Pag-alagad Kang Jehova Uban sa Kalipay

“Sa kalipay panag-alagad kamo kang Jehova. Dumuol kamo sa iyang atubangan nga may pag-awit.”—SALMO 100:2.

1, 2. (a) Sa unsang paagi napaila ang rasismo sa Berlin, Alemanya, apan unsay nahitabo sa krusada alang sa “Usa ka Libo ka Tuig nga Pagmando”? (b) Unsang kalainan sa 1936 ang napanid-an sa Olympia Stadium sa Hulyo 1990, ug sa unsa naangkla ang kalipay sa internasyonal nga pundok nga nagtigom didto?

ANG dapit mao ang Olympia Stadium, Berlin. Kalim-ag-upat ka tuig nga miagi, kining nindot nga estadyum nahimong sentro sa panaglalis sa dihang ang diktador nga si Adolf Hitler gikatahong wala motagad sa usa ka itom Amerikanong maglulumba nga nakadaog ug upat ka medalyang bulawan. Usa ka pagdaot, sa tinuoray, sa rasistang pangangkon ni Hitler sa “Aryanhong pagkasuperyor”!a Apan karon, sa Hulyo 26, 1990, ang mga itom, mga puti, mga dalag​—usa ka nahiusang katawhan gikan sa 64 ka nasodnong grupo, nga 44,532 tanan—​nagtigom dinhi alang sa “Putling Pinulongan” Distritong Kombensiyon sa mga Saksi ni Jehova. Talagsaon gayong kalipay ang miawas niadtong hapon sa Huwebes! Human sa pakigpulong sa bawtismo, 1,018 ka kandidato mihugyaw, “Ja!” ug usab, “Ja!” sa pagpamatuod sa ilang pagpahinungod kang Jehova nga Diyos, aron sa pagbuhat sa iyang kabubut-on.

² Gidangtag 19 minutos aron kadtong bag-ong mga Saksi makagawas nga naglinya sa estadyum sa pagpadulong nila sa tubig sa bawtismo. Ug sulod nianang tanang minutos, mihugong ang kusog nga mga pakpak sa tibuok haluag kaayong arena. Ang mga mananaog sa Mga Dulang Olimpiada wala pa sukad makasinati sa samang pakpak nga maoy nagdawat karon sa ginatos, gikan sa daghang nasodnong grupo, nga nagpasundayag sa pagtuo nga magmadaogon sa kalibotan. (1 Juan 5:3, 4) Ang ilang kalipay hugot naangkla sa pagsalig nga ang pagmando sa Gingharian sa Diyos pinaagi ni Kristo magpatungha gayod sa usa ka libo ka tuig sa mahimayaong mga panalangin alang sa katawhan.​—Hebreohanon 6:17, 18; Pinadayag 20:6; 21:4, 5.

3. Unsang kamatuoran ang gipasiugda sa pagsalig sa mga kombensiyonista, ug sa unsang paagi?

³ Walay rasanhon o nasyonalistikanhong mga dinumtanay dinhi, kay ang tanan nagasulti sa putling pinulongan sa Pulong sa Diyos, sa ingon nagpasiugda sa kamatuoran sa mga pulong ni Pedro: “Sa pagkamatuod akong naila nga ang Diyos walay pinalabi, apan sa matag nasod ang tawo nga may kahadlok kaniya ug nagabuhat sa pagkamatarong dalawaton alang kaniya.”​—Buhat 10:34, 35; Sofonias 3:9.

4. Ubos sa unsang mga kahimtang nangahimong mga magtutuo ang kinabag-an sa mga kombensiyonista, ug sa unsang paagi natubag ang ilang mga pag-ampo?

⁴ Ang dakong bahin sa maong mga kombensiyonista sa Berlin nangahimong mga magtutuo panahon sa daghang katuigan sa pagpiot, nga mikobre sa panahong Nazi (1933-1945) ug sa misunod nga sosyalistikanhong panahon sa Silangang Alemanya, diin ang pagdili sa mga Saksi ni Jehova sa legal bag-o pang giwagtang niadtong Marso 14, 1990. Busa, daghan kanila “nagdawat sa pulong ubos sa dakong kasakitan uban sa kalipay sa balaang espiritu.” (1 Tesalonica 1:6) Karon sila may dakong kagawasan sa pag-alagad kang Jehova, ug ang ilang kalipay walay kinutbanan.​—Itandi ang Isaias 51:11.

