Mga Migraduwar sa Gilead Nakadawat sa Gasa sa Misyonaryong Pag-alagad
SA MARSO 1, 1992, ang 22 ka membro sa migraduwar sa ika-92 nga klase sa Watchtower Bible School of Gilead nakadawat ug usa ka gasa—ang gasa sa misyonaryong pag-alagad. Sa dihang naghatag pakigpulong sa klase, si Lloyd Barry sa Nagamandong Lawas nagpahayag: “Hinaot inyong dawaton kanang dalayegong gasa uban sa dakong kalipay, ug hinaot gamiton ninyo kana sa pagdala ug kalipay sa uban.”
Mga 4,662 imbitadong mga bisita ug sakop sa pamilyang Bethel nagtapok sa Assembly Hall sa Siyudad sa Jersey, sa New Jersey, alang sa programa sa graduwasyon. Laing 970 sa mga pasilidad sa New York sa Watchtower Society sa Brooklyn, Wallkill, ug Patterson naminaw pinaagig linya sa telepono. Ang tanan naminaw pag-ayo samtang ang mga migraduwar gihatagan ug mga panamilit nga tambag nga makatabang kanila sa pagpabili pag-ayo sa gasa sa misyonaryong pag-alagad ug sa maalamong paggamit niana.
Ang programa gibuksan pinaagi sa madasigong pag-awit ug awitonon numero 155, “‘Mag-abiabi ang Usa sa Usa’!” Pagkahuman, ang tanan natandog samtang si Frederick W. Franz, ang 98-anyos nga presidente sa Tunghaang Gilead, mipahinungod ug kinasingkasing nga pag-ampo. Unya, ang tsirman, si Carey Barber sa Nagamandong Lawas, nag-abiabi sa tanan sa programa sa graduwasyon ug nag-ingon: “Wala pa masukad ing mas dakong panginahanglan alang sa mga misyonaryong Gilead kaysa karong adlawa.” Sunod sa iyang mga gisulti, gipailaila niya ang usa ka serye sa mugbo, makatabang nga mga pakigpulong.
Si Curtis Johnson sa Bethel Home Committee nagsulti ug una, nagpalapad sa tema “Atimana Pag-ayo ang Imong Tanaman.” Si Brader Johnson nagbatbat nga sa dihang kining bag-ong mga misyonaryo makaabot sa ilang mga asaynment, kada usa kanila makabaton ug espirituwal nga tanaman nga pagatikaron. (1 Corinto 3:9) Ang katawhan ni Jehova sa tibuok kalibotan maoy usa ka espirituwal nga tanaman nga namuswak ug pagkamatarong ug pagdayeg sa atubangan sa tanang kanasoran. (Isaias 61:11) ‘Kon sa unsang paagi nimo atimanon ang imong espirituwal nga tanaman sa umaabot,’ pasiugda sa mamumulong, ‘moapektar ug dako sa imong kalamposan sa imong misyonaryong asaynment.’ Unsa ang makatabang kanila sa pag-atiman pag-ayo sa ilang espirituwal nga tanaman? ‘Si Jehova mahimong alad sa pagpanalipod likos sa inyong espirituwal nga tanaman. Kon kamo determinado sa pag-ugmad sa hustong mga buhat, pabiling suod kaniya diha sa pag-ampo, ug unya pagbuhat uyon sa inyong mga pag-ampo.’
Sunod, si Lloyd Barry naghisgot bahin sa tema “Pagkalipay Kanunay Diha sa Ginoo.” (Filipos 4:4) Kay may kapin sa 25 ka tuig sa misyonaryong kasinatian sa Hapon, siya may pila ka praktikal nga mga sugyot sa pagtabang sa mga migraduwar sa pagtagamtam sa gasa sa misyonaryong pag-alagad. Siya nag-ingon: ‘Makaplagan ninyo nga ang inyong kangaya sa pag-alagad sa Diyos motabang ninyo sa pagbuntog sa daghang mga kapiut ug tingali pila ka pisikal nga mga suliran nga inyong masugamak.’ (Proverbio 17:22) Iyang gipahinumdoman ang mga migraduwar nga tingali ilang hikaplagan ang mga kahimtang ug mga panimuyo nga lahi ra gikan sa ilang naandan. Basin kinahanglan nilang motuon sa bag-ong pinulongan. ‘Kinahanglang maningkamot kamo ug maayo sa pagtuon sa pinulongan. Apan sa dihang kamo makaarang sa pakigkomunikar nga walay babag uban sa mga tawo diha sa ilang kaugalingong pinulongan, kana usab modugang sa inyong kalipay.’
