Ang Pagsalig Kang Jehova Mosangpot sa Pagpahinungod ug Bawtismo

“Salig kang Jehova ug magabuhat ug maayo; magpuyo ka sa yuta, ug magmatinumanon.”—SALMO 37:3.

1. Unsay gipamulong sa maalamong mga tawo sa kalibotan nga nagpakita nga kabuangan ang pagsalig sa mga tawong pangulo?

KINSAY atong kasaligan? Ang tawhanong mga pangulo ba? Ang ilang rekord nagpakita nga kaubangan ang pagsalig sa mga tawong dili-hingpit. Gani, bisan ang maalamong mga tawo sa kalibotan nahibalo nianang kamatuorana! Busa, ang magasin sa negosyo nga Vision sa Uropa miingon nga ang “labing mangil-ad nga bahin sa kahimtang karong panahona mao nga walay usa ang nakakitag paagi sa pagsulbad niini.” Ug ang manalaysay sa ekonomiya nga si Robert Heilbroner miingon: “Dunay butang nga nagasamok kanato. Kini ang pagduhaduha nga walay usa ang nagadumala, nga walay usa ang may katakos sa pagsulbad sa mga problema nga nagahasmag kanato.”

2. Unsay ikasulti bahin sa mga kaayohan sa modernong siyensiya?

² Tinuod, milampos ang tawo sa nagkalainlaing mga natad sa siyensiya. Apan kini bang tanan mapuslanon? Dili, dili gayod. Sumala sa gipamulong sa magsusulat nga si Lewis Mumford: “Ang ideya nga ang mekanikal ug siyentipikanhong kauswagan nagagarantiya ug katumbas nga kaayohan sa tawo . . . karon nahimong bug-os walay basehanan.” Ang kaso nga gihisgotan mao ang asidong ulan, nga nagahugaw sa mga linaw ug sa mga suba ug nakadugang sa paglaglag sa mga kahoy sa minilyon. Dugang pa, ang makasubong kahimtang sa kalibotan—ang pagdaghan sa krimen, kabangisan, ug terorismo, sa pagkagiyan sa droga ug sa alkohol, ug sa mga sakit nga napasa sa sekso, ug ang delikadong situwasyon sa ekonomiya—ang tanan nagapamatuod nga walay kapuslanang mosalig kita sa tawhanong mga pangulo.

3. Unsang tambag ang gihatag sa Pulong sa Diyos bahin sa kon asa kita mosalig?

³ Ang Pulong sa Diyos tukmang nagtambag kanato: “Ayaw pag-ibutang ang inyong pagsalig sa mga prinsipe, ni sa anak sa tawo, nga kaniya walay kaluwasan. Mogula ang iyang gininhawa, sa yuta siya mobalik; nianang maong adlaw mahanaw ang iyang mga hunahuna.” (Salmo 146:3, 4) Kon dili sa tawo, nan kinsay atong kasaligan? Kita makasalig sa Maglalalang sa langit ug sa yuta, sama sa atong mabasa: “Bulahan ang tawo nga nagasalig kang Jehova, ug kansang pagsalig mao si Jehova.”—Jeremias 17:7.

Nganong Mosalig Kang Jehova?

4. Unsa ang pangunang mga hiyas ni Jehova, ug sa unsang paagi kini nakahatag kanatog maayong mga katarongan sa pagsalig kaniya?

⁴ Kita makasalig kang Jehova sa makataronganong mga rason. Una sa tanan, makasalig kita kaniya tungod sa iyang pangunang mga hiyas—gugma, kaalam, hustisya, ug gahom—ug sa ubang katingalahang mga hiyas. Ang iyang Pulong nagpasalig kanato nga siya makagagahom sa tanan, ang usa sa iyang mga titulo mao ang “Diyos nga Labing Makagagahom.” (Genesis 28:3) Pagkalig-ong basehanan kana sa pagsalig! Walay usa ang malamposong makasukol kang Jehova, ug walay usa ang makababag sa iyang mga katuyoan. Siya mao usab ang Usa nga Nasayod sa Tanan. Dili lamang nasayod siya sa kataposan gikan sa sinugdanan, ang umaabot maoy bukas nga libro alang kaniya, ug diha kaniya nagapuyo usab ang tanang kahibalo ug kaalam, sumala sa makita sa iyang katingalahang mga buhat sa kalalangan. Wala gayod sukad sa iyang mga pakiglabot nga siya nasayop. (Isaias 46:10; Roma 11:33-35) Labaw pa niana, hingpit si Jehova sa pagkakasaligan, Diyos sa pagkamatarong ug pagkamatinumanon. Dili siya arang makabakak. (Deuteronomio 32:4; Tito 1:2; Hebreohanon 6:18) Labaw sa tanan, ang dili-mahakugong gugma mao ang iyang nangibabawng hiyas, kini sa tukma ang ginaingon: “Ang Diyos gugma.”—1 Juan 4:8, 16.

