Nganong Angayng Ipahinungod ang Imong Kaugalingon Kang Jehova?
“Niining gabhiona dihay mibarog duol kanako nga usa ka manulonda sa Diyos kang kinsa iya ako.”—BUH. 27:23.
1. Unsang mga lakang ang nahimo na niadtong magpabawtismo, ug unsang mga pangutana ang motungha?
“PINASUKAD sa halad ni Jesu-Kristo, ikaw ba naghinulsol na sa imong mga sala ug nagpahinungod na sa imong kaugalingon kang Jehova aron buhaton ang iyang kabubut-on?” Usa kini sa duha ka pangutana nga tubagon sa mga kandidato sa bawtismo inigkahuman sa pakigpulong sa bawtismo. Nganong angayng ipahinungod sa mga Kristohanon ang ilang kaugalingon kang Jehova? Sa unsang paagi ang pagpahinungod ngadto sa Diyos makahatag kanatog kaayohan? Nganong dili dawaton sa Diyos ang pagsimba niadtong wala magpahinungod Kaniya? Aron masabtan ang tubag niana, kinahanglan una natong hisgotan kon unsay kahulogan sa pagpahinungod.
2. Unsay kahulogan sa pagpahinungod sa atong kaugalingon kang Jehova?
2 Unsay kahulogan sa pagpahinungod sa atong kaugalingon sa Diyos? Matikdi kon giunsa paghubit ni apostol Pablo ang iyang relasyon sa Diyos. Atubangan sa mga pasahero sa barko nga gikusokuso sa bagyo, iyang gitawag si Jehova nga ‘Diyos kang kinsa iya ako.’ (Basaha ang Buhat 27:22-24.) Ang tanang matuod nga Kristohanon iya ni Jehova. Sa kasukwahi, ang tibuok kalibotan “nailalom sa gahom sa usa nga daotan.” (1 Juan 5:19) Ang mga Kristohanon mahimong iya ni Jehova sa dihang mohimo silag dalawatong pagpahinungod ngadto kaniya pinaagi sa pag-ampo. Kana maoy personal nga panaad. Sundan kana sa bawtismo sa tubig.
3. Unsay gisimbolohan sa bawtismo ni Jesus, ug sa unsang paagi masundog sa iyang mga sumusunod ang iyang ehemplo?
3 Si Jesus naghatag kanatog ehemplo sa dihang personal niyang gipili ang pagbuhat sa kabubut-on sa Diyos. Sanglit natawo man siya sa dedikadong nasod sa Israel, siya napahinungod na ngadto sa Diyos. Bisan pa niana, sa iyang bawtismo siya mihimog labaw pa kay sa gikinahanglan ilalom sa Balaod. Gipakita sa Pulong sa Diyos nga siya miingon: “Tan-awa! Ako mianhi . . . sa pagbuhat sa imong kabubut-on, Oh Diyos.” (Heb. 10:7; Luc. 3:21) Busa ang bawtismo ni Jesus nagsimbolo sa pagtanyag niya sa iyang kaugalingon sa Diyos aron sa pagbuhat sa kabubut-on sa iyang Amahan. Ang iyang mga sumusunod nagsundog sa iyang ehemplo sa dihang sila magpabawtismo. Apan, sa ilang kahimtang, ang bawtismo sa tubig maoy publikong pasundayag nga sila personal nang nagpahinungod sa Diyos pinaagi sa pag-ampo.
Kon sa Unsang Paagi ang Pagpahinungod Makahatag ug Kaayohan
4. Unsay atong makat-onan bahin sa pagkakomitido gikan sa panaghigalaay ni David ug Jonatan?
4 Ang Kristohanong pagpahinungod maoy seryosong butang. Kini dili usa ka yanong panaad. Apan, sa unsang paagi ang pagpahinungod makahatag kanatog kaayohan? Sa pagtandi, atong hisgotan kon sa unsang paagi ang pagkakomitido diha sa tawhanong mga relasyon makahatag ug kaayohan. Ang usa ka pananglitan niana mao ang panaghigalaay. Aron makabatog kaayohan gikan sa panaghigalaay, kinahanglang dawaton nimo ang responsibilidad sa pagkahimong higala. Kana nagpasabot nga ikaw komitido, o imong gibati nga duna kay obligasyon nga higugmaon ang imong higala. Ang usa sa labing talagsaong panaghigalaay nga gihubit sa Bibliya mao kanang kang David ug Jonatan. Mihimo pa gani silag pakigsaad sa ilang panaghigalaay. (Basaha ang 1 Samuel 17:57; 18:1, 3.) Bisan tuod talagsa ra ang ingon niana nga panaghigalaay, kadaghanan sa panaghigalaay molig-on kon ang managhigala komitido, o mobatig obligasyon sa usag usa.—Prov. 17:17; 18:24.
