Makaplagan ba Nimo ang Hustong Relihiyon?

SI Ronald—nga gihisgotan sa nag-unang artikulo—naghunahunang angay niyang ihunong ang iyang pagpangita sa usa ka relihiyon nga makahatag niyag praktikal nga tabang ug giya. Apan siya mihukom sa paghatag ug kataposang higayon sa iyang kaugalingon. “Kon tinuod man nga may Diyos, gusto kong siya masayod nga ako matinud-anong nangita kaniya,” matud niya. Busa usa ka gabii si Ronald miampo: “Kon tinuod man nga ikaw Diyos nga mahigugmaon, pangitaa ako kay sa daghan nang mga tuig ako nangita kanimo ug wala makakaplag.”

Pila ka adlaw sa ulahi sa iyang trabaho, si Ronald giasayn sa usa ka turno sa trabaho kauban sa usa ka Saksi ni Jehova. Siya misugod sa pagsukitsukit kaniya mahitungod sa Bibliya. Ang mga tubag nakahaling sa iyang pagkamausisaon. Sa wala madugay siya misugod sa pagtuon sa regular sa Bibliya. Siya mitambong usab sa mga miting sa lokal nga kongregasyon sa mga Saksi ni Jehova.

Unom ka bulan sa ulahi si Ronald nakombinsir nga iyang nakaplagan ang relihiyon nga naghatag kaniyag panukmod sa pagpasibo sa iyang kinabuhi sa labing praktikal nga paagi. Tapos sa tulo ka tuig nga pakig-uban sa mga Saksi ni Jehova, siya misaysay sa usa ka sulat ngadto sa magasing Bantayanang Torre sa pila ka kaayohang iyang nakuha gikan niining pakig-ubana.

Nawagtang ang “Kinaiya nga Mopatay”

Si Ronald misulat: “Ang unang kaayohan gikan sa pagkakat-on sa kamatuoran [pagtulon-an sa Bibliya] mao ang pagkaarang sa pagpugong sa akong kasuko. Sa dugayng panahon ako nalambiggit sa martial arts. . . . Ako niadto tigbansay gikan sa unom ngadto walo ka oras sa usa ka adlaw, ug gisilsil kanunay kanako nga ugmaron ang kinaiya nga mopatay.”

Ang pagpakig-away ug pagpatay dili epektibong mga paagi sa pagsulbad sa mga kasungian batok sa isigkatawo. Busa, ang mapuslanong relihiyon maoy usa ka impluwensiya alang sa kalinaw. Ang Bibliya nagaingon sa Roma 12:18: “Magmakigdaiton sa tanang tawo.” Ang mga Saksi ni Jehova dili magbansay sa ilang mga lawas alang sa pagpakig-away, ni sila magtinguha sa pagpanalipod sa ilang kaugalingon pinaagi sa pagtuon unsaon paggamit ug mga pusil. Sila ilado sa tibuok yuta sa ilang makigdaiton, neyutral nga baroganan panahon sa gubat.

Kay nakakita sa praktikal nga impluwensiya o kagahom sa maong relihiyon, usa ka Romano Katolikong madre misulat sa usa ka Italyanhong magasin sa simbahan: “Pagkalahi unta ang kalibotan kon kitang tanan mahigmata usa ka buntag nga malig-ong nakahukom nga dili na mobakyaw ug armas, . . . sama sa mga Saksi ni Jehova!”

Kining makigdaitong tinamdan taliwala sa mga Saksi nakaamot sa pagkaporma sa tibuok-kalibotang kapunongan sa kapin sa tulo ka milyong tawo sa 208 ka nasod. Sila nagaisip sa usag usa ingong mga higala, bisan kon unsa ang ilang nasyonalidad, rasa, o sosyal nga ranggo. Kini labing praktikal sa usa ka makig-awayong kalibotan, ilabina kon gikinahanglan ang tabang. Si Eva, usa ka batan-ong Swekong babaye nga usa sa mga Saksi ni Jehova, nakasinati niini.

Samtang nagduaw sa Gresya, si Eva gitakboyan sa meningitis. Kay gikuyapan, ug may pagkahilo sa dugo ug internal nga hemoreds, siya gidala dayon sa usa ka ospital sa Athens, diin siya walay nailhan. Ang iyang amahan sa Sweden gipahibalo pinaagig telepono. Iyang gitawag ang usa ka ansiano sa lokal nga kongregasyon sa mga Saksi ni Jehova. Ang maong ansiano mitawag sa mga Saksi nga iyang kaila sa Athens. Si Eva daling nakontak sa Gregong mga kaubang magtutuo nga wala niya mahibalag sa nangagi.

