Tambag nga “Tinimplahan ug Asin”

“Himoa nga ang inyong mga sinultihan magamadanihon, tinimplahan ug asin, aron mahibalo kamo sa pagpanubag kang bisan kinsa.”—COLOSAS 4:6.

1, 2. Nganong bililhong “tinimplahan ug asin” ug Kristohanong tambag?

SA NANGAGING kasaysayan, ang asin nakadulag tagsaong papel sa pag-andam sa pagkaon. Preserbatibo kini ug makapalami sa sabor, sa ingon ang mga pagkaon nga walay asin las-ay ug walay lami. Busa, dihang misulat si Pablo nga kinahanglang “tinimplahan ug asin” ang mga pulong sa Kristohanon, ang buot niyang ipasabot nga ang atong sinultihan kinahanglang makalig-on, maingon man makalilipay ug madanihon. (Colosas 4:6) Tinuod kini ilabina kon maghatag ug tambag. Ngano?

² Ang katuyoan sa pagpanambag dili lang kay pakig-ambitay ug impormasyon. Sa daghang mga kaso, ang usa nga gitambagan nahibalo na sa pila ka mga prinsipyo sa Bibliya nga aplikado sa iyang situwasyon, apan naglisod siya sa pagpadapat kanila o sa pagkakita sa ilang bili. Busa, ang tinuod nga hagit sa Kristohanong pagpanambag mao ang pagbag-o sa panghunahuna sa usa ka tawo. (Galacia 6:1; Efeso 4:11, 12) Busa, may panginahanglag “asin.”

3. Unsang tabang ang gihatag ni Jehova alang sa Kristohanong magtatambag?

³ Tinuod, usa ka hagit ang pagpanambag, ug aron maabot kana, ang magtatambag nagkinahanglag kahibalo ug pagsabot. (Proverbio 2:1, 2, 9; 2 Timoteo 4:2) Makalilipay, mitagana si Jehova ug Bibliya, nga nasudlan dili lamang hinungdanong kahibalo kondili daghang mga panig-ingnan sa tambag sa may salabotang mga tawo sa Diyos. Ang pagsusi sa pipila niini makatabang kanato nga mahimong mas epektibong mga magtatambag.

Tagda ang “Kahibulongang Magtatambag”

4. Dihang maghatag ug tambag sa kongregasyon, sa unsang paagi makasundog ang Kristohanong ansiano kang Jesu-Kristo?

⁴ Pananglitan, tagda si Jesus, ang “Kahibulongang Magtatambag.” (Isaias 9:6) Sa kataposan sa unang siglo, si Jesus may mga sulat sa pagtambag nga gipadala ngadto sa pito ka kongregasyon sa distrito sa Asia. Kining mga sulata maoy maayong sulondan sa mga ansiano sa pagpanambag sa ilang mga kongregasyon​—ug ang mga prinsipyo aplikado usab sa magtambag sa mga indibiduwal. Ang suliran nga gihisgotan ni Jesus seryoso: apostasiya, impluwensiya ni “Jezebel,” pagkadagaang, ug materyalismo, ug uban pa. (Pinadayag 2:4, 14, 15, 20-23; 3:1, 14-18) Busa bukas nga gihisgotan ni Jesus kining mga sulirana. Dili kaduhaduhaan ang mga butang nga buot niyang isulti sa tagsatagsang mga kongregasyon. Karon, kon mohatag tambag ang Kristohanong mga ansiano sa ilang mga kongregasyon, kinahanglang ilang timplahan ug “asin” ang ilang tambag uban ang pagkamapaubsanon ug kalumo, sa pagsundog kang Jesus. (Filipos 2:3-8; Mateo 11:29) Sa laing bahin, sa pagsundog gihapon kang Jesus, kinahanglang prangka sila. Ang tambag kinahanglang dili hanap kaayo ug malukpanon ra kaayo sa tanan nga dili na hinoon masabtan sa kongregasyon ang punto.

