URIAS

[Ang Akong Kahayag Mao si Jehova].

1. Ang Hitihanon nga bana ni Bat-seba. Si Urias maoy usa sa langyawng mga manggugubat ni David. (2Sa 23:39; 1Cr 11:41) Ang iyang mga pulong, panggawi, kaminyoon sa usa ka Hudiyong babaye, ug pagpuyo sa Jerusalem duol sa palasyo sa hari tanan nagpasabot nga siya misagop sa pagsimba kang Jehova nga Diyos ingong usa ka tinuling kinabig.​—2Sa 11:​3, 6-11.

Samtang si Urias nakiggubat sa Ammon didto sa Raba, si David nakapanapaw sa iyang asawa nga si Bat-seba nga wala hisayri ni Urias. Dayon gipasugoan ni David si Urias nga paadtoon sa Jerusalem, ug unya ang hari nangutana kaniya bahin sa lakaw sa gubat ug gisugo siya nga mopauli sa iyang balay aron ang ipanganak sa iyang asawa ingnon nga iya ni Urias. Apan, midumili si Urias sa pagpauli tungod kay ang kasundalohan atua sa panggubatan. (Deu 23:9-11; itandi ang 1Sa 21:5.) Bisan pag gihubog siya ni David, siya midumili gihapon sa pagkatulog didto sa iyang balay. (2Sa 11:1-13) Unya ang sala ni David batok kang Urias nadugangan, tungod kay si David nagpadala kaniya pagbalik ngadto sa gubat ug nagsugo kang Joab nga iyang maniobrahon nga mamatay si Urias sa pagpakiggubat.​—2Sa 11:14-26.

2. Usa ka saserdote nga nakasaksi sa pagsulat ni Isaias sa ngalan sa iyang anak nga lalaki nga si Maher-salal-has-baz diha sa usa ka papan. (Isa 8:​1, 2) Ang ngalan ni Urias diha sa ubang teksto giespeling nga Uriyas.​—2Ha 16:10; tan-awa ang URIYAS Num. 1.

3. Lagmit usa ka saserdote, usa nga mibarog sa tuong kiliran ni Esdras sa dihang iyang gibasa ang Balaod ngadto sa nahibalik nga mga destiyero nga nagkatigom sa Ganghaan sa Tubig didto sa Jerusalem.​—Neh 8:1-4.