Dawata ang Tabang sa Diyos sa Pagbuntog sa Tagong Kasal-anan

“Ako adunay kusog alang sa tanang butang tungod kaniya nga nagapalig-on kanako.”—FILIPOS 4:13.

1. Unsay gihangyo sa usa ka nabalakang amahan?

PATULON ang batang lalaki.a Nagbulabula ang iyang baba, ug kombulsiyonon, ug usahay mahulog sa tubig o sa kalayo. Midangop ang iyang nasubong amahan sa tawong iladong makaayo sa mga masakiton. Sa nakitang kulang siya sa pagsalig sa katakos niadtong tawhana, ang amahan misinggit: “May pagtuo ako! Tabangi ako sa kakulangan ko sa pagtuo!”

2. Sa unsang paagi makatino kita nga nagtinguha ang Diyos sa pagtabang kanato sa pagbuntog sa atong mga kasal-anan?

² May makat-onan kita gikan niining amahana nga nangayog tabang kang Jesus. Miadmiter ang tawo nga kulang ang iyang pagtuo; nahibalo usab siya nga may tinguha si Jesus sa pagtabang. Mahimong mahitabo usab kana kanato, samtang atong atubangon ang atong kaugalingong mga kasal-anan—bisan sa mga tagong kasal-anan—ug maningkamot sa pagbuntog kanila. Makasalig kita nga may tinguha ang Diyos sa pagtabang kanato, sama nga mitabang siya sa uban sa nangaging panahon. (Itandi sa Marcos 1:40-42.) Siya, pananglitan, mitabang kang apostol Pablo sa pagbuntog sa mga kasal-anan nga miresulta tungod sa pagbaton ug dagayang mga butang o sa dakong panginahanglan. Tingali mangandoy ang tawong pobre ug bahandi; ang kapakyasan tingali sa adunahang tawo mao ang iyang mapagawalong pagsalig sa kalamposan ug sa pagtamay sa mga kabus. (Job 31:24, 25, 28) Sa unsang paagi gibuntog ug gilikayan ni Pablo kining mga kasal-anana? Siya miingon: “Ako adunay kusog alang sa tanang butang tungod kaniya nga nagapalig-on kanako.”—Filipos 4:11-13.

3. Nganong maalamon alang kanato ang pagsulay sa pagbuntog sa atong mga kahuyangon?

³ Pinaagi sa pagsalig sa gahom sa Diyos, maalamon kita sa pagpakigbisog sa pagdaog sa atong mga kasal-anan, dili kay dili sila tagdon tungod kay sila sa karon natago. Ang salmista miingon bahin kang Jehova: “Siya nasayod sa mga tinago sa kasingkasing.” (Salmo 44:21) Kon dili nato buntogon ang atong mga kasal-anan, motungha ra sila nga moresultag dakong kadaot kanato. Ang prinsipyo aplikado: “Ang mga sala sa pipila ka tawo dayag sa tanan, nga motultol sa paghukom, apan ang mga sala sa uban mapadayag ra sa kaulahian.” (1 Timoteo 5:24) Atong susihon ang duha ka komung kasal-anan nga kinahanglang hatagan ug pagtagad sa mga Kristohanon nga nagtinguha sa pagpahimuot kang Jehova.

Tagong Kasal-anan May Kalabotan sa Seksuwal nga Kailibgon

4, 5. (a) Unsang timbang nga panglantaw ang gipadayag sa Bibliya bahin sa seksuwal nga kailibgon? (b) Unsang mga pasidaan ang atong makita sa Kasulatan mahitungod sa seksuwal nga kailibgon?

⁴ Ang usa sa labing maayong gasa sa Diyos mao ang kaminyoon, lakip sa katakos ug sa kailibgon sa pagsanay. (Genesis 1:28) Kinaiyanhon ug mahinlo ang kapahayagan sa seksuwal nga kailibgon sa relasyon sa kaminyoon. Giawhag sa Bibliya ang pagpangitag seksuwal nga kalipayan diha lamang sa usa nga kapikas. (Proverbio 5:15-19) Apan, kinahanglang pugngan ang seksuwal nga gana. Ingong pagtandi, tagda ang atong gana sa pagkaon. Ang atong pagkabaton ug maayong gana sa pagkaon wala magpasabot nga ugmaron nato ang dili tukmang pangibog sa pagkaon, o nga dili kita kinahanglang magpugong kon kanus-a, diin, ug kon unsaon nato sa pagkaon.—Proverbio 25:16, 27.

