Mangil-ad nga mga Batasang Seksuwal—Karaan ug Moderno
UNSA ka dulumtanan ang pagsimba kang Moloch, usa sa mga diyos nga Moabihanon? Si Paolo Mantegazza nagsulat diha sa iyang librong The Sexual Relations of Mankind nga ang mga Moabihanon sa panahon sa Bibliya naghimog malaw-ayng mga buhat seksuwal “nga nagkoros, samtang sila nagsayaw libot sa sihagong estatwa ni Moloch, tapos lamoya sa pito ka bronsing baba sa diyos ang mga halad sa mga matinuohon, mga halad nga harina, mga tokmo, mga nating karnero, mga laking karnero, mga nating baka, mga toro, ug mga batang lalaki.” Siya midugang: “Si bisan kinsang nagbasa sa Bibliya angay mahinumdom sa makalilisang nga mga panghimaraot nga gipahayag ni Moises ngadto niadtong mga Hebreohanon nga nakighilawas kang Moloch. Si Paal-Phegor, usab, o Belphegor [Baal sa Peor], nga maoy paboritong diyos sa mga M[i]dianhon, gidawat uban sa panatikong pagkamasiboton sa mga Hudiyo, ug ang iyang kulto sama ra ka law-ay sa mga rituwal ni Moloch.”—Levitico 18:21, New World Translation Reference Bible, potnot; 20:2-5; Numeros 25:1-5; Jeremias 32:35.
Ang “panatikong pagkamasiboton” niadtong mga Hudiyo may katumbas karong adlawa diha sa “bag-ong moralidad” nga mitungha, ilabina sa Tinipong Bansa ug sa ubang kayutaan sa Kakristiyanohan, sa katuigang 1960.
Sa pagtulotimbang sa tagdugayng mga epekto nianang seksuwal nga rebolusyon, si Drs. Alexandra ug Vernon H. Mark, magkaubang mga magsusulat sa librong The Pied Pipers of Sex, mipresentar sa ilang mga hunahuna diha sa seksiyong “Speaking Out” sa Medical World News, Houston, Texas, U.S.A. Sa 1985 sila misulat:
“Sa miaging 25 ka tuig, ang katilingban nakasaksig dramatikong kausaban sa mga batasang seksuwal. . . . Kining pagbalit-ad sa tradisyonal nga moralidad gitawag seksuwal nga rebolusyon.” Tapos sa pagngalan sa medikal nga mga propesyonal nga responsable sa maong kausaban sa seksuwal nga mga tinamdan, ang mga magsusulat mipahayag: “Nga dili proporsiyon sa tinagsa ka mga amot, [ang maong mga doktor] nakabatog katingad-ang epekto diha sa katilingban ug sa tanan niining institusyon. Inay nga motan-aw ug utang-kabubut-on sa maong mga magdudumala sa seksuwalidad, kinahanglang kunhoran nato ang ilang impluwensiya pinaagi sa pagpasiugda sa maayog salabotan ug timbang nga baroganan bahin sa seksuwal nga kagawian ug sa panalipod sa panglawas sa publiko.
“Ang pagbuhi sa bug-os nga kapungot sa seksuwal nga rebolusyon wala pa makapatunghag dagkong mga benepisyo sa nasod sa katibuk-an—gawas kon maghunahuna kita sa ganansiyang salapi. Apan tungod sa pasiugda diha sa sekso ingong kalingawan ug tan-awonong dula, ang rebolusyon nagpatunghag daghang problema nga nagapameligro kanato sa sosyal nga kagubot—nga ang usa mao ang sakit venereal. Ang VD dili usa ka bag-ong hampak, apan karon kini nahimong usa ka hampak, nga nagapatunghag bag-ong mga matang sa katingad-ang bakterya ug samag-virus nga mga kagaw. Ang genital herpes, nga dili mamaayo diha sa mga hamtong, nagpahinabog mga kamatayon sa masuso gumikan sa meningoencephalitis. Ang AIDS . . . nakasulod sa taliwala sa atong katilingban ug sa mga sapasapa sa dugo sa inosenteng mga biktima agi sa nakontaminar nga hinatag nga dugo.”
Kining maong mga magsusulat nahidangat sa konklusyon: “Ang nagbuntaog nga ebidensiya nga nagapakasala sa mga pangulo sa seksuwal nga rebolusyon maoy talagsaon. Gisaad nila ang kalipay, kagawasan, ug maayong lawas. Gihatag nila ang kasakitan, sakit, ug kamatayon pa.” Ang Bibliya nagatin-aw kon diin nagabarog ang maong mga pangulo. Pananglitan, ang 1 Corinto 6:9, 10 nagaingon: “Unsa! Wala ba kamo mahibalo nga ang mga tawong dili matarong dili magapanunod sa gingharian sa Diyos? Ayaw kamo pagpalimbong. Ang mga makihilawason, mga tigsimbag diyosdiyos, mga mananapaw, mga lalaking gitipigan alang sa dili-kinaiyanhong mga katuyoan, o mga lalaking nagahigda uban sa mga lalaki . . . dili magapanunod sa gingharian sa Diyos.”—Tan-awa usab ang Judas 7.