Pagpanguna sa Dalan Ngadto sa Paraiso

SA USA ka hayag, bugnaw nga adlaw sa Marso sa New Jersey, mga 4,300 ang nagtigom sa Jersey City Assembly Hall sa mga Saksi ni Jehova. Sila naggikan sa tibuok Tinipong Bansa ug sa daghan pang laing kanasoran. Kadtong espesyal nga tigom gihaling sa mga hitabong nahitabo 43 ka tuig nga miagi dihang natukod ang usa ka espesyal nga tunghaan sa pagbansayg misyonaryo ilalom sa pagdumala sa niadto presidente sa Watch Tower Bible and Tract Society, si Nathan H. Knorr.

Kadtong tigom sa Marso mao ang graduwasyon sa ika-80ng klase sa Watchtower Bible School of Gilead. Apan unsay miagda sa pag-abot niadtong dakong panon alang sa programa sa graduwasyon? Kadto mao ang gidahom nga kalidad sa programa.

Misyonaryong mga Tinamdan—Ang Yawi sa Kalamposan

Ang tsirman sa programa mao si Karl Klein, usa ka membro sa Nagamandong Lawas sa mga Saksi ni Jehova. Iyang gipailaila ang unang mamumulong, ang kanhi misyonaryo sa Hapon, si Lloyd Barry, ug karon usa ka membro sa Nagamandong Lawas, kinsa mipakigpulong bahin sa temang “Sa Inyong Pagtuo Idugang ang Binuhatan.” Mitambag siya: ‘Tapos sa lima ka bulang dakong pagbansay sa Gilead, ang inyong gugma ug pagtuo kinalabwan gayod. Karon, samtang mangadto kamo sa inyong mga asaynment, kinahanglang idugang ninyo ang binuhatan.’ (Santiago 2:22, 23) Siya miingong sama kang Jehova sila angay ‘mobangon ug sayo’ ug pahimuslag maayo ang tibuok adlaw diha sa iyang pag-alagad.​—Jeremias 7:25.

Si Daniel Sydlik, laing membro sa Nagamandong Lawas, mihatag ug makapadasig nga tambag sa ulohang “Makaugmad Kamo sa Hustong Tinamdan.” Sa bisan unsang kahimtang, matud niya, kamo mahimong makabaton sa positibo kaha o negatibong tinamdan. Sa pagpasukad sa iyang mga gipamulong sa Malakias 3:15, 16, iyang giilustrar nga sayon kaayo ang pagpangitag mga depekto sa usa ka bag-ong nasod. “Magmahinay sa pagpangitag depekto,” mipadayon siya. “Magbaton ug masadyaong tinamdan nga panalanginan sa Diyos.”

Ang ubang mamumulong, apil si Ulysses Glass, ang registrar sa tunghaan, nagpasiugda sa panginahanglan sa pagkamainantoson, katagbawan sa nalampos, ug sa kaisog. Si Jack Redford, kanhi misyonaryo ug usa sa mga instruktor sa tunghaan, mihatag ug praktikal nga tambag mahitungod sa pagbatog liberal nga hunahuna. Hinumdomi, matud niya, “ang mga tawong makinaadmanon nagausob sa ilang mga hunahuna, ang mga buang lamang ang dili mag-usob!” Busa mitambag siya sa bag-ong mga misyonaryo nga mahimong mapasiboon sama kang apostol Pablo, kinsa mikutlo pa sa lumad nga mga magbabalak. (Buhat 17:28) “Pamulak kamo sa dapit nga gitamnan kaninyo. . . . Magbaton ug bukas nga hunahuna ug kasingkasing,” siya mitapos.

Ang pangunang pakigpulong sa graduwasyon gihatag sa presidente sa Watch Tower Society, si Frederick W. Franz, nga karon 92 anyos na. Sa ulohang “Pagpanguna Karon sa Dalan Balik sa Paraiso sa Yuta,” iyang gidumdom ang pagkatukod sa Tunghaang Gilead, “nga usa ka bata sa gubat ug usa ka bata sa pagtuo” nga nagsugod sa tunga sa Gubat sa Kalibotan II. Nga gigamit ang Isaias 62:10 ingong iyang pangunang teksto, iyang gipakita sa unsang paagi kadtong bag-ong mga misyonaryo makaapil sa maong dakong buluhaton sa pagpanukod sa haluag, solidong dalan nga niana ang mga bag-ohan sa matuod nga pagsimba makalakaw sa ilang pagpaingon sa Paraisong gipasig-uli. Sa pagtapos sa programa sa buntag, gipanghatag ang mga diploma ngadto sa 24 ka graduwado.

Ang sesyon sa hapon nag-apil sa makalingaw nga pagsubli sa mga graduwado sa mga butang ilang nakat-onan sa tunghaan, ingon man ang pasiunang talan-awon sa umaabot nga mga hagit nga ilang atubangon. Ang programa natapos sa usa ka drama sa Bibliya nga tin-awng naghulagway giunsa ni Rahab, ug sa ulahi sa mga taga-Gabaon, sa pagpakitag pagtuo nga mitultol sa kaluwasan.​—Josue, kapitulo 2 ngadto 6 ug 9.

Uban sa 24 ka graduwado sa maong ika-80ng klase sa Tunghaang Gilead, ang total nga 6,234 ka misyonaryo ang nanglakaw sa tibuok kalibotan sa pagpanguna sa buluhatong pagsangyaw ingong katumanan sa Mateo 24:14.