Naglangaylangay ba ang Diyos sa Iyang Paghukom?

HANDURAWA nga nagapaabot ka sa usa ka bisita gikan sa gawas sa lungsod si kinsa nagsulti kanimo sa adlaw sa iyang pag-abot, apan dili sa takna. Sa pag-aginod sa panahon ug wala pa siya moabot, mosugod ka sa paghunahunang siya nalangan. Kini ba ang adlaw nga iyang giingon nga siya moabot? Mahimo kahang kamo wala magkasinabot? Sa inanay, ang butang nga sa sinugdan maoy pagkadili-mapailobon moiway sa butang labi pang makapalagot, butang nga gitawag pagduhaduha.

Kini tingali magbatbat pag-ayo sa gibati sa pila ka tawo mahitungod sa gisaad nga pag-abot sa panahon sa Diyos sa pagtuman sa paghukom batok sa pagkadaotan. Kon buot sabton, ang iyang mga magsisimba dugay nang nagpaabot niana. Tagda, pananglitan, ang matinumanong si Haring David. Kapin sa 3,000 ka tuig sa nangagi siya miingon: “Si Jehova mismo sa imong tuo nga kamot magadugmok sa mga hari sa adlaw sa iyang kapungot. Siya magahukom taliwala sa mga nasod.” Busa si bisan kinsa karong adlawa mabasol ba nga mahibulong, Kanus-a ba?—Salmo 110:5, 6.

Pinaagi sa pagtandi sa mga kahimtang sa kalibotan ngadto sa mga tagna sa Bibliya ug sa pagtagad sa kronolohiya sa Bibliya, ang ugdang nga mga estudyante sa Bibliya nagtuo nga ang adlaw sa paghukom sa Diyos sa kataposan haduol na. Apan dili ba kana ang gibati sa daghang tawo sa nangagi, nga unya ilang nadiskobrehan sa ulahi nga nasayop sila? May tino bang paagi sa pagsusi sa tukma kon kanus-a ipatuman ang paghukom sa Diyos?

Sa “Natudlong Panahon” sa Diyos

Gipaila ni Jesus nga ang paghukom mahitabo sa usa ka tino nga panahon. Apan sa pagpasidaan sa iyang mga sumusunod siya miingon: “Magpadayon kamo sa pagtukaw, kay wala kamo masayod kon kanus-a ang natudlong panahon.”—Marcos 13:33.

Si Habacuc, nga gisugo sa Diyos unom ka siglo kanhi sa pagsulat mahitungod sa pagpatuman sa balaang paghukom, miingon usab nga kini mao unyay “alang sa natudlong panahon.” Ug ingong pasidaan batok sa pagkadili-mapailobon o tingali pagkamaduhaduhaon pa, siya misaad sumala sa sugo sa Diyos: “Kini dili magbakak. Bisan kini malangan, paabota kini; kay kini matuman gayod. Kini dili maulahi.”—Habacuc 2:2, 3.

Apan kon ang paghukom sa Diyos maoy “alang sa natudlong panahon” ug kon kini “dili malangan,” nganong si Habacuc miingon “bisan kini malangan”? Dayag sa pagpakitang ang pila sa katawhan sa Diyos magdahom niini nga labi pang dali kay sa aktuwal nga pag-abot niini. Ngano? Kay ang eksaktong panahon sa pag-abot niini magpabiling dili nila masayran.

Samtang dinhi sa yuta, bisan si Jesus wala masayod sa eksaktong panahon, kay siya miingon: “Mahitungod sa maong adlaw o takna walay nasayod, bisan pa ang mga manulonda sa langit, o ang Anak, gawas sa Amahan lamang.” (Marcos 13:32) Apan, ang iyang nasayran mao ang yugto sa panahon nga niana mahitabo ang paghukom. Busa, sa hangyo sa iyang mga tinun-an, siya mihatag ug ilhanan nga tungod niana sila makaila sa maong yugto sa panahon inigsugod na niini. Ang unang ebidensiya niini, matud ni Jesus, maoy “sama sa unang mga kasakit sa pagpanganak.” Karon, siyempre, ang babayeng mabdos nga mobati sa kasakit sa pagpanganak dili mahibalo sa eksaktong panahon sa pagkahimugso sa iyang anak. Hinuon, siya nasayod nga haduol na ang pagkahimugso niini.—Mateo 24:3-8, Today’s English Version.

“Kining Kaliwatana Dili Gayod Mahanaw”

Gawas sa pagkasayod kanus-a moabot ang yugto sa panahon sa balaang paghukom, si Jesus nakabutang ug limite sa gidugayon niana. Sa paggamit sa ilustrasyon sa usa ka igira, siya miingon: “Inigpanglumoy na sa iyang bag-ong sanga ug manalingsing na, inyong masayran nga nagakaduol na ang ting-adlaw. Maingon man usab inigkakita ninyo niining tanang butanga, inyong masayran nga siya haduol na nga anaa na gayod sa mga pultahan. Sa pagkamatuod magaingon ako kaninyo nga dili mahanaw kining kaliwatana hangtod mahitabo kining tanang butang.”—Mateo 24:32-34.

