Diyosnong Kalinaw Alang Niadtong Gitudloan ni Jehova
“Ang tanan nimong mga anak pagatudloan ni Jehova, ug dagaya ang kalinaw sa imong mga anak.”—ISAIAS 54:13.
KALINAW! Pagkatilinguhaon niana! Apan ang rekord sa katawhan dili gayod malinawon. Ngano man?
1, 2. Diin nagadepende ang pagtagamtam sa kalinaw?
2 Ang pagtagamtam sa kalinaw suod nga nalangkit sa pagtahod sa awtoridad. Ug kinsa ang labing taas nga awtoridad sa uniberso? Ang Maglalalang, si Jehova nga Diyos. Busa ang gikahimut-ang relasyon uban kaniya hinungdanon alang sa kalinaw. (Salmo 29:11; 119:165) Kon mabungkag kanang labing hinungdanong relasyon, imposibleng mabatonan ang tinuod nga kalinaw uban sa Diyos, sa isigkatawo, o sa kaugalingon.—Isaias 57:21.
Kon Nganong Walay Kalinaw ang Kalibotan
3 Sumala sa ato nang nasayran, wala magdugay tapos sa banagbanag sa kasaysayan sa tawo nga ang espiritu nga anak sa Diyos mirebelde batok kang Jehova. Ang rebelyon maoy usa ka pagpakiggubat. Kadtong magbubungkag sa kalinaw, nga nailhan sa ulahi nga Satanas nga Yawa, misugyot kang Eva sa dili pagtugot sa balaod sa Diyos nga mobabag sa iyang pagbuhat ug butang nga nakita niyang makahatag kaniyag kaayohan. Gituis sa Yawa ang mga kamatuoran sa pagpahunahuna kang Eva nga siya gihikawan ug usa ka butang nga maayo tungod sa pagpamati sa Diyos. Gidani siya nga mahimong dalo, sa ako-una nga kaisipan. Sa ulahi miduyog ang iyang bana kaniya sa ilang pagkadaotan, ug tungod niini, ang tanan nilang mga anak natakdan nianang espirituha.—Genesis 3:1-6, 23, 24; Roma 5:12.
4, 5. (a) Diin kutob nga milampos si Satanas sa pag-impluwensiya sa kaisipan sa katawhan? (b) Unsay epekto niana diha sa mga paningkamot sa tawo sa pagpatunghag kalinaw?
4 Dili kay gamayng bahin lamang sa katawhan ang nagasalikway sa balaod sa Diyos. Ang Bibliya nagsugilon kanato nga si Satanas “nagalimbong sa tibuok kalibotan.” (Pinadayag 12:9) Tinuod nga sobra ka daotan ang ubang mga tawo, nga nagapakitag bug-os nga pagkawalay pagtagad sa Diyos ug sa ilang isigkatawo; ug dili ingon niini ang uban. Apan malamposon kaayo si Satanas sa pag-impluwensiya sa kaisipan sa katawhan nga gumikan niana nakapahayag si apostol Juan: “Ang tibuok kalibotan anaa sa gahom sa usa nga daotan.” (1 Juan 5:19) Nagtuo man o wala ang mga tawo nga naglungtad ang Yawa, sila nagabuhat sa iyang gusto. Ilang gisunod siya, busa siya mao ang ilang magmamando. Tungod niini, ang katawhan nahilayo sa Diyos, ug nahimong iyang kaaway. Niining matanga sa palibot, ikatingala bang nangapakyas ang mga paningkamot sa tawo sa pagpatunghag kalinaw?—Colosas 1:21.
5 Busa, ang nagauswag nga gidaghanon sa mga tawo nga gikan sa tanang kanasoran nagatagamtam sa diyosnong kalinaw, kalinaw nga gikan sa Diyos. Sa unsang paagi nakab-ot kini?
Ang Makatagbawng Kalinaw nga Ginahatag sa Diyos
6. (a) Unsay gipasiugda ang gihatag sa Bibliya mahitungod sa kalinaw? (b) Pinaagi ni kinsa nga posible natong matagamtam ang kalinaw nga ginahatag sa Diyos?