5, 6. Unsang dugang pagtulon-an ang makat-onan sa Kristohanong ansiano sa mga mensahe ni Jesus sa pito ka kongregasyon?

⁵ Tagda usab, nga kon mahimo sa sinugdanan pa lang hatagan ni Jesus ug komendasyon ang mga kongregasyon ug taposon ang iyang tambag sa makalig-ong pagdasig. (Pinadayag 2:2, 3, 7; 3:4, 5) Timplahan usab sa Kristohanong mga magtatambag ang ilang tambag ug pagdayeg ug pagdasig. Sama sa gipamulong sa usa ka eksperyensiyadong ansiano: “Tinuod, wala kay mahimo kon imo lang pangasab-an ang mga igsoon.” Kon mohatag ug kusganong tambag, dili biyaan sa mga ansiano ang mga igsoon nga mobatig kaluya sa buut kondili, napalig-on ug determinado sa paghimo pag mas maayo sa umaabot.​—Itandi sa 2 Corinto 1:1-14.

⁶ Sa kataposan, unsay ikasulti mahitungod sa mga balita ni Jesus ngadto sa mga kongregasyon sa Esmirna ug sa Piladelpia? Wala siya manaway niining mga igsoona. Sanglit nahiagom man sila sa grabeng mga pagsulay, iyang gidasig sila sa pagpadayon sa pag-antos. (Pinadayag 2:8-11; 3:7-13) Ang mga Kristohanong mga magtatan-aw usab, dili lamang mohatag ug tambag kon gikinahanglan ang pagbadlong kondili alisto sa tanang panahon sa pagdayeg sa mga igsoon sa ilang maayong mga binuhatan ug sa pagdasig kanila sa pag-antos.​—Roma 12:12.

Paggamit ug mga Ilustrasyon

7, 8. (a) Sa unsang paagi ang tambag ni Jesus sa iyang mga sumusunod “tinimplahan ug asin”? (b) Nganong bililhon ang mga ilustrasyon kon maghatag kitag tambag?

⁷ Laing higayon nga mihatag si Jesus ug tambag dihang ang iyang mga disipulo nabalaka kon kinsa kanila ang mahimong labing dako sa Gingharian sa langit. Mahimong makapangasaba siya sa iyang mga sumusunod ning bahina. Apan, iyang ‘gitimplahan ang iyang mga pulong ug asin.’ Nanawag ug gamayng bata, siya miingon: “Bisan kinsa nga magpaubos sa iyang kaugalingon sama niining gamayng bata siya mao ang labing dako sa gingharian sa langit.” (Mateo 18:1-4; Lucas 9:46-48) Ang tambag tin-aw apan maluluton ug makalig-on. Sa pagpakita nga ang Gingharian sa langit lahi kay sa mga gingharian ning kalibotana, gidasig ni Jesus ang iyang mga sumusunod nga magmapaubsanon, ug giwala ang ilang hinungdan sa away.

⁸ Panid-i, usab, ang epektibong paagi sa pagpanudlo nga gigamit ni Jesus ning bahina. Usa ka buhing ilustrasyon​—usa ka bata! Butangag “asin” sa maalamong mga magtatambag ang ilang mga pulong pinaagig mga ilustrasyon, sanglit makapasiugda kini sa pagkaseryoso sa butang o makatabang sa dumadawat sa tambag sa pagpangatarongan ug sa pagtan-aw sa suliran sa bag-ong kahayag. Ang mga ilustrasyon makapakunhod sa tensiyon.

