Kon sa Unsang Paagi Imong Matagamtam ang Diyosnong Kalinaw sa Bug-os Pa
“Oh kon ikaw namati lamang unta sa akong mga sugo! Unya ang imong kalinaw mahisama sa usa ka suba, ug ang imong pagkamatarong maingon sa mga balod sa dagat.”—ISAIAS 48:18.
KADTONG regular nga nakigbahin sa pagtuon sa Bibliya sa kongregasyon uban sa tabang niining magasina nahibalo sa bili sa kalinaw nga ginahatag sa Diyos, ug gusto nila kanang maong kalinaw. Sa walay duhaduha gikalipayan kana sa kadaghanan. Apan dili tanan ang nakatagamtam niana sa bug-os pa. Ngano man? Mahitungod kanila nga nakadawat sa diyosnong kalinaw, si Jehova miingon: “Ako, si Jehova, nga imong Diyos, ang Usa nga nagatudlo kanimo sa pagpahimulos, ang Usa nga nagamando kanimo sa dalan nga ikaw angay moagi. Oh kon ikaw namati lamang unta sa akong mga sugo! Unya ang imong kalinaw mahisama sa usa ka suba, ug ang imong pagkamatarong maingon sa mga balod sa dagat.”—Isaias 48:17, 18.
2. (a) Unsay kahulogan sa ekspresyong “namati”? (b) Pila sa mga sugo sa Diyos nga kinahanglan natong sundon? (1 Juan 5:3)
2 Sa matin-aw, ang tanan makapahimulos gikan sa pagtambong sa mga tigom diin didto ginahisgotan nato ang Bibliya. Apan kadto lamang namati sa mga sugo ni Jehova, nagapadapat ug nagasubay kanila, ang nakatagamtam sa diyosnong kalinaw. May mga dapit ba nga kinahanglan nimong buhaton kini sa bug-os pa? (2 Pedro 1:2) Kulang pa alang kanato ang pagpamati sa pipila sa mga kinahanglanon sa Diyos ug isalikway kadtong atong nakitang makahasol ug mas malisod. Dihang gitintal sa Yawa si Jesu-Kristo sa iyang mahakugong paagi sa paghunahuna, malig-ong mitubag si Jesus: “Nahisulat na, ‘Ang tawo mabuhi dili sa tinapay lamang, kondili sa matag pulong nga magagula sa baba sa Diyos.’”—Mateo 4:4.
3. Unsang mga bahin sa atong kinabuhi nga kinahanglang atong ipahiuyon sumala sa mga dalan ni Jehova kon buot natong mabatonan ang dagayang kalinaw?
3 Ang mga sugo sa Diyos nagatandog sa tanang bahin sa atong mga kinabuhi. Una sa tanan, nalangkit sila sa atong relasyon kang Jehova. Ug sila nakaapekto sa atong paghunahuna sa iyang makitang organisasyon ug sa Kristohanong ministeryo, sa paagi sa atong pagtagad sa mga sakop sa panimalay, ug sa atong pagtagad sa katawhan sa kalibotan. Kadtong kinasingkasing nga nagasunod sa mga sugo ni Jehova sa tanang mga butang mao ang gipanalanginan ug dagayang kalinaw. Atong tagdon ang pipila ka butang nga makatabang kanato sa pagtagamtam niana sa kaugalingon.
Kini Bang mga Butanga Nagkinahanglan sa Imong Pagtagad?