5. Sa unsang paagi maseguro sa usa ka ulipon nga magpabilin siya sa iyang buotang agalon hangtod sa hangtod?
5 Ang Balaod nga gihatag sa Diyos ngadto sa Israel naghisgot ug laing relasyon diin ang mga tawo makabatog kaayohan kon sila mohimog panaad. Aron maseguro sa usa ka ulipon nga magpabilin siya sa iyang buotang agalon hangtod sa hangtod, makahimo siyag lig-ong kasabotan uban kaniya. Ang Balaod nag-ingon: “Kon ang ulipon mangusog sa pag-ingon, ‘Gihigugma ko gayod ang akong agalon, ang akong asawa ug ang akong mga anak; dili ko buot nga mogawas ingong usa nga pinagawas,’ nan ang iyang agalon magdala kaniya haduol sa matuod nga Diyos ug magdala kaniya ngadto sa pultahan o sa poste sa pultahan; ug ang iyang agalon magatusok sa iyang dalunggan pinaagi sa hilihod, ug siya mahimong iyang ulipon hangtod sa panahong walay tino.”—Ex. 21:5, 6.
6, 7. (a) Unsang kaayohan ang mabatonan sa pagkahimong komitido? (b) Unsay gipakita niana maylabot sa atong relasyon kang Jehova?
6 Ang kaminyoon maoy usa ka relasyon diin labawng gikinahanglan ang pagkakomitido. Kana maoy pagkakomitido, dili sa usa ka kontrata, kondili sa usa ka tawo. Ang duha ka tawo nga nagpuyopuyo lang walay tinuod nga kasegurohan; mao man usab ang ilang mga anak. Apan kon sila komitido sa usag usa diha sa dungganong kaminyoon, sila adunay bug-at nga Kasulatanhong rason nga maningkamot sa pagsulbad sa ilang mga problema sa mahigugmaong paagi.—Mat. 19:5, 6; 1 Cor. 13:7, 8; Heb. 13:4.
7 Sa panahon sa Bibliya, ang mga tawo nakabatog kaayohan sa dihang sila naghimog kontrata sa negosyo ug sa trabaho. (Mat. 20:1, 2, 8) Mao man usab karon. Pananglitan, kita makabatog kaayohan kon dunay himoong sinulat nga kasabotan, o kontrata, sa dili pa magsugod ug negosyo o manarbaho sa usa ka kompaniya. Busa, kon ang panaad o pagkakomitido magpalig-on sa mga relasyon sama sa panaghigalaay, kaminyoon, ug panarbaho, ang bug-os nga pagpahinungod labaw pa gayong makahatag ug kaayohan kanimo diha sa imong relasyon kang Jehova! Atong hisgotan kon sa unsang paagi ang mga tawo kaniadto nakabatog kaayohan sa ilang pagpahinungod kang Jehova nga Diyos ug nganong dili lamang kini usa ka panaad o pagkahimong komitido.
Kon sa Unsang Paagi ang Pagpahinungod Nakahatag ug Kaayohan sa Israel
8. Unsay kahulogan sa pagkahimong napahinungod sa Israel ngadto sa Diyos?
8 Ang tibuok nasod sa Israel napahinungod ngadto kang Jehova sa dihang sila nanaad kaniya. Sa dihang gitigom sila ni Jehova duol sa Bukid sa Sinai, siya miingon kanila: “Kon kamo hugot nga magasugot sa akong tingog ug magatuman gayod sa akong pakigsaad, nan kamo tinong mahimong akong linaing katigayonan gikan sa tanang ubang mga katawhan.” Ang katawhan nagkausa sa pag-ingon: “Andam kami sa pagbuhat sa tanan nga gisulti ni Jehova.” (Ex. 19:4-8) Ang pagkahimong napahinungod sa Israel nagkahulogan ug labaw pa kay sa pagkahimong komitido sa pagbuhat ug usa ka butang. Nagpasabot kana nga sila iya na ni Jehova, ug giisip niya sila ingong iyang “linaing katigayonan.”
