Giatubang sa mga Ministro sa Gingharian ang Hagit
“Nan, unsa si Apolos? Oo, unsa si Pablo? Mga ministro nga pinaagi kaniya kamo nahimong mga magtutuo.”—1 CORINTO 3:5.
1. (a) Sa relihiyon, unsa ang ginahagit karon, ug ngano? (b) Unsang imperyo ang ginahagit, ug unsay mahitabo niini?
ANG awtoridad sa mga ministro sa relihiyon ginahagit karon. Dugang ug dugang mao kini ang nahitabo samtang ang mga bahin sa politikal nga kalibotana mibali batok sa relihiyon, lakip sa relihiyong “Kristiyano,” nga nagaisip niini ingong panguwarta. Bisan ang mga graduwado sa relihiyosong mga seminaryo wala na ilha ingong awtorisadong mga ministro ug gidid-an sa mga nasod nga nahimong batok sa relihiyon. Oo, ang kalibotanong imperyo sa bakak nga relihiyon ginaatake ug ginahulga sa tibuok yuta nga pag-atake nga mopahinabog kalaglagan niini. Gitagna kini sa langitnong Awtor sa tinuod nga pagsimba ug mitakdag iyang kaugalingong panahon alang sa katumanan sa iyang tagna. Ang buhi nga mga linalang sa tibuok nga uniberso makapahimulos gikan niining dako nga hitabo!
2. Bahin sa relihiyon, unsay magpabilin ug unsa ang dili magpabilin?
2 Dugang pa, ang pagkawalay relihiyon dili magdugay sa pagmando sa yuta, apan ang nabindikar nga Maglalalang sa uniberso magpabilin! Oo, ug ang tinuod nga relihiyon niining walay kamatayon ug Labing Makagagahom nga Diyos magpabilin! Busa, bisag gilimod sa bilyonbilyon ang mga kamatuoran, sa mismong panahon karon ang mga magbubuhat sa putling pagsimba sa Diyos buhi ug aktibo sa yuta. Ug hangtod karon tinuod ang gipamulong sa miaging mga siglo: “Ang iyang dili-makita nga kinaiya dayag nga makita sukad pa sa pagtukod sa kalibotan, tungod kay ilang naila na pinaagi sa mga butang nga nabuhat, bisan ang iyang walay kataposang gahom ug pagka-Diyos, busa wala silay ikapangulipas.”—Roma 1:20.
3, 4. (a) Unsay pamatuod nga si Jehova adunay mga ministro sa yuta? (b) Sa unsang paagi atong masayran nga mawad-ag trabaho ang mga ministro sa relihiyon sa Babilonyang Bantogan?
3 Sa gisulat kadtong mga pulonga sa panahon sa unang siglo sa atong Komung Panahon, si Jehova nga Diyos may mga ministro na dinhi sa yuta. Busa nakasulat si apostol Pablo: “Nan, unsa si Apolos? Oo, unsa si Pablo? Mga ministro nga pinaagi kaniya kamo nahimong mga magtutuo, sama sa gihatag sa Ginoo diha sa matag usa. Ako ang nagtanom, si Apolos mao ang nagbisbis, apan ang Diyos mao ang nagpatubo.”—1 Corinto 3:5-9.
4 Si Jehova may mga ministro usab karon sa yuta. Apan wala niya gamita ang relihiyosong mga ministro sa Babilonyang Bantogan, ang kalibotanong imperyo sa bakak nga relihiyon. Sa pagkatinuod, mawad-an na unya sila ug trabaho. Mahitabo kana sa dihang laglagon ang Babilonyang Bantogan. Nagtagna bahin niini, ang Pinadayag 16:19 nag-ingon: “Ang bantogang siyudad nabuak sa tulo ka bahin, ug ang mga siyudad sa kanasoran nangagun-ob; ug unya ang Diyos mahinumdom sa Babilonyang Bantogan, sa paghatag kaniya sa kopa sa bino sa kapintas sa iyang kasuko.”
5. Unsay nahitabo sa karaang Babilonya sa 539 W.K.P., ug komusta ang mga ministro ug ubang mga tigpaluyo sa mga relihiyon sa Babilonyang Bantogan?