Sa ingon ang paghukom ipatuman sa usa ka panahon sa pagkinabuhi sa mga tawong makakita sa unang ebidnesiya sa yugto sa panahong gitagna ni Jesus. Ang sinugdan niining yugtoa sa panahon magtimaan sa sinugdanan sa kataposan sa kalibotan ni Satanas, nga batok niana ang bag-ong natukod nga Gingahrian sa Diyos sa langit magpatuman sa balaang paghukom. Ang kronolohiya sa Bibliya ug ang pagkatuman sa tagna sa Bibliya nagataganag daghang pamatuod nga kining yugtoa sa panahon nagsugod sa 1914.a

Busa una bug-os mangamatay ang 1914 nga kaliwatan, ang paghukom sa Diyos kinahanglang ikapatuman na. Kining kaliwatana buhi pa nga tinagdaghan. Pananglitan, sa 1980 may 1,597,700 ka tawong buhi sa Federal Republic of Germany nga natawo sa 1900 o una pa niana. Ang numero modako pa kon ang minilyong lungsoranon niini wala unta makaagom sa ahat nga kamatayon panahon sa duha ka gubat sa kalibotan.

Sa pagsaad nga “kining kaliwatana dili gayod mahanaw,” gigamit ni Jesus ang duha ka negatibong ou ug me. Ang The Companion Bible nagatin-aw sa maong paggamit sumala sa mosunod: “Ang duha ka negatibo kon tapoon mawad-an sa ilang linaing mga kahulogan, ug mahimong labing kusganon ug mapasiugdahong apirmasyon.” Karon na lamang, sa panahong mopatim-aw nga ang kaliwatan mahimong mahanaw sa dili pa matuman ang tanan, nga ang mga pulong ni Jesus “dili gayod” magbatog dakong kahulogan.

Usa ka Pagsulay sa Pagtuo

Ang mapasidan-anong mga pulong ni Habacuc nagapailang adunay daw pagkalangay sa paghukom ni Jehova, nga nagasilbing pagsulay sa pagtuo. Sa makataronganon kining pagsulaya dili motungha hangtod sa hinapos sa kaliwatang gihisgotan ni Jesus. Sa pagtumong pananglitang sa sinugdan niining artikuloha, palandonga kini: Kanus-a ka ba mosugod sa pagduhaduhang seryoso nga moabot ang imong bisita? Tinong dili sa alas nuybe sa buntag, ni sa udto, dili pa gani lagmit sa hapon na kaayo. Apan lagmit ang imong pagtuo masulayan inigtikyop na sa kagabhion. Bisan pa niana, hinumdoming bisan sa 11:30 s.g. ang imong bisita may igo pang panahon sa pag-abot ingong pagtuman sa iyang saad!

Walay katarongan ang pagkabalaka nga dili matuman ang Pulong sa Diyos. Kini wala pa gayod mapakyas. Ang mga pulong ni Josue ngadto sa mga Israelinhon kapin sa 3,000 ka tuig nga miagi matuod karon sama ra kaniadto: “Walay usa ka pulong gikan sa tanang maayong pulong nga gipamulong ni Jehova nga inyong Diyos ang napakyas. Silang tanan natuman alang kaninyo. Walay usa ka pulong ang napakyas.”—Josue 23:14.

“Mahitungod sa pagkatuman sa tagna mopatim-aw nga kinaiyanhon lamang alang kanato, ug sa tanang tawo, nga mahimong dili mapailobon ug pagdahom nga ang mga butang mahimo nga mas madali kay sa kasagarang mahitabo.” Kana ang giingon sa The Watch Tower sa isyu nianang Mayo 1, 1910, nga midugang: “Kini usa ka paglangaylangay maylabot sa atong pagpaabot, apan kita makatinong walay paglangaylangay maylabot sa balaang katuyoan . . . Kita dili magduhaduha nga ang sangpotanan makab-ot sa kabug-osan sa panahon—ang panahon sa Diyos.”

Sa paghinumdom, ang matinumanong mga Kristohanong buhi karong adlawa makakitag maayong mga katarongan nganong ang paghukom sa Diyos wala pa ipatuman. Sa pagkamatuod, sila nagakalipay nga kini wala pa ipatuman. Ang sunod natong artikulo magasaysay ngano.

[Mga Potnote]

[Hulagway sa panid 4]

Daghan sa kaliwatan sa 1914 nagalaom nga makakitang “kining tanang butanga mahitabo”