Gipahayag nga Matarong “Alang sa Kinabuhi”
“Pinaagi sa usa ka buhat sa pagkamatarong ang dangatan . . . mao ang pagpahayag kanilang matarong alang sa kinabuhi.”—ROMA 5:18.
1. Kinsa ang gigutom ug giuhaw sa pagkamatarong, ug sa unsang paagi mapatagbaw ang ilang tinguha?
“MALIPAYON ang gigutom ug giuhaw sa pagkamatarong, kay sila pagabusgon.” (Mateo 5:6) Kining pagkauhaw sa pagkamatarong bug-os nga mapatagbaw dili lamang alang kanila nga “iya sa gingharian sa langit” kondili ngadto usab sa “magapanunod sa yuta.” (Mateo 5:10; Salmo 37:29) Kining duha ka matang makabahin sa paglaom nga gipadayag ni apostol Pedro sa misulat siya: “Adunay bag-ong langit ug usa ka bag-ong yuta nga atong ginapaabot sumala sa iyang [sa Diyos] saad, diin magapuyo ang pagkamatarong.” (2 Pedro 3:13) Oo, nagsaad si Jehova nga Diyos ug matarong bag-ong langitnong kagamhanan, “ang gingharian sa langit,” ug usa ka matarong “bag-ong yuta,” o tawhanong katilingban diha sa paraisong yuta.
2. Unsay relasyon ang naglungtad tali kang Jehova, sa pagkamatarong, ug sa atong paglaom alang sa malinawon Bag-ong Kahikayan?
2 Apan unsa man gayoy kahulogan sa matarong bag-ong langit ug usa ka matarong bag-ong yuta? Kini nagkahulogan nga ang bag-ong langitnong kagamhanan ug katawhan sa yuta nga mandoan niana kinahanglang moila sa sukdanan sa Diyos sa matarong ug sa daotan. Si Jehova mao “ang puloy-anan sa pagkamatarong.” (Jeremias 50:7) Ang pagkamatarong mao ang patukoranan sa iyang soberinidad, o nahimutangan sa trono sa uniberso. (Job 37:23, 24; Salmo 89:14) Aron adunay kalinaw sa uniberso, ang mga linalang ni Jehova kinahanglang moila sa iyang katungod sa pagtukod ug mga sukdanan kon unsa ang matarong ug daotan. Sa ingon, ang atong paglaom sa usa ka matarong Bag-ong Kahikayan nagadepende sa pagsunod ni Jehova sa iyang mga sukdanan.—Salmo 145:17.
3. Tungod sa bug-os nga pagkamatarong ni Jehova, unsang mga pangutana ang mobangon sa hunahuna?
3 Busa mobangon ang pangutana kon sa unsang paagi tagdon sa balaan ug matarong nga Diyos si Jehova ang dili-matarong nga mga makasasala. (Itandi sa Isaias 59:2; Habakkuk 1:13.) Sa unsang paagi siya, samtang nagpabiling matinumanon sa iyang hataas nga mga sukdanan sa pagkamtarong, mopili gikan sa mga makasasala niadtong makabahin sa matarong kagamhananong “bag-ong langit” ug sa pagdawat ingong iyang mga higala kadtong mahimong bahin sa matarong “bag-ong yuta”? Sa pagtubag niini, kinahanglang atong sabton ang doktrina sa Bibliya sa pag-isip, o pagpahayag nga matarong.
Usa ka Maluloy-ong Kahikayan sa Pagbayad sa Utang
4. Nganong ang nangahulog nga katawhan dakog utang sa Diyos, ug nganong dili kita makabayad niining utanga?
4 Diha sa Kasulatan, gipakasama ang mga sala sa mga utang. (Tan-awa ang Mateo 6:12, 14; 18:21-35; Lucas 11:4.) Ang tanang tawo makasasala ug busa, dakog utang atubangan sa Diyos. “Ang bayad sa sala mao ang kamatayon.” (Roma 6:23) Sanglit sila “gibaligya ilalom sa sala” sa ilang kagikang si Adan, ang iyang mga kaanakan walay mahimo aron makabayad niining dako nga utang. (Roma 7:14) Ang kamatayon sa nakautang ang makaimpas niini, “kay ang tawong patay na nakagawas na sa iyang sala.” (Roma 6:7) Walay maayong mga buhat nga nahimo sa bug-os nga kinabuhi sa makasasala ang makapalit ug balik sa giwala ni Adan, gani dili usab kini makahatag kaniya ug matarong nga baroganan atubangan sa Diyos.—Salmo 49:7, 9; Roma 3:20.
