Bawtismo sa Masuso—Kon Nganong Mosupak ang Ubang mga Pari!

BUOT lamang ni Alan ug Sonia nga mabawtismohan ang ilang masuso. Busa nakurat sila sa dihang ang ilang Anglikanong pari dili lang kay mibalibad sa paghimog seremonyas kondili mitambag pa niini: “Kamo ray bawtismo.” Ang katarongan? Si Alan ug Sonia dili regular nga tigsimba.​—The Christian Century, Hunyo 3-10, 1981.

Ubay-ubayng magtiayon karong bag-o nakaeksperyensiyag samang pagdumili​—usa ka tin-awng timaan nga ang pila ka iglesya nagbag-o sa ilang hunahuna sa bawtismo sa masuso. Tagda ang Romano Katolikong Iglesya. Tapos sa konselyo sa Batikano II, gibag-o sa iglesya ang mga seremonyas sa pagbawtismo sa masuso. Oo, ang iglesya nagpadayon sa pagbawtismo sa mga masuso, apan karon ang mga ginikanan kinahanglang magpasalig nga ilang matutuon ang ilang bata ingong Katoliko. Mimando ang Batikano: “Kon kining mga pasaliga dili tininuod, nan dunay katarongan sa paglangan sa sakramento; ug kon kini wala gayod, ang sakramento kinahanglang dumilian.”​—L’Osservatore Romano, “Lagda sa Bawtismo sa Bata,” Disyembre 1, 1980.

Lahi kaayo kini sa mga adlaw sa dinha, sumala sa Katolikong pari si Joseph M. Champlin, nga “bawtismohan sa masibotong mga misyonero ang paganong mga bata nga giabandono sa dalan,” ug ang mga pari “manambag sa mga ginikanan sa dili paglanganlangan sa Bawtismo sa batang kapin sa bulan nga ilalom sa kasakit sa salang mortal.”

Unsay nagpaluyo niining nabag-o nga tinamdan? Una, giila karon sa mga lider sa iglesya nga dili makapahimong Kristohanon ang bawtismo. Ang nagkaus-os nga mga maninimba ug ang kakulang sa kinatibuk-an sa pagtuo taliwala sa bawtismadong mga Katoliko nahimong tinuod nga tuboran sa kabalaka. “Nganong padakoon sa iglesya ang suliran pinaagi sa pagbawtismo sa mga bata nga garantisadong mahimong dili tumotuong mga hamtong?” nangatarongan ang artikulong U.S. Catholic.

Ang bag-ong kamatuoran sa bawtismo, hinunoa, nagladlad usab sa seryosong kal-ang taliwala sa mga teologo. Sumala sa gipamulong sa Katolikong magsusulat si Joseph Martos, daghang klerigo wala magtuo nga ang bawtismo sa bata maoy usa ka “samag madyik nga seremonyas nga may dili makitang mga epekto sa kalag.” Alang kanila, kining panghunahunaa maoy kinaraan, wala na sa uso.

Nan, dili ikatingala, nga daghang sinserong mga Katoliko ang naglibog. Dili ba sukad pa sa sinugdan nagtudlo ang iglesya nga ang walay bawtismong mga bata mahiadto sa kalayonhong impiyerno o magdugay sa purgatoryo? Kon tinuod man kini, natingala ang uban, nganong idumili ang bawtismo ilalom sa tanang mga sirkumstansiya? Importanteng mga pangutana kini. Sumala sa gipamulong sa Katolikong pari nga si Vincent Wilkin, ang dangatan niadtong nangamatay nga walay bawtismo “sa tinuod daghan ug dili maisip, nga mas masayon pa ang pagtimbangtimbang sa naglangkob nga gidaghanon sa tawhanong rasa.”

Busa, tan-awon natog lakbit ang bawtismo sa masuso—sumala sa kasaysayan ug sa Bibliya.