6 Diha sa Roma 15:33 tukmang gibatbat si Jehova ingon nga “ang Diyos nga nagahatag sa kalinaw.” Sukad sa sinugdan, katuyoan sa Diyos alang sa iyang tanang mga linalang nga makatagamtam ug kalinaw. Kapin sa 300 ka beses nga ang iyang dinasig nga Pulong, ang Bibliya, nagpunting ug kalinaw. Kini nagpatin-aw nga si Jesu-Kristo mao ang “Prinsipe sa Pakigdait.” (Isaias 9:6, 7) Siya mao ang gisugo sa Diyos sa pagbungkag sa mga binuhatan sa pangunang magbubungkag sa kalinaw, si Satanas nga Yawa. (1 Juan 3:8) Ug pinaagi sa “Prinsipe sa Pakigdait” matagamtam natong tanan ang makatagbawng kalinaw nga ginahatag sa Diyos.
7. (a) Unsay nalakip nianang hinatag sa Diyos nga kalinaw? (b) Nganong dili kini usa ka butang nga kinahanglang atong hulaton hangtod nga mahanaw ang daang sistema ug sa mabatonan na nato sa kataposan ang kahingpitan?
7 Unsa ka katingalahang kalinaw kini! Labaw pa kini sa pagkawalay gubat. Ang Hebreohanong pulong sha·lohmʹ, nga kasagarang hubarong “kalinaw,” nagpasabot ug maayong panglawas, kauswagan, ug kaayohan. Ang kalinaw sa Diyos nga gihuptan sa tinuod nga mga Kristohanon tagsaon sa pagkaagi nga kini wala magadepende sa ilang palibot. Wala kini magkahulogan nga ang dili maayong mga palibot dili makaapektar kanila. Apan nakabaton sila ug kalig-on sa kinasuloran nga nakapalikay kanila sa mga butang nga makadugang sa kagubot pinaagi sa pagbalos kon matandog sila niini. (Roma 12:17, 18) Bisag may sakit sa pisikal o kabus ang usa ka tawo, mahimong himsog ug mauswagon gihapon siya sumala sa espirituwal nga baroganan ug busa nagatagamtam sa kalinaw nga ginahatag sa Diyos. Sa dayag, ang kalinaw nga ilang ginatagamtam molambo dihang kining hakog nga kalibotan mawagtang, ug kini molalom dihang makab-ot sa tanang katawhan ang kahingpitan. Apan ang diyosnong kalinaw nga posible karon mao ang malinawng kondisyon sa hunahuna ug kasingkasing, usa ka kalmadong pagbati sa kinasuloran bisan unsa pay nagakahitabo sa gawas. (Salmo 4:8) Nagagikan kini sa gikahimut-ang relasyon uban sa Diyos. Pagkabililhong bahandi!
Mga Anak nga Gitudloan ni Jehova
8. Kinsa ang unang nagatagamtam niini nga kalinaw sa Diyos pinaagi ni Jesu-Kristo?
8 Kinsa ang nakabaton sa maong kalinaw tungod kay gitudloan ni Jehova ug nagasunod sa iyang mga sugo? Sa pagtubag, gikuha sa Bibliya ang atong pagtagad una ngadto kanilang nagalangkob sa espirituwal nga Israel. Sila gihisgotan diha sa Galacia 6:16, diin dinhi atong mabasa: “Ang kalinaw ug kaluoy maanaa unta sa Israel sa Diyos, sa tanan nga nagalakaw subay niining lagda sa pamatasan.” Kini sila mao ang 144,000 kinsa gipili sa Diyos aron makaambit sa langitnong kinabuhi uban ni Jesu-Kristo.—Pinadayag 14:1.
9. Unsang “lagda sa pamatasan” ang nalangkit sa pagtagamtam sa espirituwal nga Israel ug kalinaw?
9 Balik sa unang siglo, ang espirituwal nga Israel nagtuon sa pangunang kamatuoran, ang “lagda sa pamatasan,” nga direktang nalangkit sa ilang pagtagamtam sa kalinaw. Hinungdanon nga ilang masabtan ang lagda sa pamatasan. Sulod sa kapin sa 15 ka siglo, gigamit ni Jehova ang Moisesnong Kasugoan aron sa paglandong sa maayong mga butang sa umaabot. Apan tapos sa gihalad nga kamatayon ni Jesu-Kristo, ang mga kinahanglanon sa Moisesnong Kasugoan dili na mabugkoson. (Hebreohanon 10:1; Roma 6:14) Nakita kini gikan sa desisyon sa Kristohanong nagamandong lawas sa Jerusalem maylabot sa isyu sa sirkunsisyon. (Buhat 15:5, 28, 29) Kini gipasiugda pag-usab diha sa dinasig nga sulat ngadto sa mga taga Galacia. Ang maayong mga butang nga gilandongan sa Moisesnong Kasugoan natuman na. Sa mapailobon gisilsil ni Jehova diha sa mga hunahuna ug sa mga kasingkasing sa dinihogang mga sumusunod ni Kristo ang kahulogan sa Iyang dili-takos nga kalulot nga gipasundayag pinaagi ni Kristo. Pinaagi sa pagpakitag pagtuo niining maong tagana, pinaagi sa ilang paggawi nga subay niana, matagamtam nila ang usa ka matang sa kalinaw nga wala pa sukad matagamtam sa makasasalang mga tawo.—Galacia 3:24, 25; 6:16, 18.
