Gipamatud-an sa mga Ministro sa Diyos ang Ilang Kuwalipikasyon
“Ug kinsa ang may igong katakos?”—2 CORINTO 2:16.
1. Sa kalibotan karon nga nabahin sa relihiyon, unsang mga pangutana ang mahimong ibangon sa bug-os nga kamatinud-anon?
SA KARON nga kalibotan nga nabahin sa relihiyon, kining pangutanaha mahimong ibangon sa bug-os nga kamatinud-anon: Kinsa ba gayod ang awtorisado nga mga ministro sa Diyos? Maingon man, si apostol Pablo nangutana: “Kinsa ang may igong katakos niining mga butanga?” Sa gihagit, si Pablo ug ang iyang kaubang mga magbubuhat nakaingon, “Kami gayod”! (2 Corinto 2:16, 17) Apan karon, kinsa ang adunay lig-ong basehanan, ang may katungod, ug kaisog sa pagtubag, “Kami gayod”?
2. Unsa ang diwa sa mga pulong ni Pablo sa 2 Corinto 2:14-17?
2 Sa dili pa tubagon kanang pangutanaha, atong tagdon kining mga pulonga ni Pablo sa mga Kristohanon sa Corinto: “Apan salamat sa Diyos! Kay . . . bisan asa kita moadto kita iyang gigamit sa pagsulti sa uban bahin sa Ginoo ug sa pagpakaylap sa Ebanghelyo sama sa maamyon nga pahumot. Ug kon mahitungod sa Diyos adunay usa ka maamyon, mahumot nga alimyon sa atong kinabuhi. Kini ang alimyon ni Kristo sa sulod kanato, usa ka kaamyon alang sa luwason ug sa dili luwason sa atong palibot. Sa dili luwason, daw kita maoy makalilisang nga baho sa kamatayon ug kalaglagan, apan alang sa nakaila kang Kristo kita maoy pahumot nga makahatag kinabuhi. Apan kinsa ang may igong katakos sa maong buluhaton? Sila lamang kinsa, sama sa atong kaugalingon, mga tawong maunongon, nga gipadala sa Diyos, nga nagasulti pinaagi sa gahom ni Kristo, samtang ang mga mata sa Diyos nakatutok kanato. Kita dili sama niadtong mga magtitinda—ug daghan sila—nga ang katuyoan mao ang pagpahimulos sa Ebanghelyo aron makabaton silag maayong pangabuhi niana.”—2 Corinto 2:14-17, The Living Bible; tan-awa ang The Watchtower, Mayo 1, 1944, panid 133-4.
3. (a) Unsay atong reaksiyon sa kaisipan sa pagtinda sa Pulong sa Diyos alang sa mahakugong ganansiya? (b) Unsay gihimo ni Pablo aron dili mahimong pabug-at sa pinansiyal niadtong iyang giwalihan?
3 Ang pagpaninda sa Pulong sa Diyos alang sa mahakugong ganansiya—tinuod nga makaluod hunahunaon! Wala mangita si Pablo ug kuwarta pinaagi sa pagwali niana nga Pulong aron magkinabuhi sa kaharuhay, ug sa ulahi mohunong sa ministeryo ug magparelaks na lang sa nahibiling bahin sa iyang mga adlaw. Kinabubut-on siyang naghimog mga tolda ingong sideline aron duna siyay ikagasto sa iyang kaugalingon ug matabangan pa niya ang iyang mga kauban sa pag-alagad kang Jehova. (Buhat 18:1-4) Wala magpabug-at si Pablo sa pinansiyal sa mga tawong giwalihan niya sa maayong balita. Busa nakapangutana siya sa mga Kristohanon sa Corinto: “Nakasala ba ako sa pagpaubos sa akong kaugalingon aron kamo mapasidunggan, tungod kay giwali ko diha kaninyo ang maayong balita sa Diyos sa walay pagpagasto kaninyo?” (2 Corinto 11:7) Kanang pangutanaha matubag sa positibong dili!