5 Apan komusta man usab kadtong mga tawo nga nagapabiling maunongong mga sumusunod sa relihiyosong mga sistema nga gialagaran sa propesyonal nga mga ministro sa Babilonyang Bantogan? Buweno, tagda ang nahitabo sa gabii sa 539 W.K.P. sa dihang si Haring Belsasar ug ang iyang halandong mga dinapit naghimaya sa mga diyosdiyos sa Babilonya diha sa dakong kombira sa paghagit sa misulong nga mga Medianhon ug mga Persianhon. Una, dihay pasidaan nga gihatag sa mga nanaghudyaka sa ilang nakita ang milagrosong sinulat sa kamot sa pader sa dapit nga gikombirahan ug nakadungog sa interprestasyon nga gihatag sa manalagna ni Jehova nga si Daniel. Tapos nga napukan ang Babilonya niadto mismong gabhiona, ang hari ug tingali ang ubang mga nanaghudyaka nga naghimaya sa bakak nga mga diyos gipamatay sa misulong nga mga kaaway. (Daniel, kapitulo 5) Ang samang katalagman nagahulat sa mga ministro ug niadtong nagapabiling maunongon sa relihiyosong mga sistema sa Babilonyang Bantogan.
Dinalian nga Panginahanglan sa mga Ministro sa Diyos
6. (a) Niining malisod nga panahon, unsa ang kinahanglang mabatonan sa Diyos alang sa tawhanong banay? (b) Kanus-a natapos ang panahon sa mga Hentil, ug unsay gipamulong ni Jesus bahin niini?
6 Walay bisan usa ang makataronganong makaduhaduha sa kamatuoran nga kita karon nagkinabuhi na sa malisod nga yugto sa tawhanong kasaysayan sukad sa tibuok yutang Lunop sa mga adlaw ni Noe. (2 Timoteo 3:1-5) Busa kinahanglan nga karon adunay tinuod nga mga ministro sa Diyos ni Noe. Siempre, sama nga mihatag si Jehova ug mga pasidaan sa katawhan sa mga adlaw ni Noe ug sa nanaghudyaka sa kombira ni Belsasar, Siya may dinaliang balita alang sa tawhanong banay sukad sa 1914, sa dihang miulbo ang unang gubat sa kalibotan. Sa pagkatinuod, sa masangkaron nga sukod, sa mga upat na ka dekada ang mga alagad sa Diyos nagtudlo niadtong tuiga nga nagtimaan sa kataposan sa Panahon sa mga Hentil, nga mahitungod niini si Jesus miingon: “Ang Jerusalem pagayatakan sa mga Hentil, hangtod matuman na ang mga panahon sa mga Hentil.”—Lucas 21:24, King James Version.
7. (a) Hangtod kanus-a nga giyatakan ang Jerusalem sa dili dili-Hudiyohanong kanasoran? (b) Unsay gipunting ni Jesus sa kataposan sa dihang naghisgot sa Jerusalem nga “pagayatakan sa mga Hentil”?
7 Hapit 53 ka tuig tapos sa 1914, o hangtod sa Unom-ka-Adlaw nga Gubat sa 1967, ang yutan-ong Jerusalem nagpadayon nga giyatakan sa dili Hudiyohanong kanasoran. Apan, sa matin-aw, wala magpunting si Jesus sa Hudiyohanong Jerusalem karon kondili nianang gihulagwayan sa siyudad hangtod sa 607 W.K.P. Ug unsay gihulagwayan niini? Walay lain kondili ang Gingharian ni Jehova nga Diyos pinaagi sa iyang dinihogang Hari sa harianong banay ni David!—Lucas 1:32; 1 Cronicas 29:11.
8. Ngadto kang kinsa gihatag ni Jehova ang gingharian ni David, ug nganong dili makakita ang mga tawo sa gitagnang paglingkod sa trono?