10. (a) Ang espirituwal nga Israel nakatagamtam ug unsang katumanan sa saad nga girekord sa Isaias 54:13? (b) Sa unsang paagi ang pagdisiplina ni Jehova kanila nahimong tabang sa ilang pagtagamtam ug kalinaw?
10 Gitagamtam sa sakop sa espirituwal nga Israel ang katumanan sa dakong saad nga natala sa Isaias 54:13. Didto ang Diyos miingon ngadto sa iyang samag-asawang organisasyon sa maunongong mga espiritung linalang: “Ang tanan nimong mga anak pagatudloan ni Jehova, ug dagaya ang kalinaw sa imong mga anak.” Siyempre, ang iyang pangunang Anak mao si Jesu-Kristo, nga gipanganak ingong Mesiyas dihang siya gidihogan sa balaang espiritu sa 29 K.P. Apan ang langitnong “babaye” ni Jehova adunay daghan pang mga anak—144,000 nga nahimong ikaduhang bahin sa binhi nga gitagna diha sa Genesis 3:15. Misaad si Jehova nga siya unya mao ang Dakong Magtutudlo sa tanan niining mga anak. Iyang gitudloan sila sa kamatuoran mahitungod kaniya ug sa iyang mga katuyoan. Iyang gitudloan sila kon unsaon sa pag-alagad kaniya. Usahay, iyang gidisiplina sila. Gikinahanglan kini kon sila mosipyat sa pagsunod sa iyang Pulong. Malisod nga dawaton ang disiplina. Apan sila mapaubsanong midawat sa ilang panginahanglan niini ug mihimog mga kausaban, ug nga mibunga ug maayong mga bunga ang maong disiplina—“malinawong bunga, nga mao, ang pagkamatarong.”—Hebreohanon 12:7, 11; Salmo 85:8.
Ang “Dakong Panon” Gitudloan sa mga Dalan ni Jehova
11. (a) Kinsa pa ang gitudloan ni Jehova sa atong adlaw? (b) Sa unsang paagi ilang gipasundayag nga sila takos sa katin-awang makita sa Isaias 2:2, 3, ug unsay epekto niini diha sa uban?
11 Sa atong adlaw, ang espirituwal nga Israel dili mao lamang ang grupo nga gitudloan ni Jehova. Sa miaging katungang siglo, ang pagtagad gitumong usab diha sa uban. Si Isaias gidasig sa pagsulat mahitungod kanila sa kapitulo 2 ug 3: “Ug mahitabo sa ulahing mga adlaw nga ang bukid sa balay ni Jehova pagatukoron sa ibabaw sa kabukiran, ug igatuboy sa ibabaw sa mga bungtod; ug ang tanang mga nasod magaganayan ngadto kaniya.” Oo, kadtong modawat sa pagsimba sa bugtong tinuod nga Diyos nagahatag niini ug labing hataas nga dapit sa ilang mga kinabuhi. Busa nagabarog kini nga taas pa kay sa tanang porma sa pagsimba nga niini sila nakigbahin niadto ug padayong nagapakigbahin ang kalibotan sa ilang palibot. Ang katawhan sa tanang kanasoran nakakita niini. Ilang nakita nga, bisan unsa pay pangayoon sa mga awtoridad sa kalibotan o sa pagkakaylap sa dili-kristohanong mga batasan sa kalibotan, ginauna sa nagasimba kang Jehova ang ilang relasyon kaniya nga labaw sa tanang butang. Nakita usab sa uban ang napatunghang bunga diha sa mga kinabuhi sa maong mga magsisimba, ug daghan ang gustong moambit sa tinuod nga pagsimba. Busa kapin sa tulo ka milyong mga tawo nagaingon karon sa uban: “Umari kamo, ug manungas kita sa bukid ni Jehova, ngadto sa balay sa Diyos ni Jacob; ug siya magatudlo kanato sa iyang mga dalan, ug kita magalakaw sa iyang mga alagianan.”—Tan-awa usab ang Zacarias 8:23.