⁵ Tingali minyo sa miagi si Pablo, ug siya nasayod nga maayo ang normal seksuwal nga kapahayagan tali sa mga magtiayon. (1 Corinto 7:1-5) Busa lain ang iyang gipasabot sa misulat siya: “Busa, patya ninyo, ang sangkap sa inyong lawas nga anaa sa yuta may kalabotan sa pakighilawas, kahugawan, seksuwal nga gana, daotang tinguha, ug kaibog.” (Colosas 3:5) Hayan ang iyang gipasabot mao ang seksuwal nga mga kapahayagan nga gawas sa tukmang kahimtangan ug paagi sa kaminyoon. Ang apostol miingon usab: “Ang matag usa kaninyo kinahanglang masayod kon unsaon sa pagkontrolar sa iyang kaugalingong sudlanan sa kadungganan ug himaya, dili sa maibogong seksuwal nga gana.” (1 Tesalonica 4:4, 5) Kining prangka, dinasig nga tambag mapuslanon alang sa minyo ug dili minyong mga Kristohanon.

6. Nganong tukmang likayan sa mga Kristohanon ang pag-abuso sa kaugalingon?

⁶ Ang usa ka paagi nga ginahimo kining “kaulag sa lawas” (1 Tesalonica 4:5, The New Testament for English Readers, ni Henry Alford) mao ang pagkupay sa iyang [lalaki o babaye] kaugalingong kinatawo aron bation ug kalalim. Gitawag kinig masturbasyon, o pag-abuso sa kaugalingon. Komun kini taliwala sa dili minyong mga lalaki ug babaye. Apan ginahimo usab kini sa daghang minyong mga tawo. Ang pagkakomun niini miagak sa daghang mga doktor sa pag-ingon nga normal kini ug may kaayohan pa ngani. Apan, kining buhata supak sa tambag sa Diyos batok sa “maibogong seksuwal nga gana.” Mas atong masabtan kana kon ngano, ug nganong kinahanglang sumpoon sa mga Kristohanon ang batasan, pinaagi sa paghatag pagtagad sa pipila ka tambag nga gihatag ni Jesus.

7. Unsang dugang katarongan ang gihatag sa Mateo 5:28 bahin sa paglikay sa masturbasyon?

⁷ Si Jesus miingon: “Ang si bisan kinsa nga motan-aw sa babaye aron bation ug kaibog kaniya nakapanapaw na kaniya sulod sa iyang kasingkasing.” (Mateo 5:28) Siya nasayod nga ang maibogong mga hunahuna sa pagpanapaw sagad moresulta ug imoral nga mga buhat. Apan, bisan kadtong matugoton sa masturbasyon miadmiter nga kanunayng malangkit niini ang seksuwal nga mga handurawan. Human naghisgot sa “paghanduraw [sa mga batan-on] sa kalalim nga idulot sa masturbasyon,” ang librong Talking With Your Teenager midugang: “Tingali sila maghanduraw sa ilang kaugalingon ug mahilayng seksuwal nga mga situwasyon o nga may kaparis sa samang sekso o kaparis sa edad-edarang mga tawo sama sa mga magtutudlo, mga paryente, bisan [mga ginikanan]. Tingali maghanduraw silag seksuwal nga kapintasan. Normal kining tanan.” Apan tinuod ba kini? Maisip bang “normal” sa mga Kristohanon ang ingon niini nga mga handurawan ug masturbasyon sumala sa kahayag sa pasidaan ni Jesus bahin sa ‘panapaw sa kasingkasing’ o sa tambag ni Pablo batok sa “maibogong seksuwal nga gana”? Dili, kining mga handurawana ug pag-abuso sa kaugalingon—kon himoon man sa batan-on o edad-edaran, sa dili minyo ug sa mga minyo—kinahanglan gayod nga buntogon.