8 Si Jesu-Kristo mao ang hatagan ni Jehova nga Diyos sa gingharian sa iyang kagikan nga si David sa karaan. Atubangan kang Pilato nga maghuhukom, si Jesus miingon nga ang Iyang Gingharian dili bahin niining kalibotana, nga nagkahulogan nga kini langitnon. (Juan 18:36) Nan, makataronganon nga ang umaabot nga paglingkod ni Jesus diha sa Gingharian mahitabo sa dili-makitang kalangitan. Busa ang iyang pagkahari dili-makita sa tawhanong mga mata, ug maoy hinungdan nga kita ug ang Hentil nga kanasoran dili makakita sa literal sa iyang paglingkod diha sa iyang tukmang dapit, ang hinatag sa Diyos nga Gingharian sa 1914. Kadtong mga nasora sa tinuod wala magtuo nga nahitabo kini, bisan pa sa kamatuoran nga ginawali kini sa katawhan ni Jehova sukad sa katuigang 1870.
9. (a) Unsay gihimo sa kanasoran nga wala magtagad sa balita sa Gingharian? (b) Tungod sa gihimo sa kanasoran sa 1914, unsa ang kinahanglang buhaton?
9 Wala magtagad sa balita sa Gingharian, sa tinghunlak sa 1914 ang kanasoran okupado sa gubat. Sumala sa gitagna sa Salmo 2:1-12, ilang gipakita ang ilang kaugalingon nga mga kaaway ni Jesus, midumili sa “paghalok” sa bag-ong nakalingkod nga Hari ingong timaan sa ilang pagpasakop ug pagkamaunongon. Busa, kinahanglang matuman ang Salmo 110:1, 2, nga atong mabasa: “Si Jehova miingon sa akong Ginoo: ‘Lumingkod ka sa akong tuong kamot hangtod nga ibutang ko ang imong mga kaaway nga tumbanan sa akong mga tiil.’ Ang bara sa imong kalig-on igapadala ni Jehova gikan sa Sion, nga nagaingon: ‘Maghari ka taliwala sa imong mga kaaway.’”
10. (a) Ilalom sa unsang mga kahimtang nga nagsugod si Jesus sa pagmando sa 1914? (b) Kinsa ang mga hawas ni Jehova sa ika-20ng siglo?
10 Gipakita sa magsusupak nga Hudiyohanon ang ilang kasuko sa mga apostoles ni Jesus sa milingkod si Jesus sa tuong kamot sa Diyos sa paghulat sa panahon sa pagsugod sa pagmando taliwala sa iyang mga kaaway. (Buhat 4:24-26) Maingon man, sa taliwala sa mga kaaway nga ang gihimayang Jesu-Kristo misugod sa iyang pagmando sa kataposan sa Panahon sa mga Hentil sa 1914. Busa niining ika-20ng siglo, sama sa nangagi, diha sa taliwala sa mga kaaway nga gibangon ni Jehova ang mga magdadala sa iyang balita, ang iyang tinuod nga mga ministro sa Gingharian. Sila maoy iyang mga saksi.—Isaias 43:10-12.
Pagpanalipod sa Atong Kuwalipikasyon Ingong mga Ministro
11. Kinsa ang mihagit sa katungod sa mga Saksi ni Jehova ingong ordinado sa Diyos nga mga ministro sa Gingharian?
11 Sa tibuok panahon, nahimong hinungdanon alang sa tinuod nga ordinado sa Diyos nga mga ministro sa Gingharian sa pagpanalipod sa ilang katungod alang sa ministeryo. Ilabinang tinuod kana sa mga Saksi ni Jehova niining ika-20ng siglo. Ang ilang kuwalipikasyon ingong ordinadong mga ministro sa Diyos gihagit ug wala ilha. Kang kinsa? Sa mga graduwado sa mga seminaryo sa teolohiya sa Kakristiyanohan kinsa nakadawat ug diploma sa ordinasyon ug nahimong suweldadong klerigo. Ilang giisip ang ilang kaugalingon nga nakatungha sa husto ug may igong katakos nga mahimong bugtong propesyonal nga mga ministro sa Diyos sa Bibliya.
12. Ang katungod sa unsang iladong unang siglong Kristohanon ang gihagit, ug sa unsang paagi gilantaw ang tawo nga may lahi nga matang sa maayong balita?
