Mga Magmamantala sa Gingharian Nagtaho

Maayong Balita Gikan sa Norway

DAGHANG maayong mga kasinatian ang nabatonan sa kapig 9,500 ka magmamantala sa Gingharian sa maayong balita sa Norway. Naila sa mga tawong matinud-anog kasingkasing ang mensahe sa Bibliya nga gimantala sa mga Saksi ni Jehova ingong kamatuoran ug tubag sa ilang mga pag-ampo, sumala sa gipahayag sa mosunod nga mga kasinatian.

◻ Usa ka batan-ong magtiayon miampo sa Diyos sa pagtabang kanila nga makaplagan ang usa ka katuyoan sa kinabuhi. Usa ka semana sa ulahi ang mga Saksi ni Jehova miduaw, ug sila gipadayon sa asawa. Ang bana napasidan-an na batok sa mga Saksi, mao nga siya migawas sa balay aron hugasan ang iyang sakyanan. Ang asawa natawo sa Lebanon ug naglisod sa pinulongan, mao nga gipakita kaniya sa mga Saksi ang ngalan ni Jehova diha sa iyang Arabikong Bibliya. Duha ka semana sa ulahi namalik ang mga Saksi, ug sa makausa pa ang bana migawas aron hugasan ang iyang sakyanan. Gisukna sa mga Saksi ang asawa kon siya naghunahuna ba nga mapresente unta ang iyang bana sa sunod panahong sila moduaw aron siya makahubad, ug siya misaad sa paghangyo kaniya.

Sa ikatulong pagduaw, ang sakyanan limpiyo kaayo nga wala mobati ang lalaki nga magamit niya kanang pasumangil sa paggawas, mao nga siya nagpabilin ug nangutanag daghang pangutana sa pagsusi sa kalainan sa mga Saksi ug sa iglesya sa Estado. Ang pagduaw milungtad ug tulo ka oras, ug ang usa ka brosyur gipahimutang sa magtiayon. Sa paglakaw sa mga Saksi, ang asawa mihigda na apan ang bana misugod sa pagbasa sa brosyur, nga nagtan-aw sa tanang kasulatan. Sa tungang gabii gipukaw niya ang iyang asawa ug miingon: “Kinahanglang basahon nimo kini.” Siya mibangon, ug gibasa nilang duha hangtod sa ala singko sa buntag. Sa pagkaamgo nga ilang nakaplagan ang kamatuoran, sila nakahilak sa kalipay ug miampo kang Jehova, nga gigamit ang iyang ngalan. Ang regular nga pagtuon sa Bibliya nasugdan uban kanila, ug sila misugod sa pagtambong sa mga tigom. Gibiyaan niya ang iyang trabaho uban sa militaryo, ug sila miluwat gikan sa iglesya ug mihunong sa pagtabako. Karon sila bawtismado ug malipayong nagaalagad kang Jehova uban sa ilang mga igsoong lalaki ug babaye sa tibuok nga kalibotan.

◻ Duha ka sister diha sa ilang balay-balay nga ministeryo sa Norway nakahibalag ug usa ka babaye nga nagpakitag interes. Iya silang gidapit nga mobalik ug gipangutana kon siya makadapit bag ubang mga babaye. Sa sunod nga pagduaw, upat pa ka laing babaye ang presente. Usa kanila aktibo kaayo sa simbahan. Siya miingon nga sukad gayod nga siya bata pa, buot niyang mosunod sa sugo ni Jesus sa paghimog mga tinun-an. Kadto misangpot nga siya nakaadto sa Aprika kauban sa iyang bana tungod sa usa ka proyekto sa langyawng hinabang. Ang tanang babaye may daghang pangutana, ug gihikay nga duawon sila sa mga sister matag duha ka semana. Ang bag-ong mga silingan gidapit, ug ang pipila nagpadayon sa pag-anha samtang ang uban mihunong sa pagtambong, apan ang aktibong membro sa iglesya mipabili nga siya nakakat-on sa kamatuoran. Usa ka adlaw, sa dihang ang ministro sa iyang simbahan miingon nga mosuportar siya sa gubat ug siya nagtuo sa doktrinang Trinidad, siya mibiya sa iglesya. Misugod siya sa pagtambong sa mga tigom sa mga Saksi ni Jehova ug sa wala madugay misugod sa pagpakig-ambit sa buluhatong pagsangyaw. Sa wala madugay tapos niadto siya nabawtismohan. Sa kataposan karon, tapos sa 30 ka tuig, siya mahimong magkalipay sa tinuod nga pagsunod sa sugo ni Jesus sa paghimog mga tinun-an.—Mateo 28:19.

Si Jehova nagapanalangin sa mga igsoon sa Norway diha sa ilang balaang pag-alagad ingon man niadtong nagapamati sa maayong balita!