Pagbuntog Niining Tagong Kasal-anan

8, 9. Ang pagsabot sa unsang kamatuoran ang makatabang sa tawo sa pagbuntog sa batasan sa masturbasyon?

⁸ Kon ang Kristohanon adunay ingon niining tagong kasal-anan, unsay iyang buhaton aron sa pagbuntog niini, “sa pagkontrolar sa iyang kaugalingong sudlanan sa kadungganan ug himaya”? (1 Tesalonica 4:4) Pinaagi sa iyang Pulong, naghatag ang Diyos ug bililhong tabang.

⁹ Una hinungdanong mahibalo nga adunay mga sukdanan si Jehova. Gitin-aw niya ang pagkadaotan sa relasyon sa sekso gawas sa kaminyoon, sa pakighilawas ug panapaw. (Hebreohanon 13:4) Busa, kon nagtuo kita nga ang iyang mga paagi mao ang labing maayo, mangita kitag makatagbawng mga balos sa seksuwal nga kapahayagan sulod lamang sa kaminyoon. (Salmo 25:4, 5) Ang librong Adolescence, ni E. Atwater, nagpunting niana bahin sa masturbasyon, nga ang mga batan-on sagad magpakitag ‘kahilom, kaulaw ug mga pagduhaduha.’ Ang usa sa katarongan nga gihatag mao nga ‘ang pagkasuod sa relasyon sa gugma nga nagauban sa pakigsekso maoy nakulang diha sa masturbasyon.’ Oo, adunay kaayohan sa pagkontrolar sa seksuwal nga kailibgon hangtod nga ikapahayag kini diha sa mahigugmaong mga relasyon sa kaminyoon.

10. Unsang ubang mga lakang ang mahimong himoon sa tawo aron matabangan siya sa pagbuntog ning batasana?

¹⁰ Ang Pulong sa Diyos naghatag dugang tabang pinaagi sa pagtambag: ‘Bisan unsang butang tinuod, bisan unsang butang maugdang, bisan unsang butang matarong, bisan unsang butang maputli, bisan unsang butang maayong pamation ug kon aduna may pagkadalayegon, palandonga ninyo kining mga butanga.’ (Filipos 4:8) Sa matin-aw, ang makapukaw sa sekso nga mga hulagway ug imoral nga mga nobela dili ‘maputli ug dili maayong pamation o dalayegon.’ Apan kining mga butanga maoy ginapangita sa mga tigmasturbar. Busa, ang tanan nga determinado sa pagbuntog niining kasal-anana, kinahanglang bug-os nga maglikay sa makapukaw sa sekso nga materyal. Napamatud-an sa nangagi nga kon ang pangibog sa tawo mapukaw padulong sa pagkagana sa sekso nga miresulta sa miagi ug masturbasyon, ang matinguhaong pagtagad kon unsa ang matarong ug maputli makakalma sa mga kailibgon. Ilabinang hinungdanon kini kon mag-inusara ang tawo diha sa kangitngit, sa dinha ang tagong kasal-anan sa pag-abuso sa kaugalingon kasagaran.b—Roma 13:12-14.

11. Ibatbat ang dugang mga butang nga nakitang mapuslanon sa pagbuntog niining kasal-anana?

¹¹ Ang laing tabang mao ang pagpabiling aktibo, kaharmoniya sa tambag: “Pagbantay kamo sa inyong paggawi dili ingong buangbuang kondili ingong mga maalamon, nga magapalit sa panahon, tungod kay daotan ang mga adlaw.” (Efeso 5:15, 16) Pangutanag mga sugyot sa hamtong nga Kristohanon nga kasaligan bahin sa positibong mga butang nga buhaton. (Isaias 32:2) Ang kadaghanan nga nakabuntog niining kasal-anana miadmiter nga ang ilang pagkahibalo nga adunay usa nga matinagdanong Kristohanon nga mosusi kanila sa ilang kauswagan makatabang kanila sa pag-ugmad ug pagpugong sa kaugalingon. Sa pagkatinuod, ang Usa nga himoon natong labing suod nga kasaligan mao si Jehova. Busa hinungdanon gayod ang pagdangop kaniya diha sa pag-ampo, sa pagpangayo sa iyang tabang. (Filipos 4:6, 7) Kon ang usa nga nakigbisog niini nga kasal-anana “mapandol” sa usa ka higayon, makapangayo siya sa Diyos ug kusog, dayon makahimo siya sa pagbag-o sa iyang mga paningkamot ug tingali molampos sa makausa pa, sa mas hataas nga panahon.—Hebreohanon 12:12, 13; Salmo 103:13, 14.