Mga Okasyon sa Kalipay

5. Giunsa pagsaulog sa Israel ang pagluwas ni Jehova sa Pulang Dagat?

⁵ Ang pagkagawas sa atong mga igsoon sa Silangang Uropa, ug karong bag-o sa mga bahin sa Aprika ug Asia, magpahinumdom kanato sa mga pagluwas ni Jehova sa kanhing mga panahon. Mahinumdoman nato ang gamhanang buhat ni Jehova sa Pulang Dagat, ug nga ang awit sa pasalamat sa Israel nakaabot sa kinakusgan sa mga pulong: “Kinsa man ang sama kanimo, Oh Jehova? Kinsa man ang sama kanimo, nga nagapamatuod nga gamhanan mismo sa pagkabalaan? Ang Usa nga pagakahadlokan uban sa mga awit sa pagdayeg, ang Usang nagabuhat sa mga katingalahan.” (Exodo 15:11) Karong adlawa, dili ba kita nagapadayon sa pagkalipay sa katingalahang mga butang ginabuhat ni Jehova alang sa iyang katawhan? Tinong ginabuhat nato kana!

6. Unsay atong makat-onan gikan sa pagsinggit sa kalipay sa Israel niadtong 537 W.K.P.?

⁶ Ang kalipay miawas sa 537 W.K.P. sa dihang ang Israel nahibalik sa yuta niini tapos sa pagkabihag sa Babilonya. Ang nasod ni Jehova karon nakapahayag, sama sa gipahayag ni Isaias: “Tan-awa! Ang Diyos mao ang akong kaluwasan. Ako mosalig ug dili mahadlok; kay si Jah Jehova mao ang akong kusog ug akong kagahom, ug siya nahimong kaluwasan ko.” Pagkadakong kalipay! Ug unsaon sa nasod pagpahayag nianang kalipaya? Si Isaias mipadayon: “Nianang adlawa kamo magaingon gayod: ‘Magpasalamat kamo kang Jehova, kamong katawhan! Sangpita ninyo ang iyang ngalan. Ipahibalo taliwala sa mga katawhan ang iyang mga pakiglabot. Hisgoti nga ang iyang ngalan gibayaw. Pag-awit kamo kang Jehova, kay siya nakahimo sa labaw kaayo.’” Sila karon “nakasinggit sa kalipay” sa paghimo sa iyang gamhanang mga buhat nga “mahibaloan sa tibuok nga yuta,” sama sa ginabuhat karong adlawa sa napagawas nga mga alagad ni Jehova.​—Isaias 12:1-6.

Kalipay sa Buluhaton ni Jehova

7. Unsang mga pagpahigawas ang angay ikalipay niadtong 1919?

⁷ Sa modernong panahon ang mga alagad ni Jehova misugod sa pagsinggit sa kalipay sa dihang iya silang gihatagan ug katingalahang kaluwasan niadtong 1919. Sa Marso 26 nianang tuiga, ang mga membro sa Nagamandong Lawas gipagawas gikan sa bilanggoan sa Tinipong Bansa diin sila gibilanggo sulod sa siyam ka bulan pinasukad sa bakak nga mga sumbong sa sedisyon. Pagkadakong saulog ang nahitabo sa pag-abiabi kanila balik sa Brooklyn Bethel! Dugang pa, kadtong tanan nga dinihogang nahibilin sa maong panahon nagkalipay tungod kay gipagawas sa espirituwal nga paagi gikan sa Dakong Babilonya, ang sistema sa relihiyon nga pinaagi niana gilit-ag ni Satanas ang tibuok nga kalibotan.​—Pinadayag 17:3-6; 18:2-5.

8. Unsang katingad-anang pagluwat ang gipahibalo sa Cedar Point nga Kombensiyon niadtong 1919, ug unsang pag-awhag alang sa buluhaton ang gihatag?

⁸ Ang makasaysayanhong mga hitabo sa 1919 gipurongpurongan sa kombensiyon sa katawhan sa Diyos nga gihimo sa Cedar Point, Ohio, U.S.A., Septiyembre 1-8. Sa ikalimang adlaw sa maong asembliya, ang “Adlaw sa mga Kaubang-Magbubuhat,” ang presidente sa Watch Tower Society, si J. F. Rutherford, nakigsulti sa 6,000 sa makapatandog nga pakigpulong nga nag-ulohang “Nagapahayag sa Gingharian.” Tapos sa paghisgot sa Pinadayag 15:2 ug Isaias 52:7, gisultihan niya ang iyang mga mamiminaw nga ang usa ka bag-ong magasin, ang The Golden Age (karon nailhang Pagmata!), patikon sa matag duha ka semana, aron ipanagtag ilabina sa kanataran. Sa konklusyon siya miingon: “Kadtong bug-os debotado sa Ginoo; kadtong dili mahadlokon, kansang mga kasingkasing maoy putli, nga nahigugma sa Diyos ug sa Ginoong Jesus uban sa bug-os nilang hunahuna, kusog, kalag ug pagkatawo, sumala sa ihatag sa higayon, magkalipay sa pag-apil sa maong buluhaton. Pangayoa sa Ginoo ang iyang giya ug pagtultol aron himoon ka unta niya nga matuod, matinumanon, ug hanas nga tinugyanan. Dayon, uban ang awit sa kalipay diha sa imong kasingkasing, lakaw aron alagaron siya.”