Kini mopahinumdom sa usa ka ilustrasyon nga gigamit ni apostol Pablo, nga nagpakita sa pagkasakop sa usag usa diha sa panaghiusa ug sa kaluoy. Siya miingon sa 1 Corinto 12:25, 26: “Angay walay pagkabahin sa lawas, kondili . . . ang mga sangkap niini angay magbaton sa samang pagtagad sa usag usa. Ug kon ang usa ka sangkap magaantos, ang tanang ubang sangkap magaantos duyog niini.”

Kini ang nasinati ni Eva sa Gresya. Sa halos tulo ka semana ang bag-o niyang mga higala wala gayod magbiya kaniyang walay nagbantay. Siya naulian ug mipauli sa iyang balay. Siya miingon: “Ako gayong natagamtam ang mga kaayohan sa mahigugmaong pag-inigsoonay.”

Dili Pagtinguha “Nianang Ekstrang Dolyar”

Mobalik kita sa sulat ni Ronald. Tapos sa pagsugilon sa unsang paagi ang iyang bag-ong pagtuo nakatabang niya sa pagpugong sa iyang kasuko, pagwagtang nianang “kinaiya nga mopatay,” ug nahimong mas makigdaiton, siya miingon nga ang pagtulon-an sa Bibliya naghatag kaniya sa usa ka timbang nga panud-ong sa trabaho ug salapi. “Ako ang numero unong operetor sa kompiyutir sa akong amo,” matud ni Ronald, “ug ako tig-eskapo sa pakig-uban sa akong pamilya ug mga higala aron lamang makaobertaym. Ako tigtrabaho sa mga gabii sa kapin ug pito ka tuig. Sa kanunay akong gitinguha kanang ekstrang dolyar.”

Ang maong tinguha “nianang ekstrang dolyar,” sa kadugayan, mahimong makadaot, nga makapatay pa. “Alang sa pipila, ang salapi nagpasabot sa kasegurohan. Alang sa pipila kini nagpasabot sa gahom. Alang sa uban kini nagpasabot nga sila makapalit ug gugma, ug alang sa ikaupat nga grupo kini nagpasabot sa pakig-indig ug pagkadaog sa dula,” matud sa sikyatristang si Jay Rohrlich, kansang mga kliyente kadaghanan pinansiyal nga mga ehekutibo sa distrito sa Wall Street sa New York.

Sa pagkomento mahitungod niining pahayaga, ang usa ka taho sa magasing Science Digest nag-ingon: “Ang pagtuo nga ang salapi makapatungha niining mga butanga . . . kadaghanan mosangpot sa pagkainutil sa sekso, pagkadili-makatulog, mga atake sa kasingkasing ug mga suliran sa kapikas o mga anak.” Ang tambag sa Bibliya mao: “Pasagding ang inyong paagi sa kinabuhi mahigawas sa gugma sa salapi.” Nakat-onan ni Ronald kini ug gipadapat. Iyang nadiskobrehang kini labing mapuslanon.​—Hebreohanon 13:5.

Tukmang Panud-ong sa Trabaho

Ang pagpangagpas sa salapi kadaghanan motukmod sa mga tawo nga pugson ang ilang kaugalingon nga moasenso sa hagdanan sa karera. Kini makapahinabog grabeng tensiyon ug emosyonal nga panagbangi sa mga tawong labing himsog​—bisan sa punto sa paghikog. “Usa ka lalaki, kinsa miabot sa trabaho usa ka buntag nga nakadiskobreng gibalhin ang iyang talad-trabahoan, misaka sa ibabaw sa tinukod ug milukso gikan niana.” Si Dr. Douglas LaBier miasoy niana sa usa ka interbiyo sa U.S.News & World Report maylabot sa koneksiyon tali sa mga karera ug sa emosyonal nga mga suliran.

“Ang gikinahanglan,” matud ni Dr. LaBier, “mao ang mas tugob nga kinabuhi, usa nga wala kaayo masentro sa usa ka karera. Gawas pa sa mga butang sama sa igong diyeta, pahulay ug ehersisyo, ang mga tawo nga gustog mas timbang nga mga kinabuhi kinahanglang mamalandong sa pagbuhat ug labaw pa uban sa ilang mga pamilya ug pag-ugmad sa mga katakos nga walay labot sa karera nga mohatag kanilag kalipay.”