5. Nasudlan sa unsang rekord ang Pulong sa Diyos, nga nagpamatuod sa iyang pagkakasaligan?

⁵ Ang pakiglabot ni Jehova sa katawhan dugang nagahatag pamatuod sa iyang pagkakasaligan nga Diyos nga gamhanan, kaalam, hustisya, ug gugma. Gipasaligan ni Moises ang mga Israelitas nga nagatuman si Jehova sa pakigsaad ug nagapakitag mahigugmaong-kalulot niadtong nahigugma kaniya ug nagatuman sa iyang mga sugo. (Deuteronomio 7:9) Sa una pa, giluwas ni Jehova ang mahadlokon sa Diyos nga si Noe ug ang iyang pamilya latas sa dakong Lunop. Giluwas sa Diyos ang matarong nga Lot ug ang iyang duha ka anak nga babaye gikan sa kalayonhong kalaglagan sa Sodoma ug Gomorra. Sa ulahi, gipaggawas sa Diyos ang mga Israelitas gikan sa Ehipto ug gihatagan silag yuta sa Canaan sa pagtuman sa iyang saad kang Abraham. (Genesis 7:23; 17:8; 19:15-26) Ug dili ba giluwas man ni Jehova ang tulo ka Hebreohanon nga gitambog ngadto sa nagkalayong hudno, ug si Daniel gikan sa lungib sa mga liyon?—Daniel 3:27; 6:23.

6. Unsang modernong-adlawng pamatuod ang atong nabatonan nga dili sayop ang atong pagsalig kang Jehova?

⁶ Nga si Jehova mao ang usa nga atong kasaligan napamatud-an usab diha sa mga eksperyensiya sa iyang modernong-adlawng mga Saksi. Pananglitan, nagpasiatab si Adolf Hitler nga iyang paphaon ang “pundok” sa mga Saksi ni Jehova sa Alemanya. Apan si Hitler hinoon ug ang iyang Nazi nga partido ang nangapapha, ug karon kanang maong grupo sa mga Saksi pilopilo nga midaghan nga kapin sa 119,000. Dugang pa, sa literal gatosgatos ka sugilanon sa kinabuhi sa mga Saksi ni Jehova nga gipatik sa Ang Bantayanang Torre ug sa kaubang magasin niini nga Pagmata! maoy maayong pamatuod sa kamatuoran nga si Jehova mao gayod ang Diyos nga atong kasaligan.

Nganong ang Uban Dili Mosalig Kang Jehova

7. Nganong ang usa ka tawo miingon nga siya maoy “usa ka Tumatan-aw ni Jehova”?

⁷ Apan, pagkadiyutay karon ang nagasalig kang Jehova! Daghan usab niadtong nahibalo sa iyang mga hiyas ug nahimo wala mosalig kaniya. Diha sa artikulo nga migula sa basahong U.S. Catholic (Enero 1979) miingon ang usa ka tawo: “Dihang gipangutana sa tigsurbi ang usa ka tawo kon unsang relihiyona ang iyang pilion, siya mitubag, ‘Tingali Tumatan-aw ako ni Jehova.’ Sa giaghat sa pagpatin-aw siya miingon, ‘Nagtuo ako sa gituohan sa mga Saksi ni Jehova—apan dili ako gustong magpalangkit.’” Ang magasin mikomento: “Ang dedikadong Saksi ni Jehova walay kapilian kondili dugang magpalangkit.”

