Ang Pagkamaabiabihon sa Malta Nagapamunga ug mga Panalangin

ANG Malta miabiabi sa pag-abot ni apostol Pablo sa dihang nalunod ang barko nga iyang gisakyan sa unang siglo K.P. Ang mga mulopyo sa isla midawat kaniya ug sa iyang kaubang mga manlalawig nga “matinabangon.” Sa pagkamatuod, ang mga taga Malta nagpakita sa mga biyahedor ug “talagsaong tawhanong kalulot.”—Buhat 28:1, 2.

Sa ulahi, ang punoan sa isla, nga ginganlag si Publio, midawat kang Pablo ug sa iyang mga kauban nga maabiabihon ug ‘gitagad sila nga maluluton sa tulo ka adlaw.’ Sa dihang ang balita mikaylap nga giayo sa apostol ang amahan ni Publio sa hilanat ug kalibang, “ang ubang mga tawo sa pulo nga may mga sakit miduol usab kaniya ug giayo.” (Buhat 28:7-9) Apan daghan pa ang gihimo ni Pablo. Siya nagpugas ug binhi sa kamatuoran diha sa mga kasingkasing sa mga tawo, ug kini misangpot ug daghang mga panalangin alang niining maabiabihong mga islahanon. Karong adlawa, ang samang butang maoy nagakahitabo sa Malta. Dali ug tan-awa kon sa unsang paagi.

Ang mga Bisita Nagdalag Maayong Balita

Kon tan-awon gikan sa kahanginan, ang gidan-agan sa adlaw nga Malta misidlak nga samag usa ka mutya nga nahimutang diha sa asul nga Mediteraneo. Samtang nagkaduol sa Luga Airport, ang bisita makakitag napagba-sa-adlaw nga yuta nga daw wala kaayoy tanom. Sa dihang nakatugpa na, iyang nahibaloan nga kining onse por disisayis ka kilometrong isla maoy pinuy-anan sa gibanabanang 347,000 ka molupyo. Ang linginon ug talinis nga mga atop sa daghang mga simbahan ug mga katedral sa Malta nagpadayag sa relihiyosong kaagi niini. Apan niining ika-20ng siglo, sa unsang paagi ang mga taga Malta nakabenepisyo sa mga pagduaw sa mga Saksi ni Jehova?

Ang usa ka nagapanawng magtatan-aw nga ginganlag David miduaw sa balay ni Juliana ug nakakaplag ug andam nga pagsanong sa mensahe sa Gingharian. “Ako wala malipay sa pag-apil-apil sa simbahan sa politika,” matud ni Juliana, “ug busa misulay ako sa pagpangita diha Bibliya sa kamatuoran mahitungod sa kagamhanan sa Diyos. Apan samtang akong gibasa kini, dihay mga butang nga wala nako dayon hisabti. Handurawa kon unsa ka dako sa akong kaikag sa dihang kining mituktok sa akong pultahan nangutana kon nahibalo ba ako kon unsa ang Gingharian sa Diyos! Dihadiha, akong gihangyo siya nga ipakita kanako ang tubag diha sa akong Katolikong Bibliya. Iya kadtong gihimo. Niadto mismong adlawa ako nahibalo nga nakaplagan ko ang kamatuoran.”

Usa ka lokal nga Saksi ang mihikay sa pagtuon sa Bibliya uban kang Juliana. Sa dihang si David mibalik sa Malta unom ka bulan sa ulahi, pagkadakong katingala nga si Juliana ang nag-abiabi kaniya sa pagsulod sa Kingdom Hall! Siya sa dili madugay andam na nga mahimong usa ka magmamantala sa maayong balita sa Gingharian.

Ang bana ni Juliana, si Francis, naglibog usab sa mga pagtulon-an sa simbahan. Samtang giduaw siya sa usa ka okasyon samtang didto siya sa ospital, iyang naabtan siya nga naminaw sa mga narekord nga teyp sa mga pahayag publiko sa Bibliya nga gihatag sa Kingdom Hall. Human nakadungog sa pahayag sa ulohan maylabot sa pamilya, namatikdan ni Francis nga makataronganon gayod ang tambag sa Bibliya, ug ingong resulta, siya mihukom nga mosugod sa pagtambong sa Kristohanong mga tigom. Sa kataposan siya nakaamgo sa usa ka suliran nga kinahanglang sulbaron. Unsa kadto?