4. Sa unsang paagi gisundog sa mga Saksi ni Jehova ang panig-ingnan ni Pablo may kalabotan sa Pulong sa Diyos?
4 Karon gisunod sa mga Saksi ni Jehova ang maayong panig-ingnan sa apostol sa dili pagtinda sa bililhong Pulong sa Diyos kondili ilang gipakig-ambit kini ngadto sa tanan. Wala nila inegosyo ang maong balaang butang. Busa wala silay gibayrang klerigo, ang ilang mamumulong sa publiko wala magpabayad sa ilang mga pakigpulong, ug sukad walay ginapasang mga plato sa pagpangolekta diha sa ilang mga tigom. Kon adunay gustong moamot ug salapi alang sa buluhaton, makahulog siya bisag pila, bisag gamay sama sa “duha ka diyot nga gamay kaayog bili,” sa kahon sa kontribusyon diha sa Kingdom Hall o sa ubang lugar. (Lucas 21:1-4) Ang kinabubut-ong mga kontribusyon gamiton sa paghulip sa mga gastos ug dili sa pagpadato sa usa ka tawo. Bisan ang pribadong mga balay libreng gigamit alang sa mga tigom sa mga Saksi ni Jehova.—Filemon 1, 2.
“May Igong Katakos”
5. Kinsa ang naghatag katakos sa mga Saksi ni Jehova sa balaang pag-alagad?
5 Apan kinsa karon ang naghatag sa mga Saksi ni Jehova sa katakos sa pagpadayon sa buluhaton sumala niini nga Kasulatanhong sumbanan bisan pa sa tanang paglutos ug pagsupak nga kanunay nilang maagian? Walay lain kondili ang Indibiduwal nga naghatag kang Pablo ug sa iyang mga kauban sa igong katakos alang sa balaang pag-alagad. Palihog tagda ang maligdong nga motibo ni Pablo, nga lahi sa motibo sa relihiyosong magtitinda, siya miingon: “Sa kamatinud-anon, oo, ingon nga pinadala sa Diyos, sa atubangan sa Diyos kami nagapahayag diha kang Kristo.” (2 Corinto 2:17) Kini mao ang paagi nga nagapamulong ang mga Saksi ni Jehova karon. Apan ginarekomendar ba nato ang atong kaugalingon nga mga ministro? Kinahanglan pa bang magpapatik kita ug mga sulat sa rekomendasyon gikan sa uban?
6. (a) Nganong giisip sa klero sa Kakristiyanohan nga sila ang “may igong katakos”? (b) Apan unsay basehanan sa pagbaton sa tawo ug igong katakos alang sa tinuod Kristohanong ministeryo?
6 Wala modawat si Pablo nga naugmad niya ang iyang kuwalipikasyon alang sa iyang ministeryo. Siya miingon: “Ang among pagkabaton ug igong katakos nagagikan sa Diyos, nga maoy naghatag kanamog igong katakos nga mahimong mga ministro niining bag-ong pakigtugon.” (2 Corinto 3:4-6) Dili sama kang Pablo, ang klero sa Kakristiyanohan nag-angkon nga “may igong katakos” tungod kay nakagraduwar sa mga seminaryo sa teolohiya. Busa moingon sila nga kadtong wala makagraduwar sa seminaryo dili kuwalipikadong mga ministro nga may awtoridad sa pagpanudlo. Apan ang linain nga pagtuon ni Pablo sa Hudaismo wala maghatag kaniyag katakos sa Kristohanong ministeryo may labot sa bag-ong pakigtugon. Si Jesus wala magtukod ug seminaryo sa teolohiya alang sa iyang 12 ka apostoles o alang kang bisan kinsa nga magpalista. Maingon man karon, ang pagbaton sa tawo ug igong katakos alang sa tinuod Kristohanong ministro kinahanglang magagikan kang Jehova, ang dakong Magtutudlo. Busa, ang ingon nga ministro kinahanglang magpakitag pamatuod nga dili ikalimod.
“Kinsay Naghatag Kaninyo sa Maong Awtoridad?”