12 Kaamgid kining kahimtanga sa unang siglo K.P. Diha sa Romanong lalawigan sa Galacia, bisan ang dinasig nga magsusulat sa hapit katunga sa mga libro sa Kristohanong Gregong Kasulatan nakaagi ug hitabo nga naghagit sa iyang kuwalipikasyon ingong apostol ni Jesu-Kristo, kay gihagit ang pagkatukma sa iyang gipanudlo nga mao ang Kristiyanidad. Busa napugos siya sa pagpahayag sa mga taga Galacia: “Nahibulong ako nga sa kalit mitalikod kamo sa Usa nga nagtawag kaninyo sa dili-takos nga kalulot ni Kristo ug mibali kamo ngadto sa laing maayong balita. Apan dili sa lain; kondili adunay nanagpagubot kaninyo ug buot magatuis sa maayong balita mahitungod kang Kristo. Apan bisan pa kon kami, o usa ba ka manulonda nga gikan sa langit magawali kaninyog maayong balita nga supak sa amo nang gikawali kaninyo, ipatunglo siya. Sumala sa amo nang gikaingon kaniadto, usbon ko karon ang pag-ingon, nga kon adunay magawali kaninyo ug maayong balita nga supak sa inyo nang nadawat, ipatunglo siya.”—Galacia 1:6-9.
13. Nganong dili angay tahapan sa mga taga Galacia ang katungod ni Pablo?
13 Matuod, kanang maong magsusulat, si apostol Pablo, wala makakat-on sa Kristohanong mga pagtulon-an sa personal nga kontak uban kang Jesu-Kristo o sa Iyang 12 ka apostoles. Sa ulahi, migugol si Pablo ug pila ka panahon uban kang apostol Pedro, o Cefas. (Juan 1:42; Galacia 1:18, 19) Apan sa pagpanalipod sa iyang pagkahimong kuwalipikadong ministro sa maayong balita nga gikan sa Diyos pinaagi kang Kristo, nakapahayag si Pablo sa mahuyang nga mga Kristohanon sa Galacia: “Oo, sa ilang pagkakita sa dili-takos nga kalulot nga nahatag kanako, si Santiago ug Cefas ug Juan, ang mga gipanag-ila nga mao ang mga haligi, mihatag kanako ug kang Bernabe sa tuong kamot sa pakig-ambitay, aron kami managpangadto sa kanasoran, ug sila ngadto sa may sirkunsisyon.” (Galacia 2:9) Hayan kadtong mga taga Galacia angay nga mangutana sa ilang kaugalingon: Kon ang mga disipulo ni Jesus nga si Santiago, Pedro, ug Juan miila kang Pablo ingong magdadala sa tinuod nga maayong balita, unsay atong basehanan sa paghagit sa iyang balita ug magpalayo gikan niana?
14. Nganong dili katingalahan nga hagiton ang pagkaministro sa mga Saksi ni Jehova?
14 Apan komusta ang katawhan ni Jehova karon? Buweno, sanglit ang tawo nga sama kang Pablo napugos sa pagpanalipod sa iyang mga kuwalipikasyon ingong ministro sa Diyos ug ni Kristo, nganong ikatingala nato kon kita, ingong dedikado, bawtismadong saksi ni Jehova, hagiton ug kinahanglang magapanalipod sa atong baroganan ingong mga ministro sa Gingharian? Siempre, sama sa kahimtang ni Pablo, kanang walay gibasehang hagit kanato walay ginapamatud-an.
Bisan si Jesus Gihagit
15. Kinsa, nga mas taas kay sa mga apostoles, ang gihagit usab bahin sa iyang katungod sa pagpanudlo, ug kinsay iyang gipasidunggan sa iyang awtoridad?
