Unsa ka Praktikal ang Modernong-Adlaw nga Relihiyon?

“AKONG giitsa ang Bibliya sa kuwartong-tun-anan sa akong pagpaingon sa akong lawak-higdaan. Abi nakog dili na ako mopunit niana pag-usab o moatender ug laing simbahan. Ako nagpangita sa mga unom na ka tuig. Bisan pa niana ako wala makakaplag ug tabang.”

Si Ronald, usa ka 26-anyos nga operetor ug kompiyutir, nakaagig pila ka kalisod ug nahadlok nga magun-ob ang iyang kinabuhi. Ang relihiyon daw walay praktikal nga bili alang kaniya. “Tapos na ako niana,” matud niya.

Daghang tawo, sama kang Ronald, nahiubos sa relihiyon. Komosta ka man? Nagtuo ka bang ang relihiyon nakahatag ug praktikal nga tabang ug giya sa mga tawo aron sila mahimong mas maayong mga kauban sa trabaho, mga silingan, mga bana, mga asawa, mga ginikanan, o mga anak? Ang relihiyon ba usa ka impluwensiya sa kalinaw ug panaghiusa taliwala sa mga tawo? Nakatabang ba kini kanila sa pagsabot sa katuyoan sa kinabuhi? Nakasilsil ba kini sa seguradong paglaom sa umaabot diha sa ilang mga hunahuna ug mga kasingkasing?

Walay Praktikal nga Giya

Niining komplikadong kalibotan, gikinahanglan sa mga tawo ang maalamon, matin-awng giya. Makadahom ba sila niini gikan sa espirituwal nga mga pangulo? Sa usa ka sulat ngadto sa usa ka kolumnista sa magasin, ang usa ka babaye mireklamo:

“Ang ato na lamang madungog karon diha sa atong simbahan . . . sa taastaas nang panahon karon mao ang gugma, gugma, gugma. . . . Unsa na bay nahitabo sa ‘Dili ka’​—‘Dili ka magpatay. Dili ka mangawat,’ ug uban pa? Kinahanglang subsob kitang pahinumdoman nga ang pila ka butang ginadili. . . . Apan dili na gani kita makadungog sa pulong ‘Sala.’ Kini nahisamag ilang gilikayan kini nga daw kini mahugaw, mahilas nga pulong.”

Dayag, gibati sa pipila nga ang ilang relihiyosong mga magtatambag nahimong luag kaayo, matinugoton kaayo. Ang ingong espirituwal nga mga giya mahuyang. Sila nahisama sa doktor nga magtabontabon sa sakit sa iyang pasyente ug moresetag sinambogan nga medisina. Unsa ang pila ka hinungdan sa maong kapakyasan?

Propesyon Anaa sa Krisis

Ang usa ka tawong nabug-atan sa iyang kaugalingong mga suliran dili makaarang sa paggugol sa daghang panahon ug paningkamot sa pagtabang sa uban. Ang mga taho sa balitaanan nagapadayag nga ang nagkadaghang klerigo nabug-atan kaayo sa ilang kaugalingong propesyonal ug personal nga suliran. Ania ang pila ka pananglitan:

“Bisan tuod kasagaran ang tensiyon ug kawalay-kapuslanan sa daghang propesyon karong adlawa, kana labing grabe taliwala sa Hudiyong klero,” matud sa klinikal nga sikologo si Dr. Leslie R. Freedman human sa upat-ka-tuig nga pagtuon sa unibersidad bahin sa Hudiyonhong klero.

“Kon ako may anak lalaki, gusto ko bang siya magpari? Ikasubo, ang akong tubag kinahanglang dili,” nagpatuo ang usa ka pari, si William Wells, sa usa ka taho mahitungod sa mga suliran sa mga klerigo. Nganong dili man? Siya miingon nga siya dili makadasig sa usa ka batan-ong lalaki sa pagpalandong sa usa ka propesyong gisakit pag-ayo sa “panagbangi, kasamok, ug mga kawalay-piho sama sa Romano Katolikong pagkapari karong adlawa.”

Ang mga pari sa Swekong suportado-sa-Estadong Luteranong Iglesya may suliran usab. Ang usa ka Swekong mantalaan nag-ingon: “Ang mga pari may mga suliran sa pangisip, nga sa grabeng mga kaso mosangpot sa paghikog. . . . Ang propesyon sa pagkapari anaa sa krisis.”

Makapalibog nga Kawalay-Panaghiusa

Sa mga nasod diin ang relihiyosong mga pangulo nalambiggit sa hago ug makapabahin nga mga gubat, sila mahitipas gikan sa paghatag ug tukmang pagtagad sa espirituwal nga mga panginahanglan sa katawhan. Kinahanglan usab nga sila makaambit sa responsabilidad sa pagkawala sa mga tawo ug sa salapi nga magamit unta sa materyal nga kaayohan sa katawhan.

Sa tanang bahin sa kalibotan anaa kadtong nawad-an sa ilang pagsalig sa relihiyon ug nahimong dili matinagdanon sa relihiyon. Ang pagkawala sa mga membro ug pag-us-os sa tumatambong sa simbahan gitaho gikan sa mga dapit sama sa Sweden, Pinlandiya, Alemanya, Britanya, Italya, Canada, ug sa Tinipong Bansa.

Ikaw ba nahiapil niadtong si kinsa, sama kang Ronald, nagahunahuna nga sila tapos na sa relihiyon? Ug bisan pa, may relihiyon kaha nga napamatud-ang may praktikal nga bili alang sa daghan? Kini hisgotan sa sunod nga artikulo.