Dugang mga Hinungdan nga Magmapasalamaton

ANG katawhan sa karaang Israel nagbaton ug mas daghang hinungdan kay sa uban sa pagpahayag ug pagkamapasalamaton sa Maglalalang. Nganong kita makasulti niini?

Aw, sama sa tanang ubang tawo, ang mga Israelinhon may hinungdan nga magmapasalamaton tungod sa tanang matahom ug kahibulongang mga butang gilalang sa Diyos. Apan sila may dugang hinungdan sa pagpasalamat tungod kay ang Labing Gamhanan nagpili kanila nga mahimong linain niyang katawhan ug nag-atiman ilabina kanila. (Amos 3:1, 2) Palandonga ang pipila sa ilang talagsaong mga hinungdan sa pagkamapasalamaton.

Duha ka Pag-ikyas sa Kamatayon

Pagkamapasalamaton sa tanang Israelinhong mga ginikanan sa gabii sa Nisan 14, 1513 W.K.P.! Niadtong halandumong gabii, ang manulonda sa Diyos nagpatay sa “tanang panganay sa yuta sa Ehipto, gikan sa tawo ngadto sa mananap.” Apan gisayloan niya ang mga balayng Israelinhon diin ang dugo sa mga hayop sa Paskuwa gisablig sa mga haligi ug balabag sa pultahan. Ang kahilom nabuak samtang “nahitabo ang dakong pagminatay taliwala sa mga Ehiptohanon, tungod kay walay usa ka balay nga walay usa ka patay.” Bisan pa niana, ang matag Israelinhong panimalay nagbaton gihapon sa minahal nga panganay nga buhi ug maayog lawas.—Exodo 12:12, 21-24, 30.

Wala madugay tapos niadto, ang pagkamapasalamaton mibugwak gikan sa mga kasingkasing sa mga Israelinhon samtang ilang nasaksihan ang milagrosong pagbalda ni Jehova sa dihang sila daw natanggong sa kabaybayon sa Mapulang Dagat, nga migukod nga mainiton ang kasundalohan sa Paraon sa Ehipto. Nahauna, ilang nakita nga ang haligi sa panganod nga nag-agak kanila mibalhin ngadto sa ilang luyo, nga epektibong nakapahinay sa mga migukod. Dayon nakita sa mga Israelinhon nga gituy-od ni Moises ang iyang kamot ibabaw sa dagat, ug sila mitan-aw nga nahibulong samtang gipahuros sa Diyos ang kusog nga hangin sa silangan sa tibuok gabii, nga nagbahin sa katubigan ug nagpamala sa dagat. Ang mga Israelinhon dili na kinahanglang agdahon sa pagdali sa pag-agi sa maong gitagana-sa-Diyos nga dalan sa kaikyasan.

Apan, karon, may usa ka bag-ong hinungdan sa pagkahadlok! Ang mga Ehiptohanon mihugos sa dagat, nga masaligon nga makaapas sa mga Israelinhon. Apan, tan-awa! Sa dihang ang tanang Ehiptohanon didto na sa dalan diin ang katubigan nahimong bungbong, nagsugod pagkatangtang ang mga ligid gikan sa ilang mga karro, ug sa wala madugay may kaguliyang. Dayon, nga ang tanang Israelinhon didto na sa tabok, gisugo ni Jehova si Moises nga tuy-oron pag-usab ang iyang kamot, “ug ang dagat mibalik sa kasagarang kahimtang niini sa pagsingabot sa kabuntagon.” Ang resulta? Walay mausa sa minahal nga kasundalohan sa hambogirong si Paraon ang nakaikyas sa pagkalumos, bisan ang hambogirong magmamando mismo. (Exodo 14:19-28; Salmo 136:15) Makahanduraw ka ba unsa kamapasalamaton kang Jehova ang giluwas nga mga Israelinhon?

Katingalahang mga Paagi sa Diyos sa Pagpakig-away

Bisan tuod mapasalamaton tungod sa ilang pagkaluwas gikan sa Ehipto ug sa ilang dili-hikalimtang pag-agi sa Mapulang Dagat, ang mga Israelinhon moatubang pag daghang lisod nga kasinatian una sila makaabot sa Yutang Saad. Apan ang matag kasinatian sulod sa ilang 40-anyos nga panaw sa kamingawan angay mahimong dugang hinungdan sa espesyal nga pagkamapasalamaton kang Jehova.

