Si Jesu-Kristo—Diyos, Tawo, o Kasugiran?

ANG usa ka pasundayag sa honing rock nga gibuksan sa Broadway sa New York City niadtong 1971 nahimong kontrobersiyal, kay kadto naghisgot man sa usa ka relihiyosong ulohan. Apan lagmit ang ulohan sama ra ka kontrobersiyal sa ilhanan sa pangunang karakter niadto.

Ang usa sa bantog nga mga awit sa maong pasundayag misukna: “Jesu-Kristo Kinalabwang Bituon, sa imong hunahuna ikaw ba mao sumala sa ginaingon nila nga ikaw mao?” Sumala sa katawhan sa unang siglo kinsa ba si Jesus? Si Jesus mismo nangutana sa iyang mga tinun-an niana ug nakadawat sa daghang nagkalainlaing tubag. (Mateo 16:13, 14) Karong adlawa, halos 2,000 ka tuig sa ulahi, ang ilhanan ni Jesu-Kristo kontrobersiyal gihapon.

Hinungdanon ba gayod kon kinsa si Jesus? Unsay epekto sa iyang ilhanan diha kanato? Aw, ang iladong mga tawo sa nangaging mga adlaw nag-umol sa kasaysayan sa kalibotan, sa ingon nag-apektar kanatong tanan, bisan sa dili-laktud nga paagi lamang. Apan karong adlawa sila patay na. Busa, bisan pag kita naapektahan nila sa ilang gibuhat, sila dili makaapektar kanato pinaagi sa ilang ginabuhat.

Hinuon, kini lahi gayod sa kahimtang ni Jesu-Kristo. Milyonmilyon nagtuo, ug may tinuod nga ebidensiya sa maong pagtuo; nga si Jesus buhi kaayo karong adlawa, dili ingong tawo sa yuta, kondili ingong gamhanang espiritu sa langit. Ang ginabuhat ni Jesus, ilabina niining ika-20ng siglo, may dakong epekto diha sa tanang tawo. Dugang pa, ang epekto ni Jesus diha sa atong mga kinabuhi dili mao lamang kon unsay iyang gibuhat sa nangagi. Kini nagalakip kon unsay iyang ginabuhat sa pagkakaron ug, ikalipay, kon unsay iyang buhaton sa umaabot.

Sa pagbalik sa atong tema: si Jesu-Kristo—Diyos, tawo, o kasugiran? Unsay imong hunahuna? Kon si Jesu-Kristo kasugiran lamang, kana magpasabot nga siya dili Diyos o tawo, nga magahimo sa paghisgot nga walay kahulogan. Sa laing bahin, angay kitang maikag nga masayod bahin sa usa ka Jesus nga buhi ug gihatagag gahom sa Diyos aron makahatag kanatog malungtarong kaayohan.