8. Unsa ang pangunang mga kinaiyahan ang nagapalihok sa tawo sa pagtinguhang magpalangkit sa pag-alagad kang Jehova?

⁸ Ngano man nga ang uban dili gustong magpalangkit? Tungod kay sila walay maayong kahimtang sa kasingkasing. Ang tawo kinahanglang “tukmang nakahilig sa kinabuhing walay kataposan.” (Buhat 13:48) Sumala sa gipamulong ni Jesus diha sa iyang sambingay sa magpupugas, kadtong nagapamunga nagadawat sa pulong sa kamatuoran diha sa ‘maayo ug mabuot nga mga kasingkasing.’ (Lucas 8:15) Oo, dili madanihon ang kamatuoran sa mga tawong dili sinsero. Ang pangunang kinahanglanon mao ang matinud-anong kasingkasing. Ang kamatuoran sa Pulong sa Diyos dili usab madanihon sa mga tawong mapahitas-on. Ang mapaubsanong tinamdan ang kinahanglan. (Santiago 4:6) Dugang pa, ang kamatuoran dili madanihon sa mga tawong natagbaw na sa kaugalingon, matarong sa kaugalingon. Apan madanihon kini sa mga tawong mahunahunaon sa ilang espirituwal nga panginahanglan, nga gigutom ug giuhaw sa pagkamatarong, ug nga nagabakho ug nagaagulo sa tanang dulumtanang mga butang nga ilang nakitang nagahitabo sa kalibotan karon.—Mateo 5:3, 6; Ezekiel 9:4.

Ang Pagsalig Kang Jehova Motultol sa Pagpahinungod

9, 10. (a) Unsay gikinahanglan sa dili pa makasalig ang tawo kang Jehova, ug sa unsang paagi kadtong adunay maayong kahimtang sa kasingkasing mosanong? (b) Kinsay gituohan niining mga tawhana?

⁹ Sa dili pa mosalig ang tawo kang Jehova, siya kinahanglan makadungog mahitungod Kaniya. Apan “unsaon nila sa pagsangpit kaniya nga wala nila tuohi? Ug unsaon man nila sa pagtuo kaniya nga wala gayod nila hidunggi? Ug unsaon man nila sa pagkadungog kon walay magwawali?” (Roma 10:14) Samtang nagawali ang mga alagad ni Jehova, kadtong may maayong kahimtang sa kasingkasing mosanong, sama sa gihimo sa kadaghanan sa karaang Tesalonica. Mahitungod kanila, si Pablo misulat: “Sa inyong pagdawat sa pulong sa Diyos, nga inyong nadungog gikan kanamo, inyong gidawat kini, dili ingong pulong sa tawo, kondili ingon nga mao gayod sa pagkatinuod, ang pulong sa Diyos, nga nagalihok sa sulod ninyo nga mga magtutuo.”—1 Tesalonica 2:13.

¹⁰ Dihang makakat-on mahitungod kang Jehova, kining mga tawo nga maayog mga kasingkasing motuo kaniya. Kini hinungdanon, kay “kon walay pagtuo dili gayod mahimo ang pagpahimuot kaniya, kay bisan kinsa nga magaduol sa Diyos kinahanglan magatuo sa iyang pagkaanaa ug nga siya nagabalos ra sa mga magapangita kaniya.” (Hebreohanon 11:6) Hinungdanon usab ang pagtuo sa Anak sa Diyos. “Walay kaluwasan pinaagi kang bisan kinsa pa nga lain, kay walay bisan unsa pang lain nga ngalan sa silong sa langit nga gikahatag ngadto sa mga tawo nga pinaagi niini maluwas sila”—oo, walay laing ngalan gawas kang Jesu-Kristo.—Buhat 4:12.

11. Ang pagsalig kang Jehova mopalihok sa tawo sa pagsunod sa unsang tambag nga gihatag ni apostol Pedro?

¹¹ Ang pagsalig sa Pulong sa Diyos, kang Jehova, ug sa iyang Anak si Jesu-Kristo mopalihok sa tawo sa pagpamati sa tambag ni apostol Pedro sa mga Hudiyo sa iyang adlaw: “Busa, paghinulsol kamo, ug bumalik na aron mapala ang inyong mga sala, aron ang mga panahon sa kahayahay magaabot gikan sa atubangan ni Jehova.” (Buhat 3:19) Pinaagi sa pagkuhag kahibalo mahitungod kang Jehova ug sa Iyang mga kinahanglanon, makat-onan sa tawo nga ang kabubut-on sa Diyos alang kaniya mao ang pagkahimong sumusunod ni Jesu-Kristo. Sumala sa gipahayag ni apostol Pedro niana: “Kay alang niining dalana nga kamo gipanawag, maingon nga alang kaninyo miantos si Kristo, nga nagbilin kaninyog usa ka panig-ingnan aron kamo managsunod sa iyang mga tunob.” (1 Pedro 2:21) Gitin-aw ni Jesus kon unsay nalangkit dihang miingon siya: “Kon adunay buot mosunod kanako, kinahanglang magadumili siya sa iyang kaugalingon ug magapas-an sa iyang kahoy sa pagsakit ug magpadayon sa pagsunod kanako.” (Mateo 16:24) Kini nagkahulogang pagpahinungod sa kaugalingon kang Jehova nga Diyos sa pagbuhat sa iyang kabubut-on ug sa pagsunod sa mga lakang ni Jesu-Kristo.

