Gipahayag nga Matarong Ingong Higala sa Diyos
“Mituo si Abraham kang Jehova, ug kini giisip kaniya ingong pagkamatarong,’ ug siya ginganlan nga ‘higala ni Jehova.”’—Santiago 2:23.
1, 2. Sa unsang paagi ang “mga butang sa langit” ug ang “mga butang sa yuta” ipasig-uli ngadto sa Diyos
GIPAKAMAAYO sa Diyos nga ang tanang kabug-osan magapuyo diha kaniya [Kristo], ug pinaagi kaniya ipasig-uli ang tanang mga butang pag-usab pinagi sa pagpakigdait pinaagi sa dugo nga iyang giula diha sa kahoy sa pagsakit, kun mga butang man sila sa yuta o mga butang sa langit.” (Colosas 1:19, 20) Kining balaang katuyoan sa pagpasig-uli nagapadulong sa iyang kinatayuktokan.
2 “Ang mga butang sa langit” dili espirituhanong mga linalang, kay ang mga manulonda wala malukat sa dugo ni Kristo. Hinunoa, sila maoy mga tawo nga gipalit sa dugo sa Kordero aron mahimong usa ka “gingharian ug mga saserdote” uban kang Kristo diha sa “bag-ong langit.” Sila bug-os nga gipahayag nga matarong pinaagi sa dugo ni Kristo. Dugang pa, duolan na sa 50 ka tuig karon, nakigdait si Jehova sa “mga butang sa yuta,” diha sa mga tawo nga mahimong bahin sa matarong “bag-ong yuta.” (Pinadayag 5:9, 10; 2 Pedro 3:13) Kining pagtigom sa “tanang mga butang,” sa yuta ug sa langit, “maoy sumala sa iyang [Jehova] maayong tuyo nga iyang gilaraw diha kaniya.”—Efeso 1:9, 10.
Ang Katuyaon sa Diyos sa Iyang Anak si Adan
3, 4. Unsay baroganan ni Adan atubangan sa Diyos, apan unsang bahina nga nagkinahanglan gihapon siya nga ipahayag nga matarong?
3 Gilalang si Adan nga hingpit, matarong, tawhanong anak sa Diyos. (Lucas 3:38) Ang pagkamatarong ni Adan wala ihatag o ipahamtang nga matarong. Ang iyang pagkamatarong kinaiyanhon. Sumala sa baroganan sa pagkawalay sala atubangan kang Jehova, si Adan dili kinahanglang “ipahayag” nga matarong. Basta magpasakop lang siya sa matarong nga pagmando sa Diyos, iyang mahuptan ang maayong baroganan atubangan sa iyang Maglalalang.
4 Apan, wala pa siya makapamatuod sa iyang kaugalingon nga usa ka maghuhupot sa integridad ug wala pa mahukmi nga takos sa katungod sa kinabuhing walay kataposan sa yuta. Tungod niana, kinahanglang iyang ipakita, sa usa ka yugto sa panahon, ang pagkamatinumanon ngadto kang Jehova ug sa pagpabilin sa pagkamatarong. Kon nakapamatuod pa unta siya sa iyang integridad ilalom sa pagsulay, iya untang madawat ang katungod nga mabuhing walay kataposan sa yuta. Ingon nga daw ang Diyos nakapahayag, o nakapamulong, nga takos si Adan sa walay kataposang kinabuhi. Ingong simbolo niini, sa walay duhaduha agakon unta siya ni Jehova ngadto sa “kahoy sa kinabuhi” ug nagtugot kaniya sa pagkaon sa bunga niini.—Genesis 2:9, 16, 17; 3:22.
5. (a) Unsay giwala ni Adan sa iyang kaugalingon ug sa iyang mga anak? (b) Unsang paglaom sa kagawasan gikan sa sala ug kamatayon ang gihatag ni Jehova sa tawhanong kalalangan?
