Mga Pangutana Gikan sa mga Magbabasa

◼ Ang mga Saksi ni Jehova malig-on ba mahitungod sa pagkaulitan sama sa ilang pagkalig-on mahitungod sa makadaot nga bisyo sa tabako?

Ang mga Saksi ni Jehova nagbaton ug lig-ong baroganan nga gipasukad sa Bibliya batok sa tabako, ug sama nilang gidawat ang Kasulatanhong pagtunglo sa pagkaulitan.

Nagtuo silang ang pagtabako nagalapas sa mga prinsipyo sa Bibliya. Nalangkit sa pagtabako ang pagkagiyan sa nikotina. Dugang pa, dili kinaiyanhon ang pagsuyop sa aso. Ang pagtabako nagahugaw sa lawas, nagahatag ug mga suliran sa panglawas, ug nakapamubo sa mga kinabuhi nga magamit unta sa pagdayeg sa Diyos. Ang pagtabako sa kapeligroso nagahugaw sa hangin nga ginahanggab sa uban; tinong kana dili paghigugma sa silingan.​—2 Corinto 7:1; Roma 12:1; Marcos 12:33.

Apan, unsa na man ang inulitan nga sobrang pagkaon? Sa prangka, ang Bibliya nagatunglo sa pagkaulitan, nga maoy dinalo nga pagpatuyang sa pagkaon, o sobra nga pagkaon. Ang usa ka anak nga Israelinhon nga sa walay-paghinulsol “usa ka ulitan ug palahubog” pagapatyon. (Deuteronomio 21:18-21) Ang Proverbio nagapasidaan batok sa “pagpakig-uban sa mga ulitan.” (Proverbio 28:7; 23:20, 21) Ang pagkaulitan daotan usab sanglit kita giingnang ang “mga tawong dalo” dili magapanunod sa Gingharian sa Diyos. (1 Corinto 6:9, 10; itandi ang 1 Pedro 4:3; Filipos 3:18, 19.) Ang Kristohanong mga magtatan-aw kinahanglang “may pagpugong-sa-kaugalingon,” dili “walay buhat nga mga ulitan.” (Tito 1:8, 12) Kini seryoso kaayo nga ang pila ka magtatan-aw natangtang tungod sa ilang walay-pagpugong nga pagkaon.

Ugaling, pagailhong ang paghukom kon kanus-a nagalungtad ang pagkaulitan dili sayon. Ang pagkaon (nga lahi sa pagsuyop sa aso sa tabako) maoy kinaiyanhon ug tukma. Ang pagkatambok usab dili mao ang bugtong timaan sa pagkaulitan; ang usa ka tawong niwang kaayo mahimo tingaling ulitan. Ang pagkatambok dili mao ang ginasaway sa Bibliya, kondili ang sobrang pagkaon, nga mahimo o mahimong dili mosangpot sa pagkatambok kaayo.

Ang pila ka tawo sobra sa timbang tungod sa deperensiya sa glandula o sa sakit, bisan tuod si Propesor Judith Rodin nagtuo nga “5 porsiento lamang sa tanang kaso sa pagkatambok kaayo ang gipahinabo ilabina sa medikal nga mga suliran.” Ang panulondon tingali makapainklinar sa usa ka tawo nga modako. Si Dr. William Bennett mikomento: “Daghang tambok nga tawo nagamentenar sa ilang timbang pinaagi sa pagkaon sa ginakaon sa tawong kasarangan ug timbang, . . . Sila lahi sa metabolikong paagi.” Ang pila ka siyentipiko mibati gani nga kon mokaon ug menos ang tambok nga tawo, ang iyang lawas magpaus-os sa gikusgon sa metabolismo mao nga mas hinay ang pagka-ut-ot sa calories. Apan bisan kon ang usa ka tambok nga tawo dili ulitan sa diwa nga kusog mokaon, siya kinahanglang magpadapat nga labi pang ugdang sa tambag sa Diyos.