15 Ang Ginoong Jesu-Kristo mismo gihagit ug giatubang sa pagkadili-mainandamon sa iyang kaugalingong katawhan sa pagdawat kaniya ingong awtorisadong ministro sa Diyos. Pananglitan, atong mabasa: “Ug sa nanungatunga na ang piyesta [sa mga balongbalong], si Jesus misaka sa templo ug nanudlo. Busa ang mga Hudiyo nahibulong niini, nga nanag-ingon: ‘Naunsa ba nga may hingkat-onan man kining tawhana, nga wala man unta siya makaeskuyla?’” Prangkang gitubag ni Jesus kanang hagita, nga nag-ingon: “Ang gitudlo ko dili akong kaugalingon, kondili iya sa nagpadala kanako. Kon adunay nagatinguha sa pagbuhat sa Iyang kabubut-on, iyang mahibaloan kon ang akong gitudlo gikan sa Diyos o nagsulti ba lamang ako sa kinaugalingon kong pagbulot-an. Ang bisan kinsa nga nagasulti sa iyang kinaugalingong pagbulot-an nagapangita sa iyang kaugalingong kadungganan; apan ang bisan kinsa nga nagapangita sa kadungganan sa nagpadala kaniya, tinuod kini siya, ug wala kaniya ang pagkadilimatarong.”—Juan 7:14-18.
16. Nganong ang relihiyosong mga pangulo sa Hudaismo nagtuo nga sila may katarongan sa paghagit sa katakos ni Jesus sa pagpanudlo?
16 Ang relihiyosong mga pangulo sa Hudaismo nagtan-aw kang Jesu-Kristo ingong timawang taga Galilea. Siempre, wala sila magtuo nga dili siya makabasa tungod kay wala makatungha, sama sa seminaryo sa teolohiya. Gawas pa, nakapakita na si Jesus nga makabasa siya sa teksto sa Hebreohanong Kasulatan. (Lucas 4:16-21) Ang dili madawat sa mga Hudiyo sa Judea ug sa Jerusalem mao nga kining panday sa miagi dili usa ka teologo ug dili maisip nga sakop sa mga eskriba, mga Pariseo, ug mga Saduceo sa ilang nasod. Nan, nganong nagpatuo siya sa katilingban nga nahibalo siya kon unsay gipasabot sa Hebreohanong Kasulatan ug unsay aplikasyon niini, nga nagsulti nga may awtoridad sama sa iyang gihimo? Kini maoy hinungdan kon nganong tinuod nga bungol ang mga Hudiyo sa pagpaminaw sa espirituwal nga mga butang aron maila ang taginting sa balaang kamatuoran. Mapahitas-on ra kaayo sila sa pagdawat sa butang nga gikan sa usa ka tawo nga wala makagraduwar sa teolohikal nga tunghaan.
“Tudloan ni Jehova”
17. May kalabotan kang Jesu-Kristo, kinsa nga Magtutudlo ang nakalimtan sa Hudiyohanong mga pangulo sa relihiyon, ug unsang matanga sa estudyante si Jesus?
17 Kadtong maalamon sa kalibotan nga mga Hudiyo nagsalikway sa Usa nga nagtudlo kang Jesu-Kristo. Ang katakos ni Jesus ingong magtutudlo nagagikan sa “labing dakong magtutudlo sa tanan,” si Jehova nga Diyos! (Job 36:22, Today’s English Version) Naghisgot sa maong katakos sa Diyos, si Jesus miingon: “Sa diha nga matuboy na ninyo ang Anak sa tawo, nan inyong mahibaloan nga ako mao siya, ug nga wala akoy ginabuhat sa kaugalingon kong pagbulot-an; hinunoa nga nagasulti ako sa ingon sumala sa gitudlo kanako sa Amahan.” (Juan 8:28) Busa gipakita ni Jesus ang iyang kaugalingon nga labing hawod nga estudyante sa unibersohanong tunghaan sa labing hataas nga Magtutudlo nga naglungtad. Kini maoy kadungganan sa Usa nga nagtudlo kaniya. Dili ikahibulong nga ang mga taga Nazaret nakasulti niini sa ilang katagilungsod niadto: “Diin ba makuha niining tawhana ang iyang kaalam ug kining gamhanong mga buhat?”—Mateo 13:54.
18. (a) Unsang matanga sa magtutudlo ang gusto nato? (b) Unsay gipamulong ni Jesus bahin sa labing dakong Magtutudlo ug kadtong gitudloan Niya?
