Gituman Nila ang Kabubut-on ni Jehova

Usa ka Amahan nga Andam Mopasaylo

KINI gihinganlang ang labing bantogang sugilanon nga nasulat sukad masukad​—uban ang maayong katarongan. Ang sambingay ni Jesus bahin sa gugma sa usa ka amahan alang sa iyang nawalang anak maoy susama sa usa ka bentana nga pinaagi niini kita makabaton ug maanindot nga pagtan-aw sa kaluoy sa Diyos alang sa mahinulsolong mga makasasala.

Nawala ug Nakaplagan

Ang usa ka tawo dunay duha ka anak lalaki. Ang manghod miingon kaniya: ‘Buot kong makuha ang akong panulondon karon, inay nga maghulat pa hangtod mamatay ka.’ Ang amahan misugot, lagmit mihatag kaniya ug un-tersiya sa tanan niyang gipanag-iya​—ang legal nga bahin sa manghod sa duha ka anak lalaki. (Deuteronomio 21:17) Ang batan-on dalidaling nanghipos sa tanan niyang kabtangan ug mipanaw sa layong dapit diin iyang gihurot ang tanan niyang salapi sa mapatuyangong pagkinabuhi.​—Lucas 15:​11-13.

Unya nahitabo ang usa ka grabeng gutom. Tungod sa kalisod, ang batan-on midawat ug trabaho ingong tig-atiman ug mga baboy​—usa ka talamayong trabaho para sa usa ka Hudiyo. (Levitico 11:​7, 8) Nihit kaayo ang pagkaon mao nga misugod siya sa pagpangandoy sa mga bunga sa carob nga maoy pagkaon para sa mga baboy! Sa kataposan, ang batan-on nakaamgo. ‘Ang mga sulugoon sa akong amahan mas napakaon pag maayo kay kanako!’ nakahunahuna siya. ‘Mopauli ko, motug-an sa akong mga sala, ug magpakiluoy nga mahimong usa sa mga sinuholang tawo sa akong amahan.’a​—Lucas 15:​14-19.

Ang batan-on mibaktas pauli. Walay duhaduhang dako kaayo ang pagkabalhin sa iyang panagway. Bisan pa, ang iyang amahan nakaila kaniya “samtang layo pa siya.” Natukmod sa kaluoy, siya midagan paingon sa iyang anak, migakos kaniya, ug “mihalok nga mabination kaniya.”​—Lucas 15:20.

Kining mabinationg pag-abiabi nagpasayon para sa batan-on nga magpahayag sa iyang mga pagbati mismo. “Amahan,” siya miingon, “ako nakasala batok sa langit ug batok kanimo. Ako dili na takos nga tawgon pang imong anak. Himoa ako ingong usa sa imong sinuholang mga tawo.” Ang amahan mipatawag sa iyang mga ulipon. “Dali!” siya misugo. “Pagpagawas ug usa ka besti, ang labing maayo, ug sul-obi siya niana, ug butangig singsing ang iyang kamot ug sandalyas ang iyang mga tiil. Ug dad-a ang pinatambok nga toreyong baka, ihawa kini ug mangaon kita ug maglipay sa atong kaugalingon, tungod kay kining akong anak nga lalaki patay na ug nabuhi pag-usab; siya nawala ug nakaplagan.”​—Lucas 15:​21-24.

Usa ka maanindot-pagkahikay nga kombira ang gisugdan, lakip ang musika ug pagsayaw. Ang magulang nga anak lalaki nakadungog sa kasaba samtang nagpauli gikan sa umahan. Sa dihang iyang nasayran nga ang iyang igsoong lalaki mipauli ug kini maoy hinungdan sa kasadya, siya nasuko pag-ayo. ‘Ako nagpaulipon kanimo sa daghang tuig, ug wala gayod ako mosupak kanimo, apan wala ka gayod bisan kausa mohatag kanako ug nating kanding aron ako maglipay kauban sa akong mga higala,’ siya mireklamo sa iyang amahan. ‘Apan sa dihang ang imong anak lalaki nga nagwaldaswaldas sa imong bahandi mibalik, imo siyang giandaman ug kombira.’ ‘Anak,’ ang iyang amahan malumong mitubag, ‘ikaw ania kanunay uban kanako, ug ang tanang akoa maoy imoha. Apan angay lamang nga kita maglipay tungod kay ang imong igsoong lalaki patay na ug nabuhi. Siya nawala ug nakaplagan.’​—Lucas 15:​25-32.