Pagpakig-away Batok sa Pag-abuso sa Alkohol

12. Unsa ang Kristohanong panglantaw bahin sa alkoholikong mga ilimnon?

¹² ‘Ang bino makalipay sa Diyos ug sa tawo,’ miingon ang usa ka bersikulo sa Bibliya. (Maghuhukom 9:13) Tingali mouyon ka, nga ang alkoholikong mga ilimnon nakatabang sa paglingawlingaw ug tuboran sa kalipay sa kadaghanan. (Salmo 104:15) Apan, dili makalimod ang uban, nga ang paggamit sa alkohol mohatag ug pisikal ug moral nga mga kapeligrohan. Ang pangunang problema mao ang tuman nga pagkapalahubog. Seryoso kining kasal-anana nga nagpasidaan ang Diyos nga ang mga palahubog ipalagpot sa kongregasyon ug dili makasulod sa Gingharian. (1 Corinto 5:11-13; Galacia 5:19-21) Nasayod ang mga Kristohanon niini ug mouyon nga kinahanglang maglikay sila nga dili mahubog. Apan, gawas sa pagkahubog, sa unsang paagi ang paggamit sa alkohol mahimong tago nga kasal-anan?

13. Ipatin-aw kon sa unsang paagi ang pagsalig sa alkohol maugmad.

¹³ Mahimong kasarangang moinom ang Kristohanon, apan sa gihapon adunay seryosong kasal-anan. Tagda ang eksperyensiya sa usa ka tawo nga atong tawgong Heinz.

Siya, ang iyang asawa, ug mga anak nahimong tinuod nga Kristohanon ug aktibo kaayo sa lokal nga kongregasyon. Sa ulahi si Heinz natudlo ingong ansiano ug gilantaw ingong ‘haligi’ sa mga kongregasyon sa siyudad. (Galacia 2:9) Masabot, iyang giatubang ang kapit-osan sa pag-atiman sa iyang pamilya ug ubang kabalaka sa pag-atiman sa panon. (2 Corinto 11:28) Apan, ang iyang trabaho, mihatag kaniyag dakong kapit-osan tungod kay ang kompaniya nga iyang gitrabahoan nagkadako, ug gisaligan siya sa iyang amo nga iyang atimanon ang daghang mga problema ug mga desisyon.

Daghang mga gabii nga dili mahimutang si Heinz. Iyang nakita nga ang pag-inom ug diyutay makatabang kaniya sa pagrelaks. Sa pagkamatuod, sanglit hamtong nga Kristohanon mainampingon gayod niyang gilikayan ang sobrang pag-inom o paghuboghubog. Bisag moinom siyag diyutay sa gabii aron makarelaks, dili siya magpangitag alkohol sa panahon sa adlaw, ug dili usab siya moinom sa panahon sa pangaon. Dili siya ilado nga ‘tig-inom ug daghang bino.’—1 Timoteo 3:8.

Sa wala damha naospital si Heinz sa usa ka komung operasyon. Mitungha ang tagsaong mga simtoma. Unsay nakaingon kanila? Wala magdugay ang mga doktor sa pagtino nga nag-antos si Heinz sa mga epekto sa pagkagiyan. Oo, nagpangitag alkohol ang iyang lawas. Nakurat niini ang pamilya, apan mitabang sila sa pagpasig-uli kaniya ug mipaluyo sa iyang desisyon sa paglikay sa alkohol sa bug-os.

