Kon Nganong Wala pa Ipahinabo sa Diyos ang Iyang Paghukom

DUOLAG kawhaan ka tuig tapos sa pagkamatay ni Jesus, gipaabot na sa pila ka Kristohanon nga si Jehova “moabot” sa paghukom. Kadto nagdasig kang apostol Pablo sa pagsulat kanila, nga miingon: “Ang adlaw ni Jehova . . . dili moabot gawas moabot una ang pagbiya sa pagtuo ug igapadayag ang tawo sa kalapasan, ang anak sa kalaglagan.” Bisag giangkon ni Pablo nga “ang misteryo sa maong kalapasan” “naglihok na” sa iyang adlaw, dayag nga kadto dili sa gidak-ong gikinahanglan, aron moabot na ang balaang paghukom.—2 Tesalonica 2:2, 3, 7, 8.

Duhag-Pilo nga Pagtigom

Ang pagbiya sa pagtuo o apostasiya bisan tuod tinong moabot, dili makababag sa katuyoan sa Diyos sa pagpilig 144,000 ka matinumanong Kristohanon aron mahimong kaubang mga magmamando sa iyang Anak, si Jesus, sa langit. (Tan-awa ang Pinadayag 14:1-5.) Inigkakompleto na lamang ang ilang gidaghanon ug sila sa kataposan mapatikan sa Diyos nga mahitabo ang paghukom ni Jehova. Ang Pinadayag 7:2, 3 nagasaysay: “Sa upat ka manulonda [kini giingon]: ‘Ayaw pagdaota ang yuta o ang dagat o ang kakahoyan [pinaagi sa pagpatungha sa malaglagong mga hangin sa paghukom sa Diyos batok sa kanasoran], hangtod matapos na namong mapatikan ang mga ulipon sa among Diyos diha sa ilang mga agtang.’” Sumala sa atong nasayran na karon, kining buluhatona wala pa matapos sa dihang natukod ang Gingharian sa 1914.

Busa, bisan pag ang pipila naglaom nga kini basin mahitabo, ang paghukom sa Diyos dili mahimong moabot niadtong panahona. Ang Enero 1, 1914 nga isyu sa The Watch Tower mihatag luna sa maong hitabo, nga miingong bisan pag “ang Tuig 1914 mao ang kataposan sa ginatawag sa Bibliya nga ‘Hentil nga mga Panahon’ . . . kita dili gayod masaligong kining tuiga, l914, makasaksi sa dagko kaayo ug matuling kausaban sa kapasayloan sumala sa atong gidahom.” Bisan pa niana, samtang mipadayon ang artikulo sa pagsaysay, ang mga Kristohanon mapasalamatong ang kronolohiya sa Bibliya nagpukaw kanila sa pagkaduol sa balaang paghukom. Kadto miingon: “Kami nagtuo nga ang kronolohiya usa ka panalangin. Kon kita magpukaw kanato nga sayosayo o pila ka takna nga sayo sa buntag kay sa atong pagmata unta, maayo! Kadtong nagamata ang makabaton sa panalangin.”

Nahiapil usab niadtong nakabaton sa panalangin mao ang ginabatbat sa Bibliya nga “usa ka dakong panon, nga walay tawong makaihap, nga gikan sa tanang nasod ug mga tribo ug mga katawhan ug mga pinulongan.” Sa 1935 na lamang nga bug-os nasabtang ang maong “dakong panon” nalangkoban sa mga tawo “nga magagula sa dakong kasakitan,” nga buot ingnon, kadtong nagabiya sa organisasyon ni Satanas ug nagabarog sa kiliran sa Diyos, aron makalabang-buhi sa pagpahinabo sa paghukom sa Diyos. Sulod na karon sa mga kalim-an ka tuig, ang buluhatong pagtigom niining “dakong panon” nagapadayon sumala sa katuyoan ni Jehova. Kita mahimong maglipay nga ang balaang paghukom wala pa ipahinabo hangtod matapos kining nagaluwas-kinabuhing buluhaton.—Pinadayag 7:9, 14.

Politikanhong mga Hitabo

Ang pila ka politikanhong hitabo gitagna usab nga mahitabo una pa ipahinabo ang paghukom sa Diyos. Ang pagkatuman sa tagna ni Daniel mahitungod sa “duha ka hari” (kapitulo 11) karon tin-awng nasabtang haduol na sa pagkakompleto.a Sa tayuktok sa maong katumanan, ipahinabo sa Diyos ang paghukom.—Itandi ang Daniel 2:44.

Bisan pag mabatokon sa usag usa, ang dagko kaayong mga nasod ug ang ilang mga bloke—“ang hari sa habagatan” ug “ang hari sa amihanan”—gihawasan diha sa tibuok-yutang politikanhong organisasyon nga karong adlawa “gidayeg sa katawhan.” Pagkahaom nga kabatbatan sa tapos-Gubat sa Kalibotan I nga Liga sa Kanasoran ug sa tapos-Gubat sa Kalibotan II nga sumusunod niini, ang organisasyong Hiniusang Kanasoran.—Daniel 11:40; Pinadayag 17:8.

Nga nabahin sa ideolohiya ug sa politika, ug sa samang panahon “nagkahiusa,” kining “duha ka hari” daghag ikasulti mahitungod sa pagtipig sa “pakigdait ug kasegurohan” sa kalibotan. Kini, usab, makahuloganon, kay ang tagna sa Bibliya nagaingon nga “dihang sila magaingong ‘Pakigdait ug kasegurohan!’ nan ang kalit nga kalaglagan modangat kanila.” Sa unsang gidak-on kining “duha ka hari,” nga bulag ug duyog sa organisasyong Hiniusang Kanasoran, makasulbad sa politikanhon, ekonomikanhon, silingananhon ug sosyal nga mga suliran sa kalibotan aron mobating makataronganon sa paghimo sa maong pagpatugbaw, kita sa pagkakaron wala masayod.—1 Tesalonica 5:2, 3.