9. Unsa ang ubang Kasulatanhong mga pananglitan sa paggamit sa mga ilustrasyon sa paghatag tambag?

⁹ Dihang gipasidan-an si Cain nga dako ang iyang kapeligrohang makahimog dakong sala, matin-aw nga gibatbat ni Jehova ang sala sama sa usa ka mapintas nga mananap. Siya miingon: “Ang sala nag-atang sa ganghaan, apan ikaw magabuot niini.” (Genesis 4:7) Dihang nasuko si Jonas tungod kay wala patya ni Jehova ang mahinulsolong mga taga Nineve, gihatagan siya sa Diyos ug tabayag ingong landong. Unya, dihang nalaya ang tanom ug mireklamo si Jonas, miingon si Jehova: “Ikaw naguol sa tabayag . . . Dili ba angay kong bation ang kasubo sa Nineve nga dakong siyudad, diin nanagpuyo ang kapin sa usa ka gatos ug kaluhaan ka libo ka tawo?” (Jonas 4:5-11) Pagkapuwersado nga tambag!

10. Sa unsang paagi gigamit sa usa ka modernong adlawng Kristohanong magtatambag ang ilustrasyon sa pagtabang sa usa ka batan-on sa dugang pagsabot sa mga motibo sa iyang mga ginikanan?

¹⁰ Maingon man, dihang ang usa ka batan-on nasuko tungod kay gipiotan siya sa iyang mga ginikanan sa iyang mga kauban, ang usa ka nagapanawng magtatan-aw mitabang kaniya pinaagi sa paggamit ning ilustrasyona: “Gusto kang manahi, dili ba? Handurawa ang imong kaugalingon nga nakagugol ug daghang panahon sa pagtahig maanindot nga senina alang sa usa ka higala. Apan dihang gihatag nimo kini kaniya, imong nakita nga gigamit niya kini sa pagtrapo sa salog. Unsay imong bation?” Miadmiter ang babaye nga masuko gayod siya. Busa ang ministro mipadayon: “Mao kanay paghunahuna sa imong ginikanan niana. Daghang panahon ang ilang nagugol sa pagmatuto kanimo, ug mapasigarbohon sila kanimo. Busa gusto nilang makauban mo ang mga tawo nga motagad kanimo sa maayong paagi, dili mga tawo nga modaot lamang kanimo sa ulahi.” Ang ilustrasyon nakatabang sa babaye sa pagpabili sa gihimo sa iyang mga ginikanan.

Pagbangon ug mga Pangutana

11. Sa unsang paagi epektibong gigamit ni Jehova ang mga pangutana sa pagtambag kang Jonas?

¹¹ Dihang nakigsulti si Jehova kang Jonas bahin sa iyang dili makataronganong kasuko, tingali imong namatikdan nga nagbangon usab Siya ug mga pangutana. Dihang si Jonas, nga nasuko nga wala laglaga ang Nineve, mihangyo nga mamatay, si Jehova miingon: “Angay bang masuko ka?” Wala motubag si Jonas. Busa, gitugotan ni Jehova ang tabayag sa pagtubo ug sa pagkalaya. Misamot ang kasuko ni Jonas. Busa gipangutana siya ni Jehova: “Angay bang ikasuko mo ang nahitabo sa tabayag?” Ning panahona mitubag si Jonas: “Angay akong masuko, nga ikamatay ko.” Karon nga mitubag ang propeta kang Jehova, Siya mipadayon sa pagtandi sa tinamdan ni Jonas sa usa lamang ka tanom uban sa Iyang tinamdan sa Nineve, nga nagbangon ug maugdang nga pangutana: “Dili ba diay ako angay masubo sa Nineve?” (Jonas 4:4, 9, 11) Busa natambagan si Jonas sa pagsunod sa tinamdan ni Jehova diha sa mahinulsolong mga taga Nineve.