Sa kataposan, ang mga Israelinhon mitabok sa Subang Jordan ug didto na sa yuta nga gihatag sa Diyos kanila. Sa wala madugay ilang nasaksihan ang usa ka pananglitan sa katingalahang mga paagi ni Jehova sa pagpakig-away alang kanila. Sa unsang paagi? Aw, pinaagi sa katingalahang pagbihag ug paglaglag sa unang Canaanhong siyudad nga ilang nahibalag—ang Jerico! (Josue, kapitulo 6) Pagkatalagsaon ang gimandoan-sa-Diyos nga estratehiya sa pagmartsa palibot sa Jerico samtang magdala sa arka sa tugon! Sa unom ka sunod-sunod nga adlaw, sila mimartsa palibot sa mga paril kas-a sa matag adlaw. Sa ikapitong adlaw, sila milibot sa paril sa pito ka beses. Sa gihuyop sa mga saserdote ang ilang mga trompeta, gisiak sa mga Israelinhon ang kahanginan pinaagi sa “usa ka kusog nga singgit sa panggubatan,” ug “ang paril natumpag”! (Bersikulo 20) Ang balay lamang ni Rahab ug ang bahin sa paril sa ilalom niana ang nagpabiling nagtindog. Ang paril sa daw dili-mapukan nga siyudad natumpag nga wala moluthang si Josue ug ang iyang kasundalohan bisag usa ka pana! Tino, kadtong kasinatian sa Jerico maoy talagsaong dugang hinungdan sa pagkamapasalamaton sa Diyos.

Sa laing okasyon, may dugang talagsaong pasundayag sa katingalahang mga paagi ni Jehova sa pagpakig-away. Sa dihang ang katawhan sa Gibeon nakigdait sa mga Israelinhon, ang lima ka Amorehanong hari mideklarar ug gubat batok sa mga taga-Gibeon. Si Josue mitabang kanila, ug ang milagrosong kamot ni Jehova gipakitang subsob sa misangpot nga bugnoay. Gilibog sa Diyos ang mga Amorehanon, ug “samtang sila nangalagiw gikan sa atubangan sa Israel ug didto sa lugsongon sa Beth-horon, gilabay ni Jehova ang dagkong mga bato gikan sa mga langit diha kanila abot sa Azekah, mao nga sila nangamatay.” Daghan ang nangamatay gumikan sa maong mga ulan sa bato kay sa gipatay sa mga Israelinhon pinaagi sa espada.—Josue 10:1-11.

“Sa atubangan sa mga mata sa Israel,” si Josue niadto nakigsulti kang Jehova ug miingon: “Adlaw, umurong ibabaw sa Gibeon, ug, bulan, ibabaw sa ubos nga patag sa Aijalon.” Ang resulta? “Sumala niana,” matud sa asoy, “ang adlaw miurong, ug ang bulan wala molihok, hangtod ang nasod nakapanimalos sa mga kaaway niini.”—Josue 10:12, 13.

Pagkakatingalahang mga hitabo! Ug dugang pa gayong talagsaong mga hinungdan sa pagkamapasalamaton sa bahin sa katawhan ni Jehova!

Pagkamapasalamaton Wala Magdugay

Tapos sa matag pagpadayag sa pagbalda ni Jehova, ang mga Israelinhon natugob sa pagkamapasalamaton. Lagmit, ang matag Israelinhon nag-ingon diha sa iyang kasingkasing nga dili gayod niya hikalimtan ang mga butang iyang nakita. Bisan pa niana, ang maong pagkamapasalamaton dili katuohan nga wala magdugay. Sa masubsob, ang mga Israelinhon nagpakitag dimapasalamatong tinamdan. Busa, ang Diyos “balikbalik nga nagtugyan kanila ngadto sa kamot sa mga nasod, mao nga kadtong nagdumot kanila nagmando ibabaw kanila.”—Salmo 106:41.

Bisan pa niana, gipakita ni Jehova ang iyang dako kaayong espiritu sa pagpasaylo sa dihang nahidangat ang mga Israelinhon sa dakong kalisdanan, naghinulsol sa ilang daotan ug dimapasalamatong dalan, ug nangayo kaniyag tabang. “Iyang nakita ang ilang kagul-anan sa nabati niya ang ilang pagtuwaw. Ug nahinumdom siya sa iyang tugon bahin kanila, ug siya nagbasol sumala sa gidaghanon sa iyang dakong mahigugmaong-kalulot.” (Salmo 106:44, 45) Sa balikbalik, ang ilang mapasayloon nga Diyos nagpagawas kanila gikan sa mga tigdaugdaog ug nagpasig-uli kanila sa iyang pag-uyon.

Bisan pa sa hataas-nga-pailob sa Diyos ug sa iyang balikbalik nga pagpadala sa mga manalagna aron ipasibo ang ilang panghunahuna ang mga Israelinhon nagpamatuod nga gahig-ulo. Sa kataposan, naupos ang pailob ni Jehova, ug gitugotan niya nga mapukan ang nasod sa Juda sa mga Babilonyanhon niadtong 607 W.K.P. Kadtong wala mapatay sa kasundalohan ni Haring Nabukodonosor gidalang binihag ngadto sa Babilonya.

Pagkamalaglagong kataposan alang sa balikbalik nga pagkadili-mapasalamaton ug pagkadili-maunongon ngadto sa Diyos! Ug kadto nahitabo bisan pa sa daghang hinungdan nga magmapasalamaton.

Sa unsang paagi ang mga Kristohanon karong adlawa makalikay sa samang sayop sa pagkapakyas sa pagpakitag pagkamapasalamaton tungod sa tanang gibuhat ni Jehova nga Diyos alang kanila, gawas pa sa iyang mga buhat sa pagkamaayo alang sa katawhan sa linangkob? Kini pagahisgotan sa sunod nga artikulo.