Nagpalapad sa temang “Itutok ang Inyong mga Mata sa Ganti,” si Eldor Timm sa Factory Committee sunod nga nagsulti. Unsa ang ganti? Kinabuhing dayon! Sa pagbaton niana kinahanglang itutok nato ang atong mga mata niana. Ang mamumulong nagbatbat sa pila ka kaamgiran ug kalainan tali sa mga Kristohanon diha sa lumba sa kinabuhi ug mga maglulumba sa paugnat-kusog nga mga salmot sa unang siglo. Sama sa mga maglulumba, ang mga Kristohanon kinahanglang manlimbasog sa pagbansay, pagsunod sa lagda, ug sa paghukas sa mga pabug-at sa ilang kaugalingon. Apan dili sama sa literal nga mga maglulumba, ang mga Kristohanon nagsalmot sa tibuok kinabuhi nga lumba ug nagtinguha sa ganti nga dumalayon. Inay sa usa lamang ka mananaog, ang tanan nga modagan sa lumba sa tibuok kinabuhi hangtod sa kataposan makadawat sa ganti. Si Brader Timm naghinapos: ‘Sa pagdaog sa ganti sa kinabuhi, kinahanglan kita may pakigdait uban kang Jehova, ang Maghahatag sa ganti. Ug aron may pakigdait uban kang Jehova, kinahanglan madaiton kita uban sa atong mga kaigsoonan.’
Si Milton Henschel sa Nagamandong Lawas sunod nga namulong bahin sa tema “Pinaagi sa Paglipay Gikan sa Kasulatan, Makabaton Kita ug Paglaom.” (Roma 15:4) ‘Sa milabayng lima ka bulan,’ sugod sa mamumulong, ‘napuliki kamo sa Bibliya. Natukod ang pagkasuod kaayo. Kamo may lig-ong paglaom. Samtang kamo moadto sa inyong mga asaynment, timan-i palihog nganong ang inyong paglaom maoy lig-on. Kana mahitungod kay kamo nagpabiling suod sa Kasulatan.’ Sa pagpasundayag ug usa ka pananglitan sa asoy sa Bibliya nga nagapalig-on sa paglaom, ang mamumulong nagdala sa pagtagad ngadto sa mga Maghuhukom mga kapitulo 6 hangtod 8, nga nagpahinumdom sa unsang paagi si Gideon gisangonan sa pagluwas sa Israel gikan sa pagdaogdaog sa Midianhon. Human ibatbat ang asoy ug ang iyang kahinungdanon alang sa atong adlaw, siya nag-ingon: ‘Sa dihang kamo may kahigayonan sa pagpakigsuod sa Kasulatan ug maghunahuna mahitungod ning mga butanga, kana makarepresko kaninyo. Kamo makakuha ug kaisog.’
Ang tanan hinam nga makadungog sa panamilit nga tambag sa duha ka pangunang mga instruktor sa tunghaan ngadto sa mga estudyante. Si Jack Redford unang nagsulti bahin sa temang “Buhata ang Hustong Butang.” Iyang gipahinumdoman ang mga migraduwar: ‘Sa Gilead kamo sa bug-os nabansay kon unsay husto sumala sa Kasulatan. Karon kamo moadto sa mahagitong misyonaryong mga asaynment. Ug kami nahibalo nga kamo mahimong makasugamak ug lisod nga mga suliran. Bisan pa niana, ug bisan pa sa inyong mga pagbati, kami nahibalo nga mabuhat ninyo ang hustong butang.’ Unsay makatabang? Usa ka butang, pagbaton ug hustong panlantaw sa uban. Ang mamumulong nag-ingon: ‘Ayaw pagdahom ug kahingpitan gikan sa kadili-hingpit.’ Ang pagbaton ug hustong tinamdan sa masulayong mga kahimtang makatabang usab. ‘Kitang tanan may atong kalamposan ug kapakyasan sa kinabuhi,’ padayag niya. ‘Bisan kinsa makadumala sa mga kalamposan. Ang pagdumala nimo sa kapakyasan ang magatino kon kaha ikaw makalahutay sa misyonaryong pag-alagad.’—Santiago 1:2-4.
Ang magtatala sa tunghaan, si Ulysses Glass, nagpili sa tema nga “Unsay Paglaom sa Umaabot?” Sa paaging morag maymay gikan sa usa ka amahan, iyang gidasig ang mga migraduwar sa paghupot sa ilang paglaom nga nagsigang madan-agon. (Proverbio 13:12) ‘Ang sinugdanan sa pagkawala sa paglaom dili kaayo mamatikdan,’ patin-aw niya. ‘Ang mga sirkumstansiya lagmit makapahinabo kanato nga mahimong napuliki tungod sa atong kaugalingon inay sa atong relasyon uban sa Diyos. Mahimong magkasakit kita o mobating gidaogdaog sa uban. Ang pila mahimong may labaw materyal nga mga butang kaysa atong nabatonan o lagmit may mas maayong resulta diha sa ministeryo, ug basin mahimo kitang morag nasina. Kon tugotan nato nga sa inanay masapnan sa maong mga butang, sa dili madugay ang pagkatinuod sa paglaom sa Gingharian magkahanap diha sa atong kasingkasing ug hunahuna, ug ngani mahimo pa kitang mohunong sa lumba sa kinabuhi.’ Unsay arang mahimo? ‘Positibong lihok kinahanglang buhaton kon atong buhion pag-usab ang atong paglaom. Kinahanglang pun-on nato ang atong mga hunahuna ug kasingkasing sa seguradong mga saad sa Diyos ug iliso ang atong pagtagad sa pagkatinuod sa Gingharian sa Diyos. Ug kinahanglang atong ipasig-uli ang atong komunikasyon kang Jehova, kay kini seguradong motultol sa kalipay.’