5 Apan napakyas si Adan sa gisulay ug busa nawala diha kaniya ang pagkahingpit, pagkamatarong, ug pagkahimong anak alang sa iyang kaugalingon ug sa iyang kaanakan. (Roma 5:12) Busa, ang tanang mga anak ni Adan nangatawo nga bulag gikan sa Diyos, kinaiyanhon nga dili-matarong. (Efeso 2:3; Roma 3:10) Busa, ang tawhanang kalalangan “nailalom sa kakawangan” apan “pinaagi sa paglaom,” ang maong paglaom sa kagawasan gikan sa sala ug kamatayon gihatag gilayon tapos sa pag-alsa sa Eden.—Roma 8:20, 21; Genesis 3:15.
Gipahayag nga Matarong Atubangan ni Kristo—Sa Unsang Paagi?
6, 7. (a) Sa unsang sukod nga gipahayag nga matarong ang ubang mga tawo atubangan sa gihalad nga kamatayon ni Kristo? (b) Unsa ang pila ka panig-ingnan sa una-Kristohanong mga alagad ni Jehova nga nakadawat sa matarong nga baroganan?
6 Ang paglaom sa katawhan alang sa kagawasan gikan sa sala ug kamatayon nagadepende sa pag-abot sa gisaad nga “binhi,” ang bugtong Anak sa Diyos. (Juan 3:16) Sa wala pa ang gihalad nga kamatayon ni Kristo, walay paaging makabaton ang katawhan ug “kapasayloan sa sala ug kinabuhi,” o “pagpahayag kanila nga matarong alang sa kinabuhi.” (Roma 5:18, Revised Standard Version; New World Translation) Bisan pa, sa wala pa ibayad ni Kristo ang lukat alang sa kagawasan sa tawo, may mga lalaki ug mga babaye nga mituo sa saad sa Diyos ug gipalig-on kanang pagtuoha pinaagi sa mga binuhatan. Tungod niini, sa maluluton gipasaylo ni Jehova ang ilang kasal-anan ug gidawat sila ingong iyang mga alagad. Sa mahigugmaon iyang giisip sila nga walay sala, kon itandi sa kinabag-an sa katawhan nga bulag gikan sa Diyos. (Salmo 32:1, 2; Efeso 2:12) Iyang gihatagan sila ug matarong nga baroganan, nagpahayag kanilang matarong sa usa ka sukod nga angay niadtong panahona.
7 Busa, pinaagi sa pagtuo si Abel “gipanghimatud-an nga siya matarong.” (Hebreohanon 11:4) Si Noe “nahimong manununod sa pagkamatarong pinaagi sa pagtuo.” (Hebreohanon 11:7) Bisan pa sa iyang mga kasaypanan, nailhan si Job nga “matarong ug matul-id.” (Job 1:1, 22; 7:21) Si Pinehas nagpakitag kasibot sa putli nga pagsimba, ug “kadto giisip kaniya ingong pagkamatarong.” (Salmo 106:30, 31; Numeros 25:1-13) “Pinaagi sa pagtuo” ug sa iyang mga buhat sa kalulot ngadto sa mga tawo sa Diyos, ang dili Israelinhong pampam nakadawat ug matarong nga baroganan, o gipahayag nga matarong.—Hebreohanon 11:31; Santiago 2:25.
Kon sa Unsang Paagi Giisip si Abraham nga Matarong
8, 9. (a) Kang kinsang pagkamatarong ang nahimong pangunang tema sa sulat ni Pablo ngadto sa mga taga Roma? (b) Sa unsang bahin nga ang pagpahayag sa pagkamatarong sa “mga balaan” labaw pa nianang kang Abraham?
8 Ang kaso ni Abraham takos sa dako nga pagtagad. Ang pagpahayag kaniyang matarong gihisgotan sa duha ka magsusulat sa Kristohanon Gregong Kasulatan, diin kining duha gisulat ngadto sa unang-siglong mga Kristohanon nga gitawag aron mahimong bahin sa 144,000 ka membro sa espirituwal nga Israel.—Roma 2:28, 29; 9:6; Santiago 1:1; Pinadayag 7:4.