7. Sa unsang paagi lahi ang mga pangulo sa relihiyon kang Nicodemo sa paagi sa ilang paglantaw sa awtoridad ni Jesus?
7 Gihagit sa relihiyosong mga pangulo ang katungod bisan sa Anak sa Diyos sa pagwali sa maayong balita ug sa paghimog mga milagro. Diha sa templo, “ang pangulong mga saserdote ug mga ansiano sa mga tawo miduol kaniya samtang siya nagapanudlo ug miingon: ‘Pinaagi ba sa unsang awtoridad nga ginahimo nimo kining mga butanga? Ug kinsay naghatag kanimo sa maong awtoridad?’” (Mateo 21:23) Mibalibad sila sa paghimog konklusyon sama sa naabot sa Hudiyohanong magmamandong si Nicodemo sa iyang gisultihan si Jesus: “Rabi, kami nasayod nga ikaw maoy magtutudlo nga gikan sa Diyos; kay wala gayoy makahimo niining mga ilhanan nga imong gipangbuhat gawas lamang kon ang Diyos uban kaniya.”—Juan 3:1, 2.
8. Tapos sa kapin sa tulo ka tuig sa ministeryo ni Jesus, unsay reaksiyon sa Hudiyohanong mga pangulo sa ebidensiya kon kinsa siya ug sa iyang awtoridad?
8 Makahimo si Jesus sa pagsulti sa iyang mga maghahagit, ‘Pasagdi nga ang akong mga buhat ang magsulti alang sa ilang kaugalingon!’ Sa milabay ang kapin sa tulo ka tuig sa iyang pag-alagad sa katilingban, daghan nang mga ilhanan ang nakita sa hataas nga mga saserdote ug sa mga ansiano aron basehan sa tukmang konklusyon kon kinsa gayod si Jesus ug sa katungod sa paghimog mga milagro ug sa pagtudlo sa kamatuoran bahin sa Gingharian sa Diyos. Gahi kaayo ang ilang ulo sa pagdawat sa tanang ebidensiya nga gihatag ni Jehova sa pagpamatuod nga si Jesus mao ang gisaad nga Mesiyas.
9, 10. (a) Nganong dili matingala ang mga Saksi ni Jehova kon hagiton ang ilang kuwalipikasyon ingong mga ministro karon? (b) Sa unsang paagi giatubang ni Jesus ang relihiyosong mga pangulo nga mihagit sa iyang awtoridad, ug unsay epekto niini?
9 Tungod sa nahitabo kang Jesus, dili ikatingala sa mga Saksi ni Jehova nga ang ilang kuwalipikasyon ingong awtorisadong mga ministro sa iyang Amahan hagiton sa relihiyosong mga pangulo karon. Sanglit wala ilha niadtong naghagit sa awtoridad ni Jesus ang iyang daghang milagrosong mga buhat, nagbangon siyag mga pangutana nga nagbutang kanila sa kaulawan. Ug makahimo ang iyang presenteng mga disipulo sa samang butang kon bahin sa mga tawo nga sa kinabubut-on dili magtagad sa mga buhat niadtong mga disipuloha.
10 Sa gipangutana sa hataas nga mga saserdote ug sa mga ansiano si Jesus, “Kinsa ang naghatag kanimo sa maong awtoridad?” wala siya maghatag ug hanap nga pangutana apan miingon: “Ako, may pangutana usab kaninyo. Kon inyo akong tug-anan niini, tug-anan ko usab kamo pinaagi sa unsang awtoridad gibuhat ko kining mga butanga: Ang bawtismo ni Juan, diin ba kadto gikan? Gikan ba sa langit o gikan sa mga tawo?” Ang asoy midugang: “Sila nagsugod sa pagpangatarongan sa ilang kaugalingon, nga nag-ingon: ‘Kon moingon kita, “Gikan sa langit,” siya moingon kanato, “Nan, nganong wala man lagi ninyo siya tuohi?” Ug kon moingon kita, “Gikan sa tawo,” mahadlok kita sa katawhan, kay ang tanan mituo man nga si Juan propeta.’ Busa si Jesus gitubag nila nga nag-ingon: ‘Wala kami mahibalo.’ Ug siya miingon kanila: ‘Dili ko usab kamo tug-anan pinaagi sa unsang awtoridad gibuhat ko kining mga butanga.’” (Mateo 21:23-27) Karon, ang mga Saksi ni Jehova makahagit sa klero sa Kasulatanhong paagi nga may sama niana nga epekto.a
11. Unsang buluhaton ang gihimo sa katawhan ni Jehova sa wala pa ang 1914, ug sa unsang paagi napahilom ang ilang mga kritiko?
