Mga Magmamantala sa Gingharian Nagtaho
Ang Diyos Dili Mapihigon
KAPIN sa 1,900 ka tuig kanhi, si apostol Pedro misangyaw ngadto sa opisyal sa kasundalohan nga si Cornelio, nga nag-ingon: “Sa tino naila ko nga ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” (Buhat 10:34, 35) Si Cornelio nagpakita ug kahadlok sa Diyos ug gugma sa pagkamatarong. Gidawat niya ang pagsangyaw ni Pedro ug nahimong Kristohanon.
Ang samang prinsipyo mapadapat usab karong adlawa—ang Diyos dili mapihigon. Mamatikdan nato kini gikan sa usa ka kasinatian gikan sa Alemanya. Ang taho nag-ingon:
“Sa teritoryo sa among kongregasyon, adunay usa ka dakong kuwartel sa Rusong kasundalohan. Niadtong 1989, wala madugay human matumpag ang Paril sa Berlin, ang mga ansiano nangutana kon may magmamantala ba nga makahibalo sa pinulongang Ruso. Pipila kanamo ang makahibalo, ug miadto kami sa pagtrabaho nianang teritoryoha, nga maoy usa ka tinuod nga kalipay. Ang mosunod maoy usa sa daghang kasinatian.
“Kauban nako ang usa ka dili-bawtismadong magmamantala (kinsa nabawtismohan na) sa dihang nakigsulti kami sa usa ka komandante. Ang komandante namati sa among gisulti ug dayon gidapit kami sa pagpakigsulti sa iyang mga sundalo. Matud niya nga kinahanglan silang makadungog bahin sa Diyos ug sa Bibliya usab, busa nakigsabot kami nga mobalik.
“Gihangyo namo ang usa ka igsoong babaye nga larino mosultig Ruso nga mouban kanamo ingong tighubad. Didto sa tigomanan sa kuwartel, nagpahimutang kami ug lamesa alang sa literatura ug nakasulti ngadto sa 68 ka sundalo ug nagtubag sa ilang mga pangutana. Human niadto sila malipayong midawat sa 35 ka libro ug halos 100 ka magasin. Sa dihang mibiya kami sa tigomanan, nakita namo ang gagmayng mga pundok nga naghisgot sa literatura.
“Nakigsabot kaming mobalik sa Hulyo 4, 1992. Sa pag-abot namo sa alas 10:50 s.b., gisultihan kami sa guwardiya sa ganghaan sa kuwartel nga ang mga sundalo nagpaabot kanamo. Usa ka medyor nagdala kanamo ngadto sa tigomanan, ug among nakaplagan nga ang usa ka babaye, kinsa mikuha kanhi ug literatura gikan kanamo alang sa librarya, nag-anunsiyo sa among pag-abot pinaagi sa pagbutang ug mga plakard diha sa mga kuwartel. Tulo ka igsoong lalaki ang mihatag ug mubong mga pakigpulong bahin sa among tibuok-kalibotang buluhaton ug nagpakita kon nganong makasalig kita sa Bibliya. Dayon among gitubag ang mga pangutana gikan sa mga mamiminaw, nga naghatag ug mga tubag gikan sa Bibliya. Lakip sa mga pangutana nga gisukna mao, Unsay baroganan sa mga Saksi ni Jehova bahin sa serbisyo sa militar, ug aduna bay mga sundalo kanila? Naghatag kinig higayon sa dili-bawtismadong magmamantala nga mikuyog nako sa una sa pagbatbat sa iyang 25-tuig nga karera sa militar sa Silangang Alemanya, nga ang kataposang mga tuig ingong kapitan sa sundalo sa kahanginan. Iyang giasoy kon sa unsang paagi siya nakakat-on bahin sa Diyos ug sa Bibliya ug nga niadtong panahona buot na niyang mahimong usa sa mga Saksi ni Jehova. Nadani ang mga sundalo sa ilang nadungog. Sulod sa pito ka minuto ang tanang literatura nga among gidala diha na sa mga kamot sa mga sundalo, ug daghan ang gusto ug Bibliya. Nakakuha kamig pito ka Rusong Bibliya sa usa ka baligyaanan ug libro, nga ilang giapresyar pagdawat. Tinuod gayod nga kalipay ang paghatag ug impormasyon sa Bibliya niining gigutom sa espirituwal nga mga tawo, ug kami nanghinaot nga sila molihok uyon niana.”
Sa pagkatinuod, ang Diyos dili mapihigon. Pinaagi sa iyang Pulong siya naghangyo sa matinud-anog-kasingkasing nga mga tawo bisan kinsa man sila ug bisan diin man sila. Gidapit niya sila sa pagkat-on bahin kaniya ug sa iyang Anak, si Jesu-Kristo, ug daghan gikan sa lainlaing kahimtang sa kinabuhi ang nagahimo niana.—Juan 17:3.