Mga Magmamantala sa Gingharian Nagtaho
Si Jehova Nagapanalangin sa Pagkamalahutayon
GIBATI sa mga Saksi ni Jehova ang lalom nga paghigugma kang Jehova nga Diyos ug ang responsabilidad nganha sa ilang isigkatawo, nga nagadasig kanila nga maningkamot sa paghatag sa tanan ug higayon nga makadungog sa maayong balita sa Gingharian sa Diyos. (Mateo 24:14) Kana ang hinungdan ang usa ka igsoong babaye determinado nga mosangyaw ngadto sa mga sundalo ug sa ilang mga pamilya sa militaryong compound sa iyang teritoryo.
Sa matag panahong mosulay siya, dili siya pasudlon sa kapitan nga nagdumala. Siya misugid: “Busa gihukom ko nga makigkita sa pangulong opisyal, usa ka koronel. Sa giteleponohan ko ang iyang sekretaryo, wala niya ako ikonektar sa koronel. Giplano ko ang pagduaw sa koronel sa iyang balay, kay siya nagpuyo nga halayo sa baraks. Sa miduaw ako, gisukna ako niya kon tagadiin ako. Maayo na lang, ako natawo sa gamay pangunang isla sa Fiji. Tungod sa pagkamatinahoron siya namati sa akong hangyo ug miingon nga siya nakadungog na sa mga Saksi ni Jehova apan wala pa gayod kasaysayi sa atong buluhaton. Kadto naghatag nakog talagsaong higayon sa pagsangyaw kaniya, ug gidawat niya ang tulo ka tabang sa pagtuon sa Bibliya gikan kanako. Giingnan niya ako nga moadto sa iyang opisina sa baraks sa alas 9:00 s.b. sa sunod Martes. Sa dihang ang laing igsoong babaye ug ako miabot, ang mga guwardiya gipahibalo na sa among pagduaw ug giingnan nga gihatag ang pagtugot nga kami mosangyaw sa compound. Ang komander sa guwardiya miingon: ‘Gipahibalo ko na ang tanang opisyal nga sa ma-Biyernes ang tanang pultahan pagaablihan alang kaninyo, ug bisan pag ang tanan dunay lainlaing mga relihiyon, ang inyo mahimong mao ang relihiyon nga nagasangyaw sa pasidaan sa Gingharian sa langit ug sa kataposan sa kalibotan.’
“Sa among pag-abot sa Biyernes,” siya mipadayon, “ang usa ka militaryong sakyanan nga may trompa milibot sa kampo nga nagpahibalo: ‘Ania sa kampo ang duha ka ka edarang babaye nga nagapahibalo sa usa ka pasidaan kaninyo, busa ablihi palihog ang inyong mga pultahan ug pamati kamo kanila. Likayi ang pagpakig-ergo kanila o pagmugnag kamabingkilon.’ Gitrabaho namo ang kampo gikan sa 8:30 s.b. hangtod 5:00 s.g., nga nakapahimutang sa 100 ka libro ug 200 ka magasin. Ug ang resulta? Nahimo ang daghang pagduaw pag-usab ug nasugdan ang daghang pagtuon sa Bibliya.”
Gikan sa lain isla sa Habagatang Pasipiko nga karong bag-o nabuksan alang sa buluhatong pagsangyaw sa mga espesyal payunir miabot ang usa ka makaiikag nga kasinatian. Kining mga espesyal payunir gisupak sa mga lider sa United Church. Panahon sa duaw sa magtatan-aw sa sirkito, sila naglisod sa paghimog pagduaw pag-usab, kay ang pangulo sa balangay, nga naimpluwensiyahan sa mga lider sa simbahan, dili mopasulod sa mga Saksi ni Jehova sa balangay. Sa ilang pag-abot, ang pangulo wala diha, mao nga ang tawong interesado naduaw ug nahatag ang maayong pamatuod. Sa ilang pagbiya, ang usa ka dakong bangka nakit-ang nagsingabot, ug dayag kadto may kadaot sa makina, sanglit nagbugsay man ang mga tawo. Oo, kadto mao ang pangulo sa balangay nga miabot nga ulahi na kaayo sa pagpugong sa pagduaw pag-usab. Sa pagpauli, gisultihan sa mga payunir ang magtatan-aw sa sirkito diha sa pidgin: “Me fella thinkim might angel now breakim engine belong him.”
Busa si Jehova nagpanalangin sa pagkamalahutayon sa maong mga igsoon sa pagsugot sa iyang sugo nga iwali “kining maayong balita sa gingharian.”