11 Gikan sa 1876 paunahan, nagapasidaan ang katawhan ni Jehova sa kalibotan, ug ilabina sa Kakristiyanohan, nga matapos ang Panahon sa mga Hentil sa tinghunlak sa 1914. (Lucas 21:24, King James Version) Dili mahimong dili makamatikod ang klero niining pangunang buluhaton nga miabot na halos 40 ka tuig—usa ka buluhaton nga katugbang nianang kang Juan Bawtista. Kadtong maong mga klero maikagong naghulat aron dukdukon ang editor niining magasina kon molabay ang 1914 nga walay tagsaong mahitabo nga katugbang niadtong iyang gipasidaan. Apan, oo, unsa ka dako sa ilang kahilom sa dihang sa Hulyo 28, 1914, nawala ang kalinaw sa mibuto ang Gubat sa Kalibotan I!
12. Unsang mga kalisdanan ang miduyog ug misunod sa Gubat sa Kalibotan I?
12 Ang kalumpagan sa gubat ug ang pagkawala sa daghang lalaki gikan sa pagpanguma miresultag kakulangan sa pagkaon. Giuyog ang kalibotan sa mga linog sa daghang bahin sa yuta, nga nakapahinabog dagkong kadaot ug pag-antos. Sa 1915 ang linog sa Avezzano, Italya, nakapatay ug 29,970, ug nakapatay ang grabe kaayong linog ug 200,000 sa Lalawigan sa Kansu, Tsina. Sa 1923, kapin sa 140,000 ang nangamatay sa linog sa Great Kanto sa Japan. Sa hapit nang matapos ang gubat miabot ang trangkaso Espanyola nga sa usa ka tuig nakapatay ug mas daghang biktima kay sa upat ka tuig sa gubat. Dili usab kalimtan mao ang paglutos sa mga alagad ni Jehova sa yugto niadtong unang gubat sa kalibotan, nga miresultag dili-makataronganong pagbilanggo sa siyam ka bulan sa presidente ug sa sekretaryo-tresurero sa Watch Tower Society ug sa unom nilang kaubang mga trabahante.
13. Unsay gipangutana sa mga Saksi ni Jehova sa klero sa Kakristiyanohan, ug kinahanglang unsay admitihon niadtong maong mga kritiko kon matinud-anon ang ilang tubag?
13 Sukad sa kataposan sa Gubat sa Kalibotan I, gipangutana sa mga Saksi ni Jehova ang klero sa Kakristiyanohan: ‘Ang malaglagong hitabo nga mihampak sa atong yuta gikan sa 1914 paunahan katumanan ba sa tagna ni Jesus diha sa Mateo 24:3-13?’ Kon matinud-anong motubag kadtong mga kleroha ug oo, kinahanglang ilang dawaton nga milingkod na si Jesu-Kristo sa iyang langitnong Gingharian sa 1914. Siempre, sanglit miingon man si Jesus nga ‘ang kalibotan dili na makakita kaniya’ ug nga siya karon usa na man ka dili-mamatay espirituhanong persona, ang iyang “pag-abot,” o “presensiya,” dili makita. (Juan 14:19; Mateo 24:3, KJ; 1 Pedro 3:18) Apan kon dawaton nila kining tanan dili makapangatarongan ang klero nga ang nakatay-og sa kalibotan nga mga hitabo sa 1914-18 maoy usa lamang ka pag-ulbo sa panag-away sa kanasoran nga nahitabo na sa nangagi.
14. (a) Kon dawaton sa relihiyosong mga pangulo ang kamatuoran, unsang buluhatona nga maobligar sila sa pakigbahin? (b) Unsang kapuli sa Gingharian ang ilang gisalikway, apan unsang lakang ang ilang gisubay?
