Ikaw Gidapit sa “Balaang Kalinaw” nga mga Kombensiyon
MAIKAGON kaayong nagapaabot ang matag Kristohanong saksi ni Jehova sa tinuig distritong mga kombensiyon! Walay duhaduhang kini mao ang haylait sa matag tuig sa kalendaryo. Ang nindot nga mga pakigpulong, ang mga drama sa Bibliya, ang mga basahong luwatan, ang pakig-uban—usahay ang daghan usab nga tumatambong—nagakaipon sa paghimo niining mga tigoma nga espesyal gayod.
Pananglitan, tagda ang pipila sa “Mga Maghuhupot sa Integridad” nga mga Kombensiyong gihimo sa miaging tuig. Ang duha sa São Paulo ug sa Rio de Janeiro, Brazil, may kinatas-ang tumatambong nga 249,351, nga may 2,645 nga nagpasimbolo sa ilang pagpahinungod kang Jehova nga Diyos pinaagi sa bawtismo sa tubig. Ang kombensiyon sa Montreal, Canada, nga gitambongan sa 78,804, talagsaon tungod sa treyler nga parke niadto ug kay gihimo kadto sa 11 ka lainlaing pinulongan. Kadtong mitambong sa kombensiyon sa Zurich, Switzerland, mitahong wala sukad sa ilang kinabuhi nga ilang nasinati ang kadasig ug hingaping kalipay niadto. Ang mga delegadong mitambong sa usa o kapin pang kombensiyon nga gihimo sa Polandiya mipahayag ug susamang mga pagbati.
Ang dili-kompletong tibuok-yutang taho nagapakita sa tumatambong nga 5,653,689 sa 754 “Mga Maghuhupot sa Integridad” nga mga Kombensiyon, uban ang 75,202 bag-ong Saksi nga nabawtismohan. Pagkakahibulongan ang pagpanalangin ni Jehova sa maong mga panagkatigom sa iyang katawhan!
Kaatbang sa popular nga panultihon, alang niadtong mitambong sa maong mga kombensiyon ang katumanan milabaw sa gilaoman. Halos tino nga ang opinyon mao nga ang kinaulahiang kombensiyon mao ang pinakamaayo sukad. Busa ang tanang Saksi ni Jehova maikagong magpaabot sa “Balaang Kalinaw” Distritong mga Kombensiyon niining tuiga, nga himoon sa tibuok kalibotan—130 kanila ginaeskedyul alang sa Tinipong Bansa.
Pagkamaayong tema alang sa atong distritong kombensiyon: “Balaang Kalinaw”! Karong adlawa ang tawhanong katilingban natusaktusak sa away. Dili lamang ang literal nga mga gubat ginabugno sa tibuok yuta apan adunay ubang matang usab sa pakig-away: ekonomikanhong away ug away tali sa mga kapikas sa kaminyoon, ingon man tali sa mga ginikanan ug mga anak. Apan nga lahi kaayo, adunay pakigdait taliwala sa dedikadong katawhan ni Jehova. Ang ilaha maoy diyosnong pakigdait, nga nagagikan sa Usang Balaan, si Jehova nga Diyos, ang Diyos sa kalinaw nga nagahatag ug kalinaw. Sila may pakigdait uban kaniya tungod sa pagtuo ug sa mga buhat, mao nga sila may pakigdait sa usag usa, diha sa kongregasyon ug sulod sa pamilya.—Filipos 4:7; Roma 16:20.
Matikdi, usab, nga kining diyosnong pakigdait dili lamang ang pagkawalay away. Ang pulong alang sa pakigdait o kalinaw sa Hebreohanon mao ang sha·lohmʹ, ug kini nagkahulogan dili lamang sa pagkamalinawon kondili sa pagkamaayo ug kauswagan. Oo, ang mga Saksi ni Jehova nagapahimulos ug kauswagan ingon man pagkawalay away tungod kay anaa sa espirituwal nga paraiso. Kining kombensiyona makapaarang sa tanang nagatambong nga mahimong labaw pang mahunahunaon sa kalinaw ug mabalak-on sa pagpasiugda sa pakigdait, basta kini anaa sa ilang gahom.—Roma 12:18.
