Ilang ‘Gitanyag ang Ilang Kaugalingon’ sa Kinabubut-on
USA ka tropikal nga nasod ang Suriname, usa sa kapin sa 200 ka yuta diin dinhi aktibo ang mga Saksi ni Jehova. Dili pa dugay, mibiyahe ang magtiayong misyonero sa Suriname sa 200-milya (320-km) sa dyip sa pagduaw sa minahan sa bauxite ug sa pakigsulti sa mga trabahante didto mahitungod sa katuyoan sa Diyos. Nakakita sila ug dakong kaikag.
Diha sa ilang unang paghunong, ang manedyer sa kampo miingon: “Malipay ako sa pagdawat kaninyo dinhi. Nagkinahanglan gayod kami ug sama niini.” Dayon dihay iyang gipaskin sa kapiterya nga usa ka anunsiyo sa pakigpulong sa Bibliya ug sa pasundayag sa slide nga himoon nianang gabhiona sa alas 7:30. Sa dihang miabot ang takna, 70 ka tawo ang mitungha ug namati pag-ayo sa pakigpulong kon unsaon sa pagkuhag kahibalo bahin sa Diyos pinaagi sa kalalangan ug pinaagi sa Bibliya, ug dayon nanan-aw sila sa piniling mga slide nga nagpakita sa tibuok kalibotang buluhatong pagsangyaw.
Human niana gipailaila sa mga misyonero ang nagkalainlaing mga publikasyon nga makatabang sa tumatambong nga makabaton ug dugang impormasyon. “Gusto ko ug libro,” miingon ang usa ka tigulang nga lalaki, nga mipaingon sa atubangan. Kadto maoy signal sa uban. Dayon ang mga suplay sa mga misyonero nahurot, ug midalidali ang bana sa pagsakay sa dyip sa pagkuhag bag-ong suplay, samtang ang asawa okupadong nagsulat sa direksiyon niadtong buot nga magpaduaw.
Mao kana ang unang gabii sa ilang panaw. Mipalabay ang misyonerong magtiayon ug usa ka semana sa maong dapit, nakakaplag ug samang kalamposan bisan asa sila moadto. Ang ilang eksperiyensiya maoy kapahayagan sa dakong tinguha nga naglungtad gihapon diha sa kadaghanang mga kasingkasing sa pagpamati sa kamatuoran ug sa pagkakat-on sa kabubut-on ni Jehova. Kana maoy sa pagtagbaw nianang tinguha nga ginatanyag sa kaliboang mga Saksi ni Jehova sa panahon niining kataposang mga adlaw aron mapadala sa mga kanasoran sama sa Suriname sa pagtabang sa lokal nga mga Saksi sa pag-atiman sa tanang interes. Busa ilang natuman ang saad sa salmista: “Ang imong katawhan motanyag sa ilang kaugalingon sa kinabubut-on sa adlaw sa imong militaryong gahom.” (Salmo 110:3) Ug si Jehova madagayaong nagapanalangin kanila niana.
Buot ba nimong makigbahin niana nga panalangin nga ilang ginatagamtam? Tingali motubag ka: ‘Apan dili gayod ako mahimong misyonero!’ Ug tingali tinuod kana. Apan bisan pa niana, tingali usa na ikaw sa daghan kinsa nakahimog hinungdanong bahin sa katingalahang mga kasinatian nga ginatagamtam sa mga misyonero sa tibuok kalibotan. Sa unsa nga paagi?
‘Ihatag Kini sa mga Misyonero’
Gihimo kana sa batan-ong babaye nga ginganlag April. Dili, dili misyonero si April, tingali sa umaabot nga panahon siya mahimong usa. Apan nianang gutloa bata pa kaayo siya sa pagbiyahe sa langyawng nasod ug sa pagbaton ug makaikag nga mga kasinatian. Apan bisan pa niana, buot siyang mahimong bahin nianang tanan, busa misulat siya sa mga hedkuwarter sa Watchtower Society sa Brooklyn: “Dihay mihatag kanakog usa ka dolyar diha sa sirkitong asambliya. Buot nakong ihatag kini ngadto kaniyo aron inyong ihatag kini sa mga misyonero sa pagtabang kanila sa pagtudlo sa mga tawo mahitungod kang Jehova.” Busa, sa hinungdanon kaayong paagi, ang gamayng April nakahimog bahin sa tibuok kalibotang misyonerong buluhaton. Siya nakaamot gikan sa iyang mga kahinguhaan sa pagtabang sa pagpalakaw niana.