4. (a) Nganong ang pagkaadunay pagtuon sa Bibliya sa balay o ang pag-adto sa Kingdom Hall dili garantiya nga kita may kalinaw sa Diyos? (b) Unsay nalakip sa pagpakitag pagtuo kang Jesus? (Juan 3:36)
4 Bag-o ka pa bang nagtuon sa Bibliya uban sa mga Saksi ni Jehova? O ikaw ba tingali nakig-uban na sa lokal nga kongregasyon sa daghan nang mga bulan o mga katuigan? Kon mao, ikaw sa walay duhaduha nakakita ug kalipay sa pagbaton sa kahibalo sa mga katuyoan sa Diyos nga bukas sa imong atubangan. Apan ang kamatuoran nga gikalipayan sa usa ka tawo ang pagtuon sa Bibliya sa balay o nalipay sa pag-adto sa Kingdom Hall wala magpasabot nga siya may kalinaw na uban sa Diyos. Kitang tanan nangatawo sa kasal-anan, ug ang kalinaw sa Diyos makab-ot lamang kanato pinaagi ni Jesu-Kristo. (Isaias 53:5; Buhat 10:36) Ang yanong pagtuo kang Jesus dili mopatungha niana nga kalinaw. Kinahanglang atong masabtan ang atong panginahanglag lukat, sa pagtuo sa bili sa halad ni Jesus, ug sa pagpakitag pamatuod nianang pagtuoha pinaagi sa pagsunod sa iyang mga sugo. (Santiago 2:26) Ang usa sa mga sugo nga gihatag ni Jesus samtang dinhi pa siya sa yuta mao nga kadtong mahimong iyang mga disipulo kinahanglang bawtismohan sa tubig. (Mateo 28:19, 20) Nabawtismohan ka na ba ingong simbolo sa imong pagpahinungod kang Jehova pinaagi ni Jesu-Kristo?
5. Nganong ang pagpahinungod ug bawtismo hinungdanon sa atong pagkahimong may kalinaw sa Diyos?
5 Aduna bay butang sa imong kinabuhi nga nakahimo kanimong dili kuwalipikado sa bawtismo? Kon nahibalo ka nga aduna, o sa panahon sa imong pagtuon imong nahibaloan nga mao kini ang kahimtang, ayaw paglangan sa pagtul-id sa mga butang. Sayra nga ang kaisipan ug paggawi nga makadiskuwalipikar sa tawo alang sa bawtismo maoy kababagan usab sa iyang pagbaton ug kalinaw sa Diyos. Lihok dayon samtang may higayon pa. Sumala sa gipakita sa 1 Pedro 3:21, kadtong gihatagan ug maayong konsensiya ni Jehova nga Diyos nagpahinungod una sa ilang kaugalingon kaniya pinaagi sa pagtuo sa halad ni Kristo, nagpabawtismo sa pagsimbolo niana nga pagpahinungod, ug nagabuhat sa kabubut-on sa Diyos. Unya ang kalinaw nga nagauban sa maayong konsensiya tungod kay nakabaton sa inuyonang baroganan atubangan sa Diyos ilang maangkon; walay laing paagi nga makab-ot kana. Siyempre, sinugdanan lamang kana.
6. Nganong ang atong kaisipan bahin sa mga tigom sa kongregasyon nalangkit sa atong pagtagamtam ug kalinaw?
6 Sunod, tagda ang imong pagkahimong regular sa pagtambong sa mga tigom sa kongregasyon ug sa imong pakigbahin niana kutob sa imong maarangan. Kini bang mga tigoma may dapit sa imong kinabuhi nga dili nimo tugotang mababagan ka sa kalibotan sa ubang personal nga mga kalihokan? Nangandam ka ba sa mga tigom ug isipong usa ka pribilehiyo ang pakigbahin? Kining mga butanga, usab, dunay kalabotan sa pagtagamtam sa kalinaw. Ngano? Tungod kay ang espiritu sa Diyos nagauban sa iyang nagtigom nga katawhan, ug ang kalinaw maoy bunga niana nga espiritu. (Galacia 5:22) Dinhi niining mga tigoma nga kita natabangan sa pagsabot sa mga kinahanglanon ni Jehova, ug gikinahanglan nato kini aron makahimo sa butang nga kahimut-anan sa mga mata ni Jehova. Dinhi, usab, kita nakakat-on kon unsaon sa pagpalambo sa pakigdait sa atong mga relasyon sa isigkatawo—diha sa kongregasyon, sa balay, sa eskuylahan, ug sa atong sekular nga trabaho. Ang atong mga tigom maoy usa sa pangunang mga paagi nga niini kita gitudloan ni Jehova, ug sumala sa gipunting sa Kasulatan, kadto lamang gitudloan ang makatagamtam sa dagayang kalinaw.—Isaias 54:13.