12. Unsa ang bili sa mga pangutana sa pagpanambag? Iilustrar.

¹² Oo, ang mga pangutana makatabang sa magtatambag sa pagkasayod sa hunahuna sa tawo nga nagkinahanglag tambag. Matabangan usab kanang tawhana sa pagkaamgo pa sa iyang mga suliran ug mga motibo. Pananglitan, tingali moinsister ang usa ka tawo nga may katungod siya sa pag-inom sa dili pa momaneho sa pagpauli sa balay. Tingali tinuod nga mobati siya, ‘Dili ako maapektohan sa alkohol!’ Tingali may higalang buot mangatarongan kaniya, sa pag-ingon: ‘Apan ingnon tang maaksidente ka nga dili nimo sala. Unsa kahay hunahunaon sa polisiya kon ilang namatikdan nga nakainom ka? Ug ingnon ta nga naapektohag diyutay ang imong reaksiyon. Momaneho ka ba gayod sa imong awto bisag dili 100 porsiento ang kalantip sa imong reaksiyon? Takos ba kini, basta makainom lang?’

13. Sa unsang paagi gigamit sa usa ka magtatambag ang Bibliya, lakip sa mga pangutana, dihang mihatag tambag? Nganong epektibo kini?

¹³ Ang Kristohanong tambag kanunayng ipasukad sa Bibliya. Ug kon posible, kinahanglang gamiton gayod sa Kristohanong mga magtatambag ang Bibliya sa maghatag ug tambag. Usa kini ka gamhanong tabang. (Hebreohanon 4:12) Sa pag-ilustrar: Ang usa ka eksperyensiyadong ansiano naningkamot sa pagtabang sa usa nga dili na aktibo sa buluhatong pagsangyaw. Gihisgotan sa ansiano ang sambingay ni Jesus mahitungod sa usa ka tawo nga dunay duha ka anak, diin ang duha gisugo sa pagtrabaho sa iyang parasan. Ang una miingon nga moadto siya apan wala. Ang ikaduha miingon nga dili siya moadto apan midesider sa pag-adto. (Mateo 21:28-31) Dayon ang magtatambag nangutana: “Hain sa duha niining mga bataa ang imong gisunod karon?” Nasabtan sa magmamantala ang punto, ilabina dihang mipadayon ang magtatambag: “Unsay paglantaw sa imong hunahuna ni Jehova, nga Tag-iya sa parasan, sa imong situwasyon?”

14. Unsa ang pila ka situwasyon diin ang mga pangutana mahimong hinungdanong kasangkapan sa paghatag ug tambag?

¹⁴ Sama ra usab kon motabang niadtong may mga pagduhaduha, kadtong may mga suliran sa kaminyoon ug sa panimalay, kadtong may mga problema sa mga indibiduwal, o kadtong anaa sa masulayong mga situwasyon.a Ang hinashasang mga pangutana makatabang niadtong gitambagan sa pagpangatarongan, sa pagtuki sa ilang kaugalingon, ug sa pagdangat sa tukmang mga konklusyon.

Pamati Pag-ayo

15. (a) Unsa ang kapakyasang nahimo sa tulo ka “maglilipay” ni Job? (b) Sa unsang paagi makatabang ang pagpamati sa Kristohanong magtatambag?

¹⁵ Apan, hinumdomi, nga ang pagbangon ug mga pangutana nagpasabot nga gusto kang mamati sa mga tubag. (Proverbio 18:13) Dili angay mahulog ang mga magtatambag sa laang nga nakabitik sa tulo ka “maglilipay” ni Job. Nakigsulti si Job kanila, apan wala gayod sila mamati. May nahukom na ang ilang mga hunahuna nga ang hinungdan sa pag-antos ni Job mao ang iyang pagkamakasasala. (Job 16:2; 22:4-11) Sa kasukwahi, kinahanglang mamati pag-ayo ang Kristohanong mga magtatambag. Busa, iyang panid-an ang makahuloganong mga paghunong o mga paglubad sa tingog nga nagtimaan nga wala pa ikasugid ang tibuok sugilanon. Tingali ang dugang pangutana mopagawas sa hunahuna nga nagpalikod sa hunahuna sa tawo.​—Itandi sa Proverbio 20:5.