Duolan sa 20 ka tuig, si Francis nagtrabaho ingong usa ka croupier sa kasino. Siya karon nakaamgo nga ang trabaho nga nalangkit sa sugal sukwahi sa Kristohanong mga prinsipyo nga naghukom sa kadalo ug kahakog. (Roma 13:9, 10; 1 Corinto 6:9, 10) “Bisan pag sa sinugdan kulang ako sa pagtuo nga gikinahanglan aron ilisan ko ang akong trabaho,” miadmiter si Francis, “miampo ako sa tabang ni Jehova. Sa kataposan, ako nakakita ug laing trabaho nga makaarang kanako sa pag-atiman sa akong asawa ug sa akong anak nga lalaki, si Sandro.” Karong adlawa, si Francis nag-alagad ingong usa ka ansiano diha sa lokal nga kongregasyon sa mga Saksi ni Jehova.

Paglipay Gikan sa mga Kasulatan

Si Rose malipayong naminyo kang George sulod sa unom ka tuig sa dihang siya kalit nga namatay sa aksidente. Siya wala gayod makakaplag ug paglipay diha sa pangatarongan sa pari nga gikuha sa Diyos si George tungod kay nangabubho sa gugma nga gibati niya alang sa iyang bana. Si Rose nasubo kaayo nga nakahunahuna siya sa pagtubok sa kinabuhi sa iyang tulo ka anak ug dayon maghikog.

Apan pagkadakong kausaban ang miabot kang Rose sa dihang gisugdan siya sa silingang Saksi nga ginganlag Helen sa pagtuon sa Bibliya uban kaniya! Si Rose sa wala madugay napahalipayan sa Kasulatanhong pagtulon-an bahin sa pagkabanhaw. (Juan 5:28, 29) Sa samang panahon, ang pagdasig miabot gikan kang Peter, laing nagapanawng magtatan-aw. Dako kaayong kaayohan ang iyang nakuha gikan sa iyang mga pakigpulong bahin sa pagkabanhaw. Nadasig niini nga paglaom, si Rose miduyog kang Helen diha sa publikong pagsangyaw, ug silang duha karon nag-alagad ingong regular nga mga payunir, o bug-os panahong mga magmamantala sa Gingharian.

Gidasig nga Magmasiboton

Si Joe nagagikan sa usa ka dakong pamilya, kay siya adunay 12 ka igsoong mga lalaki ug mga babaye. Gidasig sa usa ka nagapanawng magtatan-aw, siya masibotong nagsangyaw sa iyang mga paryente. “Sa sinugdan,” matud pa niya, “ang akong pamilya nahibalo nga ang akong gipatin-aw kanila gikan sa Bibliya makataronganon. Apan sa dihang nakita nila nga ang akong interes sa pagkahimong Saksi midako, nausab ang ilang mga hunahuna, ug silang tanan mibatok kanako—ilabina ang akong amahan.” Ang ila bang tinamdan nakapalong sa kasibot ni Joe?

Wala gayod! Pananglitan, sa dihang ang bata sa usa sa iyang igsoong mga babaye nasakit ug hapit nga mamatay, gisangyawan siya ni Joe, gisultihan siya bahin sa paglaom sa pagkabanhaw. Karon kini nga sister bawtismado na nga Saksi ni Jehova. Sunod, ang usa sa magulang nga mga igsoong lalaki ni Joe ug ang iyang pamilya nagpakitag interes sa kamatuoran. Dayon ang kinamagulangang igsoong lalaki ug ang iyang pamilya mibarog dapig sa Gingharian sa Diyos. Kasamtangan, ang amahan ni Joe dugang ug dugang nasuko. Sa dihang ang kinamanghorang igsoong babaye ni Joe usab misugod sa pagtuon sa Bibliya, gipalayas sa amahan si Joe sa balay. Wala magpaulang, gigamit ni Joe ang tanang okasyon sa pagduaw sa iyang mga paryente ug nakighisgot bahin sa mensahe sa Bibliya. Sa gihapon, ang iyang amahan masuk-anong misanong ug miingon: “Nganong dili ka makigsulti sa pari? Siya ang labaw nga nahibalo sa Bibliya!” Si Joe mitubag nga siya malipay sa pagbuhat niana kon ang iyang amahan mouban kaniya. Unsay gisangpotan sa ilang pagduaw?