12. Sa unsang paagi ang gihisgotan sa Isaias mapahimuslan pinaagi sa pagbaton sa Diyos ingong ilang Magtutudlo, ug unsa ang tagsaong bahin sa instruksiyon nga iyang gihatag kanila?
12 Hunahunaa lang ang kahulogan niana—ang pagaton sa Diyos ingong ilang Magtutudlo! Kadtong nagadawat sa maong instruksiyon ug tinuod nga nagapabili sa tuboran niini wala hampaka sa kagubot sa hunahuna. Wala sila mabahinbahin tali sa duha ka opinyon o nagaduhaduha kon unsa ang matarong. Ang kamatuoran gikan sa Pulong sa Diyos matin-aw kaayo. Ug unsay gipadayag sa Isaias 2:4 nga maoy tagsaong bahin sa instruksiyon nga ilang nadawat? Nalangkit kana kon unsaon sa pagtagamtam sa kalinaw diha sa magubot nga kalibotan. Busa, bisan unsa pay gustong buhaton sa uban, kadtong gitudloan ni Jehova naningkamot sa paghimo sa ilang mga espada nga mga punta sa daro ug sa ilang mga bangkaw nga mga galab. Sila dili na magpakakat-on pa mahitungod sa gubat.
13. Diin gikan ang “dakong panon,” apan nganong nahimo sila nga ingon nianang matanga sa mga tawo?
13 Mao gihapon kining grupoha ang gilarawan diha sa Pinadayag 7:9, 10, 14 ingong nalakabang buhi sa malinaw nga bag-ong yuta sa Diyos nga maoy mosunod sa umaabot nga “dakong kasakitan.” Ang makalabang buhi nga “dakong panon” nagagikan sa tanang rasa, mga tribo, mga katawhan, ug mga pinulongan. Ang kadaghanan kanila sakop niadto sa mga pundok nga naggubatay sa usag usa. Ang uban nagalakat sa mahakugong kurso sa kinabuhi; bisan pa, kana makababag usab sa pagtagamtam sa pakigdait. Apan karon kini sila nga migula gikan sa tanang kanasoran maoy mahigugmaon ug kalinaw, nagapasiugda ug pakigdait nga katawhan. Ug unsay nakahimo kanila nga ingon niana? Sila gitudloan ni Jehova.—Isaias 11:9.
Usa ka Tagsaong Matang sa Kalinaw
14. Gipasukad sa unsa ang kalinaw sa katawhan sa Diyos, ug nganong naingon niana kini?
14 Ang kalinaw nga gihatag sa Diyos sa iyang katawhan tinuod nga tagsaon. Dili kini butang nga resulta sa usa ka mahuyang nga kasabotan taliwala sa duha ka partido nga walay pagsaliganay sa usag usa. Kini walay pakigkompromiso. Gipasukad kini sa pagkamatarong. (Isaias 32:17) Apan sa unsang paagi mahimo kanang tinuod nga kalinaw nga nalangkit man ang mga tawong dili-hingpit? Ingong mga makasasala, unsang pagkamatarong ang atong nabatonan? Buweno, pinaagi sa pagtuo atong matagamtam ang pagkamatarong nga gihimong posible pinaagi sa nagatabon sa sala nga halad ni Jesus.
15. Sa panahon sa yutan-ong ministeryo ni Jesus, unsay gitudlo ni Jehova sa iyang umaabot nga mga anak nga hinungdanon sa kalinaw?
15 Kini nakatabang kanato sa pagsabot sa gipamulong ni Jesus nga narekord diha sa Juan 6:45-47. Didto nakigsulti siya sa mga Hudiyo nga wala madani kaniya ingon nga mao ang Mesiyas ug nagbagolbol batok kaniya. Apan maylabot sa iyang mga tinun-an nga siya miingon: “Diha sa mga Propeta nahisulat kini nga nag-ingon [sa espisipiko, sa Isaias 54:13], ‘Ug silang tanan pagatudloan ni Jehova.’ Ang tanan nga nakadungog ug nakakat-on gikan sa Amahan magaari kanako. Dili kay adunay nakakita sa Amahan, gawas kaniya nga gikan sa Diyos; kini siya nakakita sa Amahan. Sa pagkatinuod magaingon ako kaninyo, Siya nga motuo may kinabuhing dayon.” Gidawat niadtong mga disipuloha ang instruksiyon nga gihatag kanila ni Jehova. Sila nadani kang Jesus. Dihang gisalikway sa uban ang mga butang nga iyang gitudlo ug gitalikdan si Jesus, nagpabilin ang iyang mga apostoles. Sumala sa gipamulong ni Pedro: “Kami nagatuo ug midangat sa kahibalo nga ikaw mao ang Balaang Usa sa Diyos.” (Juan 6:69) Tungod sa ilang pagtuo ni Jesu-Kristo, makahimo sila sa pagdangat sa makigdaitong relasyon kang Jehova nga Diyos, usa ka relasyon nga may pasalig sa kinabuhing dayon.