16. Unsay gikinahanglan sa magtatambag kon malisod ang pagpaminaw sa mga pahayag sa naguol nga kaubang Kristohanon?

¹⁶ Tinuod, dili kini masayon. Ang nahasol nga tawo tingalig mosinghag: “Naglagot ako sa akong mga ginikanan!” o, “Dili na ako makaantos pa sa akong bana!” Hasol nga pamation kining mga butanga. Apan hinumdomi nga mainandamon si Jehova sa pagpamati dihang mireklamo si Asap nga daw walay kapuslanan ang iyang pagkamatinumanon. (Salmo 73:13, 14) Ang Diyos namati usab dihang miingon si Jeremias nga giduladulaan lang siya. (Jeremias 20:7) Daw mireklamo si Habacuc nga gidaogdaog sa mga daotan ang mga matarong, ug nga wala gani nakakita si Jehova niana. (Habacuc 1:13-17) Kinahanglang andam usab ang Kristohanong mga magtatambag sa pagpamati. Kon mao kini ang bation sa mga tawo, nan angay masayod ang magtatambag bahin niini aron siya makatabang. Dili gayod niya aghaton sa inalistong paagi ang tawong gitambagan sa pagpahayag ug mga opinyon nga sa iyang hunahuna angay huptan sa indibiduwal imbes sa iya gayod nga nabatonan. Likayan usab sa magtatambag ang pagkasuko o sa paghukom dayon, nga makapaluya hinoon sa buut sa tawo sa pagbukas sa iyang kasingkasing.​—Proverbio 14:29; 17:27.

17. Sa unsang paagi ang pagpamati sa atong mga igsoon usahay maoy maayong paagi sa paglipay kanila?

¹⁷ Usahay, ang dakong bahin sa atong pagpanambag mao ang pagpamati, nga nagtugot sa tawo sa pagbubo sa kahiubos, kasakit, o emosyonal nga pag-antos. Dihang mipauli si Noemi gikan sa uma ni Moab, gitimbaya siya sa mga babaye ning mga pulonga: “Mao ba kini si Noemi?” Apan masub-anong mitubag si Noemi: “Ayaw ako pagtawga nga Noemi. Tawga akong Mara, kay ang Makagagahom nagpaantos kanako sa hilabihan nga kapaitan. Ako migikan nga hupong, ug gipabalik ako ni Jehova nganhi nga walay dala. Nganong tawgon ninyo akong Noemi, nga si Jehova ang nagpakaulaw kanako ug ang Makagagahom ang naghatag kanakog katalagman?” (Ruth 1:19-21) Walay ikatubag ang mga babayeng Israelinhon. Apan, sa kasagaran, ang mahigugmaong pagpamati samtang magpahayag ang uban sa ilang emosyonal nga kasakit makaamot sa ilang pagkaayo.b

Magmarealistiko

18. (a) Unsa ang pipila ka pagsanong sa tambag nga gikan kang Jehova ug Jesu-Kristo? (b) Unsang hiyas ang kinahanglang ugmaron sa Kristohanong magtatambag?

¹⁸ Siyempre, lainlain ang pagsanong sa tambag. Maayo ang pagsanong ni Jonas sa tambag ni Jehova. Naulian ang propeta sa iyang gibating kapait ug kasuko nga sa ingon iyang giasoy ang iyang mga eksperyensiya aron makakat-on ang uban gikan kanila. Dugaydugayng panahon nga nakat-onan sa mga sumusunod ni Jesus ang pagtulon-an sa pagkamapaubsanon. Gani, sa gabii nga namatay siya, nagkalalis na usab sila bahin sa kon kinsa ang labing dako kanila! (Lucas 22:24) Busa, kadtong mohatag tambag kinahanglang magpailob. (Ecclesiastes 7:8) Ang tawong may nakagamot nang sayop nga tinamdan sagad dili dayon magbag-o sa iyang dalan tungod lang sa pila ka pulong sa usa ka ansiano. Ang dugay na kaayong mga suliran sa mga kapikas sa kaminyoon dili mawala tapos sa usa ka interbiyo sa usa ka hamtong nga Kristohanon. Ang grabeng sakit nagkinahanglag mga bulan nga maayo, ug maingon man ang seryosong espirituwal nga mga suliran. Ug ang uban dili mamati sa maayong tambag. Bisag gitambagan ni Jehova mismo, milakaw si Cain ug gibuno ang iyang igsoon.​—Genesis 4:6-8.