7. Unsang pagsobli sa mga butang nga gihisgotan sa atong mga tigom ang gikinahanglan?
7 Ang suod nga nalangkit nga punto nga angay tagdon mao ang anam-anam nga pagpadapat diha sa atong mga kinabuhi sa mga butang nga atong nakat-onan. Dili kita gustong mahisama sa mga Israelitas kinsa matud pa ni Jehova ‘masubsob nga nakadungog apan wala makasabot.’ (Isaias 6:9) Dugang pa, kita ba nagatinguha nga mahisama niadtong gibatbat ni Jehova kang Ezekiel—maylabot sa mga tawo nga namati sa manalagna ni Jehova apan wala mosunod sa iyang gipamulong tungod kay mipili sila sa pagtuman sa ilang mahugaw o materyalistikong mga pangibog? (Ezekiel 33:31, 32) Sa kasukwahi, kadtong nagatigom sa balay ni Jehova sa atong adlaw ug nakabaton sa iyang pag-uyon gibatbat nga nagaingon: “Manungas kita ngadto sa bukid ni Jehova ug ngadto sa balay sa Diyos ni Jacob; ug siya magatudlo kanato sa iyang mga dalan, ug kita magalakaw sa iyang mga alagianan.” (Miqueas 4:2) Kon atong isilsil sa atong kasingkasing ang instruksiyon nga atong madawat gikan sa atong mga tigom, ug sa matag tigom hinumdoman nato ang usa ka punto nga atong gikinahanglan ug pauswagon kana, makaani kita ug malinawong mga bunga. Sumala sa gipamulong ni Jesus diha sa Lucas 11:28: “Malipayon kadtong nakadungog sa pulong sa Diyos ug nagahawid niana!”
8 Ang usa sa mga butang nga ginapasiugda sa atong mga tigom mao ang bili sa pakigbahin sa bug-os sa pagsangyaw sa Gingharian sa Diyos ug sa pagtabang sa uban aron mahimong mga disipulo. (Mateo 24:14; 28:19) Nangibabaw ba kining mga kalihokana sa imong kinabuhi? Kon kita tinuod nga namati sa gipamulong ni Jehova kanato pinaagi sa iyang Pulong ug pinaagi sa iyang organisasyon, kita nahibalo nga mao kini ang labing importanteng buluhaton nga ginahimo sa yuta karon. (Pinadayag 14:6, 7) Ug ilado kini nga kamatuoran nga kadtong anaa sa bug-os panahong pag-alagad—ug maingon man usab kadto kinsa, bisag dili makapayunir, madasigon sa ministeryo—mao ang malipayon kaayo sa atong taliwala. Ang kalinaw nga ilang gitagamtam dili kay usa lamang ka tulo sa tubig, kondili sumala sa gipamulong ni Jehova, kini nahimong “sama sa suba.” (Isaias 48:18) Mao ba kana ang imong gitagamtam? Matagamtam nato kanang tanan.
9. Unsay makatabang kanato sa pagpatunhay sa atong hinatag sa Diyos nga kalinaw bisag nagaantos kita ug grabeng mga kalisdanan?
9 Apan, ang atong pagsunod niining tambaga wala magpahimo kanato nga dili madutlan sa mga kapig-otan sa kinabuhi niining presenteng sistema sa mga butang. Apan bisan unsa pa ka lisod sa mga kahimtang, ang Diyos nagpasalig kanato sa iyang mahigugmaong tabang kon kita modangop kaniya. (1 Pedro 5:6, 7) Nakakat-on ba kita sa pagpangayo sa tabang ug pagtultol ni Jehova sa tanang butang nga atong buhaton, libreng modangop kaniya diha sa pag-ampo ug, tapos sa atong paghimo kutob sa atong maarangan sa malisod nga mga kahimtang, nagatugyan sa atong mga palas-anon diha kang Jehova, masaligong itugyan kini diha kaniya? (Proverbio 3:5, 6; Salmo 55:22) Sa kinasingkasing kita gidasig diha sa Filipos 4:6, 7: “Ayaw kamo pagkabalaka mahitungod sa bisan unsang butang, hinunoa sa tanang butang ipahibalo ninyo sa Diyos ang inyong mga hango pinaagi sa pag-ampo ug sa pagpangamuyo uban sa pagpasalamat; ug ang kalinaw sa Diyos nga lapaw sa tanang pagpanabot magabantay sa inyong mga kasingkasing ug sa inyong mga hunahuna pinaagi kang Kristo Jesus.” Pagkakatingalahang tagana kana! Nakakat-on ka na ba sa pagpahimulos sa bug-os pa sa kalinaw sa Diyos nga gihatag nianang paagiha?