14. Unsay motultol sa pagkahimong mabiaybiay tungod sa alkoholikong mga ilimnon?

¹⁴ Namatikdan sa uban nga ang alkohol adunay tagsaong bahin sa ilang kinabuhi, busa maningkamot sila sa pagtago sa ilang pag-inom, dili buot nga mahibaloan sa pamilya ug mga higala kon pila ang ilang mainom ug unsa ka sunson. Tingali dili bation sa uban nga wala sila magsalig sa alkohol, apan, ang pag-inom nahimong dugokan sa ilang adlaw. Bisan hain pa sila niining kategoriyaha may dakong kapeligrohang makainom sila ug sobra sa pipila ka okasyon o mahimong tagong mga alkoholiko. Tagda kining sambingay: “Ang bino maoy usa ka tigbiaybiay, ang maisog nga ilimnon mao ang sabaan, ug ang si bisan kinsa nga magpahisalaag dili maalamon.” (Proverbio 20:1) Ang punto mao nga ang pag-inom ug sobra ka daghan makahimo sa tawo nga sabaan ug kataw-anan. Apan, ang bino makapasipala sa tawo sa laing diwa. Ang tawo takos nga mabiaybiay kon naghunahuna siya nga natago ang iyang pag-inom gikan sa Diyos.

15. Unsay kalabotan sa mga pulong ni Pablo sa 1 Corinto 9:24-27 bahin sa paggamit sa Kristohanon sa alkohol?

¹⁵ Ang usa sa mga bunga sa espiritu sa Diyos mao ang pagpugong sa kaugalingon, ug kita nagkinahanglan niana sa tanang bahin sa kinabuhi. (Galacia 5:22, 23) Gipakasama ni Pablo ang Kristohanon sa usa ka magdadagan. Diha sa normal nga lumba ang magdadagan “magpugong sa kaugalingon sa tanang butang” aron lamang “mabatonan ang dili madunot nga purongpurong.” Maingon man, nagkinahanglan ang mga Kristohanon sa “pagpugong sa tanang mga butang” aron makabaton sa ganti nga mas dakog bili—KINABUHI. Gipasiugda ni Pablo nga atong ‘pantonon ang atong lawas ingong ulipon’ aron mapaneguro ‘nga tapos makasangyaw kita sa uban dili kita mahisalikway,’ sama sa tagong kasal-anan may kalabotan sa alkohol.—1 Corinto 9:24-27.

16. Sa unsang paagi makatino ang tawo kon nahimo na bang suliran kaniya ang alkohol?

¹⁶ Unsay makatabang sa Kristohanon sa pagsagubang niining kasal-anana? Maayong masabtan nga bisag makatago ang tig-inom sa iyang buhat gikan sa ubang tawo, dili siya makatago niini sa Diyos. (1 Corinto 4:5) Busa, sa matinud-anon—sa panan-aw sa Diyos—kinahanglang palandongon sa tawo ang iyang batasan sa pag-inom. (Ang among gipasabot mao ang pag-inom sa paglingawlingaw o paggawal, dili kay gamay lamang nga gidaghanon sama sa komung ilimnon uban sa pagkaon.) Apan, ang uban, tingali moingon, ‘Apan dili kinahanglanon kanako ang pag-inom. Lamian lang ako niana; makarelaks kini kanako. Makahunong ako kon gusto ko.’ Buweno, tungod sa mga kapeligrohang makainom ug sobra o sa pagsalig sa alkohol, nganong dili sulayan kini sa usa o duha ka bulan? O, sanglit adunay dakong tendensiya sa paglimod nga adunay suliran, sulayi sa usa ka bulan ang dili pag-inom sa tanang panahon diin normal ang pag-inom. Pananglitan, ang tawong naanad sa pag-inom human sa pagtrabaho, sa dili pa matulog, o sa sosyal nga tigom makalikay sa dili pag-inom. Sa ingon iyang masubay kon unsay iyang bation. Kon malisdan siya, o siya ‘dili makarelaks,’ siya adunay seryosong problema.