Pananglitan, ang mga Kristohanon kinahanglang mag-ugmad sa pagpugong-sa-kaugalingon, nga mapadapat usab sa pagkaon. (Galacia 5:22, 23; 2 Pedro 1:5-8) Giawhag ni apostol Pablo ang mga Kristohanon nga mahisama sa usa ka maglulumba nga “nagapugong sa kaugalingon sa tanang butang.” Si Pablo ‘nagpanton sa iyang lawas ug nag-ulipon niana aron siya dili mahimong dili inuyonan.’ (1 Corinto 9:24-27) Ang tambok nga tawo basin may katarongan sa ‘pagpanton sa iyang lawas’ kon bahin sa unsa ka daghan, unsa, kanus-a, ug kon sa unsang paagi siya magakaon.a

Ang pagkatambok peligroso. Ang mga taho nagapakitang ang pagkatambok mahimong mosangpot sa alta presyon sa dugo ug taas nga cholesterol, diabetes nga mosugod dihang hamtong na, ubay-ubayng matang sa kanser, sakit sa kasingkasing ug sa apdo, arthritis, ug mga sakit sa respiratoryo. “Ang usa ka tawong 20 porsientong sobra sa timbang nagaatubang sa proporsiyon sa pagkamatay nga un-tersiyang labaw kay sa kasarangan; alang niadto 30 ug 50 porsientong sobra sa timbang, ang mga proporsiyon maoy 50 ug 100 porsientong labaw, ang matag usa.” (The New York Times, Pebrero 27, 1985) Ang susamang mga taho sa mga suliran sa panglawas nagagikan sa Inglaterra, Alemanya, ug Italya.

Ang usa ka Kristohanon buot gayong ‘mahigugma kang Jehova uban sa tibuok niyang kasingkasing, kalag [o, kinabuhi], hunahuna, ug kusog.’ (Marcos 12:30) Daghan, sa pagtuon sa Kristiyanidad, mihunong sa pagtabako sa pagpreserbar sa ilang kahimsog ug kinabuhi. Dili ba ang mga Kristohanon samang magmabalak-on nga ang pagkasobra sa timbang tungod sa pagpatuyang sa pagkaon basin makadaot sa ilang panglawas ug sa ilang kinabuhi nga gipahinungod kang Jehova?

Ang pila ka tawo mokaon ug daghan dihang sila masulob-on, mobatig kapakyasan, mamingawon, o masuko. Bisan tuod ang pagka-Kristohanon dili bug-os mopugong nianang mga pagbatia, inay mangitag kahupayan diha sa dili-kinahanglanong pagkaon, ang Kristohanon makadangop sa Diyos ug sa iyang mga igsoon. Bahin niini, basaha ang Filipos 4:6, 7, 11-13. Bisan ang mga siyentipiko nga nagtuo nga ang usa ka tawo kinaiyanhong may kiling padulong sa tinong timbang nagaadmitar nga kini mausab. Ilang ginapasiugda ang pagkunhod sa pagkaong daghag tambok ug pagpauswag sa lawasnong kalihokan. Makaiikag, sa daghang dapit ang Kristohanong regular nagapakig-ambit sa balay-balay nga ministeryo sigeng nagalakaw ug nagatungas nga makapahimsog. Si Pablo, usab, ‘naghago ug nagbudlay’ sa ministeryo.​—2 Corinto 11:26, 27.

Busa ang mga Saksi ni Jehova dili uyon sa pagkaulitan tungod sa ginaingon sa Bibliya. Bisan kon unsa ang ilang timbang, sila nagapaningkamot sa ‘pagpugong sa kaugalingon sa tanang butang,’ apil ang pagkaon. Kini dili tungod ilabina sa kultural nga hukom mahitungod sa uso kondili tungod kay buot nilang magkinabuhi sumala sa mga prinsipyo sa Bibliya ug mahimong aktibong mga Kristohanon nga giuyonan sa Diyos.

[Mga footnote]