Laing sulat miabot gikan sa usa nga mas gulanggulang kay kang April. Siya misulat: “Gisukip ko ang tseke nga $100 aron magamit sa buluhaton sa Gingharian. Kini maoy gasa nga gihatag kanako, busa akong gipasa kini kaninyo . . . Ang pagpayunir nahimo nang bahin sa akong kinabuhi sulod sa 46 ka tuig. Apan, hapit na akong mag-90 ug kinahanglan akong maghinayhinay.” Kining matinud-anon, dugay nang panahong alagad ni Jehova dili makahimo sa misyonerong pag-alagad. Apan buot siyang makigbahin, ug iyang gihimo kini pinaagi sa pag-amot sa pinansiyal nga paagi.
Kining duha ka sulat nagpasiugda sa laing paagi diin ang katawhan ni Jehova ‘mitanyag sa ilang kaugalingon sa kinabubut-on sa adlaw sa militaryong gahom.’ Ilang natuman ang tambag sa proverbio sa Bibliya: “Pasidunggi si Jehova sa imong bililhong mga butang ug sa unang mga bunga sa tanan nimong abot.” (Proverbio 3:9) Tungod sa usa ka katarongan o sa lain, dili sila makahimo sa pagtanyag sa ilang kaugalingon sa pisikal sa samang sukod nga mahimo sa uban. Apan, nakaamot sila sa ilang “bililhong mga butang” ug busa nakatabang sa pahimo niini nga posible alang sa uban sa pagbuhat sa ingon. Sa nangaging panahon, ang maong kinabubut-ong paghatag nagpakitag hinungdanong mga prinsipyo. Atong susihon kon unsa kining mga prinsipyoha, ug kon kini ba sila bililhon gihapon karon.
Ang Ilang “mga Kasingkasing Nag-aghat Kanila”
Sa panahon ni Moises dihay trabaho nga pagabuhaton. Kinahanglan nga tukoron ang tabernakulo aron mahimong sentro sa tinuod nga pagsimba sa nasod sa Israel. Ang kuwalipikadong mga Israelitas gidapit sa pag-amot sa ilang panahon ug abilidad sa buluhaton sa pagtukod. (Exodo 35:10) Ug gidapit ang tanan sa pag-amot sa ilang materyal nga mga kabtangan aron sa paggasto niana. Ang resulta: hilabihan kadaghang kontribusyon, sobra pa kay sa gikinahanglan. Ug takos tagdon nga ang maong kontribusyon gihatag sa mga mainandamon ug kasingkasing. Ang rekord nagtug-an kanato nga ang ilang “mga kasingkasing nag-aghat kanila,” ang ilang “mga kasingkasing nagpukaw kanila.” Oo, ang ilang kontribusyon maoy kapahayagan sa pagtuo kang Jehova ug kapahayagan sa pagsuportar sa katuyoan sa tabernakulo—tinuod nga pagsimba.—Exodo 35:20-29; 36:4-7.
Sa mga adlaw ni Ezekias, laing buluhaton ang kinahanglang taposon. Napasagdan sa dugayng katuigan, ang templo kinahanglang hinloan ug ang mga tawo matudloan sa pagtahod sa kasugoan ni Jehova. Gipahibalo ang mga Israelitas sa panginahanglan sa materyal nga mga amot “aron nga [ang mga saserdote ug mga Levihanon] hugot nga magpabilin sa kasugoan ni Jehova.” (2 Cronicas 31:4) Ang pagsanong sa katawhan labihan kaayo ka madasigon nga tungod niana ang hataas nga saserdote si Azaria miingon: “Si Jehova mismo ang nagapanalangin sa iyang katawhan.”—2 Cronicas 31:10.
Busa, ang kinabubut-ong paghatag sa mga Israelitas maoy kapahayagan sa ilang maayong kondisyon sa kasingkasing ug sa ilang pagpaluyo sa tinuod nga pagsimba, maingon man usab sa panalangin ni Jehova diha kanila. Apan komusta ang situwasyon karon?
