Usa ka Bililhong Bahandi nga Ipaambit

SUMALA SA GIASOY NI GLORIA MALASPINA

Sa dihang wala na namo makita ang baybayon sa Sicily, ang akong bana ug ako misugod sa pagtunong sa among pagtagad diha sa among destinasyon, ang Mediteranyong isla sa Malta. Pagkakulbahinam nga palaaboton ang pagduaw sa Malta! Samtang ang barko mitadlas sa dagat, kami naghunahuna sa kasinatian ni apostol Pablo sa Malta panahon sa unang siglo.​—BUHAT 28:1-10.

ANG tuig maoy 1953, ug ang Malta niadtong panahona dili legal nga nag-ila sa pagsangyawng kalihokan sa mga Saksi ni Jehova. Sa tuig una niana, kami migraduwar gikan sa Watchtower Bible School of Gilead ug giasayn sa Italya. Human sa hamubo lamang nga panahon sa pagtuon ug Italyano, kami mahinamong makakita kon unsay naghulat kanamo sa Malta.

Buot ba ninyong masayran kon sa unsang paagi ako, nga usa ka batan-ong babaye, nahimong usa ka langyawng misyonaryo? Pasaysaya ko ninyo.

Makapainspirar nga Panig-ingnan sa Akong Inahan

Niadtong 1926, sa dihang ang among pamilya nagpuyo sa Fort Frances, Ontario, Canada, ang akong inahan midawat sa pulyetong Millions Now Living Will Never Die gikan sa usa ka Estudyante sa Bibliya (ingon sa pag-ila sa mga Saksi ni Jehova kaniadto). Gibasa niya kini uban ang dulot nga interes, ug niadtong semanaha siya mitambong sa usa ka ginuropong pagtuon sa Bibliya, nga naggamit sa magasing Bantayanang Torre. Si Mama himasa kaayo sa Bibliya, ug siya midawat sa mensahe mahitungod sa Gingharian sa Diyos ingong bahandi nga iyang gipangita. (Mateo 6:33; 13:44) Bisan pa sa hilabihang pagsupak gikan kang Papa, ug bisan tuod may atimanonon siyang tulo ka gagmayng batang babaye, mibarog siya dapig sa kamatuoran.

Ang dili matarog nga pagtuo ni Mama sulod sa 20 ka tuig nagpaamgo kanako ug sa akong duha ka magulang babaye, si Thelma ug Viola, sa kahibulongang paglaom sa kinabuhing dayon sa bag-ong kalibotan sa pagkamatarong. (2 Pedro 3:13) Siya nag-atubang ug daghang malisod nga mga pagsulay, apan wala gayod kami magduhaduha sa pagkamatarong sa iyang napiling dalan.

Niadtong 1931, sa dihang ako diyes anyos lamang, mibalhin kami ngadto sa usa ka umahan sa amihanang Minnesota, T.B.A. Didto kami nahunong sa regular nga pakig-uban sa mga Saksi ni Jehova apan dili gikan sa Biblikanhong instruksiyon gikan ni Mama. Ang iyang debotadong pag-alagad ingong colporteur, o bug-os-panahong ministro, nag-inspirar kanako nga buot moduyog kaniya nianang buluhatona. Niadtong 1938 ang akong duha ka igsoong babaye ug ako nagpasimbolo sa among pahinungod kang Jehova pinaagi sa pagpabawtismo sa usa ka asembliya sa Duluth, Minnesota.

Tapos ako migraduwar sa hayskul niadtong 1938, gidasig ako ni Mama nga mokuhag komersiyo aron makasuportar ako sa akong kaugalingon ingong payunir (ang bag-ong ngalan sa colporteur). Kini napamatud-ang usa ka maayong tambag, ilabina nga si Papa mihukom sa pagbiya kanamo ug maong kinahanglan nga kami na ang mag-atiman sa among kaugalingon.