9 Diha sa iyang sulat ngadto sa mga taga Roma, nangatarongan si Pablo nga kadtong “gipanawag nga mahimong mga balaan” (1:7), mga Hudiyo ug mga Hentil (1:16, 17), gipahayag nga matarong “pinaagi sa pagtuo gawas sa mga buhat sa kasugoan.” (3:28) Sa paglig-on mining argumentoha, mibukas siya ug taas nga katin-awan (4:1-22) ug mikutlo sa Genesis 15:6 nga nag-ingon: “Mituo si Abraham kang Jehova, ug kini giisip kaniya ingong pagkamatarong.” Dayon, sa pagtapos sa mga bersikulo sa kapitulo 4, si Pablo miingon nga si Jesus “gitugyan ngadto sa kamatayon tungod sa atong mga kalapasan ug gibanhaw aron sa pagpahayag kanato [nga mao, “ang mga balaan” (Roma 1:7)] nga matarong.” Dili mahimong labot si Abraham sa “kita,” sanglit dugay na siyang namatay una pa sa kamatayon ug pagkabanhaw ni Kristo. Busa, diha sa nagsunod nga mga kapitulo, si Pablo naghisgot niadtong “magmando ingong mga hari” ug sa pagpahayag kanilang matarong “alang sa kinabuhi” may kalabotan sa pagkahimong “mga anak sa Diyos” ug “kaubang mga manununod uban kang Kristo,” siya sa dayag naghisgot sa usa ka butang nga lahi gikan sa gipahayag sa Diyos kang Abraham nga matarong.—Roma 5:17, 18; 8:14, 17, 28-33.
10. Sa unsang paagi gipatin-aw ni Santiago ang sukod sa pagpahayag kang Abraham nga matarong?
10 Naghisgot usab si Santiago kang Abraham ingong panig-ingnan sa pagpamatuod nga ang pagtuo kinahanglang paluyohan sa diyosnong mga buhat. Tapos nakahisgot nga gipahayag nga matarong si Abraham, nga mikutlo sa Genesis 15:6, si Santiago midugang ug komento nga nakatabang kanato sa pagkakita sa sukod sa pag-isip kang Abraham nga matarong. Siya misulat: “Ang kasulatan natuman nga nagaingon: ‘Si Abraham mituo kang Jehova, ug kini giisip kaniya ingong pagkamatarong,’ ug siya sa ulahi ginganlan nga ‘higala ni Jehova.’“ (Santiago 2:20-23) Oo, tungod sa iyang pagtuo, si Abraham gipahayag nga matarong ingong higala ni Jehova, dili ingong anak nga may katungod sa hingpit tawhanong kinabuhi o sa pagkahari uban kang Kristo. Makapaikag, diha sa iyang Synonyms of the Old Testament, si Robert Girdlestone misulat bahin sa pagkamatarong ni Abraham: “Kining maong pagkamatarong dili bug-os, i.e. kay ang ingon nagsugyot kang Abraham ngadto sa Diyos ingong may katungod nga tag-angkon sa panulondon sa pagkahimonganak.”
Ang Basahon ni Jehova sa Handumanan
11. Kang kinsang mga ngalan ang nahisulat sa basahon sa handumanan ni Jehova, ug ngano?
11 Ang pagpahamtang sa relatibong pagkamatarong sa matinumanong mga lalaki ug babaye una pa kang Kristo maoy timaan sa tinuod, o aktuwal, nga pagkamatarong ug pagkahingpit nga nalangkit sa kinabuhing walay kataposan nga mahimo nilang mabatonan sa bag-ong yuta sa Diyos. Tungod sa ilang mga palaabuton sa kinabuhi, hayan lantawon sila nga nahisulat na ang ilang mga ngalan diha sa basahon sa handumanan. (Itandi sa Malaquias 3:16; Exodo 32:32, 33.) Nasudlan kini sa mga ngalan niadtong giisip ni Jehova nga “mga matarong” kinsa nakapakita sa ilang pagtuo pinaagi sa matarong nga mga buhat, ug nga nahalinya sa pagdawat sa kinabuhing walay kataposan sa yuta.—Salmo 69:28; Habakkuk 2:4.