Gipanalanginan ni Jehova ang Iyang Katawhan
Buweno, karon adunay tagsaong buluhaton nga pagahimoon. Si Jesus mitagna: “Kining maayong balita sa gingharian igawali sa tanang pinuy-anang yuta sa pagpamatuod sa tanang kanasoran; ug unya moabot ang kataposan.” (Mateo 24:14) Gitagna usab sa Bibliya nga kining buluhatong pagsangyaw pagaubanan sa buluhatong pagpanudlo ug sa pagtigom sa tinuod nga mga magsisimba. (Isaias 2:3, 4; 54:13; Zacarias 8:23; Mateo 28:19, 20; Pinadayag 7:9) May bahin ba ang kontribusyon niini nga buluhaton?
Oo. Pananglitan, aron mapadala ang misyonero sa Watchtower Bible School of Gilead ug sa pagsustento kaniya didto sa panahon sa maong kurso, ug dayon ipadala sila ngadto sa nasod sama sa Suriname ug sa pagsustento kaniya didto sa pipila ka tuig, nagkinahanglag libolibong dolyares. Apan ang Sosyedad sa Watchtower nagpadalag kapin sa 6,000 ka misyonero sukad sa unang gibuksan ang tunghaang Gilead.
Sa pagkamatuod, kini maoy bahin lamang sa galastohan may kalabotan sa pagsangyaw sa maayong balita. Anaa usab ang sirkito ug distritong mga magtatan-aw ug ang ilang mga asawa, ug ang mga trabahante sa puloy-anang Bethel sa Sosyedad, kansang mga pribelihiyo sa pag-alagad nakapugong kanila sa pagsuportar sa kaugalingon sa sekular nga buluhaton. Anaa usab ang mga espesyal payuner kinsa nakadawat ug pinansiyal nga tabang aron makahimo sila sa pag-alagad sa malisod nga mga teritoryo. Apan kana maoy sustento lamang alang sa mga trabahante!
Dugang pa sa galastohan sa bag-ong imprintahanan ug sa kasangkapan sa pagbugkos sa mga libro, maingon man usab sa galastohan sa bag-ong pasilidad sa Bethel nga ginatukod sa tibuok kalibotan, lakip sa mga Assembly Hall ug libolibong bag-ong mga Kingdom Hall. Hinumdomi, usab, ang “tago” nga mga galastohan, sama sa regular nga pagbuson sa mga sulat nga gisulat ngadto sa kapin sa 46,000 ka kongregasyon, ug ang pagpatik sa daghang mga porma ug mga dokumento nga hinungdanon sa teokratikanhong organisasyon. Karon imong maamgohan ang hilabihan ka dakong salapi ang gigasto matag tuig sa pagsangyaw sa “maayong balita” ug sa pagsegruo nga ang “karnero” adunay mga dapit nga katigoman ug espirituwal nga pagkaon nga tagamtamon.
Ang katingalahang butang mao nga si Jehova ang nagpahimo niini nga posible. Sa unsang paagi? Sa kinadak-an, pinaagi sa pagpalihok sa mga kasingkasing sa mga tawo sa paghatag kinabubut-ong mga kontribusyon. Busa, ang tagsatagsa ka indibiduwal mohatag mga donasyon nga kuwarta—maingon man usab sa pagdonar sa ilang panahon ug kusog—sa pagsuportar sa lokal nga mga proyekto sama sa mga Kingdom Hall ug mga Assembly Hall. Daghang mga kongregasyon nagpadalag regular nga kontribusyon sa Sosyedad sa Watchtower o,sa gawas sa Tinipong Bansa, ngadto sa sangang opisina sa ilang nasod. Kasagaran mohatag usab ang mga indibiduwal ug mga mga kontribusyon sa nagkalainlaing paagi direkta sa Sosyedad. (Tan-awa ang kahon.) Ang resulta? Bisan niining malisod nga panahon sa ekonomiya gipalihok ni Jehova ang mga kasingkasing sa iyang katawhan sa paghatag sa kon unsay gikinahanglan aron sa pagtapos sa buluhaton nga iyang gisugo.