Nakat-onan sa mga Saksi ni Jehova gikan sa Bibliya nga matimbang kon bahin sa trabaho ug salapi. Ang Ecclesiastes 4:4, 6 nagahisgot sa pagbudlay nga nalangkit sa “panag-indig sa usag usa” ug nagaingon: “Labi pang maayo ang usa ka hakop sa pahulay kay sa duha ka hakop nga kahago ug paghakop sa hangin.” Nasayran ni Ronald nga kini praktikal nga kaalam. Iyang gikunhoran ang iyang sekular nga trabaho aron makabaton siyag dugang panahon alang sa iyang espirituwal nga intereses ug alang sa iyang pamilya ug mga higala.

Labi Pang Malipayong Kinabuhi sa Pamilya

Unya si Ronald miingon sa iyang sulat nga ang tambag sa Bibliya mahitungod sa kaminyoon ug kinabuhi sa pamilya nakatabang niya sa pagdumalang mas maalamon sa mga kahimtang sa pamilya. Kini kinahanglanon karon dihang ang kinabuhi sa pamilya daw nagakawala sa daghang dapit. Ang industriyalisadong mga nasod nagatahog menos nga mga kasal, mas daghang diborsiyo, ug nagkadiyutayng pagpanganak.

Kining kilinga makapakurat tungod kay ang pamilya mao ang dapit diin ginatagbaw ang kadaghanang sukaranang mga panginahanglan sa tawo. Sa usa ka surbi, ang Australian Sydney Morning Herald misukot sa 2,000 ka tawo kon hain sa mosunod ang mihatag kanilag labing dakong katagbawan: trabaho, pamilya, mga higala, mga kalingawan, mga kabtangan, o relihiyon. Ang kinadaghanan mihatag sa “pamilya” sa unang dapit.

Ang mga Saksi ni Jehova interesado nga huptang lig-on ang ilang mga pamilya. Pananglitan, sa miaging kapin lamang sa lima ka tuig, ang ilang duha ka magasing Ang Bantayanang Torre ug Pagmata! (ang giipong sirkulasyon maoy mga 22 milyong kopya sa kapin sa 100 ka pinulongan) nagdalag mga 60 ka praktikal nga artikulo mahitungod sa pagdumala sa nagkalainlaing kahimtang sa kinabuhi sa pamilya. Sa walay pagduhaduha, ang gipasukad-sa-Bibliya nga relihiyon nga motabang sa mga tawo sa pag-atiman sa ilang mga pamilya sa maalamon ug mahigugmaong paagi maoy praktikal.

Gitubag ang Dakong “Ngano?”

Si Ronald nagtapos sa iyang sulat pinaagi sa pag-ingon: “Adunay usa ka butang kanunay moabot sa hunahuna dihang ako mobasa sa mantalaan, motan-aw sa balita, makigsulti sa mga kauban sa trabaho, o mosulti sa uban mahitungod sa akong pagtuo. Kini mao nga ang pagkausa sa mga Saksi ni Jehova nagahatag kanako sa tubag sa usa sa labing kaylap gisuknang mga pangutana sa kalibotan​—‘Ngano?’ Nganong anaa ang tanang krimen, kapintasan, gubat, imoralidad, sakit, kagubot, gawas pa sa tanang adlaw-adlaw nga suliran? Ang pagkahibalong kining sistemaha ug ang mga suliran niini temporaryo lamang nakakuhag bug-at nga lulan gikan sa akong mga abaga.”

Ang Bibliya nagapadayag kon unsay nagapaluyo sa makalilibog nga kahimtang sa kalibotan karong adlawa. Kini nagapatin-aw nganong ang unang katuyoan sa Maglalalang sa paghimo niining yutaa nga paraisong pinuy-anan sa katawhan wala pa matuman. Kini nagapatin-aw sa unsang paagi wagtangon sa Diyos ang tanang masamokong mga impluwensiya gikan sa yuta ug tukoron ang permanenteng paraiso aron pahimuslan sa mga tawo sa walay kataposan.​—2 Pedro 3:9-13.

Aron ang usa ka relihiyon may praktikal nga bili, kinahanglang kini mamungag maayong bunga. Kinahanglang ipatungha niini ang mas maayong mga tawo. Kinahanglang makapatin-aw kini nganong ang kahimtang sa yuta karong adlawa maoy ingon niini. Ug angay isilsil niini ang seguradong paglaom sa umaabot diha sa mga hunahuna ug mga kasingkasing sa mga tawo. Gipangita ni Ronald ang ingon nga relihiyon, ug iyang nakaplagan kini. Ang samang higayon bukas pa alang kanimo.​—Mateo 7:17-20.

[Hulagway sa panid 5]

Ang matuod nga mga Kristohanon nagatratar sa usag usa nga matuod nga mga higala