Kinabuhi ug Ministeryo ni Jesus

Sa Dihang Hingkaplagan ang Nawalang Anak

SA DIHANG ang nawala, o usikan, nga anak sa sambingay ni Jesus mipauli sa balay sa iyang amahan, unsang pag-abiabi ang iyang nadawat? Pamati samtang moasoy si Jesus:

“Samtang didto pa siya sa halayo, nakita siya sa iyang amahan ug siya giabot ug kaluoy, ug midagan ug migakos kaniya ug mabinationg gihagkan siya.” Pagkamaluloy-on, pagkamabinationg amahan, nga maayong pagkahawas sa atong langitnong Amahan, si Jehova!

Hayan nakadungog ang amahan sa mahilayng kinabuhi sa iyang anak. Apan iyang giabiabi siya nga wala maghulat ug detalyadong katin-awan. Si Jesus usab dunay samang maabiabihong espiritu, miuna sa pagduol sa mga makasasala ug sa mga mangongolektag buhis, nga maoy naghawas diha sa ilustrasyon sa usikang anak.

Tinuod, ang masinabutong amahan sa sambingay ni Jesus sa walay duhaduha nahibalo nga naghinulsol ang iyang anak pinaagi sa pagkakita sa iyang nasubo, minghoy nga panagway sa dihang siya mipauli. Apan ang mahigugmaong pag-una sa amahan nakapasayon sa anak sa pagtug-an sa iyang mga sala, sama sa giasoy ni Jesus: “Unya ang anak miingon kaniya, ‘Amahan, nakasala ako batok sa langit ug sa imong atubangan. Dili na ako takos nga pagatawgon nga imong anak. Himoa na lang ako nga usa sa imong sinuholan.’”

Apan, wala pa makagawas sa baba ang pulong sa anak sa dihang milihok ang iyang amahan, gisugo ang iyang mga ulipon: “‘Dali! dalha ninyo dinhi ang labing maayong kupo, ug isul-ob kini kaniya, ug butangig singsing ang iyang kamot ug sapatosi ang iyang mga tiil. Ug dad-a dinhi ang nating baka nga gipatambok, ug ihawa kini ug mangaon kita ug managsadya, kay kining akong anak namatay na apan karon nabuhi siya pag-usab; siya nawala na apan karon hingkaplagan na.’ Ug sila misugod sa pagsadya.”

Kasamtangan, didto sa “uma ang kamagulangang anak” sa amahan. Tan-awa kon makaila ka ba kon kinsay iyang gihawasan pinaagi sa pagpamati sa nahibilin sa estorya. Si Jesus miingon bahin sa kamagulangang anak: “Ug sa nagsingabot siya duol sa balay iyang nadungog ang honi ug panagsayaw. Ug iyang gipatawag ang usa sa iyang mga sulogoon ug iyang gipangutana siya kon unsay kahulogan niining mga butanga. Siya mitubag kaniya, ‘Ang imong igsoon nahiabot, ug ang imong amahan nagpaihaw ug nating bakang gipatambok, tungod kay kining igsoon mo nahiuli man kaniya nga buhi ug maayo rag panglawas.’ Apan nasuko siya ug midumili sa pagsulod.

“Ug ang iyang amahan migula ug mialam-alam kaniya. Apan siya mitubag sa iyang amahan, ‘Tan-awa sulod niining daghang katuigan nagaalagad ako kanimo ug wala gayod ako makalapas sa bisan unsa nga imong gisugo, ngani wala ako nimo hatagi bisan na lang untag nating kanding aron makahimo ako sa pagsadya uban sa akong mga higala. Apan sa paghiabot niining imong anak nga milamoy sa imong katigayonan kauban sa daotang mga babaye, giihawan mo pa siya sa nating baka nga gipatambok.’”

Kinsa, sama sa kamagulangang anak, ang nanaway sa kaluoy ug sa pagtagad nga gipakita ngadto sa mga makasasala? Dili ba ang mga eskriba ug mga Pariseo? Sanglit ang ilang pagpanaway kang Jesus tungod sa iyang pag-abiabi sa mga makasasala mao man ang nakaagda niini nga sambingay, sila sa dayag mao gayod ang gihawasan sa magulang nga anak.

Gitapos ni Jesus ang iyang sugilanon uban sa hangyo sa amahan sa iyang kamagulangang anak: “Anak ko, sa kanunay nagpakig-uban ikaw kanako, ug ang tanang butang ko imo usab; apan ang pagsadya ug paglipay kinahanglan himoon ta, kay kining imong igsoon namatay na apan karon nabuhi siya pag-usab, siya nawala na apan karon hingkaplagan siya.”

Busa wala tiwasa ni Jesus ang sugilanon sa gibuhat sa magulang nga anak sa ulahi. Sa pagkatinuod, sa ulahi, tapos nga namatay ug nabanhaw si Jesus, “usa ka dakong panon sa mga saserdote nagpasakop sa pagtuo,” hayan apil kanila ang “magulang nga anak” nga matang nga maoy gihisgotan ni Jesus dinhi.

Apan kinsa sa modernong panahon ang naghawas sa duha ka anak? Kadtong nakadangat sa pagkaila bahin sa mga katuyoan ni Jehova nga dunay basehanan sa ilang pagsulod ug relasyon uban kaniya. Ang kamagulangang anak naghawas sa pipila ka membro sa “gamay nga panon,” o “kongregasyon sa mga panganay kinsang mga ngalan nahisulat sa talaan didto sa langit.” Kining sinagop nga tinamdan kaamgid nianang sa kamagulangang anak. Sila walay tinguha sa pag-abiabi sa yutan-ong matang, ang “ubang mga karnero,” kinsa ilang gibati nga nagkuha sa pagtagad.

Ang usikang anak, sa laing bahin, naghawas niadtong katawhan sa Diyos kinsa nagbiya sa mga kalingawan nga gitanyag sa kalibotan. Apan, sa ulahi, sila mahinulsolong mibalik ug nahimo na usab nga aktibong mga alagad sa Diyos. Sa pagkatinuod, pagkamahigugmaon ug pagkamaloluy-ong Amahan alang niadtong nahibalo sa ilang panginahanglag kapasayloan ug mobalik kaniya! Lucas 15:20-32; Buhat 6:7; Lucas 12:32; Hebreohanon 12:23; Juan 10:16.

◆ Sa unsang paagi gisundog ni Jesus ang pananglitan sa maluloy-ong amahan diha sa iyang sambingay?

◆ Unsa ang hunahuna sa kamagulangang anak bahin sa pag-abiabi sa iyang igsoon, ug sa unsang paagi ang mga Pariseo nagsundog sa paggawi sa kamagulangang anak?

◆ Unsa ang aplikasyon sa sambingay ni Jesus sa atong adlaw?