Apan, ang atong nasayran mao nga sa usa ka panahon sa pagmando niini, ang organisasyong Hiniusang Kanasoran, uban sa tanan niining membrong nasod—apil ang labing inila sa maong “duha ka hari”—makaagom sa paghukom sa Diyos ug ‘moadto sa kalaglagan.’ Kita nasayod usab nga ang kaliwatan sa 1914 anaa na sa hinapos sa kinabuhi niini, sa ingon diyutay na lang ang panahon aron matuman ang maong tagna. Apan kita nasayod usab—kay kini mismo ang saad ni Jesus—nga “kining kaliwatana dili gayod mahanaw hangtod kining tanang butanga mahitabo.”—Pinadayag 17:11; Marcos 13:30.

Si Jehova Dili Maglangaylangay—Maglangaylangay Ka Ba?

Kon nagatuon ka sa Bibliya ug nagatuon mahitungod sa mga katuyoan ni Jehova, ayaw paglangaylangay sa pagkalagiw ngadto sa simbolikong dapit nga may panalipod sa Diyos. “Pangitaa ang pagkamatarong, pangitaa ang kaaghop,” aron “tingali kamo pagatagoan sa adlaw sa kasuko ni Jehova.”—Sofonias 2:1-3.

Hinumdomi ang unang-siglong mga Kristohanon nga mipahawa sa Jerusalem sa 66 K.P. sa pagkaila sa ilhanan nga gihatag ni Jesus bahin sa umaabot nga paghukom niadto. Si bisan kinsang naglangaylangay sa ilang pagpahawa—tungod sa bisan unsang hinungdan—lagmit nagduka ngadto sa mini nga pagbati sa kasegurohan sa dihang ang mga Romano, si kinsa miliyok sa siyudad ug unya wala damhang misibog, wala mobalik. Miaginod ang mga semana. Ang mga semana nahimong mga bulan. Ang mga bulan nahimong mga tuig. Tingali gihunahuna sa pipila nga si Jehova naglangaylangay sa pagpahinabo sa iyang paghukom. Apan sa kalit ang mga Romano namalik sa 70 K.P. Alang niadtong didto sa sulod sa siyudad, wala ing kaikyasan.—Lucas 21:20-22.

Ang katawhan karong adlawa, kinsa nagpahinungod na sa ilang mga kinabuhi sa pagbuhat sa kabubut-on sa Diyos ug nakakalagiw na ngadto sa iyang dapit sa kaluwasan, angay dili maglangaylangay sa pagtuman sa ilang Kristohanong mga obligasyon. Angay sila dili magpugong sa pagsangyaw sa mensahe ni Jehova sa paghukom sama sa gisulayan ni Jonas nga buhaton sa gisugo siya sa pagpasidaan sa mga taga-Nineve sa balaang paghukom. Ni angay mosibog sila ngadto sa pagkawalay-kalihokan nga magpasug-o, sama sa iyang gibuhat, kay ang mga kahimtang wala mahitabo sumala sa ilang gidahom o sa madali sumala sa ilang gilaoman.—Jonas 1:1, 2; 4:2, 5, 10, 11; 2 Pedro 3:15.

Sa tukma ang The Watch Tower sa Hunyo 1, 1906, miingon mahitungod sa pagpahinabo sa Diyos sa paghukom: “Ang panahon bug-os magpaila sa balaang kaalam sa kon unsay mopatim-aw ngadto sa mubog-panglantawng katawhan nga samag walay-kaluoy nga paglangaylangay . . . Ang Diyos malulutong nagdala kanato sa iyang panglantaw ug nag-awhag kanato sa paglantaw sa mahimayaong kaugmaon . . . ug sumala sa atong masabtan ug tuohan, kita makapahulay ug mahimong maglipay niana. Apan kasamtangan, tungod kay sa ingon mibatig kahayahay tungod sa makapalipayng palaaboton, kita kinahanglang mapailobong magpaabot sa kataposan, bisan unsa ka masakit tingali ang panahon sa pagpaabot.”

Ug kita magapaabot gayod, uban niining bug-os nga pagtuo: “Kini matuman gayod. Kini dili maulahi.”—Habacuc 2:3.

[Mga footnote]

[Kahon sa panid 6]

KON UNSAY MAGAUNA SA PAGPAHINABO SA PAGHUKOM

Ang pagbiya sa pagtuo—2 TESALONICA 2:2, 3

Ang pagpatik sa 144,000—PINADAYAG 7:2, 3

Ang pagtigom sa “dakong panon” alang sa kaluwasan—PINADAYAG 7:14

Ang pagtungha sa Liga sa Kanasoran ug unya sa Hiniusang Kanasoran—PINADAYAG 17:8

Ang kataposang pag-atubangay sa duha ka dagkong bloke sa kanasoran—DANIEL 11:40, 44, 45

Ang tibuok-yutang patugbaw nga “Pakigdait ug kasegurohan”—1 TESALONICA 5:2, 3

[Litrato sa panid 7]

Giisip ni Pedro ang pailob sa Diyos ingong kaluwasan, samtang si Jonas mireklamo. Kansang panig-ingnan ang imong sundon?