16. (a) Sukad sa Pentekostes 33 K.P., sa unsang paagi ang mga sumusunod ni Jesus nakapahimulos sa tagana nga gihimo pinaagi ni Kristo? (b) Tapos niadto, unsay gikinahanglan kanila?
16 Sugod sa Pentekostes 33 K.P., ang mga kaayohan sa halad ni Kristo nagsugod nga gipadapat ngadto sa matinumanong mga sumusunod ni Jesus. Ang gisulat ni Pablo sa ulahi diha sa Roma 5:1 natuman diha kanila: “Karon nga gipahayag na kita nga matarong pinaagi sa pagtuo, pasagding tagamtamon nato ang pakigdait sa Diyos pinaagi sa atong Ginoo si Jesu-Kristo.” Pinaagi sa pagkatawo silang tanan nahimong mga kaliwat ni Adan. Sanglit mga makasasala, sila nahilayo gikan sa Diyos. Walay maayong mga binuhatan nga ilang mahimo nga makawagtang sa ilang napanunod nga kasal-anan. Apan pinaagi sa Iyang dili-takos nga kalulot, gidawat ni Jehova ang halad sa hingpit nga tawhanong kinabuhi ni Jesus alang sa mga anak ni Adan. Alang niadtong nanagtuo niining maong tagana, mahimo na karon nga isipon silang matarong ug sila mahimong sagopon sa Diyos ingong mga anak nga may palaabutong langitnong kinabuhi. (Efeso 1:5-7) Apan unsa pay gikinahanglan alang kanila? Oo, sila kinahanglang magalakaw sa mga dalan ni Jehova. Dili na sila magpadayon pa sa pagpakasala. Apan sila nahibalo nga ang pagkamatarong nga ilang nabatonan maoy sangpotanan sa dili-takos nga kalulot sa Diyos pinaagi ni Kristo. Sumala sa gipamulong sa kasulatan, ‘tagamtama ang kalinaw sa Diyos pinaagi ni Jesu-Kristo.’
17, 18. (a) Gitagamtam ba sa “ubang mga karnero” ang maong kalinaw uban sa Diyos? (b) Unsang dugang pangutana ang takos tagdon?
17 Unsay ikasulti mahitungod sa gipunting ni Jesus ingong iyang “ubang mga karnero”? (Juan 10:16) Gitagamtam ba nila ang maong kalinaw sa Diyos? Dili ingong mga anak sa Diyos, kondili gilakip sila diha sa Colosas 1:19, 20 ingong mga magdadawat sa balaang kalinaw. Kini nag-ingon nga nakita sa Diyos nga maayo pinaagi ni Kristo sa “pagpasig-uli pag-usab nganha sa iyang kaugalingon sa tanang mga butang sa kayutaan [sa ato pa, kadtong hatagan ug kinabuhing dayon diha sa paraiso sa yuta] o sa kalangitan ug naghimog kadaitan pinaagi sa iyang [Jesus] dugo diha sa kahoy sa pagsakit.” Sila uban sa yutan-ong mga palaabuton gipahayag nga matarong ug nagatagamtam ug pakigdait sa Diyos bisan karon, dili ingong mga anak, kondili ingong ‘mga higala sa Diyos,’ sama kang Abraham. Pagkahalangdong posisyon kana!—Santiago 2:23.
18 Gikalipayan ba nimo kanang maong kalinaw? Gitagamtam ba nimo kini sa bug-os sumala sa maarangan sa mga tawo nga nagkinabuhi niining labing makahuloganong panahon sa kasaysayan? Atong tagdon sa sunod nga artikulo, ang pipila ka mga butang nga makatabang sa pagkab-ot niana.
Mga Pangutana Agig Repaso
◻ Nganong walay kalinaw ang kalibotan?
◻ Unsa nga kalinaw ang gihatag sa Diyos karon?
◻ Kinsa ang nagatagamtam sa maong kalinaw?
◻ Nganong ang pagkamatarong hinungdanon niana nga kalinaw?
3. Sa unsang paagi nadaot ang relasyon sa tawo uban sa Diyos?
[Hulagway sa panid 14]
“Ang tanang nakadungog ug nakakat-on gikan sa Amahan magaari kanako”