayanan sa tanang matang sa bililhong mga bato,” diin ang ikasiyam nga pundasyon mao ang topasyo.​—Pin 21:​2, 19, 20.