12. Unsay kinahanglang buhaton sa “mga matarong” nga banhawon aron matipigan ang ilang mga ngalan diha sa basahon sa handumanan ni Jehova?
12 Apan, kining mga ngalana wala pa masulat diha sa “basahon sa kinabuhi” ni Jehova. (Pinadayag 20:15) Sa dihang kining matinumanong mga lalaki ug babaye sa nangagi mobalik sa yuta diha sa ‘pagkabanhaw sa mga matarong,’ sila sa walay duhaduha modawat uban sa pagtuo sa tagana ni Jehova sa kinabuhi pinaagi sa halad lukat ni Kristo. (Buhat 24:15) Busa sila mahimong bahin sa “ubang karnero” ni Jesus, lakip sa “dakong panon” nga makalabang sa “dakong kasakitan.” (Juan 10:16; Pinadayag 7:9, 14) Sa pagbuhat sa ingon, ilang matipigan ang ilang mga ngalan diha sa basahon sa handumanan ni Jehova.
Giisip nga Matarong Ingong mga Higala Alang sa Kaluwasan
13. Kinsay giagak karon sa Maayong Magbalantay, ug sa unsang paagi mahisulat ang ilang ngalan sa basahon sa handumanan ni Jehova?
13 Ang maayong magbalantay, si Jesu-Kristo, karon nagaagak sa “ubang karnero” nga dili sakop sa “gamayng panon” sa 144,000 nga “mga balaan” nga kanila gihatag ang langitnong Gingharian. (Lucas 12f32; Daniel 7:18) Kining “ubang karnero” mamati sa tingog sa Maayong Magbalantay. (Juan 10:16) Sila mipakitag pagtuo kang Jehova ug sa iyang Anak. Ilang gipahinungod ang ilang kinabuhi kang Jehova pinasukad sa halad lukat ni Kristo. Sila gibawtismohan “sa ngalan sa Amahan ug sa Anak ug sa balaang espiritu“ ug miila sa panginahanglan sa pagpalambo sa “mga bunga sa espiritu.” (Mateo 28:19, 20; Galacia 5:22, 23) Ang ilang mga ngalan gisulat diha sa basahon sa handumanan ni Jehova.
14. Unsay nakahatag sa “ubang mga karnero” ug maayong baroganan atubangan kang Jehova, apan unsay ilang kinahanglang pangayoon sa Diyos?
14 Kining “ubang mga karnero” nga natigom niining panahona sa kataposan maoy molangkob sa “dakong panon” nga nakita ni apostol Juan diha sa panan-awon, tapos sa pagkakita niya sa 144,000 ka membro sa espirituwal nga Israel. (Pinadayag 7:4, 9) Iyang gibatbat ang “dakong panon” nga “nakalaba ug nakapaputi sa ilang mga bisti pinaagi sa dugo sa Kordero.” (Bersikulo 14) Tungod sa ilang pagtuo sa naulang dugo sa Kordero, ang sukod sa pagkamatarong gihatag kanila. Gihulagway kini sa ilang simbolikong mga puting bisti. Sila adunay mahinlong baroganan atubangan ni Jehova, ug “maoy hinungdan” kon nganong iyang gitugotan sila sa ‘paghatag kaniya ug balaang pag-alagad sa adlaw ug sa gabii diha sa iyang templo.’ (Bersikulo 15) Dugang pa, sa adlaw-adlaw kinahanglang ilang ibutyag ang ilang mga kasal-anan ngadto kang Jehova ug sa pagpangayog pasaylo pinaagi kang Jesu-Kristo.—1 Juan l:9-2:2.