17. Nganong kinahanglang maningkamot ang Kristohanong adunay tagong kasal-anan sa alkohol sa pagbuntog niana?

¹⁷ Sa makaamgo ang matinud-anong Kristohanon atubangan sa Diyos nga siya adunay kasal-anan may labot sa alkohol, mas masayon ang pagbuntog niini. Tingali nasayod siya nga ang Bibliya nag-ingon nga ‘ang tawong buangbuang’ mangatarongan ‘nga matam-is ang kinawat nga tubig, ug ang tinapay [o alkohol] nga pagakan-on sa tago—lamian.’ Apan, kini sila, miingon ang Proverbio, modangat nga walay kahimoan diha sa kamatayon. Sa laing bahin, ang maalamong tawo mahigugma sa pagbadlong, ug malipayon siya nga ‘magabiya sa mga walay kasinatian ug makapabiling buhi pinaagi sa paglakaw sa matul-id nga dalan sa pagsabot.’ (Proverbio 9:1, 6, 8, 13-18) Oo, mohatag ang Diyos ug dugang tabang sa pagbuntog sa tagong kasal-anan pinaagi sa pagtugot kanato sa pagkahibalo kon unsay anaa sa unahan, kon unsa unyay dangatan.

Gantihan sa Diyos ang Tagong mga Lihok

18. Samtang atong buntogon ang atong tagong mga kasal-anan, bahin sa unsa nga kita makasalig? (Proverbio 24:12; 2 Samuel 22:25-27)

¹⁸ Ang ubang mga tawo mahadlok nga mahibaloan ang ilang daotang mga buhat, pinaagi sa tawo o sa Diyos. Hinaot nga dili mahitabo ang ingon niini diha kanato. Hinunoa, kinahanglang magkinabuhi kita sa pagkasayod nga dili kita makatago sa mga butang gikan Kaniya, “kay pagadad-on sa tinuod nga Diyos ang tagsatagsa ka buhat ngadto sa paghukom uban ang tagsatagsa ka tinagong butang, maayo o daotan.” (Ecclesiastes 12:14) Atong dawaton ang tabang ni Jehova sa pagbuntog sa atong mga kasal-anan, bisan sa tagong mga kasal-anan. Sa ingon makapaabot kita sa panahon sa dinha “ang tagong mga butang sa kangitngit” mapadayag ug “ang mga katuyoan sa kasingkasing” mabutyag. “Ug unya ang matag usa ka tawo magadawat ug pagdayeg nga gikan sa Diyos.”—1 Corinto 4:5; Roma 2:6, 7, 16.

[Mga footnote]

Makahinumdom Ka Ba?

◻ Unsay bation sa Diyos bahin sa tagong mga kasal-anan nga tingali atong ginahimo?

◻ Unsang Kasulatanhong tambag ang nagpakita nga ang pag-abuso sa kaugalingon kinahanglang likayan?

◻ Sa unsang paagi mabuntog sa Kristohanon ang batasan sa pag-abuso sa kaugalingon?

◻ Sanglit wala man magtunglo ang Bibliya niana, sa unsang paagi ang paggamit sa alkohol mahimong tagong kasal-anan?

◻ Unsang maalamong mga lakang ang mahimong buhaton bahin sa tagong mga kasal-anan may kalabotan sa alkoholikong mga ilimnon?

[Kahon sa panid 17]

Iyang Nabuntog ang Pag-abuso sa Kaugalingon

SA BATA PA, si C——— may normal nga pagbati sa sekso, apan may problema siya. Sa nagpanuigong 13 nabatasan na niya ang pag-abuso sa kaugalingon, sa kasagaran sa pagkatinago diha sa iyang lawak. Naulaw siya niini, apan mibati siya nga wala kini makahatag kadaot sa uban.

Sa miabot siyag 19, misamot kining batasana. Sa usa ka higayon si C——— mikompisal sa iyang pari, apan gisultihan siya nga bisag daotan, dili kini kaayo seryoso. Sa dihang si C——— misulod sa militar, wala siyay pribasiya. Busa, panagsa ra siyang makaabuso sa kaugalingon, nga, sa sulagma, nagpakita nga ang iyang miaging batasan dili maoy resulta sa dili mapugngang pangibog.