14 Dugang pa, kon admitihon sa Kakristiyanohan nga ang mga hitabo sa 1914-18 nagtimaan sa pagsugod sa kataposan sa daang sistema sa mga butang, mapugos sila sa pagdawat sa ubang bahin sa “ilhanan” sa “presensiya” ni Jesus ug kinahanglang makigbahin sa katumanan sa iyang mga pulong: “Kining maayong balita sa gingharian igawali sa tanang pinuy-anang yuta sa pagpamatuod sa tanang kanasoran.” (Mateo 24:14) Nagkahulogan kana sa pagsangyaw, dili sa Ebanghelyo nga ilang ginawali sa dugay nang kasiglohan, kondili sa maayong balita sa natukod nga Gingharian sa langit sa kataposan sa Panahon sa mga Hentil sa 1914. Kinahanglang ilang isalikway ang Liga sa Kanasoran ingong “ang politikal nga ekspresyon sa Gingharian sa Diyos sa yuta” ug lantawon kini ug ang sumusunod niini, ang Hiniusang Kanasoran, ingong ‘ang makalilisang nga butang sa kalaglagan nga nagbarog sa dapit nga balaan.’ (Mateo 24:15, KJ) Apan hangtod sa tuig 1985, midumili ang klero sa Kakristiyanohan sa pagtawag sa Liga sa Kanasoran ug sa Hiniusang Kanasoran ingong “makalilisang,” o “dulumtanang butang.”
15. Unsang palaabuton ang naghulat sa klero, apan unsay gihimo sa mga Saksi ni Jehova?
15 Busa midumili ang klero sa Kakristiyanohan sa pagbarog alang sa Gingharian ni Jehova pinaagi ni Jesu-Kristo. Tungod sa kapakyasan sa pagpaluyo niini, laglagon sila sa “dakong kasakitan” nga anaa sa unahan. Apan dili sama kanila, ang mga Saksi ni Jehova mibulag sa Babilonyang Bantogan, ang kalibotanong imperyo sa bakak nga relihiyon, ug nagawali sa balita sa Gingharian sa 205 ka kanasoran. Kining dili-hitupngang buluhaton maoy usa sa tagsaong bahin sa “ilhanan” nga nagpamatuod nga sa 1914 gipalingkod si Jesus ingong langitnong Hari, sa pagmando taliwala sa iyang mga kaaway.—Mateo 24:3, 14, 21; Salmo 110:1, 2; Pinadayag 18:1-5.
Kinahanglan pa ba ang Rekomendasyon?
16. Unsang mga pangutana ang mobangon bahin sa rekomendasyon, ug unsay gipamulong ni Pablo bahin niini?
16 Kita ba walay gibasehan sa pagrekomendar sa atong kaugalingon ingong dinihogang mga saksi ni Jehova? O ato bang gimaniobra sa kamaabtikon ang mga butang aron mapalig-on ang ingon nga rekomendasyon alang sa “ubang karnero” ni Jesus? (Juan 10:16) Walay gihimo si Pablo nga ingon niana apan makaingon nga kadtong mga taga Corinto nahimong mga Kristohanon tungod sa iyang makugihong mga paningkamot: “Nagsugod ba kita karon sa pagrekomendar sa atong kaugalingon? O kita ba, tingali, sama sa uban, nagkinahanglag sulat sa rekomendasyon nganha kaninyo o gikan kaninyo? Kamo mismo mao ang among sulat, nga nasulat sa among mga kasingkasing ug nailhan ug ginabasa sa tanang katawhan. Kay nakita kamo nga usa ka sulat ni Kristo nga gisulat namo ingong mga ministro, sinulat dili sa tinta kondili sa espiritu sa buhi nga Diyos, dili sa papan nga bato, kondili sa papan nga unod, sa mga kasingkasing.”—2 Corinto 3:1-3.
17. Nganong ikaingon nga si Pablo may igong katakos sa ministeryo, ug bahin niini, unsay ikaingon bahin sa mga Saksi ni Jehova?