“Gihikay namo ang adlaw ug oras,” si Joe miasoy, “apan ang pari gustong masayod sa ulohan na andamon, nag-ingon nga kay mibiya man siya sa seminaryo mga pito na ka tuig ang milabay, siya nagkinahanglan karon ug pagdukiduki. . . . Apan human sa usa ka semana, usa ka bulan, ug gani duha ka bulan, ang pari wala motuman sa kasabotan. Sa dihang namatikdan kini sa akong amahan, giusab niya ang iyang hunahuna bahin sa simbahan ug anam-anam nga nakaamgo nga ang akong nakat-onan gikan sa Bibliya maoy tinuod.” Ang amahan ni Joe sa kataposan midawat sa kamatuoran, miabot ug 29 ka membro sa iyang pamilya ang nakigbahin sa pag-alagad kang Jehova.

Ang Matinabangong Tambag Naghatag ug mga Panalangin

Naghisgot nga madasigon sa lain pa nga nagapanawng magtatan-aw, ang usa ka minyong payunir nga ministro nga ginganlag Ignatio miasoy: “Si Paul ug ang iyang asawa misaka diha sa balay. Ilang gitabangan kaming duha sa among relasyon sa kaminyoon ingon man usab sa pag-alagad sa kanataran. Iyang ipasiugda gayod kanunay ang bili sa pagsangyaw.”

Si Ignatio nahinumdom kon unsay nahitabo sa dihang si Paul nakigkita sa mga ansiano sa kongregasyon ug sa ministeryal nga mga alagad sa iyang kataposang pagduaw. “Sa dihang ako miingon nga dili ako mokuyog sa buluhatong pagsangyaw nianang buntaga aron sa pag-andam sa akong bahin sa programa sa tigom,” matud ni Ignatio, “si Paul miingon nga siya mogawas sa pagsangyaw sa kanataran ingon sa giplano bisan pa kon ako dili mouban niya. Niana, ako mihukom nga mouban na lang. Pagkadako sa panalangin ang gihatag ni Jehova sa akong desisyon! Nianang buntaga ako nakasugod ug usa ka pagtuon sa Bibliya, ug gikan niana, aduna nay unom ka tawo karon ang nakasulod sa kamatuoran.”—Itandi ang 3 Juan 4.

Usa ka Pagbayloay ug Pagdasig

Sa matag panahong moduaw ang usa ka nagapanaw nga ansiano sa kaubang mga Saksi sa Malta, ilang dawaton siya nga maabiabihon ug matinguhaon nga makabenepisyo gikan sa iyang pagdasig ug tambag. (Itandi ang 3 Juan 5-8.) Ingong sangpotanan, dugang ug dugang mga taga Malta ang nagabarog nga malig-on dapig kang Jehova nga Diyos ug sa iyang Gingharian. Sa kataposan sa 1989 nga tuig sa pag-alagad, 389 niining maabiabihong mga taga-isla ang nagbuhat niana. Karon nga naorganisar sa lima ka mauswagong kongregasyon (upat sa Malta ug usa sa duol nga pulo sa Gozo), ilang ginamantala sa maayong balita uban ang kaisog.

Ang tanang nagapanawng mga magtatan-aw nga gitudlo sa pagduaw sa Malta sa mga katuigang dili pa dugay mibatig sama sa gibati ni apostol Pablo, kinsa miingon sa Romanhong mga Kristohanon: “Nangandoy ako sa pagpakigkita kaninyo, aron akong ikapaambit ang espirituwal nga gasa nganha kaninyo aron nga kamo malig-on.” Ang ilang mga pagduaw sa pagkatinuod miresulta ug usa ka makapalagsik nga “pagbayloay ug pagdasig.” (Roma 1:11, 12) Dugang pa, ang kalihokan sa pagsangyaw sa Gingharian sa mga Saksi ni Jehova naghatag dagayang espirituwal nga mga panalangin ngadto sa maabiabihong mga tawo sa Malta.

[Mapa/Mga hulagway sa panid 24, 25]

(Alang sa aktuwal nga pagkahan-ay, tan-awa ang publikasyon)

GOZO

COMINO

MALTA

Valletta

Dagat Mediteraneo

8 km

5 mi