Pagpakig-ambit sa Among Bahandi sa Bug-os-Panahon

Ngadtongadto mibalhin ako sa California, ug niadtong 1947, ako misugod sa payunir nga buluhaton sa San Francisco. Samtang okupado sa pagpangandam alang sa kombensiyon alang sa “Pag-uswag sa Tanang Nasod” nga Asembliya sa Los Angeles, nahibalag nako si Francis Malaspina. Ang among parehong tumong sa misyonaryong buluhaton mitultol sa pagsugod sa usa ka mahigugmaong relasyon. Kami naminyo sa 1949.

Sa Septiyembre 1951, si Francis ug ako gidapit sa ika-18ng klase sa Gilead. Sa adlaw sa graduwasyon, Pebrero 10, 1952, tapos sa lima ka bulang subsob nga pagbansay, ang mga nasod diin kami ipadalahay gibasa sumala sa pagkasunodsunod sa alpabeto sa presidente sa tunghaan, si Nathan H. Knorr. Sa dihang siya miingon, “Italya, Brader ug Sister Malaspina,” kami naghanduraw na sa among biyahe!

Pipila ka semana sa ulahi, misakay kamig barko sa New York alang sa napulo-ka-adlaw nga biyahe paingon sa Genoa, Italya. Si Giovanni DeCecca ug Max Larson, mga kawani sa Brooklyn hedkuwarter, didto sa pantalan aron sa pagpalarga kanamo. Sa Genoa kami gisugat sa mga misyonaryo nga sinati sa makuting mga paagi sa pagsulod sa nasod.

Naghinamhinam sa tanang butang libot kanamo, misakay kamig tren ngadto sa Bologna. Ang among talan-awon pag-abot maoy sa usa ka siyudad nga nadaot pa gihapon sa mga bomba sa Gubat sa Kalibotan II. Apan diha usab ing daghang makapahimuot nga mga butang, sama sa madanihong kahumot sa sinanlag nga kape nga masimhot sa huyohoy sa kabuntagon ug ang linamasan nga baho sa lamian kaayong mga sarsa nga giandam alang sa daghan kaayong matang sa pasta.

Pagtuman sa Usa ka Tumong

Misugod kami pagsangyaw nga sinag-ulo ang presentasyon, ug among sublion ang presentasyon hangtod dawaton ang mensahe o ang pultahan sirhan. Ang tinguha sa pagpahayag sa among kaugalingon nagtukmod kanamo sa pagkugi sa pagtuon sa pinulongan. Tapos sa upat ka bulan, kami giasayn sa usa ka bag-ong puy-anan sa misyonaryo sa Naples.

Kining dako kaayong siyudad ilado sa maanindot niining mga talan-awon. Kami nalipay sa among pag-alagad didto, apan tapos sa laing upat ka bulan, ang akong bana giasayn sa sirkito, o nagapanaw, nga buluhaton nga nagduaw sa mga kongregasyon gikan sa Roma ngadto sa Sicily. Ngadtongadto, miduaw usab kami sa Malta ug bisan gani sa Libya sa Amihanang Aprika.

Ang mga biyahe sa tren gikan sa Naples ngadto sa Sicily sulod niadtong mga tuiga maoy pagsulay sa pisikal nga paglahutay. Kami mosakay sa puno kaayo nga tren ug magbarog sa naghuot nga mga agianan, usahay sulod sa unom ngadto sa walo ka oras. Hinunoa, naghatag kadto kanamo ug maayong kahigayonan sa pagpaniid ug pag-analisar niadtong anaa sa palibot namo. Daghang higayon nga ang usa ka dakong dama sa hinimo-sa-balay nga bino nagsilbing lingkoranan sa tag-iya niini, kinsa matag karon ug unya moinom sa bino sa pagtagbaw sa iyang kauhaw panahon sa hataas nga panaw. Ang mahigalaong mga pasahero sagad makig-ambit sa ilang tinapay ug salami kanamo, usa ka maabiabihon, mabinationg lihok nga among gipabilhan.