5. Sa unsang paagi mitagana si Jehova ug kahupayan sa makasasalang katawhan samtang nagtamod gihapon sa iyang hingpit nga pagkamatarong?
5 Sa unsang paagi makahatag si Jehova ug kahupayan alang sa nangahulog nga katawhan nga walay pagkompromiso sa iyang kaugalingong mga sukdanan sa pagkamatarong? Ang gipasiugda sa tubag mao ang kaalam ug dili-takos nga kalulot ni Jehova. Matahom kaayong pagkabatbat kini ni apostol Pablo diha sa iyang sulat ngadto sa mga taga Roma. Siya misulat: “Kini maoy libreng gasa nga sila [mga makasasala] gipahayag nga matarong pinaagi sa iyang dili-takos nga kalulot pinasikad sa pagtubos nga gibayad ni Jesu-Kristo. Gitanyag siya sa Diyos ingong halad pasig-uli pinaagi sa pagtuo sa iyang dugo. Kini maoy pagpakita sa iyang kaugalingong pagkamatarong, tungod kay iyang gipasaylo ang mga kasal-anan nga nangahimo sa nangagi tungod sa pagkamainantuson sa Diyos; aron ikapakita ang iyang kaugalingong pagkamatarong karong panahona, sa ipahayag nga matarong ang tawo nga may pagtuo kang Jesus.”—Roma 3:24-26.
6. (a) Sa unsang paagi ang sukdanan sa pagkamatarong ni Jehova napatagbaw pinaagi sa halad ni Kristo ug andam si Jehova sa pagbuhat ug unsa? (b) Sa unsang paagi pahamtangan sa Diyos ug pagkamatarong ang tawong may pagtuo?
6 Pinaagi sa iyang dili-takos nga kalulot, gidawat ni Jehova ang halad ni Jesus alang sa mga kaanakan ni Adan. (1 Pedro 2:24) Kadto maoy usa ka katumbas, o katugbang, nga halad sa pagpakita nga, ingong tawong hingpit, gipalit ug balik ni Jesus kanang giwala sa hingpit nga tawong si Adan. (Tan-awa ang Exodo 21:23; 1 Timoteo 2:6.) Napatagbaw ang katarongan, sa mahigugmaon si Jehova andam sa “pagpapas,” kun ‘pagwala,’ sa mga sala nga nahimo sa “tawo nga may pagtuo kang Jesus.” (Isaias 44:22; Buhat 3:19) Kon magpabiling matinumanon kining tawhana, dili lang kay magpugong si Jehova sa ‘pagpaningil sa iyang mga kalapasan’ kondili Iyang pahamtangan pa gayod siya ug pagkamatarong. (2 Corinto 5:19) Pinaagi niining maluloy-ong kahikayan sa pagbayad sa utang, ‘daghan ang nahimong mga matarong.’ (Roma 5:19) Kini maoy usa ka bahin sa pag-sip nga matarong, ang buhat sa Diyos diin ang usa ka tawo lantawong walay sala. (Buhat 13:38, 39) Kinsa ang giisip nga mga matarong, o gipahayag nga matarong, niining sistemaha sa mga butang?
144,000 nga “mga Balaan”
7. Sa unsang paagi gipahayag nga matarong si Kristo, ug busa unsay nahimong posible?
7 Matuod, si Jesus wala magkinahanglag utang sa pagkamatarong, sanglit siya tinuod man nga matarong. (1 Pedro 3:18) Nakapamatuod nga matinumanon bisan sa kamatayon ingong tawong hingpit (“ang kataposang Adan”) ug nakahalad sa iyang katungod sa kinabuhi dinhi sa yuta, gibanhaw si Jesus sa iyang Amahan, si Jehova. Si Jesus “gipahayag nga matarong diha sa espiritu,” nga mao, gitawag nga matarong sa iyang kaugalingong katakos ug gibanhaw ingong “espiritu nga nagahatag ug kinabuhi.” (1 Corinto 15:45; 1 Timoteo 3:16) Pinaagi sa iyang gihalad nga kamatayon, siya nakataganag basehanan diin si Jehova magpahamtong ug pagkamatarong sa mga lalaki ug mga babaye sa pagtuo.—Roma 10:4.