Padayon sa Pagpangita sa Kalinaw
10. Tapos makab-ot ang kalinaw, unsay gikinahanglan kanato?
10 Dihang makab-ot na nato ang kalinaw, dili kita makatugot nga pasagdan lang kana. Kinahanglan ang pagkugi aron mapatunhay kana. Busa ang 1 Pedro 3:10, 11 nag-ingon: “Siya nga buot mahigugmag kinabuhi ug motan-awg maayong mga adlaw, . . . ipapangita niya ang kalinaw ug ipakab-ot kini.” Tapos nga nakab-ot ang tumong ug nakahupot niana, buangbuang ang tawo nga dili magpabili nianang tumonga. Tapos nakakita ug nakabaton ug kalinaw, kinahanglang magbantay kita batok sa mga butang nga makadaot niana. Labaw pa niana, kinahanglang aktibo natong kab-oton ang mga butang nga makaamot ug kalinaw.
11. (a) Unsang kaisipan ang makapameligro sa atong relasyon kang Jehova? (b) Kanus-a kita mangayog panabang sa Diyos maylabot sa mga tintasyon? (Mateo 6:13)
11 Kon atong nakab-ot na ang kalinaw sa Diyos pinaagi sa tagana nga iyang gihatag, kinahanglang magbantay kita nga dili madaot kanang relasyona pinaagi sa pagbalik sa pagpakasala. Siyempre, sanglit kitang tanan dili man hingpit, kitang tanan nakasala. Apan dunay kapeligrohan dihang ipakamatarong sa tawo ang mga kaisipan ug mga lihok nga gihukman sa Diyos. Dili nato angayng ikibo lang nato ang atong abaga ug moingon, “Ingon ako niana.” (Roma 6:16, 17) Kinahanglang maghinulsol kita sa atong kalapasan imbes ipakamatarong kana, ug dayon mangayo kita sa Diyos ug pasaylo pinaagi sa atong pagtuo sa halad ni Jesus. Kinahanglang makakat-on usab kita sa pagpangayo sa Diyos ug panabang sa dili pa kita makahimo ug daotan, inay maningkamot sa pagpakigbatok nga mag-inusara, nga sa kataposan magpapukan, ug dayon mangayog pasaylo. Pinaagi sa tabang sa Diyos, molampos kita sa pagsul-ob sa “bag-ong personalidad nga gilalang sumala sa kabubut-on sa Diyos diha sa tinuod nga pagkamatarong ug pagkamaunongon.”—Efeso 4:20-24.
12. (a) Aron matagamtam ang kalinaw, unsang ubang relasyon ang nagkinahanglan ug pagtagad? (b) Unsay gikinahanglan kanato niining bahina?
12 Siyempre, nalangkit usab ang ubang tawo sa pagtagamtam sa kalinaw. Ang tinuod nga mga Kristohanon nag-alagad sa Diyos ingong bahin sa usa ka organisasyon; sila maoy “panag-ubanay sa mga igsoon.” (1 Pedro 2:17) Sumala sa gipamulong ni Jesus nga tinuod maylabot sa iyang mga sumusunod, tagsaon ang ilang gugma sa usag usa. (Juan 13:35) Apan walay hingpit kanila. Tungod sa atong mga dili-kahingpitan ug sa uban, tingali nagkinahanglan kita nga mag-ampo sa kinasingkasing sa ubang mga situwasyon ug maningkamot sa pagsulbad sa mga problema. Ang Hebreohanon 12:14 nag-awhag kanato: “Magdinaitay kamo taliwala sa tanang katawhan.” Ug diha sa atong mga relasyon uban sa atong Kristohanong mga igsoong lalaki ug babaye, adunay linain nga obligasyon sa paglahutay sa pagpangitag kalinaw. Sa prangkang pagkasulti, ang 1 Tesalonica 5:13 nag-ingon: “Magdinaitay kamo sa usa ug usa.” Nagkahulogan kana dili lamang sa pagpugong sa pagbalos kondili mahimong aktibong tigpasiugda ug kalinaw, nagahimog unang lakang sa pagpasig-uli sa kalinaw ug andam sa pag-ampo alang sa interes sa kalinaw.—Efeso 4:1-3.