Mga Leksiyon Alang Kanato

Ang amahan sa sambingay ni Jesus naghawas sa atong maluluy-ong Diyos, si Jehova. Sama sa nawalang anak lalaki, ang pipila ka katawhan sa usa ka panahon mobiya sa kasegurohan sa panimalay sa Diyos apan mobalik sa ulahi. Unsa ang panglantaw ni Jehova sa mga sama kanila? Kadtong mamalik kang Jehova nga dunay tiunay nga paghinulsol makasalig nga “siya dili man sa kanunay magabadlong, ni magatipig siya sa iyang kasuko sa walay kataposan.” (Salmo 103:9) Sa sambingay, ang amahan midagan aron abiabihon ang iyang anak lalaki. Sa susamang paagi, si Jehova dili lamang andam apan mahinamong mopasaylo sa mahinulsolong mga makasasala. Siya “andam nga mopasaylo,” ug siya mohimo niini “sa madagayaon gayod.”​—Salmo 86:​5; Isaias 55:​7; Zacarias 1:3.

Sa sambingay ni Jesus, ang tiunay nga gugma sa amahan nagpasayon alang sa anak nga magbaton ug kaisog nga mobalik. Apan tagda: Unsa kaha ang nahitabo kon ang amahan misalikway sa anak o sa masuk-anong paagi misulti kaniya nga dili na gayod mobalik? Ang maong tinamdan lagmit nga permanenteng magpalayo sa batan-on.​—Itandi ang 2 Corinto 2:​6, 7.

Busa, sa usa ka diwa, ang tiunay nga gugma sa amahan nagbukas sa dalan alang sa pagbalik sa iyang anak sa panahong siya mibiya. Usahay, ang Kristohanong mga ansiyano karon kinahanglang mopalagpot sa di-mahinulsolong mga makasasala gikan sa kongregasyon. (1 Corinto 5:​11, 13) Sa pagbuhat sa ingon, makasugod sila sa pag-andam sa dalan alang sa pagbalik sa makasasala pinaagi sa mahigugmaong pagtudlo kanila sa mga lakang nga mahimo nilang himoon para sa umaabot nga pagpasig-uli. Ang handomanan sa maong kinasingkasing nga hangyo sa ulahi nagpahinuklog sa daghang nangawala sa espirituwal ngadto sa paghinulsol ug nagtukmod kanila nga mobalik sa panimalay sa Diyos.​—2 Timoteo 4:2.

Ang amahan nagpakita usab ug kaluoy sa dihang mibalik ang iyang anak. Namatikdan dayon niya ang tim-os nga paghinulsol sa batan-on. Unya, inay nga ipugos nga idetalye sa anak ang iyang mga kasal-anan, napuliki siya sa pag-abiabi kaniya, ug siya nagpadayag ug dakong kahimuot sa paghimo niana. Ang mga Kristohanon mahimong makasundog niini nga panig-ingnan. Angay silang malipay nga nakaplagan ang usang nawala.​—Lucas 15:10.

Ang gawi sa amahan tataw nga nagpadayag nga dugay na siyang nagpaabot sa pagbalik sa iyang masupilong anak. Hinuon, kana anino lamang sa pangandoy ni Jehova alang sa tanang nagbiya sa iyang panimalay. “Wala siya magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Busa kadtong naghinulsol sa ilang kasal-anan makasalig nga sila panalanginan ug “mga panahon sa pagpalagsik . . . gikan sa persona ni Jehova.”​—Buhat 3:19.

[Mga footnote]