8, 9. (a) Kinsa ang unang makapahimulos sa pagpahamtang ug pagkamatarong, ug ngano? (b) Kinsa ang naglangkob sa “bag-ong langit,” ug kinsay ilang mandoan?
8 Sa makataronganon, kadtong pilion ni Jehova nga maglangkob sa matarong “bag-ong langit,” o kagamhananong Gingharian ilalom ni Haring Jesu-Kristo, mao ang unang bug-os makapahimulos niining maluloy-ong kahikayan niining sistemaha sa mga butang. Ang basahon ni Daniel naglarawan sa seremonya sa langit diin si Kristo, ang Anak sa tawo, nakadawat sa “paggahom ug himaya ug gingharian,” aron “ang mga katawhan, mga nasod ug mga pinulongan [sa yuta] manag-alagad kaniya.” Dayon gipakita ni Daniel nga “ang gingharian ug ang paggahom” ihatag usab ngadto sa “mga balaan sa Usa nga Supremo,” si Jehova.—Daniel 7:13, 14, 18, 27; itandi sa Pinadayag 5:8-10.
9 Ang gidaghanon niining “mga balaan” nga gipili sa pagmando uban sa Kordero nga si Jesu-Kristo sa langitnong Bukid sa Sion gibutyag nga 144,000, nga “gipalit gikan sa katawhan.” (Pinadayag 14:1-5) Kini sila, uban kang Kristo, maglangkob sa matarong “bag-ong langit“ sa bag-ong sistema sa mga butang ni Jehova.
Giisip nga Matarong—Sa Unsang Paagi ug Ngano?
10. (a) Unsang basahona sa Bibliya ang naghatag ug labing klarong katin-awan bahin sa pag-isip nga matarong, ug alang kang kinsa nga kini gisulat? (b) Kinsa ang pangunang nalangkit sa doktrina sa Bibliya sa pag-isip nga matarong?
10 Ang basahon sa Bibliya nga naghatag klarong katin-awan sa pagtawag sa Diyos sa mga tawo nga matarong mao ang sulat ni Pablo ngadto sa mga taga Roma. Makaikag, iyang gipahayag kining sulata ngadto niadtong “gitawag nga mga balaan.” (Roma 1:1, 7) Kini maoy hinungdan kon nganong ang doktrina sa “pag-isip nga matarong,” o pagpahayag nga matarong sumala sa gipadayag ni Pablo, gigamit diha sa 144,000 nga “mga balaan.”
11. Unsay relasyon sa pagtuo, binuhatan, ug pag- isip nga matarong?
11 Ang gipasiugda sa pangatarongan ni Pablo sa Roma mao nga walay Hudiyo o Hentil ang makabaton ug matarong nga baroganan atubangan sa Diyos pinaagi sa mga binuhatan, bisan ug himoon kini sa pagsunod sa Moisesnong Kasugoan o agig pagtahod sa kinaiyanhong moral nga kasugoan. (Roma 2:14, 15; 3:9, 10, 19, 20) Ang mga Hudiyo ug mga Hentil mahimong ipahayag nga matarong pinaagi lamang sa pagtuo sa halad lukat ni Kristo. (Roma 3:22-24, 29, 30) Apan, ang tambag sa panapos nga mga kapitulo sa Roma (12-15) nagpakita nga kanang pagtuoha kinahanglang paluyohan sa diyosnong mga binuhatan, sumala sa gipatin-aw ni Santiago. (Santiago 2:14-17) Kining maong mga binuhatan magpamatuod nga ang pag-isip nga matarong nga mga Kristohanon may pagtuo nga gikinahanglan aron pakamatarongon sa Diyos.
12, 13. (a) Nganong ang 144,00 nga “mga balaan” kinahanglang ipahayag nga matarong? (b) Unsay ilang buhaton sa mga katungod sa kinabuhi nga ilang madawat?