Sama sa nangaging katuigan, kining mga kombensiyon mosugod sa Huwebes sa hapon sa 1:30. Ang matag adlaw dunay temang maylabot sa pakigdait, nga ang iya sa unang adlaw maoy “Panalanginan sa Diyos ug Kalinaw ang Iyang Katawhan,” nga ipasukad sa Salmo 29:11. Ang makahuloganong pag-ampo pagahisgotan, ug ang sesyon taposon sa usa ka pakigpulong bahin sa kon sa unsang paagi si Jehova nagabag-o sa tanang butang.
Sa Biyernes ang pasukaranang pakigpulong, “Balaang Pakigdait Alang Niadtong Gitudloan ni Jehova,” magpasiugda sa tinubdan sa atong kalinaw. Apil sa ubang mga bahin sa programa mao ang makapalipay nga drama sa Bibliya nga naglangkit sa karaang mga panahon sa atong adlaw.
Gawas pa sa pakigpulong sa bawtismo, ang programa sa buntag sa Sabado magpasiugda sa atong Kristohanong mga obligasyon sa usag usa ug ang panginahanglan sa pag-uswag kanunay ingong Kristohanong mga saksi ni Jehova. Sa hapon, aduna unyay maayong tambag alang sa mga sakop sa pamilya ug sa tinudlong mga magtatan-aw.
Ang prangka ug moigog-kusog modernong-adlawng drama ipasundayag sa buntag sa Dominggo. Sa hapon, ang kusganong pakigpulong publiko nga “Sa Kataposan Kalinaw!—Dihang ang Diyos Mosulti” mao unya ang usa sa mga haylait sa kombensiyon. Pihong ang tanang motambong sa kombensiyon mopauling mobating bug-os nasangkapan sa Diyos sa kalinaw sa pagbuhat sa iyang kabubut-on.
Busa, tambong sa tanang upat ka adlaw uban ang maayong espirituwal nga gana, nga bug-os mahunahunaon sa imong espirituwal nga panginahanglan. (Mateo 5:3) Ieskedyul ang imong mga kalihokan aron maanaa sa tukmang panahon alang sa unang awit ug pag-ampo sa matag adlaw. Tambong nga nasangkapan sa pagkuhag mga nota, usab, kay ang pagsulat sa pasukaranang mga punto motabang kanimo sa pagbutang sa imong hunahuna sa ginapamulong sa mamumulong. Dugang pa, ang mga hunahunang gipahayag sa ingon labi pang matisok sa imong kasingkasing ug hunahuna.
Apan dili gayod nato hikalimtan ang kamatuorang ang putling pagsimba ni Jehova nga Diyos dili lamang kay pagdawat. Kini maoy paghatag usab. Buot natong ibutang sa hunahuna ang prinsipyo sa Bibliya: “Siya nga nagapugas ug daghan magaani usab ug daghan.” (2 Corinto 9:6) Labaw pa niana, sanglit si Jesus miingong “adunay labaw nga kalipay sa paghatag kay sa pagdawat,” atong kuhaon ang labing dakong kalipay nga posible sa kombensiyon pinaagi sa paghatag kutob sa atong mahimo, nga magboluntaryo sa atong mga pag-alagad. (Buhat 20:35) Sa pagkamatuod, angay dili na kinahanglang mohangyo alang sa boluntaryong tabang.
Dugang pa, atong isipong ugdang ang tagana sa pag-apil sa pagsangyaw sa kanataran sa hapon sa Biyernes. Ug hinaot kita magbantay sa tanang upat ka adlaw sa kahigayonan sa paghimog dili-pormal nga pagsangyaw. Kini nagapahinumdom kanato sa laing prinsipyo sa Bibliya: Ang kalag nga mahinatagon mouswag, ug ang nagabisibis pagabisibisan. (Proverbio 11:25) Oo, atong dapiton ang tanang atong madapit aron sila mismo masayod nga ang mga Saksi ni Jehova tinuod nagapahimulos ug balaang pakigdait.