Sa Sicily kami sugaton sa mga igsoon nga magdala sa among mga maleta patungas sa bukid sa tulo ka oras ug tunga nga padayong pagtungas paingon sa kongregasyon sa ibabaw. Ang mainitong pag-abiabi sa among Kristohanong mga igsoon makapakalimot kanamo sa among kakapoy. Usahay mosakay kami sa dili dali matumbang mga mula, apan dili gayod kami molantaw sa ubos diin ang usa lang ka sayop nga lakang sa mula magpahinabo sa among pagkahulog. Ang lig-ong pagbarog sa among mga igsoon dapig sa kamatuoran sa Bibliya bisan pa sa ilang kalisdanan nagpalig-on kanamo, ug ang gugma nga gipakita kanamo nagpahimo kanamong mapasalamaton nga nakauban nila.

Malta ug Libya

Uban sa daghan kaayong mga handumanan sa atong mga igsoon sa Sicily, kami milawig paingon sa Malta. Si apostol Pablo nakakaplag didto ug malulutong mga tawo, ug mao man usab kami. Usa ka bagyo sa Luuk ni San Pablo nagpaamgo kanamo sa kapeligrohan nga giatubang sa gagmayng mga barko sa unang siglo. (Buhat 27:39–28:10) Ang among sunod nga pagduaw maoy sa Libya. Unsa unyay among kahimtang niining Aprikanhong nasod diin gidili ang atong buluhaton?

Sa makausa pa kami nakasinati ug lahi kaayong kultura. Ang mga talan-awon ug mga tingog sa siyudad sa Tripoli nakadani sa akong pagtagad samtang kami naglakaw latas sa may kolumnang mga kalsada sa poblasyon. Ang mga lalaki nanagsul-ob sa hinabol nga mga sapot nga hinimo sa balhibo sa kamelyo sa pagpanalipod sa ilang kaugalingon gikan sa naglagiting nga kainit sa Desyerto Sahara panahon sa adlaw ug gikan sa kabugnaw sa kagabhion. Nakakat-on kami sa pagsabot ug pagtahod sa paagi nga ang mga tawo mipasibo sa mga klima diin sila nagpuyo.

Ang mainampingong kadasig sa mga igsoon dakog gikatudlo kanamo bahin sa pagsalig pag-ayo kang Jehova ug sa pagsunod sa mga instruksiyon niadtong kinsa mas nahibalo mahitungod sa pagsangyaw ilalom sa maong mga kahimtang. Ang atong Kristohanong mga igsoon maoy sa lainlaing mga nasyonalidad; apan sila nagbuhat nga may kaharmoniya diha sa ilang pag-alagad kang Jehova.

Usa ka Bag-ong Asaynment

Tungod sa pagsupak sa atong pagsangyawng buluhaton, kinahanglan kaming mobiya sa Italya, apan kami malipayong midawat sa bag-ong asaynment sa pagsangyaw sa Brazil niadtong 1957. Si Francis ug ako mipasibo sa kinabuhi ug mga kustombre, ug human sa walo ka bulan, si Francis gidapit sa sirkitong buluhaton. Kami mibiyahe pinaagig bus, ayroplano, ug naglakaw. Ang pagbiyahe niining dako, matahom nga nasod sama ra sa usa ka leksiyon sa geograpiya.

Ang among unang sirkito naglakip sa napulo ka kongregasyon sa siyudad sa Saõ Paulo, maingon man sa napulo ka gagmayng lungsod sa sulod nga bahin ug ubay sa habagatang baybayon sa estado sa São Paulo. Walay kongregasyon sa maong mga lungsod niadtong panahona. Mangita kamig dapit nga kapuy-an, ug tapos makapahimutang, mamalaybalay kami dala ang mensahe sa Gingharian. Nagbilin usab kamig mga imbitasyon sa salida sa usa sa edukasyonal nga mga pelikula sa Watch Tower Society.