13. (a) Aron mapalambo ang kalinaw uban sa mga magtutuo, unsay atong mahimo, apan sa unsang paagi atong ikapasundayag nga kinahanglang unahon ang kalinaw sa Diyos? (b) Sa unsang paagi atong mabatonan ang kalinaw bisan pag magubot ang atong palibot?
13 Apan, gawas sa kongregasyon dili andam ang tanan nga makigdait. Busa, sa realistikanhon, ang Roma 12:18 nagtambag: “Kon mahimo, sumala sa inyong takos maarangan, magdinaitay kamo uban sa tanang tawo.” Apan ang atong paningkamot sa pagpalambo sa kalinaw wala maglakip sa pagkompromiso maylabot sa matarong nga mga kinahanglanon sa Diyos. Tingali may mga higayong atong ipasibo ang panahon sa pagbuhat sa pipila ka butang, apan nasayod kita nga dili maalamon ang paghunong sa pagtambong sa mga tigom sa kongregasyon o sa pag-undang sa pag-alagad sa kanataran aron mahuptan ang kalinaw diha sa mga kapikas sa kaminyoon o mga paryente. Ug kita nasayod nga dili mouyon si Jehova sa atong pakigduyog sa paghimog dili diyosnong mga buhat sa mga kaubanan sa trabaho o sa mga kauban sa klase aron makabaton sa ilang pag-uyon. Kita nasayod nga ang tinuod nga kalinaw iya lamang una sa tanan ngadto sa may kalinaw sa Diyos, ngadto sa nahigugma sa balaod ni Jehova ug nagalakaw sa iyang mga dalan. Mao kining kalinawa nga atong gipakamahal labaw sa tanan. (Salmo 119:165) Tinuod, magubot ang atong palibot. Tingali ang mga dili-magtutuo managlalis ug mag-awayay sa usag usa; tingali pasipalahan kita nila tungod sa atong pagtuo. Apan nasayod kita kon sa unsang paagi gitudloan kita sa Pulong sa Diyos sa paggawi sa atong kaugalingon. Pinaagi sa pagpadayon sa pagpangagpas sa dalan nga nahiuyon sa matarong nga mga dalan ni Jehova, dili kita mahikawan sa kalinaw nga maoy labing bililhon.—Itandi sa Salmo 46:1, 2.
14. Bisag nagaantos kita ug kasakitan, unsay nakapaposible alang kanato aron mapatunhay ang kalinaw sa kinasuloran ug ang masanag nga panglantaw?
14 Sa kataposang gabii sa iyang kamatayon, gisultihan ni Jesus ang iyang matinumanong mga apostoles: “Gisulti ko kini kaninyo aron nga dinhi kanako makabaton kamo ug kalinaw. Dinhi sa kalibotan aduna kamoy kasakitan, apan magmaisogon! Gidaog ko na ang kalibotan.” (Juan 16:33) Oo, makaagi kita ug kasakitan. Ingong mga Kristohanon, kita mahiagom ug nagkalainlaing matang sa paglutos. Tingali nakaeksperyensiya kita ug inhustisya, ug tingali nag-antos kita sa grabe nga sakit. Apan ang diyosnong kalinaw molig-on kanato latas niining tanan. Tungod kay kita gitudloan ni Jehova, kita nahibalo kon nganong ginalutos ang mga Kristohanon. Wala kitay pagduhaduha kon nganong dunay inhustisya ug nganong nagaantos kita sa balatian. Nahibalo usab kita kon unsay anaa sa umaabot. Kita nahibalo nga ingong resulta sa matinumanong dalan sa kinabuhi ni Jesus ug sa iyang gihalad nga kamatayon, segurado ang kaluwasan. Dugang pa, kita nahibalo nga bisan unsa pay problema nga atong atubangon karon, kita makadangop sa Diyos diha sa pag-ampo nga masaligon nga siya mahigugmaong nagatagad kanato ug molig-on kanato pinaagi sa iyang espiritu.—Roma 8:38, 39.