Si Karl Klein sa Nagamandong Lawas naghatag sa pakigpulong sa graduwasyon. Ang iyang tema maoy “Nganong Magpaubos?” Ug unsa ang tubag sa maong pangutana? ‘Tungod kay kini maoy husto ug matarong butang nga buhaton, ang maalamon ug mahigugmaong butang nga buhaton,’ saysay niya sa iyang pangbukas nga mga pulong. Ang mga mamiminaw nabihag samtang iyang gihisgotan ang upat ka mga pananglitan sa kamapainubsanon nga maayo natong awaton: (1) si Jehova nga Diyos, kinsa sa tino mapainubsanon sa dihang nakiglabot kang Abraham ug Moises (Genesis 18:22-33; Numeros 14:11-21; Efeso 5:1); (2) si Jesu-Kristo, kinsa ‘nagpaubos sa iyang kaugalingon ug nahimong masinugtanon bisan hangtod sa kamatayon diha sa kahoy sa pagsakit’ (Filipos 2:5-8; 1 Pedro 2:21); (3) si apostol Pablo, kinsa ‘nagpaulipon sa Ginoo uban sa kinaubsan nga panghunahuna’ (Buhat 20:18, 19; 1 Corinto 11:1); ug (4) ‘silang nagapanguna kanato,’ sama sa unang presidente sa Sosyedad, si Brader Russell, kinsa kas-a nagsulat: “Ang buluhaton nga gikahimut-an sa Ginoo sa paggamit sa among ubos nga mga katakos dili buluhaton sa pagmugna kondili sa pagpasig-uli, pagpasibo, pagpauyon.” (Hebreohanon 13:7) Si Brader Klein naglaraw ug dugang kusganong mga katarongan alang sa pagpaubos. Tinuod, ang pagpakabana sa tambag nga mahimong mapainubsanon makatabang sa mga migraduwar sa paggamit nga maalamon sa gasa sa misyonaryong pag-alagad!
Pagkatapos niadtong mga pamulong, gibasa sa tsirman ang mga pagbati nga nadawat gikan sa nagkalainlaing dapit sa yuta. Ang panahon miabot na alang sa mga migraduwar sa pagdawat sa ilang mga diploma. Sila naggikan sa pito ka mga nasod—Canada, Finland, Pransiya, Mauritius, ang Netherlands, Sweden, ug Tinipong Bansa. Apan ang ilang misyonaryong mga asaynment nagdala kanila sa 11 ka mga nasod—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey, ug Venezuela.
Human sa intermisyon, ang programa sa hapon gisugdan pinaagi sa pinamubong Pagtuon sa Watchtower nga gidumala ni Joel Adams sa Service Department Committee. Human niadto, ang mga migraduwar nagdula sa pila nga kasinatian sa pag-alagad sa kanataran nga ilang natagamtam sa panahon sa termino sa tunghaan. Sa kataposan, ang drama Nganong Tamdon ang Teokratikanhong Kahikayan? gipresentar alang sa kaayohan sa entirong mamiminaw, lakip ang mga migraduwar.
Sa pagkatinuod, kining mga migraduwar mingbiya padulong sa ilang langyaw nga mga asaynment uban sa pahamangno ug pagdasig nga motabang kanila sa paggamit sa gasa sa misyonaryong pag-alagad sa pagdala ug kalipay dili lamang sa ilang kaugalingon kondili sa uban usab.
[Chart sa panid 22]
Mga Estadistika sa Klase
Mga nasod nga gihawasan: 7
Mga nasod nga giasaynan: 11
Gidaghanon sa estudyante: 22
Aberids nga edad: 33.4
Aberids nga tuig sa kamatuoran: 16.7
Aberids nga tuig sa bug-os-panahong pag-alagad: 11.8
[Hulagway sa panid 23]
Ika-92 nga Klase nga Migraduwar sa Watchtower Bible School of Gilead
Sa listahan sa ubos, ang mga lumbay ginumerohan gikan sa atubangan paingon sa likod ug ang mga ngalan gilista gikan sa wala patuo sa matag lumbay.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.