Sa pagkagawas sa militar, si C——— mipauli. Misugod siyag pagpalit ug pornograpikong mga magasin ug, napukaw gumikan niini, mibalik siya sa iyang miaging batasan. Sa nag-inusara siya sa pagpuyo, masayon ang pagbaton ug makapukaw sa sekso nga mga materyal. Makadaghan siyang magmasturbar sa usa ka adlaw.

Dayon misugod siya sa pagtuon sa Bibliya uban sa usa ka ministro sa mga Saksi ni Jehova. Sa nakat-onan niya ang kaisipan sa Diyos bahin sa imoralidad, si C——— maulaw sa pagpalit ug pornograpikong mga basahon, ug nagtinguha siya sa pagputol sa batasan sa pag-abuso sa kaugalingon. Iyang gisulayan. Apan human sa usa o duha ka semana iyang bation ang seksuwal nga kapit-osan, ug moagi sa tindahag basahon, ug mapukaw sa imoral nga basahon. Balik sa balay, sanglit iyang gibati nga napakyas siya, maayong magpadayon na lamang siya. Human niana, magbasol siya. Dili na ba gayod siya makahunong sa pagbulag ning daotang batasan?

Sa kataposan si C——— nakigsulti sa usa ka espirituwal nga ansiano sa kongregasyon. Masinabtanon kining ministroha ug gitabangan siya sa pagtan-aw sa binase sa Bibliya nga materyal nga makatabang kaniya sa pagpauswag sa iyang pagpugong sa kaugalingon. Ang ministro miasoy:

‘Handurawa ang tinguha nga mahisamag usa ka talikala. Ang unang likong gamay ug mahuyang. Apan ang matag likong magakadako ug magakalisod. Ingon niana ang pangagda nga moresultag masturbasyon. Busa kinahanglang imong hunongon ang pangagda sa labing madali. Sa magkadugay kini, mas moinit ang imong pangibog. Sa kataposan, dili na kini mapugngan. Oo, sulayi ang pagputol sa talikala sa unang likong. Sa dihang imong mamatikdan nga taliabot ang pangagda, PAGKURIKURI! Bangon ug usba ang imong posisyon, limpiyahi ang imong sapatos, ilabay ang basura—bisan unsang butang aron maputol ang likong. Tingali makasugod ka pinaagi sa pagbasag basahon sa makusog, sama sa Bibliya o Kristohanong publikasyon nga makapaliso sa imong mga hunahuna diha sa mahinlong mga pulong.’

Ginapangutana niining ministroha si C——— diha sa mga tigom kon unsa nay iyang lakat, nagadayeg ug nagadasig kanunay kaniya sa iyang determinasyon. Sulod sa pito ka semana si C——— milampos. Dayon, sa naguol ug nawad-an siyag kadasig tungod sa laing problema, nadaog na usab siya, mipalit ug makapukaw sa sekso nga basahon. Miresulta kana sa iyang pagbalik sa daang batasan. Ang ingon nga hitabo maoy mga kababagan apan gidasig siya sa ministro sa pagpadayon sa pakigbisog. Sa hinayhinay ang mga kal-ang mitaas hangtod sa 9 ka semana, dayon 17 ka semana, ug mitaas pa. Sa anam-anam mitubo ang iyang pagsalig nga makahimo siya sa pagbuntog sa iyang tagong problema.

Sa kataposan si C——— miatubang sa kamatuoran nga nasayod si Jehova sa tanan niyang gibuhat. Busa, kon buot siyang mag-alagad sa Diyos uban sa bug-os hinlong konsensiya, kinahanglang wagtangon kining batasana sa iyang kinabuhi sa bug-os. Ug iyang nahimo kini! Karon dili na gani siya makahinumdom kon unsa na kadto ka dugaya. Ingong usa ka sulondang Kristohanon, si C——— gihatagag kaakohan sa kongregasyon, ug may mga plano siya sa pagpauswag sa iyang pag-alagad sa kadayegan sa Diyos. Lahi na siya nga pagkatawo.