Ang pagsakay sa bus dala ang mga pelikula, projector, transformer, mga payl, literatura, mga imbitasyon, ug mga kasangkapan sa pagmarka sa lokasyon sa salida diha sa mga imbitasyon dili sayon nga trabaho. Kon itandi, ang among gamayng maleta sa biste dili dakong butang. Ang projector kinahanglang sabakon aron nga dili kini mag-uyog-uyog ug mabuak gumikan sa pagbiyahe diha sa libaongong mga dalan.

Human makakita ug dapit nga kasalidahan, moduaw kami sa kabalayan ug magbilin ug mga imbitasyon sa salida. Usahay kami makakuhag pagtugot sa pagpasalida sa pelikula diha sa usa ka restawran o sa usa ka hotel. Sa laing mga panahon kami magmontar ug usa ka habol tali sa duha ka poste diha sa gawas. Ang mapabilhong tumatan-aw, diin daghan kanila ang wala pa gayod makakita ug pelikula, mobarog ug maminaw pag-ayo samtang basahon ni Francis ang asoy. Human niana, managtag kamig mga literatura sa Bibliya.

Sa pag-abot sa mga balangay, kami magbiyahe pinaagig bus. Ang pipila sa mga suba walay taytayan, busa ang bus ibutang sa usa ka dakong gakit ug patabokon sa pikas tampi. Kami pahibaloon nga manaog sa bus ug, kon makita namo nga ang bus mahulog sa suba, kami molukso sa pikas kilid sa gakit aron dili masuyop sa tubig. Ikalipay, wala gayoy bus nga nahulog sa suba​—maayo na lang, ilabina nga ang suba ilado nga adunay mokaon-ug-unod nga isdang piranha!

Human makatambong sa internasyonal nga kombensiyon sa New York niadtong 1958, mipauli kami sa Brazil, diin kami sa wala madugay human niadto nahibalik sa nagapanawng buluhaton. Ang among distritong buluhaton nagdala kanamo sa utlanan sa Uruguay sa habagatan, Paraguay sa kasadpan, sa estado sa Pernambuco sa amihanan, ug sa Dagat Atlantiko sa silangang bahin sa Brazil.

Ang Kolonya sa mga Sanlahon

Sa tungatunga sa katuigang 1960, midawat kamig imbitasyon nga ipasalida ang usa sa mga pelikula sa Sosyedad sa usa ka kolonya sa mga sanlahon. Angkonon gayod nako nga ako medyo nabalaka. Diyutay ra ang among nahibaloan bahin sa sanla, gawas lamang sa among nabasahan bahin niana diha sa Bibliya. Pagsulod namo sa pundok sa mga balay, nga pinintalan ug puti, kami gitultolan ngadto sa usa ka dakong awditoryum. Usa ka bahin ang gilain pinaagig pisi diha sa tunga alang kanamo ug sa among kagamitan.

Ang elektrisyan nga mitabang kanamo maoy 40-ka-tuig nga molupyo sa kolonya. Bug-os siyang nawad-an sa duha ka kamot ug uban pang bahin sa iyang lawas, nga nagdaot pag-ayo sa iyang panagway. Nakurat ako sa sinugdan, apan ang iyang mangayaong kinaiya ug kahanas sa pagdumala sa iyang trabaho nagparelaks kanako. Sa wala madugay nag-estoryahay na kami bahin sa daghang butang samtang gitapos namo ang gikinahanglang mga pagpangandam. Sa usa ka libo ka tawo nga masakiton nga gipapuyo didto sa pasilidad, kapin sa duha ka gatos ang mitambong. Samtang sila nagtakiang sa pagsulod, namatikdan namo ang lainlaing mga ang-ang sa sakit nga ilang giantos. Pagkamakapatandog, emosyonal nga kasinatian alang kanamo!