9. Sa unsang paagi ang Israel nakabatog kaayohan sa ilang pagkahimong napahinungod sa Diyos?
9 Ang mga Israelinhon nakabatog kaayohan sa pagkahimong iya ni Jehova. Siya maunongon ug nag-amoma kanila sama sa usa ka mahigugmaong ginikanan nga nag-amoma sa iyang anak. Ang Diyos miingon sa Israel: “Malimot ba ang usa ka asawa sa iyang masuso nga sa ingon dili niya kaluy-an ang anak sa iyang tiyan? Bisan kining mga babayhana makalimot, apan ako mismo dili makalimot kanimo.” (Isa. 49:15) Si Jehova naggiya kanila pinaagi sa Balaod, nagdasig kanila pinaagi sa mga manalagna, ug nagpanalipod kanila pinaagi sa mga manulonda. Ang usa ka salmista misulat: “Siya nagasulti sa iyang pulong kang Jacob, sa iyang mga regulasyon ug sa iyang hudisyal nga mga hukom sa Israel. Siya wala magbuhat niana sa bisan unsa nga nasod.” (Sal. 147:19, 20; basaha ang Salmo 34:7, 19; 48:14.) Maingon nga si Jehova nag-amoma sa iyang nasod kaniadto, siya magaamoma usab karon niadtong magpahinungod sa ilang kaugalingon kaniya.
Kon Nganong Angayng Ipahinungod ang Atong Kaugalingon sa Diyos
10, 11. Kita ba natawo nga bahin sa unibersohanong pamilya sa Diyos? Ipatin-aw.
10 Samtang naghunahuna bahin sa pagpahinungod ug pagpabawtismo, ang uban mangutana tingali, ‘Nganong dili man dawaton sa Diyos ang akong pagsimba kon dili nako ipahinungod ang akong kaugalingon kaniya?’ Masabtan ang hinungdan kon atong tagdon ang tinuod natong kahimtang karon atubangan sa Diyos. Angay natong hinumdoman nga tungod sa sala ni Adan, kitang tanan natawo nga dili bahin sa pamilya sa Diyos. (Roma 3:23; 5:12) Ang pagpahinungod sa atong kaugalingon sa Diyos maoy hinungdanong kinahanglanon aron dawaton niya kita sa iyang unibersohanong pamilya. Atong tan-awon kon nganong hinungdanon kana.
11 Walay usa kanato ang adunay kinaiyanhong amahan nga makahatag kanatog hingpit nga kinabuhi. (1 Tim. 6:19) Wala kita matawo ingong mga anak sa Diyos tungod kay sa dihang nakasala ang unang magtiayon, ang tawo nahimulag sa iyang mahigugmaong Amahan ug Maglalalang. (Itandi ang Deuteronomio 32:5.) Sukad niadto, ang tawo dili na bahin sa unibersohanong pamilya ni Jehova, sa ingon nahimulag kaniya.
12. (a) Sa unsang paagi ang dili-hingpit nga mga tawo mahimong bahin sa pamilya sa Diyos? (b) Unsang mga lakang ang angay natong himoon una pa sa bawtismo?
12 Bisan pa niana, ang matag usa kanato makahangyo nga dawaton kita sa Diyos ingong bahin sa iyang pamilya sa inuyonang mga alagad.a Sa unsang paagi posible kana nga makasasala man kita? Si apostol Pablo misulat: “Sa dihang kita mga kaaway pa, kita gipasig-uli ngadto sa Diyos pinaagi sa kamatayon sa iyang Anak.” (Roma 5:10) Panahon sa bawtismo kita mohangyo sa Diyos ug maayong tanlag aron mahimong dalawaton kaniya. (1 Ped. 3:21) Apan, una pa sa bawtismo adunay mga lakang nga angay natong himoon. Kita angayng makaila sa Diyos, makakat-on sa pagsalig kaniya, maghinulsol, ug magbag-o sa atong kinabuhi. (Juan 17:3; Buh. 3:19; Heb. 11:6) Ug duna pay angayng buhaton una kita mahimong bahin sa pamilya sa Diyos. Unsa man kana?
