Mga Magmamantala sa Gingharian Nagtaho

Si Jehova ‘Nagpatubo Niana’ sa Fiji

ANG mga panalangin ni Jehova dayag diha sa matinumanong mga magmamantala sa Gingharian sa matahom nga kapuloan sa Fiji. Karon duna nay 1,049 ka saksi ni Jehova sa kapuloan, nga 10-porsientong pag-uswag kay sa miaging tuig. Sila nagtanom ug nagbisibis, ug ang Diyos nagpatubo niana.a—1 Corinto 3:6, 7.

Ang sangang-buhatan sa Watch Tower Society nag-ingong “sa kalit lamang ang katawhan naikag motuon sa Bibliya.” Ang mga membro sa usa ka kongregasyon nagtrabaho sa usa ka nahilit nga balangay diin sa nangagi dili maayong motagad kanila. Apan niadtong okasyona ang pangulo sa balangay nagpahibalong ang tanang tagabalangay kinahanglang dili molakaw aron mamati sa mga Saksi ni Jehova ug tapos niana ang mga babaye magdulot ug merienda alang sa mga igsoon diha sa tigomanan sa komunidad. Sa pagbalik duha ka semana sa ulahi, nakaplagan sa usa ka regular nga payunir ang 28 ka tawo nga andam motuon sa Bibliya. Sukad niadto, kini nga balangay giduaw uban sa maayong balita kada duha ka semana sa pagtabang sa mga interesado. Sa matag duaw “may madugang sa mga pagtuon.”

Usa sa 68 nga bag-ohang nabawtismohan sa usa ka bag-ong distritong kombensiyon sa nangagi maoy usa ka Sunday-school nga magtutudlo sulod sa siyam ka tuig. Siya naggikan sa relihiyoso kaayong pamilya. Siya nahibalag sa duha ka Saksi sa ilang balay-balay nga ministeryo, ug “tapos sa tagdugay nga mga panaghisgot ug daghang pagbalik-duaw, nasugdan sa kataposan ang usa ka pagtuon sa Bibliya.” Tapos sa duha ka bulang pagtuon sa Bibliya, miluwat siya sa iyang posisyon ingong Sunday-school nga magtutudlo, mibarog sa kamatuoran, ug nabawtismohan tapos sa usa ka tuig. Siya, nga nagpahayag sa mga pulong ni apostol Pablo, miingon: “Kamo tingali nakadungog sa akong madasigong buluhaton sa bakak nga relihiyon dihang ako madasigon kaayo sa mga gikabilinbiling sugilanon sa akong katigulangan. Apan karon akong nakaplagan ang kamatuoran, ug ako malipayong magaalagad kang Jehova duyog kaninyo.”​—Itandi ang Galacia 1:13, 14.

Sa 1984, ang Fiji may duha ka distritong kombensiyon sa unang panahon. Kawhaag-duha ka ansiano gikan sa dakong pulo, mitanyag, sa ilang kaugalingong gastos, sa pagsuportar sa programa sa ikaduhang mas gamayng kombensiyon sa laing pulo. Gihikay sa sangang-buhatan ang biyahe ug gidahom ang 90 ka igsoon nga motambong gikan sa dakong pulo. Apan, 115 ang mibiyahe pinaagig espesyal nga ayroplano ug 320 pinaagi sa barkong pinakyaw. Tungod sa maayong pamatasan sa mga Saksi, usa ka abyador sa kompaniya sa ayroplano miingon: “Natingala ako sa ilang pamatasan, kay sila andam mosunod sa mga direksiyon. Sa akong gipahibalo nga kinahanglang sila mokanaog sa ayroplano tungod sa daot sa makina, sila mahilomong mikanaog sa ayroplano nga walay pagbagulbol o reklamo. Sa pagsakay na usab, gibuhat nila kana nga malipayon, mahilomon, nga walay pakigbingkil. Maayo untag ang tanang pasahero sa ayroplano ingon kaninyo.”

Ang hepe inhenyero sa pinakyaw nga barko mikomento: “Maayo nga kamo ang among mga pasahero, kay kamo bug-os lahi sa Kristohanong pundok sa kabatan-onan nga bag-o namong gidala ngadto sa laing pulo. . . . Kamo limpiyo ug daling ikasabot.” Ang kaubang pasahero miingon: “Akong nakita ang usa ka butang nga wala ko sukad masinati . . . Ako natulog sa tugnawng andana sa barko dihang usa sa inyong mga igsoong babaye mihatag sa akong asawa ug kanako sa iyang kutson aron higdaan. Ako nangitag usa ka relihiyong sama niini.” Kining tawhana mitambong sa kombensiyon aron molantaw ug makakat-on sa dugang.

Sa pagkamatuod, ang maayong pamatasan niadtong tanang kaigsoonan mao ang pagadahomon sa matuod nga mga Kristohanon. Matud ni Jesus: “Ang matag maayong kahoy mamungag maayo.” (Mateo 7:17) Makalipay ang pagkakita sa pag-uswag nga ginahatag ni Jehova ngadto sa iyang matinumanong mga magsisimba sa Fiji. Ug pihong daghan pa ang mosanong sa maayong balita samtang sila magapatalinghog sa dugang ug magpadayon sa pagpaniid sa maayong pamatasan sa katawhan ni Jehova.

[Mga footnote]