Kami naghunahuna sa giingon ni Jesus ngadto sa sanlahon nga mihangyo, “Ginoo, kon buot mo lamang, mapahinlo mo ako.” Nga mihikap sa tawo, gipasaligan siya ni Jesus, “Buot ko. Mamahinlo ka.” (Mateo 8:2, 3) Pagkahuman sa programa, daghan ang miduol kanamo sa pagpasalamat sa among pagduaw, nga ang ilang nadaot nga mga lawas usa ka tataw nga testimoniya sa hilabihang pag-antos sa tawo. Sa ulahi, ang lokal nga mga Saksi ang nagtuon sa Bibliya uban niadtong gustong makakat-on pa ug dugang.

Niadtong 1967 kami mipauli sa Tinipong Bansa sa pag-atiman sa pipila ka grabeng mga suliran sa panglawas. Samtang kami mipadayon sa pagsagubang niini, nakapribilehiyo na usab kami sa pag-alagad diha sa sirkitong buluhaton. Sa misunod nga 20 ka tuig, nakig-ambit ako kang Francis diha sa nagapanawng buluhaton sa Tinipong Bansa. Sulod niadtong panahona nagtudlo usab siya sa Tunghaan sa Ministeryo sa Gingharian.

Pagkadakong tuboran sa pagdasig alang kanako nga nakabaton ug mahigugmaong bana ug matinumanong kauban nga nag-atiman sa bisan unsang asaynment nga gihatag kaniya! Duyog kaming nakapribilehiyo sa pagpaambit sa bahandi sa kamatuoran sa Bibliya sa mga bahin sa upat ka kontinente.

Gipalig-on sa Bahandi

Balik niadtong 1950, si Mama naminyo kang David Easter, usa ka matinumanong igsoon nga nabawtismohan sa 1924. Duyog silang nag-alagad sa daghang katuigan diha sa bug-os-panahong ministeryo. Hinunoa, sulod sa kataposang bahin sa kinabuhi ni Mama, ang sakit nga Alzheimer misugod sa pagpadayag. Kinahanglan siyang atimanon pag-ayo sanglit ang sakit nagpamenos sa iyang katakos sa pagpangatarongan. Ang akong mapaluyohong mga igsoong babaye ug si David miabaga sa bug-at nga responsibilidad sa pag-atiman kaniya, sanglit dili nila buot nga kami mobiya sa among espesyal nga mga pribilehiyo sa bug-os-panahong pag-alagad. Ang matinumanong panig-ingnan ni Mama hangtod sa iyang kamatayon sa 1987 nakatabang ug dako kanamo sa pagplano sa among dalan sa kinabuhi, ug ang paglaom sa langitnong ganti nga iyang gimahal naghupay kanamo.

Pagka 1989, nasabtan nako nga si Francis dili na sama ka lagsik kay sa naandan. Wala kami makamatikod nga ang snail fever, usa ka sakit nga ilado kaayo sa daghang bahin sa kalibotan, nakadaot kaniya. Niadtong 1990, kining wala molunga nga kaaway nagbuntog kaniya, ug nawad-an ako sa akong minahal nga kauban uban kang kinsa ako nakig-ambit ug 40 ka tuig diha sa pag-alagad kang Jehova.

Ang mga pagpasibo maoy bahin sa kinabuhi. Ang pipila sayon ra, ug ang pipila maoy lisod. Apan si Jehova, ang Maghahatag sa bililhong bahandi sa kamatuoran sa Bibliya, nagpalig-on kanako pinaagi sa iyang organisasyon ug sa gugma ug pagdasig sa akong pamilya. Nakakaplag gihapon akog katagbawan samtang ako mahinamong nagapaabot sa katumanan sa tanang saad ni Jehova nga dili mapakyas.

[Hulagway sa panid 23]

Sa dihang ang akong bana ug ako maoy mga misyonaryo sa Italya