15. (a) Sa unsang paagi ang sambingay sa karnero ug sa kanding nagpakita nga ang “ubang mga karnero” adunay matarong nga baroganan uban sa Diyos? (b) Unsa nga sukod nga sila gipahayag nga matarong sa presenteng panahon?
15 Nga ang “ubang karnero” maoy mga higala sa Diyos ug bisan karon adunay matarong nga baroganan atubangan kaniya gipatin-aw usab diha sa tagna ni Jesus bahin sa ‘ilhanan sa iyang presensiya,’ nga naglakip sa ilustrasyon bahin sa karnero ug sa mga kanding. Tungod kay ang “mga karnero” nagahimo man ug maayo sa nanghibilin ngadto sa 144,000 nga “mga igsoon” ni Kristo nga ania pa sa yuta, sila gipanalanginan sa Amahan ni Jesus ug gitawag nga “mga matarong.” Sama kang Abraham, sila giisip, o gipahayag, nga matarong ingong mga higala sa Diyos. Ang ilang matarong nga baroganan nagkahulogan usab ug kaluwasan alang kanila sa dihang ang “mga kanding” mobulag ngadto sa “walay kataposang kalaglagan.” (Mateo 24:3-25:46) Sila “makalabang buhi sa dakong kasakitan” nga magtimaan sa kataposan sa presente daotang sistema sa mga butang.—Pinadayag 7:14.
Agakon Ngadto sa Kahingpitan
16. Sa unsang paagi masayod kita nga ang dakong panon wala ipahayag nga matarong alang sa kinabuhi una pa sa “dakong kasakitan”?
16 Ang “dakong panon,” nga makalabang buhi sa “dakong kasakitan,” dili pa ipahayag nga matarong alang sa kinabuhi. Atong makita kini gikan sa kamatuoran nga ang kapitulo nga naghisgot kanila mipadayon sa pag-ingon: “Ang Kordero, nga nagtindog sa kinataliwad-an sa trono, magabantay kanila, ug magatultol kanila ngadto sa mga tuboran sa mga tubig nga nagahatag ug kinabuhi.” (Pinadayag 7:17) Busa, bisan ug giisip sila sa Diyos sa miagi nga matarong kon itandi sa katawhan sa kinatibuk-an ug ingong iyang mga higala, sila nagkinahanglan ug dugang tabang, o mga lakang nga himoon, aron sila ipahayag nga matarong alang sa kinabuhi.
17. (a) Unsay kahulogan sa “pag-ayo sa kanasoran”? (b) Kinsa ang kinahanglang mahisulat ang ilang mga ngalan diha sa “basahon sa kinabuhi”?
17 Sa panahon sa Milenyo, ang naentronong Kordero, si Kristo Jesus, uban sa iyang 144,000 ka kaubang mga hari ug mga saserdote, magsugod sa programa sa espirituwal ug pisikal nga “pag-ayo sa kanasoran.” (Pinadayag 22:1, 2) Kining “mga nasora” langkoban sa mga makalabang buhi sa dakong kasakitan, ang tanang mga anak nga mangatawo kanila tapos sa Har-Magedon, ug kadtong mobalik diha sa “pagkabanhaw sa matarong ug sa dili matarong.” (Buhat 24:15) Ang tanan nga motuo sa dugo ni Kristo ug nagatuman sa tukmang “mga buhat” sa ulahi mahisulat ang ilang mga ngalan diha sa “basahon sa kinabuhi.”—Pinadayag 20:11-15.
18. Sa unsang kahimtang nga pagabanhawon ang mga molupyo sa yuta sa kataposan sa Milenyo?
18 Sa kataposan sa Milenyal nga Pagmando ni Kristo, ang mga molupyo sa yuta nga nagapakita nga ilang gidawat ang halad lukat ni Kristo ug nagkinabuhi sa mga sukdanan ni Jehova banhawon sa kahingpitan. Mahisama sila kang Adan sa wala pa siya nakasala. Sama kaniya, sulayan sila sa ilang pagkamasinundanon.