Pagpahinungod Dili Lamang Usa ka Panaad

12. Sa unsang paagi ang pulong “panaad” gigamit diha sa Kakristiyanohan?

¹² Diha sa Kakristiyanohan ang terminong “panaad” masubsob nga gigamit may kalabotan sa pagkahimong Kristohanon. Busa kita gisultihan nga ang mga Evangelical sa Tinipong Bansa “nagapasiugda sa personal nga panaad kang Jesus.” Usa ka paring Romano Katoliko naghisgot bahin sa “relihiyosong panaad sa Katoliko.” Nangatarongan sa iyang paglangkit sa politika, miingon ang usa ka paring Katoliko: “Ang pag-apil sa politika maoy ekstensiyon sa akong panaad (sa pagkapari).” Ug ang mga kompaniya sa negosyo nagapaanunsiyo “Ang Among Panaad sa Among mga Kustomer.” Nan, sa tinuod, ang tawo mahimong makabaton ug daghan kaayong mga panaad sa samang higayon: mga panaad sa negosyo, sosyal nga mga panaad, politikanhon nga panaad, ug relihiyosong mga panaad.

13. Unsay nalangkit sa pagpahinungod kang Jehova?

¹³ Apan, ang pagpahinungod kang Jehova nga Diyos dili kay usa lang ka panaad. Ang panaad sa yano maoy “usa ka kasabotan kun panumpa sa paghimog butang sa umaabot.” Apan ang pagpahinungod nagkahulogan sa ‘paggugol sa kaugalingon sa bug-os alang sa pag-alagad o pagsimba sa usa nga balaan o sa balaang mga kagamitan.’ Ang kadaghanang mga tawo kontento lamang sa paghimog panaad inay pagpahinungod. Kini sa walay duhaduha mao ang hinungdan sa kamatuoran nga ang ilang relihiyon kaamgid sa background nga musika. Makalingaw kining pamation apan dili makabalda sa bisan unsang butang nga gustong buhaton sa tawo.

14. Nganong ang yanong panaad dili madawat kang Jehova nga Diyos?

¹⁴ Sa pagpahinungod sa Diyos ang pagtuman sa iyang kabubut-on mao ang labing hinungdanon sa kinabuhi. Kini nagkinahanglan nga sundon sa indibiduwal ang una ug labing dakong sugo, nga gikutlo ni Jesus dihang siya miingon: “Higugmaa si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong hunahuna ug sa tibuok mong kusog.” Gipasiugda ni Jesus ang ekslusibong kinaiyahan sa pag-alagad sa Diyos dihang siya miingon: “Walay tawo nga mahimong ulipon sa duha ka agalon; kay mahimong iyang dumtan ang usa ug ang usa iyang higugmaon, o unongan niya ang usa ug ang usa iyang tamayon. Dili kamo mahimong ulipon sa Diyos ug sa mga Bahandi.” (Marcos 12:30; Mateo 6:24) Nan, matin-aw, nga dili madawat ni Jehova ang panaad lamang.

Nganong Ituslob sa Tubig?

