Makaplagan Nimo ang Bahandi nga Bililhon pa Kay sa Bulawan!
ANG mga kamatuoran sa Bibliya gipakasama sa bulawan, salapi, o ubang natagong mga bahandi. Bisag wala ka magpangitag literal nga bulawan o salapi, tingali ikaw nahibalo nga ang pagbuhat niini nagkinahanglag mabudlay nga trabaho ug pagkamalahutayon. Ug kasagaran ang tigpangitag bahandi makaatubang ug mga kapakyasan.
Ugaling, ang maong kapakyasan dili mosangpot kon ikaw mangita sa natagong mga bahandi sa Bibliya. Matikdi kining makadasig nga garantiya: “Kon ikaw padayon nga magapangita niini ingon nga salapi, ug padayon nga magapangita niini ingon sa natagong bahandi, sa mao nga paagi ikaw makasabot sa pagkahadlok kang Jehova, ug hikaplagan mo ang kahibalo sa Diyos.” (Proverbio 2:4, 5) Apan ikaw kinahanglang mangita.
“Pangita ug Kamo Makakaplag”
“Pangita ug kamo makakaplag nga walay propeta nga motungha sa Galilea.” Mao kini ang tambag nga gihatag sa pila ka unang-siglong Hudiyonhong mga Pariseo kang Nicodemo, nga usa usab ka Pariseo. “Pangita ug kamo makakaplag.” Maayong tambag, matuod. Posible ang pagpangita ug pagkaplag sa kamatuoran—usa ka butang nga bililhon pa kay sa bulawan.
Nianang partikular nga kaso, hinunoa, kadtong mihatag sa tambag sa “pangita ug kamo makakaplag” napakyas sa paglihok nga susama. Sa unsang paagi?
Ang punoan sa mga saserdote ug mga Pariseo nagpadalag mga polis sa pagdakop kang Jesu-Kristo. Naikag kaayo sa iyang paagi sa pagpanudlo, ang mga polis mibalik nga walay dala. Busa, gipangutana sila sa mga Pariseo: “Nagpahisalaag ba usab diay kamo?” Si Nicodemo miingon: “Ang atong kasugoan dili mohukom nga sad-an ang usa ka tawo hangtod nga mapatalinghogan usa siya ug maila kon unsay iyang nabuhat, dili ba?” Kining mga pulonga maoy nakapukaw sa tambag sa ‘pagpangita ug kamo makakaplag.’—Juan 7:32, 45-52.
Sa unsang paagi ang mga saserdote ug mga Pariseo napakyas? Sila wala mahibalo o modawat nga bisan pa nga si Jesus gimatuto sa Galilea, siya natawo sa Bethlehem. Si propetang Miqueas nanagna: “Gikan kanimo [Bethlehem] adunay usa nga mogula kanimo nganhi kanako nga mahimong magmamando sa Israel.” (Miqueas 5:2) Busa ang maong kadagkaon sa mga tawo napakyas sa pagpangita ug sa pagkaplag sa kalig-onan ni Jesus ingong propeta, ang usa nga mahimong magmamando sa Israel. Kini mitultol ug makasubong mga sangpotanan, ug kini nag-ilustrar kon unsa ka importante ang pagpangita ug pagkuha sa bug-os nga kamatuoran mahitungod sa maong mga butang. Apan sa unsang paagi gilantaw ang kamatuoran?
Ang Kamatuoran Gisambogan
“Ang putli nga kamatuoran, sama sa lunsay nga bulawan, nakaplagan nga dili-maayong ipanagtag, tungod kay nadiskobrehan sa mga tawo nga mas kombenyente ang pagsambog sa kamatuoran kay sa pagputli sa ilang kaugalingon,” miingon ang ika-19ng siglong magsusulat. Pagkaprangka gihapon niining mga pulonga may labot sa kalibotanon relihiyosong natad! Ang nagapalikod niining mga kahimtangan bahin niining pagsambog sa kamatuoran mao “ang amahan sa bakak,” si Satanas nga Yawa. (Juan 8:44; Pinadayag 12:9) Iyang gigamit ang bakak nga relihiyon sa pagsambog sa matuod nga mga pagtulon-an sa importanteng mga pangutana sama niini: Kinsa ang Diyos? Unsay relasyon ni Jesus kaniya? Unsay dulnganan sa yuta ug sa katawhan?
Ang mga saserdote ug ang mga Pariseo makahimo sa pagpangita ug sa pagkaplag sa kamatuoran. Ilang makita unta ang mga bahandi nga bililhon pa kay sa bulawan. Oo, ilang mabatonan unta ang bug-os nga kamatuoran bahin kang Jesus pinaagi sa ‘pagpamati gikan kaniya ug sa pagkaila kon unsay iyang ginabuhat,’ sumala sa gisugyot ni Nicodemo. Kon sila tim-os pa unta sa pagbuhat niini, piho nga ipatin-aw unta kini ni Jesus kanila, sama sa iyang gihimo ngadto sa iyang mga tinun-an. (Marcos 4:34) Apan asa man kita makakaplag ug putli nga kamatuoran karong adlawa? Sa pagkamatuod, duna bay garantiya nga kita malamposong makapangita ug makakuha sa bug-os nga kamatuoran?
[Hulagway sa panid 4]
Ang relihiyosong mga pangulo makabaton unta sa bug-os nga kamatuoran mahitungod kang Jesus pinaagi sa ‘pagpamati gikan kaniya’