12 Busa, unsay katarongan kon nganong ang mga Kristohanong “gitawag nga mga balaan” kinahanglang ipahayag mga matarong? Dinhi mosulod ang ikaduhang bahin sa pag-isip nga matarong, nga mao, ang pagpahayag sa Diyos sa usa ka tawo nga takos sa kinabuhi ingong Iyang hingpit tawhanong anak. Tungod sa katungdanan nga ilang buhaton diha sa matarong “bag-ong langit,” kinahanglang isalikway ug ihalad sa walay kataposan sa 144,000 ang paglaom sa kinabuhing walay kataposan sa yuta. (Salmo 37:29; 115:16) Niini nga diwa sila mamatay sa hinalad nga kamatayon. Sila ‘nagapasakop sa kamatayon sama kang Kristo.’—Filipos 3:8-11.
13 Karon, kaharmoniya sa prinsipyo nga gihatag diha sa Moisesnong Kasugoan, ang tanang halad nga itanyag kang Jehova kinahanglang walay depekto. (Levitico 22:21; Deuteronomio 15:21) Ang 144,000 nga “mga balaan” gihisgotan nga “mga matarong nga gihimong hingpit.”—Hebreohanon 12:23.
Gisagop Ingong Espirituwal nga mga Anak
14, 15. (a) Unsang kausaban mahitungod sa kasalanan ang mahiagoman sa 144,000? (b) Sa unsang paagi banhawon sila ngadto sa “kabag-o sa kinabuhi”?
14 Samtang buhi pa sa unod, kining “mga matarong” makaagom ug simbolikong kamatayon. Si apostol Pablo mibatbat: “Sa pagkakita nga kita namatay na ngadto sa sala, unsaon pa man nato sa pagpakabuhi pa diha niana? O wala ba kamo mahibalo nga kitang tanan nga nabawtismohan ngadto kang Kristo Jesus gibawtismohan man ngadto sa iyang kamatayon? Busa pinaagi sa bawtismo gilubong kita uban kaniya ngadto sa kamatayon, aron nga, maingon nga si Kristo gibanhaw gikan sa mga patay pinaagi sa himaya sa Amahan, kita usab managgawi diha sa kabag-o sa kinabuhi . . . tungod kay kita nahibalo nga ang atong karaang pagkatawo gilansang uban kaniya, aron dili na kita maulipon sa sala. Kay ang tawong patay nakagawas na gikan sa iyang sala.”—Roma 6:2-7.
15 Sa panahon sa ilang tawhanong kinabuhi, ang 144,000 nga “mga balaan,” diin diyutay na lamang ang nanghibilin sa yuta ning panahona sa kataposan, ‘mamatay tungod sa kasal-anan.’ Tapos sa ilang simbolikong kamatayon, kadtong “gitawag nga mga balaan” banhawon ngadto sa “kabag-o sa kinabuhi.” Human nga gipahayag sila nga matarong, si Jehova may katarongan na karon sa pagsagop kanila pinaagi sa iyang espiritu ingong iyang espirituwal “mga anak.” Sila “gianak pag-usab” ug gisagop ingong “mga anak sa Diyos.” (Juan 3:3; Roma 8:9-16)* Sila mahimong espirituwal nga mga Israelitas ug giagak ngadto sa bag-ong pakigtugon.—Jeremias 31:31-34; Lucas 22:20; Roma 9:6.
Mga Manununod sa Pagkasaserdote ug Pagkahari
16. Sa unsa nga mahimong mga manununod ang 144,000 ng “mga balaan”?
16 Ingong sinagop nga espirituwal nga “mga anak” sa Diyos, ang 144,000 nga “mga balaan” nahimo usab nga ‘mga manununod.’ (Galacia 4:5-7) Si Pablo misulat ngadto sa kaubang inanak-sa-espiritung mga Kristohanon: “Kon, kita, mga anak, nan, manununod usab kita: mga manununod sa Diyos, ug isigkamanununod uban kang Kristo, kon kita moantos uban kaniya aron pagahimayaon usab kita uban kaniya.” (Roma 8:17) Unsa ang panulondon ni Kristo? Gihimo siya ni Jehova nga usa ka Hari-Saserdote “sumala sa paagi ni Melquisedec sa walay kataposan.” (Hebreohanon 6:19, 20; 7:1) Ingong “kaubang mga manununod” ni Kristo, ang inanak-sa-espiritu nga mga Kristohanon gitudlo usab ni Jehova ingong espirituwal nga mga saserdote. (2 Corinto 1:21; 1 Pedro 2:9) Dugang pa, ang usa sa kinataposang tumong sa pagtawag kanilang matarong ni Jehova mao ang ilang umaabot nga “pagmando ingong mga hari sa kinabuhi pinaagi sa usa ka tawo, si Jesu-Kristo.”—Roma 5:17.