15. Unsang panig-ingnan ang gihatag ni Jesus bahin sa pagpakita sa katilingban sa pagtuo sa Diyos?

¹⁵ Nganong simbolohan man ang pagpahinungod sa Diyos pinaagi sa pagbawtismo? Kon ang tawo nagatinguhang mahimong usa sa mga Saksi ni Jehova, siya walay kapilian. Tinuod usab kana kon nagatinguha siyang mailhan ingong Kristohanon, usa ka sumusunod ni Jesu-Kristo. Ang “Matinumanong Saksi” ni Jehova, si Jesus, naghatag panig-ingan niini, kay siya gibawtismohan sa Suba sa Jordan. Sanglit nagpangbawtismo man si Juan sa mahinulsolong mga makasasala, siya wala makasabot nganong gustong magpabawtismo si Jesus, apan gisultihan siya ni Jesus: “Pasagdi lang nga mahitabo kini karon, kay angay kanato ang pagbuhat niini aron sa pagtuman sa tanan nga matarong.” (Pinadayag 1:5; Mateo 3:13-17) Busa ang Anak sa Diyos nagpasundayag sa katilingban sa iyang pagtuo pinaagi sa pagtanyag sa iyang kaugalingon kang Jehova, naghatag ug panig-ingnan alang sa tanan nga nagatinguha sa pagbuhat sa kabubut-on sa Diyos.

16. Unsang sugo ang gihatag ni Jesus sa iyang mga sumusunod bahin sa bawtismo, ug unsay nagpakita nga misunod ang iyang mga disipulo niadtong sugoa?

¹⁶ Labaw pa niana, dihang hapit na siyang mobalik sa iyang Amahan sa langit, gisugo ni Jesus ang iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran, sa pagbawtismo kanila sa ngalan sa Amahan ug sa Anak ug sa balaang espiritu, sa pagtudlo kanila sa pagtuman sa tanang butang nga akong gisugo kaninyo.” (Mateo 28:19, 20) Ang rekord diha sa basahon sa mga Buhat nagpakita nga ang mga tinun-an ni Jesus madasigong mituman niadtong sugoa.—Buhat 2:40, 41; 8:12; 9:17, 18; 19:5.

17. Nganong ang yanong pagwisikwisik sa tubig dili mao ang tinuod nga bawtismo?

¹⁷ Sa unsang paagi gibawtismohan sila? Pinaagi ba sa yanong pagwisikwisik kanilag tubig, sama sa kustombre diha sa kadaghanang mga iglesya sa Kakristiyanohan? Dili gayod! Si Jesus ‘mikawas gikan sa tubig’ human nga gibawtismohan. Kini sa dayag nagpakita nga siya gituslob sa tubig. (Marcos 1:9, 10) Sa pagkatinuod, wala nay lain pang bawtismo, kay ang Gregong pulong nga gihubad “bawtismo” nagkahulogang “pagtuslob, paglusbog.”—Buhat 8:36-39.

18. Nganong ang pagtuslob maoy tukmang simbolo sa pagpahinungod sa tawo sa Diyos?

¹⁸ Kining bawtismoha mao ang labing tukmang simbolo sa pagpahinungod. Ang pagpatuslob sa tubig tukmang nagalarawan sa pagkamatay sa iyang miaging paggawi. Ang iyang paghaw-as gikan sa tubig naglarawan sa iyang pagbangon ngadto sa bag-ong dalan sa kinabuhi. Sama nga ang seremonya sa kasal makatabang sa pagpasilsil sa ilang minyo nga kahimtang sa kabahin sa pangasaw-onon ug sa pamanhonon, sa ingon ang pagtuslob sa tubig atubangan sa mga saksi maoy paghatag ug dumalayong impresyon diha sa kandidato sa bawtismo. Walay pagduhaduha bahin niana: Pinaagi sa aktuwal nga bawtismo, ang pagpahinungod sa tawo kang Jehova kinahanglang dili-mapala sa iyang hunahuna ug panumdoman ingon nga mao ang labing hinungdanong bahin sa iyang kinabuhi. Kini nagatimaan sa lisoanang punto gikan sa pag-alagad sa kaugalingon ngadto sa pag-alagad kang Jehova nga Diyos.

19. Unsang dugang katarongan sa pagpabawtismo?

¹⁹ Dili nato kalimtan ang kamatuoran nga ang bawtismo sa tubig maoy unang-kinahanglanon aron makabaton ug maayong konsensiya kang Jehova. Gipatin-aw kini diha sa 1 Pedro 3:21, nga mabasa: “Ang hulad niini nagaluwas usab karon kaninyo, nga mao ang bawtismo, (dili ingon nga paglugod sa buling gikan sa lawas kondili ingon nga pangamuyo diha sa atubangan sa Diyos alang sa maayong konsensiya,) pinaagi sa pagkabanhaw ni Jesu-Kristo.”

Pilay Edad nga Mahimong Bawtismohan?