“Mahimayaong Kagawasan” Ingong “mga Anak sa Diyos”
19. (a) Unsay mahitabo human gilayon sa Milenyo? (b) Unsay mahitabo niadtong mga tawo kansang mga ngalan dili makita diha sa “basahon sa kinabuhi”?
19 Human gilayon sa Milenyo, itugyan ni Kristo ngadto sa iyang Amahan ang hingpit tawhanong rasa. (1 Corinto 15:28) “Pagabuhian si Satanas” alang sa mahukmanong pagsulay sa katawhan. (Pinadayag 20:7, 8) Ang mga ngalan nga dili makalabang sa pagsulay dili “makaplagan nga nahisulat diha sa basahon sa kinabuhi.“ Sila sa simbolikong paagi “itambog ngadto sa linaw nga kalayo,” nga “nagkahulogang ikaduhang kamatayon.”—Pinadayag 20:15; 21:8.
20. (a) Kinsay ipahayag ni Jehova nga matarong alang sa kinabuhi, ug ngano? (b) Sa unsang paagi nakaalagad sa iyang katuyoan ang maluloy-ong kahikayan ni Jehova sa pag-isip nga matarong?
20 Kadtong magpamatuod nga maunongon kang Jehova makakita sa ilang mga ngalan nga klarong nasulat diha sa “basahon sa kinabuhi,” ingong hingpit diha sa pagkamaunongon ug takos sa katungod sa kinabuhing walay kataposan sa yuta. Si Jehova mismo nianang panahona mopahayag kanilang matarong sa bug-os nga diwa. (Roma 8:33) Sila napamatud-an nga matarong sa kinabuhing dayon. (Pinadayag 20:5) Sagopon sila sa Diyos ingong iyang yutan-ong mga anak, ug sila mosulod ngadto sa gisaad nga “mahimayong kagawasan sa mga anak sa Diyos.” (Roma 8:20, 21) Ang pakigdait ug kalinaw mahibalik sa uniberso. Ang pagkapasig-uli uban sa Diyos mabug-os alang sa “mga butang sa yuta” ug sa “mga butang sa langit.” (Colosas 1:20) Ang maluloy-ong kahikayan ni Jehova sa pagpahayag nga matarong nakaalagad sa iyang katuyoan. Mahitungod sa pangutana, “Matarong ka ba uban sa Diyos?” ang tanang linalang sa langit ug sa yuta makatubag ug oo ug modugang: “Ngadto Kaniya nga nagalingkod sa trono ug ngadto sa Kordero ang panalangin ug kadungganan ug himaya ug gahom hangtod sa kahangtoran.”—Pinadayag 5:13.
Mahitungod sa baroganan sa “ubang mga karnero” atubangan sa Diyos—
□ Nganong si Adan wala gipahayag nga matarong?
□ Sa unsang sukod nga si Abraham ug ang ubang mga lalaki ug babaye sa wala pa si Kristo gipahayag nga matarong?
□ Kinsang mga ngalan ang nahisulat sa basahon sa handumanan ni Jehova?
□ Sa unsang sukod nga ang “ubang mga karnero” adunay matarong nga baroganan sa presenteng panahon, ug kanus-a nga sila agakon ngadto sa kahingpitan?
[Blurb sa panid 28]
Pinaagi sa pagtuo sa “dugo sa Kordero,” ang “ubang mga karnero” gihatagan ug giuyonang baroganan atubangan kang Jehova ug busa gipahayag nga matarong sa panaghigala uban kaniya ug sa pagkahimong maluwas sa panahon sa “dakong kasakitan.” Sila managpakakab-ot ug kahingpitan sa maghinapos ang Milenyo. Human sa kataposang pagsulay sila ipahayag nga matarong alang sa kinabuhi.