17. (a) Bisag gipahayag nga matarong, unsay kinahanglang buhaton sa dinihogang mga Kristohanon sa adlaw-adlaw? (b) Sa unsang paagi ilang madawat ang ilang ganti?
17 Samtang dinhi pa sa yuta. kining dinihogang mga Kristohanon, bisan ug gipahayag nga matarong, makig-away pa sa ilang makasasalang nga kiling. (Roma 7:15-20) Gikinahanglan nila ang dugo ni Kristo sa paghinlo kanila sa ilang adlaw-adlawng mga kasal-anan sa pagkadili-hingpit. (1 Juan 1:7; 2:1, 2) Kon magpabilin silang matinumanon hangtod sa kataposan sa ilang yutan-ong kinabuhi, sila sa literal mamatay ug banhawon “sa usa ka dili madunot ug dili mabuling ug dili malawos nga panulondon” ingong bahin sa matarong “bag-ong langit.”—1 Pedro 1:3, 4; 2 Pedro 3:13.
“Nagapaabot sa Pagpadayag sa mga Anak sa Diyos”
18, 19. (a) Unsay gipaabot sa tawhanong “kalalangan”? (b) Sa unsang paagi “ang mga anak sa Diyos” ‘igapadayag,’ ug nganong ang tawhanong “kalalangan” mahinamong nagapaabot niini?
18 Sa unsang paagi apektado niining tanan kadtong—mas daghan pa kay sa 144,000 nga espirituwal nga “mga anak sa Diyos”—nga gigutom ug giuhaw sa pagkamatarong apan kansang paglaom mao ang pagpanunod sa yuta? Bahin kanila, si apostol Pablo misulat: “Kay ang mahinamong pagpaabot sa kalalangan nagapaabot sa pagpadayag sa mga anak sa Diyos. Kay ang kalalangan nailalom sa kakawangan . . . pinasukad sa paglaom nga ang kalalangan mismo pagawason usab gikan sa pagkaulipon sa kadunotan ug magbaton ug mahimayaong kagawasan sa mga anak sa Diyos.”—Roma 8:19-21.
19 Kining tawhanong “kalalangan” kansang paglaom mao ang pagkinabuhi sa walay kataposan diha sa usa ka paraisong yuta nagkinabuhi nga “mahinamong nagapaabot” sa panahon—nga karon haduol na—sa dihang ang Haring si Jesu-Kristo ug ang nabanhawng “mga anak sa Diyos” ‘igapadayag’ sa paglaglag sa presente daotang sistema sa mga butang ug tapos niana magmando ingong mga hari ug mga saserdote “sulod sa usa ka libo ka tuig.” (Pinadayag 20:4, 6) Sa panahon sa Milenyal nga Pagmando ni Kristo, ang tawhanong “kalalangan pagawason gikan sa pakaulipon sa kadunotan.”
20. Unsay hisgotan sa sunod nga artikulo?
20 Kon sa unsang paagi ang mga katawhan nga magpuyo sa matarong “bag-ong yuta” sa kataposan makabaton sa “mahimayaong kagawasan sa mga anak sa Diyos,” ug kon sa unsang paagi ang doktrina sa Bibliya bahin sa pag-isip nga matarong nagaapektar kanila bisan karon, maoy hisgotan sa sunod nga artikulo.
[Footnote]
Alang sa matukiong diskusyon sa pagkahimong “igaanak pag-usab,” palihog tan-awa Ang Bantayanang Torre sa Agosto 1, 1982, panid 16-29.
May kalabotan sa pagpahayag sa Diyos sa mga tawo nga matarong—
□ Unsay gipasabot sa Bibliya sa matarong bag-ong langit ug usa ka matarong bag-ong yuta?
□ Nganong ipasig-uli sa maayong baroganan ang katawhan diha kang Jehova?
□ Sa unsang paagi napatagbaw ang mga sukdanan ni Jehova sa pagkamatarong?
□ Nganong ang 144,000 mao ang unang ipahayag nga matarong, ug unsay ilang buhaton sa mga katungod sa kinabuhi nga madawat?
□ Sa unsa nga mahimong mga manununod ang 144,000 uban kang Kristo?