20. Nganong ang mga masuso dili takos nga bawtismohan?

²⁰ Ang mga pulong ni Jesus diha sa Mateo 28:19, 20 nagpakita nga kadtong nahimong iyang mga disipulo ang angay bawtismohan. Busa, matin-aw nga walay masuso kun gamayng bata ang makaabot sa mga kinahanglanon sa Kasulatan alang sa bawtismo. Ang masuso dili makabaton ug pagtuo sa Pulong sa Diyos, sa Diyos nga Maglalalang, ug sa iyang Anak si Jesu-Kristo. Ang masuso dili makasabot nga ang balaang espiritu mao ang aktibong gahom sa Diyos; ug dili usab siya makahimo sa paghinulsol sa mga sala sa miagi ug makapanaad sa pagbuhat sa kabubut-on sa Diyos.

21. Tukma bang bawtismohan ang mga batan-on?

²¹ Apan mopatim-aw nga ang ubang mga katawhan ni Jehova miadto sa laing paghingapin. Ginapahulat sa daghang Kristohanong mga ginikanan ang ilang mga anak hangtod nga maobot sila sa ulahing mga tuig sa ilang pagkatin-edyer dihang isugyot ang ulohan sa bawtismo. Sa matag karon ug unya, nagpakadungog kitag mga batan-on nga nagpahinungod sa ilang kaugalingong kabubut-on. Pananglitan, ang bata pang anak sa usa ka ansiano sa tim-os nagtinguhang magpabawtismo. Busa mihangyo ang amahan sa tulo ka ansiano nga hisgotan uban sa batan-on ang mga pangutana nga gihikay alang niadtong nagapalandong nga magpabawtismo.a Ang ilang naabot nga desisyon mao nga, bisag bata pa, takos siyang bawtismohan ingong ordinadong ministro ni Jehova nga Diyos. Gani, mitambong sa Tunghaan sa Payunir nga Pag-alagad sa Bahamas dili pa dugay ang diyes-anyos nga bawtismadong batang babaye nga anak sa bug-os panahong mga ministro!

22. Dihang magtukod ang mga ginikanan ug Kristohanong mga hiyas sa ilang mga anak, unsay ilang mapaabot sa ilang mga anak?

²² Niining bahina, daw ang ubang mga ginikanan ang napakyas. Diin kutob nga ilang gigamit ang ‘materyales nga makasukol ug kalayo’ sa pagtukod sa Kristohanong mga personalidad sa ilang mga anak? (1 Corinto 3:10-15) Una sa tanan, ang pagbuhat niini nagkinahanglan nga ang putli nga pagsimba kang Jehova mao ang labing hinungdanong butang diha sa mga kinabuhi sa mga ginikanan. Dugang pa, ang mga ginikanan kinahanglang nagapatalinghog sa maayong tambag nga gihatag diha sa Deuteronomio 6:6, 7 ug Efeso 6:4. Hayan ang resulta niini mao nga nagkinahanglang pugngan sa mga ginikanan ang ilang mga anak nga magpabawtismo nga bata pa, inay aghaton sila sa pagbawtismo sa ulahi.

23. Dihang maabot na sa tawo ang punto sa pagpahinungod ug bawtismo, unsa pa ang kinahanglan?

²³ Dihang nagapasundayag na ang tawo sa pagsalig kang Jehova pinaagi sa pagpahinungod ug bawtismo sa tubig, kinahanglang padayon niyang ipasundayag kana nga pagsalig. Ang sunod nga artikulo, “Nagaalagad Ingong Masaligong Kaubang mga Mamumuo ni Jehova,” motabang kanato sa pagsabot kon unsay nalangkit niini.

Footnote]

Unsaon Nimo sa Pagtubag?

◻ Unsang mga kamatuoran nga nagapasiugda sa kaubangan sa pagbutang sa atong pagsalig sa mga tawo?

◻ Nganong ang mga hiyas ug pakiglabot ni Jehova nagahatag kanatog maayong mga katarongan sa pagsalig kaniya?

◻ Nganong ang pagsalig kang Jehova nagkinahanglag pagpahinungod ug dili yanong panaad?

◻ Sa unsang paagi ikapasilsil sa mga ginikanan sa ilang mga anak ang tinguha sa pagpahinungod sa ilang kaugalingon kang Jehova sa sayo nga panuigon?

[Hulagway sa panid 10]

Kita makasalig kang Jehova ingong Dakong Manluluwas