18 Aron masabtan ang Bibliya, kita nagkinahanglan sa labing maayong magtutudlo kon maarangan. Ug kana nga magtutudlo mao ang Tigdasig nianang dili-hitupngang Libro. Nagsulti ngadto kanila nga mga sakop nianang makita, yutan-ong organisasyon sa Magtutudlo sa panahon sa iyang kinabuhi sa yuta, si Jesus miingon: “Walay makahimo sa pag-ari kanako gawas lamang kon ang Amahan, nga nagpadala kanako, magadani kaniya; ug pagabanhawon ko siya sa kataposang adlaw. Kini ang nahisulat sa mga Propeta, ‘Ug silang tanan tudloan ni Jehova.’ Ug ang tanan nga nakadungog ug nakakat-on sa Amahan magaari kanako.” (Juan 6:44, 45) Si Jesus didto mikutlo sa Isaias 54:13, nga mabasa: “Ug ang tanan nimong mga anak maoy mga tawo nga tudloan ni Jehova, ug dagaya ang kalinaw sa imong mga anak.”
19. Kang kinsang “mga anak” ang tudloan ni Jehova?
19 Apan, kita mangutana: Kang kinsang “mga anak” nga mahimong “mga tawo nga tudloan ni Jehova”? Kanang matagnaong saad gihatag ngadto sa malarawanong “babaye,” nga umaabot nga inahan sa pila ka “mga anak,” o kabataan. Kining maong “babaye” mao ang usa nga gisultihan sa Isaias 54:1, nga niini mabasa: “Pag-awit, Oh babaye nga apuli nga wala manganak! Hunat sa pag-awit ug suminggit ka sa makusog, ikaw nga wala gayod makaagi sa kasakit sa pagpanganak, kay ang mga anak sa biniyaan mas daghan kay sa mga anak sa babayeng adunay bana,’ miingon si Jehova.”
20. Sumala sa gipahayag sa 2 Corinto 13:5, unsa ang kinahanglang padayong buhaton sa dedikadong mga Kristohanon, ug unsay kalabotan niini sa ilang mga kuwalipikasyon ingong mga ministro sa Gingharian?
20 Sanglit si Jehova mao ang Usa nga nagpamulong ngadto niini nga “babaye” ug mahimong Magtutudlo sa iyang “mga anak,” nan siya mao ang iyang malarawanong Bana, ug siya mao ang iyang samag-asawang langitnong organisasyon. Ang iyang “mga anak,” o kabataan, maoy mga estudyante sa “labing dakong magtutudlo sa tanan.” Siempre, hinungdanon nga kadtong maong “mga anak,” ang dihinogang mga sumusunod ni Jesus, ug ilang mga kauban, ang “dakong panon,” padayong magpadapat sa instruksyon nga ihatag ni Jehova. (Pinadayag 7:9) Mao gayod kana ang usa ka paagi sa pagsunod sa tambag ni Pablo: “Susiha kanunay ang inyong kaugalingon kon kamo anaa ba sa pagtuo, pamatud-i kanunay kon unsa kamo.” (2 Corinto 13:5) Kon ang dedikado, bawtismadong mga Kristohanon magpadayon sa pagbuhat niini ug magpabiling makugihong mga estudyante sa labing dakong Magtutudlo, mabatonan gayod nila ang gikinahanglang kuwalipikasyon ingong mga ministro sa Gingharian nga awtorisado ni Jehova. Atong susihon sunod kon unsaon sa pagpamatuod sa mga ministro sa Diyos ang ilang kuwalipikasyon.
Unsay Imong Ikasulti?
◻ Sa unsang paagi imong mapamatud-an nga adunay mga ministro si Jehova sa yuta?
◻ Unsay gihulagwayan sa Jerusalem nga “giyatakan sa mga Hentil?”
◻ Sanglit wala tagda sa kanasoran ang Gingharian, unsay buhaton ni Jesus?
◻ Nganong dili katingalahan nga ang pagkaministro sa mga Saksi ni Jehova gihagit?
◻ Unsay nakalimtan sa relihiyosong mga pangulo sa mga Hudiyo nga mihagit sa katakos ni Jesus sa pagpanudlo?