Mga Magmamantala sa Gingharian Nagtaho

Pagsangyaw sa Eskuylahan

“BUHATA ang imong maarangan sa pagtanyag sa imong kaugalingon nga inuyonan sa Diyos, usa ka magbubuhat nga walay igakaulaw, nga magagamit sa pulong sa kamatuoran sa tukmang paagi,” misulat si apostol Pablo ngadto sa batan-ong si Timoteo. (2 Timoteo 2:15) Daghang anak sa mga Saksi ni Jehova ang may higayon sa pagsangyaw sa maayong balita sa Gingharian sa Diyos sa eskuylahan. Sila dili maulaw sa pagbuhat niana ug gipabilhan tungod niana sa daghan pang ubang estudyante.

◻ Ang usa ka pananglitan niini naggikan sa Martinique. Ang usa ka batan-ong babaye nga ilado sa eskuylahan ingong usa sa mga Saksi ni Jehova kadaghanan pangayoan sa iyang opinyon bahin sa relihiyosong mga ulohan sa iyang magtutudlo. Siya sa makadaghan nakig-estorya sa maong magtutudlo, ug gidawat sa magtutudlo ang pipila sa mga basahon sa Watch Tower.

Usa ka adlaw mitungha ang panaghisgot sa klase bahin sa pagkadaghag-tawo sa yuta. Sa paghisgot kon unsaon pagpugong sa pagkadaghag-tawo sa yuta, gihisgotan ang kontrasepsiyon ug aborsiyon. Ang pila ka estudyante dapig sa aborsiyon ug ang pipila supak niana. Ang magtutudlo nangayo sa batan-ong igsoong babaye sa iyang opinyon. Siya miingong malipay siya sa paghatag ug bug-os nga katin-awan sa pagkaugma. Niadtong gabhiona siya nangandam, ug sa pagkaugma nagdala sa eskuylahan sa pila ka magasing Pagmata! nga naghisgot sa Kasulatanhong paagi sa ulohang aborsiyon. Tapos sa pagbasa sa materyal, siya nangutana sa klase, ug sa pagkatapos sa panaghisgot “ang tanan sa klase mipahayag nga supak sa aborsiyon,” matud niya. Ang pila ka estudyante misuskriber pa sa magasing Pagmata!

◻ Ang laing kasinatian naggikan sa Sweden diin ang mga igsoong lalaki kadaghanan dapiton sa paghatag ug lektura sa mga eskuylahan. Usa ka espesyal payunir nga ministro sa mga Saksi ni Jehova gidapit sa paghatag sa ubay-ubayng lektura sa usa ka klase. Ang magtutudlo miingon: “Kami may gidapit nga ubang pastor dinhi, apan sila nagtokar lang sa sista ug nagsulti sa mga estudyante nga magbuotan. Maayo ra man kana,” matud sa magtutudlo, “apan buot kong ang akong mga estudyante may makat-onan usab.” Unya siya mihimog kahikayan nga moanha ang Saksi ug magdumalag regular nga pagtuon sa Bibliya uban sa klase.

Ang mga estudyante sa klasehanan, ingon man ang katawhan sa bisan diin sa kalibotan karong adlawa, dunay daghang pangutana mahitungod sa mga kahimtang sa kalibotan o sa pamilya ug sa sosyal nga mga sulirang buot nilang masulbad. Pagkadakong pribilehiyo sa mga Saksi ni Jehova nga nagaeskuyla pa nga magkugi sa personal nga pagtuon ug magkugi sa mga tigom sa kongregasyon, aron makabatog pagsabot sa Bibliya ug makatabang niana nila nga makasayod sa mga tubag sa Bibliya! Ang Biblikanhong proverbio nagatambag: “Ayaw ihikaw ang maayo gikan niadtong takos niana, kon nahitabong anaa sa imong gahom ang pagbuhat niana.”—Proverbio 3:27.