19. Sa unsang paagi makatabang ang kongregasyon niadtong nag-antos sa emosyonal nga kasakit?

¹⁹ Kadtong dunay dagkong mga suliran kinahanglang magmarealistiko kon unsay ilang mapaabot sa kongregasyon. Ang isigka-Kristohanon dili makawala sa sugmatsugmat nga depresyon, o emosyonal nga kasakit nga moresulta sa usa ka trahedya o makalilisang nga kaagi. Kon may sakit ang tawo sa pisikal, ang kasagarang mahimo sa doktor mao ang pagpabati kaniyang komportable samtang ang panahon moayo ra sa lawas. Sa susama, dihang mag-antos sa emosyon ang Kristohanon, ang mahimo sa kongregasyon mao ang “pagpabati kaniyang komportable,” mag-ampo uban kaniya ug alang kaniya, maghatag madasigong mga pulong kon posible, ug maghatag bisan unsang praktikal nga tabang nga ilang mahimo. Ug sa kasagaran, ang panahon ug ang espiritu ni Jehova mao na ang moayo. (Proverbio 12:25; Santiago 5:14, 15) Busa, ang usa ka biktima sa pag-unay misulat: “Samtang ang pag-unay maoy makalilisang nga kalisod sa emosyon, ang organisasyon ni Jehova dakog mahimo sa pagtabang kanimo, ug uban sa tabang sa Kasulatan ug sa pagtabang sa mga igsoong babaye ug igsoong lalaki ikaw makabuntog ra.”c

20. Unsay bahin ang gidula sa tambag samtang kitang tanan nagapaningkamot sa pagpadayon sa pag-alagad kang Jehova?

²⁰ Oo, ang mga Kristohanon may responsabilidad sa pagtabang sa usag usa. Ilabina ang mga ansiano, ug ang tanan usab sa kongregasyon, angay mabalaka sa kaayohan sa usag usa ug sa pagtanyag maluluton, Kasulatanhong tambag kon gikinahanglan. (Filipos 2:4) Siyempre, ang maong tambag dili hinarihari kun mabangison. Ni mohatag kinig impresyon sa pagsulay sa pagkontrolar sa kinabuhi sa usa. Hinunoa, kinahanglang ipasukad kini sa Kasulatan ug “tinimplahan ug asin.” (Colosas 4:6) May mga panahon nga ang tanan nagkinahanglan ug tabang, ug ang tukma sa panahong tambag, nga ‘inasinan,” uban sa kalulot ug pagdasig, makatabang kanatong tanan sa pagpadayon sa dalan sa kinabuhing walay kataposan.

Nahinumdoman Mo Ba?

◻ Unsa ang mga kinaiyahan sa tambag ngadto sa pito ka kongregasyon ang makatabang sa mga ansiano karon?

◻ Unsang Kasulatanhong pananglitan ang makita sa paggamit sa mga ilustrasyon sa paghatag tambag?

◻ Alang sa Kristohanong magtatambag, unsa ang tinuod nga bili sa mga pangutana?

◻ Sa unsang paagi magamit sa hanas nga magtatambag ang Bibliya?

◻ Sa unsang paagi ang tawong naghatag tambag mahimong mainampingong tigpamati?

[Mga footnote]

[Hulagway sa panid 17]

Gigamit ang gamayng bata sa pag-ilustrar sa iyang punto, mihatag si Jesus sa iyang tin-aw, malulot, ug makalig-ong tambag

[Hulagway sa panid 18]

Si Jonas nasakitan ug nasuko, apan dayag nga maayo ang iyang pagsanong sa tambag ni Jehova