Nganong Magmapasalamaton?

TAN-AWA ang hapin sa atubang ning magasina. Tino, kini mopahinumdom kanatong adunay daghang matahom nga butang nga magbakwi sa kangil-ad ug katimawang makita sa tanang dapit.

Makadayeg ka ba sa matahom nga mga butang? Palandonga ang balangaw uban ang malinawon, anindot nga pagsagol sa mga bulok human sa kangiob sa usa ka bagyo. Handurawa ang usa ka nagaambak nga busay. O sulayi ang paghanduraw sa kahayopan nga nakighagwa sa ilang mga itoy. Hulagwaya ang matahom nga tanaman sa mga bulak o ang dakong tinanom sa trigo. Oo, kini maoy kasagarang mga talan-awon alang sa daghang tawo. Apan unsay epekto niini diha kanimo?

Daling Ipakawaybili

Kasagaran, kon subsob masinati ang usa ka butang, kini mahimong mas naandan—ug dali kining ipakawaybili. Kining maong kapakyasan daw klaro diha sa paspas nga ika-20ng siglo. Apan ang dili paghatag panahon aron sa pagpalandong o pag-ihap sa mga panalangin ug mga hinungdan sa pagkamapasalamaton kanunay nga usa sa mga kahuyangan sa dili-hingpit nga katawhan:

“Sa makita ko ang imong mga langit, ang mga buhat sa imong mga tudlo,

Ang bulan ug ang mga bituon nga imong giandam,

Unsa ba ang himalatyong tawo nga ikaw matinagdanon man kaniya?

Ug ang anak sa yutan-ong tawo nga ikaw matinagdanon man kaniya?

Gihimo mo siyang agalon sa mga buhat sa imong mga kamot;

Ang tanan imong gibutang sa ilalom sa iyang mga tiil:

Ang nating mga baka ug mga torong baka ang tanan,

Ug ang mga mananap usab sa kapatagan,

Ang mga langgam sa langit ug mga isda sa dagat,

Ang bisan unsa nga moagi sa mga agianan sa kadagatan.

Oh Jehova nga among Ginoo, pagkahalangdon ang imong ngalan sa tibuok yuta!”—Salmo 8:3, 4, 6-9.

Pagkamapasalamaton Makahanaw sa Kasubo

Ang pagkamapasalamaton sa salmista tungod sa matahom nga mga butang nakatabang sa pagbakwi sa kasubo nga ipahinabo sa mangil-ad nga mga talan-awon o lisod nga mga kahimtang. Ikaw makasinati usab niana. Sa unsang paagi? Pinaagi sa pagsingkamot sa pagpabili sa bug-os pa sa daghang makapahimuot nga mga butang alirong bato. Niining paagiha, makapadako ka sa imong kalipay ug niadtong anaa alirong kanimo.

Busa, nganong dili itugot nga ang matag-adlawng mga talan-awon nga matahom ug kahibulongan magdasig sa kinasingkasing nga pagkamapasalamaton ngadto sa atong maluluy-ong Maglalalang? Palandonga karon ang pila ka dugang hinungdan nga magmapasalamaton.