13. Nganong haom nga ang usa ka tawo magpahinungod una sa Diyos ayha pa mahimong bahin sa Iyang pamilya sa inuyonang mga magsisimba?
13 Ang usa nga nahimulag sa Diyos kinahanglang mohimo unag seryosong panaad kang Jehova ayha pa mahimong sakop sa iyang pamilya sa inuyonang mga alagad. Aron masabtan kon ngano, handurawa ang usa ka tinamod nga amahan nga nagpakitag kalulot sa usa ka ilo nga batan-on ug gustong mosagop kaniya ingong bahin sa iyang pamilya. Ang amahan nailhan nga maayong tawo. Bisan pa niana, sa dili pa niya sagopon ang batan-on, gusto niyang manaad kini. Busa ang maong tawo moingon, “Sa dili ka pa nako sagopon, gusto kong mosaad ka nga imo kong mahalon ug tahoron ingong amahan.” Kon ang batan-on kinasingkasing nga manaad, siya dawaton sa maong tawo ingong sakop sa iyang pamilya. Makataronganon kana, dili ba? Sa samang paagi, kadto lamang kinasingkasing nga magpahinungod kang Jehova ang iyang dawaton ingong bahin sa iyang pamilya. Ang Bibliya nag-ingon: “Itanyag ang inyong kaugalingon kaniya: usa ka halad nga buhi, gipahinungod ug dalawaton kaniya.”—Roma 12:1, The New English Bible.
Timailhan sa Gugma ug Pagtuo
14. Nganong ang pagpahinungod usa ka timailhan sa gugma?
14 Ang pagpahinungod sa Diyos maoy timailhan sa atong tiunay nga gugma kaniya. Sa pipila ka bahin kini susama sa panumpa sa kaminyoon. Ang usa ka Kristohanong pamanhonon magpahayag sa iyang gugma pinaagig pagpanumpa nga siya magmaunongon sa iyang pangasaw-onon, bisag unsay mahitabo. Kini maoy panumpa ngadto sa usa ka tawo inay kay usa ka panaad lamang sa pagbuhat ug usa ka butang. Ang pamanhonon nahibalo nga dili niya makauban pagpuyo ang iyang pangasaw-onon kon dili niya himoon ang panumpa sa kaminyoon. Sa samang paagi, dili nato bug-os matagamtam ang mga kaayohan sa pagkahimong sakop sa pamilya ni Jehova kon dili kita magpahinungod kaniya. Busa atong ipahinungod ang atong kaugalingon sa Diyos tungod kay, bisan pa sa atong pagkadili-hingpit, kita nagtinguha nga mahimong iya ug determinado nga magmaunongon kaniya, bisag unsay mahitabo.—Mat. 22:37.
15. Nganong ang pagpahinungod usa ka timailhan sa pagtuo?
15 Sa dihang kita nagpahinungod sa Diyos, kita nagpakitag pagtuo. Ngano man? Tungod sa atong pagtuo kang Jehova, kita makasalig nga makaayo kanato ang pagpakigsuod sa Diyos. (Sal. 73:28) Kita nahibalo nga dili kanunayng sayon ang paglakaw uban sa Diyos samtang nagkinabuhi taliwala “sa baliko ug hiwi nga kaliwatan,” apan kita nagasalig sa saad sa Diyos nga siya magpaluyo sa atong mga paningkamot. (Filip. 2:15; 4:13) Kita nasayod nga kita dili hingpit, apan kita masaligon nga si Jehova magmaluluy-on kanato bisan sa dihang kita masayop. (Basaha ang Salmo 103:13, 14; Roma 7:21-25.) Hugot ang atong pagtuo nga si Jehova magaganti sa atong determinasyon nga huptan ang atong integridad.—Job 27:5.
Ang Pagpahinungod sa Diyos Makahatag ug Kalipay
16, 17. Nganong ang pagpahinungod kang Jehova makahatag ug kalipay?