15. Unsa ka tinuod nga ang kalinaw nga gipaposible ni Kristo lahi sa kalinaw nga gitanyag sa kalibotan?
15 Sa tukma, si Jesus miingon diha sa Juan 14:27: “Kaninyo ibilin ko ang kalinaw, kaninyo gihatag ko ang kalinaw. Hatagan ko kamo niini dili sama sa hinatagan sa kalibotan. Kinahanglang dili magkaguol ang inyong mga kasingkasing ni magtalaw sa kahadlok.” Tinuod gayod—ang kalibotan walay kalinaw sama sa kalinaw nga gihatag sa Diyos pinaagi kang Jesu-Kristo. Kini nakalig-on kanato sa pag-atubang sa mga kahimtang nga diin ang uban nawad-an ug paglaom.
16. (a) Unsang palaabuton ang naghulat sa unahan alang niadtong tinuod nga nagapabili karon sa kalinaw nga gihatag sa Diyos? (b) Sa unsang paagi atong ikapasundayag nga atong gimahal kanang maong kalinaw?
16 Pagkakatingalahang paglaom ang naghulat sa unahan alang sa tanang nagasagop karon sa kalinaw nga nagagikan sa Diyos ug nga nagahatag niini ug dakong bahin sa ilang mga kinabuhi! Sa dili madugay ang kalibotan nga nagapakig-away sa Diyos mahanaw na. Ang tanang kalalangan sa ulahi bug-os nga mahiusa diha sa kalinaw pinaagi sa matarong nga mga kinahanglanon sa Soberano sa Uniberso. Hinaot ang atong pasalamat alang niining dakong palaabuton motukmod kanato sa paglihok nga kaharmoniya niana karon. Hinaot nga kitang tanan mamati nga mainampingon sa mga instruksiyon ni Jehova ug sa paghimo sa iyang mga sugo nga matisok sa atong mga kasingkasing aron tinuod natong higugmaon ang iyang mga dalan ug magabuhat sa iyang gikinahanglan. Sama sa gipahayag sa Proverbio 3:1, 2: “Anak ko, ayaw hikalimti ang akong kasugoan, apan pabantayi sa imong kasingkasing ang akong mga sugo, kay ang kadugayon sa mga adlaw ug mga tuig sa kinabuhi, ug kalinaw sila igadugang kanimo.”
Mga Pangutana sa Repaso
◻ Sumala sa Isaias 48:18, unsay gikinahanglan aron mabatonan nato ang dagayang kalinaw?
◻ Pinaagi sa pagbuhat ug unsang mga butang nga atong matagamtam ang diyosnong kalinaw sa bug-os pa?
◻ Unsay gilaoman kanato aron mapatunhay ang kalinaw sa atong mga igsoong lalaki ug babaye?
◻ Sa unsang paagi atong mapatunhay ang kalinaw bisag gilibotan sa mga dili-magtutuo?
1. Unsay gikinahanglan aron atong matagamtam ang kalinaw sa bug-os pa kutob sa atong maarangan?
8. Sa unsang paagi ang pakigbahin sa pag-alagad sa kanataran kutob sa maarangan sumala sa itugot sa atong mga kahimtang makahatag kanato ug kaayohan?
[Hulagway sa panid 16]
Bawtismo
[Mga Letrato sa panid 17]
Regular nga pagtambong sa tigom
Pagpadapat sa atong nakat-onan
[Mga Letrato sa panid 18]
Bug-os nga pakigbahin sa pag-alagad sa kanataran
Pagtugyan sa atong mga palas-anon diha kang Jehova