Unsang konklusyon ang atong makuha gikan niini? Nga, sama sa mga adlaw ni Ezekias, “si Jehova nagapanalangin mismo sa iyang katawhan.” Iyang gipakita ang iyang pagpaluyo sa katingalahang paagi sa buluhaton nga ilang ginahimo. Lain pa, samtang gipaluyohan sa katawhan ni Jehova ang iyang kahikayan sa mga adlaw ni Moises, atong makita nga karon ang mga katawhan ni Jehova maoy 100 porsiento nga nagpaluyo sa buluhaton sa pagsangyaw sa maayong balita sa Gingharian sa Diyos ug sa pagtigom sa mga interesado. Sila miamot, dili tungod kay sila gipakigpulongan sa propesyonal nga mga tigpangayog amot, kondili tungod kay ang ilang mga kasingkasing maoy “nagpukaw kanila,” oo, “nag-aghat kanila.”
Si Jehova ‘Nagapadayon Niini Ngadto sa Pagkatapos’
Sa unang siglo nakigbahin si apostol Pablo sa buluhatong misyonero ug nakabaton ug katingalahang mga eksperyensiya—nga kaamgid nianang sa magtiayong misyonero sa Suriname. Siya, usab, sagad gisuportahan pinaagi sa mga kontribusyon sa iyang isigkamagtutuo. Ang usa ka kongregasyon nga ilabinang matinabangon mao kanang usa sa Filipos. Busa, sa dihang nagsulat kanila, napukaw si Pablo sa pagbungat niining mga pulonga: “Ginapasalamatan ko ang akong Diyos diha sa tanan kong paghandum kaninyo, sa tanan kong pagpangamuyo alang kaninyong tanan, ako sa kanunay magaampo uban sa kalipay, nga mapasalamaton tungod sa inyong amot sa pagpakaylap sa maayong balita sukad pa sa sinugdanan nga adlaw hangtod niining gutloa. Kay ako masaligon nga siya nga nagsugod ug maayong buhat diha kaninyo magapadayon niini ngadto sa pagkatapos hangtod sa adlaw ni Jesu-Kristo.”—Filipos 1:3-6; 4:16.
Ang mga Kristohanon, karon, nadasig usab sa ingon. Tinuod sumala sa saad ni Jehova, iyang gipalihok ang iyang katawhan sa “pagtanyag sa ilang kaugalingon sa kinabubut-on” sa nagkalainlaing paagi diha sa iyang pag-alagad. Busa ang mga Saksi ni Jehova ‘mapasalamaton kanunay sa ilang Diyos’ ug masaligon nga si Jehova nga maoy mipatungha niining maayong espiritu diha sa iyang modernong adlawng katawhan, magapadayon sa iyang buluhaton hangtod sa pagkatapos.
[Kahon sa panid 24]
Kon sa Unsang Paagi Miamot ang Uban sa Buluhaton sa Gingharian
Gasa: Ang ubang mga indibiduwal mohatag ug direktang mga gasa ug mga donasyon sa Watch Tower Bible and Tract Society of Pennsylvania, o sa sangang opisina sa nasod nga ilang gipuy-an. Ang maong mga gasa kinahanglang ubanan ug mubong sulat nga magpahayag nga ang katuyoan sa salapi maoy kinabubut-ong donasyon.
Mga Gasa nga may Linain nga mga Tagana: Ilalom niining kahikayana, ang mga indibiduwal makahatag ug kuwarta nga may linaing kahikayan nga kon ugaling gamiton nila ang uban niini o ang tanan niini sa panahon sa ilang kinabuhi, kini iuli ngadto kanila. O, aron malikayan ang gasto ug ang pagkawalay kasegurohan sa testamento, mohatag ang ubang tawo sa Sosyedad ug stocks, bonds o mga propidad nga yuta. Ang uban nga mihimo niini nga gasa, magtipig mga katungod alang sa ilang kaugalingon.
Seguro: Gihimo sa kadaghanan ang Watch Tower Society nga maoy binlan sa ilang polisa sa seguro sa kinabuhi.
Testamento: Ang uban, pinaagi sa tabang ug tambag sa ilang mga abogado, gihimo ang Sosyedad nga maoy binlan sa ilang mga testamento.
Mahimong makuha ang dugang impormasyon o tambag bahin sa maong butang pinaagi sa pagsulat sa lokal nga sangang opisina sa Sosyedad, o sa mosunod nga direksiyon: Watch Tower Bible and Tract Society of Pennsylvania, Office of the Secretary and Treasurer, 25 Columbia Heights, Brooklyn, New York 11201.
[Hulagway sa panid 23]
Kinabubut-ong nagtabang ang katawhan ni Jehova sa pagpalambo sa Gingharian