17 Pinaagi sa tabang sa espiritu ni Jehova, si Pablo nakasulat ug ubay-ubayng mga basahon sa Bibliya ug nakadanig daghang mga kinabig sa Kristiyanidad. Busa tinuod nga iyang gipamatud-an nga siya may igong katakos sa Kristohanong ministeryo. Sa modernong katumbas, ilabina sukad nga unang gipatik kining basahona sa 1879, ang dinihogang nanghibilin sa mga disipulo ni Kristo, bisan tuod dili dinasig sama kang Pablo, nakagamag daghang literatura sa Bibliya. Sukad sa 1920, sila nakapatik ug libolibo sa minilyong mga libro, mga pulyeto, mga magasin ug tracts sa daghang pinulongan. Kining basahona giapod-apod sa kubos nga bili, ang kadaghanan niini gihatag nga walay bayad sa mga kabus. Mihikay usab ang Watch Tower Society ug libreng mga pakigpulong sa Bibliya ug nakapadalag mga misyonero sa wala pa maabot nga mga teritoryo sa tibuok yuta. Tinagpulo ka libo misanong sa pinatik ug binaba nga balita ug nakapasimbolo sa ilang pahinungod kang Jehova nga Diyos pinaagi sa bawtismo, ilabina sukad sa 1935 nga unang gipatin-aw nga ang dili-maihap nga “dakong panon” sa “ubang karnero” ni Jesus makalantaw sa unahan sa walay kataposang kinabuhi diha sa napasig-uling paraiso sa yuta.—Pinadayag 7:9-17; Lucas 23:43.
18. Kon hagiton sa pagpakitag ebidensiya sa ilang mga kuwalipikasyon ingong mga ministro, unsay ikatudlo sa dinihogang nanghibilin?
18 Busa, komusta kon hagiton sa klero ang dinihogang nanghibilin sa pagpakitag mga diploma ingong mga Doctors of Divinity? Kining mga alagad ni Jehova makapakitag labaw pa kay bililhong ebidensiya! Ilang matudlo karon ang kapin sa tulo ka milyong “ubang karnero” sa tibuok yuta ug makaingon: ‘Anaa ang among sulat sa pagpalig-on!’ Ilang makutlo ang mga pulong ni Pablo ug makapamulong sa mga sakop sa “dakong panon”: “Kamo mismo mao ang among sulat, nga gisulat sa among mga kasingkasing ug nailhan ug ginabasa sa tanang katawhan.” (2 Corinto 3:2) Pasagdi nga basahon sa klero sa Kakristiyanohan kanang buhing sulat nga gilangkoban sa dedikado, bawtismadong mga Kristohanon nga nag-alagad kang Jehova nga Diyos sa adlaw ug sa gabii sa iyang templo ug mitabang sa ‘pagwali sa maayong balita sa gingharian sa tibuok yuta sa pagpamatuod sa tanang kanasoran.’ (Mateo 24:14) Sama sa dinihogang nanghibilin, ilang gipamatud-an ang ilang kaugalingon nga may igong katakos alang sa Kristohanong ministeryo.
19. Unsang tagsaong sulat sa rekomendasyon ang tipigan latas sa Har–Magedon?
19 Kining tagsaong sulat sa rekomendasyon dili mapapha sa umaabot nga “gubat sa dakong adlaw sa Diyos nga Makagagahom” sa simbolikong dapit nga gitawag Har–Magedon. (Pinadayag 16:14-16) Hinunoa, kini pagabantayan ug panalipdan sa Makagagahom nga Diyos aron ikapasundayag tapos sa Har–Magedon nga sistema sa mga butang ilalom ni Kristo nga Hari. Pagkagamhanong sulat unya kanang “dakong panon” alang sa bilyonbilyon sa mga tawong patay nga banhawon ni Jehova nga Diyos, pinaagi ni Jesu-Kristo, gikan sa handumanang mga lubnganan sa tibuok yuta! Busa padayon sa pagsulat, kamong dinihogang nanghibilin! Ug padayon sa pagtabang kanila, kamong “dakong panon” sa Maayong Magbalantay sa “ubang karnero”!
[Mga footnote]
a Unsay Inyong Komento?
◻ Sa unsang paagi gisundog sa mga Saksi ni Jehova si Pablo sa dili pagtinda sa Pulong sa Diyos?
◻ Unsa ang basehanan aron mahimong may igong katakos ang tawo alang sa tinuod nga Kristohanong ministeryo?
◻ Kon dawaton sa mga pangulo sa relihiyon ang kamatuoran, unsang buluhaton nga obligado sila sa pakigbahin?
◻ Ang dinihogang nanghibilin makatudlo sa unsang bililhong sulat nga nagpamatuod nga sila may igong katakos ingong mga ministro?
Pananglitan, tan-awa ang mga parapo 13 ug 14 sa ubos.