16 Ang pagkahimong napahinungod kang Jehova makahatag ug kalipay tungod kay kini naglangkit ug paghatag sa atong kaugalingon. Tinuod ang giingon ni Jesus: “Adunay labaw nga kalipay sa paghatag kay sa pagdawat.” (Buh. 20:35) Bug-os nga nasinati ni Jesus ang kalipay sa paghatag panahon sa iyang yutan-ong ministeryo. Kon gikinahanglan, iyang gisakripisyo ang pahulay, pagkaon, ug kaharuhay aron matabangan ang uban nga makakaplag sa dalan sa kinabuhi. (Juan 4:34) Kalipay ni Jesus ang pagpahimuot sa iyang Amahan. Siya miingon: “Ginabuhat ko kanunay ang mga butang nga makapahimuot kaniya.”—Juan 8:29; Prov. 27:11.
17 Busa, gipakita ni Jesus sa iyang mga sumusunod ang makapatagbawng paagi sa pagkinabuhi sa dihang siya miingon: “Kon adunay buot mosunod kanako, padumilia siya sa iyang kaugalingon.” (Mat. 16:24) Ang pagbuhat niana mas makapasuod nato kang Jehova. Aduna pa ba kitay laing masaligan nga mag-amoma kanato sa mas mahigugmaong paagi?
18. Nganong ang pagkinabuhi sumala sa atong pagpahinungod maghatag ug labaw nga kalipay kay sa pagkahimong dedikado ngadto sa usa ka butang o sa usa ka tawo?
18 Ang pagpahinungod sa atong kaugalingon kang Jehova ug pagkinabuhi sumala niana pinaagi sa pagbuhat sa iyang kabubut-on maghatag ug labaw nga kalipay kay sa pagkahimong dedikado ngadto sa usa ka butang o sa usa ka tawo. Pananglitan, daghang tawo ang naggamit sa ilang kinabuhi sa pagpangagpas sa materyal nga bahandi apan wala makabaton ug tinuod nga kalipay ug katagbawan. Hinunoa, kadtong nagpahinungod sa ilang kaugalingon kang Jehova nakabaton ug malungtarong kalipay. (Mat. 6:24) Ang kadungganan sa pagkahimong “mga isigkamagbubuhat sa Diyos” nakahatag kanilag kalipay. Hinunoa, sila nagpahinungod dili ngadto sa usa ka buluhaton kondili sa atong mapabilhong Diyos. (1 Cor. 3:9) Wala nay lain nga labawng magpabili sa ilang pagsakripisyo kay kaniya. Iya pa ganing ipasig-uli sa pagkabatan-on ang nagmaunongon kaniya aron sila makabatog kaayohan sa iyang pag-amoma hangtod sa hangtod.—Job 33:25; basaha ang Hebreohanon 6:10.
19. Unsang pribilehiyo ang mabatonan niadtong nagpahinungod kang Jehova?
19 Ang pagpahinungod sa imong kinabuhi kang Jehova makapasuod kanimo sa Diyos. Ang Bibliya nag-ingon: “Duol sa Diyos, ug siya moduol kaninyo.” (Sant. 4:8; Sal. 25:14) Sa sunod artikulo, atong hisgotan kon nganong kita makasalig sa atong pagpili nga mahimong iya ni Jehova.
[Footnote]
a Ang “ubang mga karnero” ni Jesus ayha pa mahimong mga anak sa Diyos pagkatapos sa usa ka libo ka tuig. Apan, kay sila nagpahinungod na sa Diyos, sila haom nga makatawag kaniya ingong “Amahan” ug hustong isipon nga bahin sa pamilya sa mga magsisimba ni Jehova.—Juan 10:16; Isa. 64:8; Mat. 6:9; Pin. 20:5.
Unsay Imong Tubag?
• Unsay kahulogan sa pagpahinungod ngadto sa Diyos?
• Sa unsang paagi ang pagkahimong napahinungod sa Diyos makahatag kanatog kaayohan?
• Nganong ang mga Kristohanon angayng magpahinungod kang Jehova?
[Hulagway sa panid 6]
Ang pagkinabuhi sumala sa atong pagpahinungod makahatag ug malungtarong kalipay