9, 10. Giunsa pagpalambo ni Jehova ang pagpatik sa Bantayanang Torre ug Pagmata! nga mga magasin?

⁹ Ang maong “awit sa kalipay” nadunggan sa tibuok yuta! Daghan sa atong mga magbabasa nakaambit, sa walay duhaduha, sa pagpauswag sa sirkulasyon sa magasing Pagmata! sa presenteng 12,980,000 kopya sa matag isyu diha sa 64 pinulongan. Ingong gamhanang instrumento sa pag-agak sa mga tawong interesado sa kamatuoran, ang Pagmata! nagasilbing kauban sa Ang Bantayanang Torre. Sa usa ka nasod sa Oriente, ang usa ka payunir nga sister, nga naglibot sa regular nga ruta sa magasin, natingala sa pagkadiskobre nga sa matag hatod niya sa kinabag-ohang mga magasin, ang tagbalay nagdonar sa katumbas nga $7 (U.S.) sa tibuok-kalibotang buluhaton sa mga Saksi ni Jehova​—tinong pagpakitag dakong pagpabili sa buluhaton sa Gingharian!

¹⁰ Karon nagsugod sa ika-112ng tuig sa pagpatik niini, ang magasing Bantayanang Torre dunay sirkulasyon nga 15,290,000 diha sa 111 pinulongan, nga 59 sa maong mga edisyon dungan nga mopatim-aw sa tibuok kalibotan nga may samang mga unod. Ingong matinumanong piniyalan, ang dinihogang nahibilin nagpadayon sa paghatag sa mapabilhong mga magbabasa sa “ilang bahin sa [espirituwal] nga pagkaon sa hustong panahon.” (Lucas 12:42) Sa 1990, ang mga Saksi ni Jehova mitaho nga nakapahimutang ug 2,968,309 ka bag-ong mga suskrisyon sa duha ka magasin, nga 2.7-porsientong pag-uswag kay sa 1989.

Kalipay Midagaya

11. (a) Unsang panawag ang gipaabot ngadto sa katawhan sa Diyos sa Cedar Point niadtong 1922? (b) Sa unsang paagi ang singgit sa kalipay gipadako?

¹¹ Ang kalipay midagaya usab samtang ang katawhan sa Diyos, nga karon 10,000 sa gidaghanon, nagtigom alang sa ikaduhang kombensiyon sa Cedar Point, niadtong Septiyembre 1922, uban sa 361 nga gibawtismohan. Sa iyang pakigpulong “Ang Gingharian sa Langit Haduol Na,” nga gibase sa Mateo 4:17, si Brader Ruth­er­ford misangko sa makapatandog nga tayuktok: “Ang kalibotan kinahanglang mahibalo nga si Jehova maoy Diyos ug nga si Jesu-Kristo mao ang Hari sa mga hari ug Ginoo sa mga ginoo. Kini mao ang adlaw sa tanang adlaw. Tan-awa, ang Hari nagamando na! Kamo mao ang iyang mga magmamantala. Busa, imantala, imantala, imantala, ang Hari ug ang iyang gingharian.” Kadtong mihugyaw sa kalipay nga misulbong niadtong kombensiyona midaghan hangtod nga sa 1989 kapin sa 6,600,000 ang nagtigom sa 1,210 ka kombensiyon sa mga Saksi ni Jehova sa tibuok nga kalibotan, diin 123,688 ang nabawtismohan.

12. (a) Unsang dili-ikabatbat nga kalipay ang naagoman sa katawhan sa Diyos karong adlawa? (b) Unsaon nato pagtimbang ang atong pag-alagad kang Jehova uban sa pagkamasinugtanon ngadto sa “labawng mga pagbulot-an”?

¹² Gimahal sa mga Saksi ni Jehova ang ilang kagawasan. Labaw sa tanan, sila nagkalipay sa modernong-adlaw nga katumanan sa mga pulong ni Jesus: “Ug kamo mahibalo sa kamatuoran, ug ang kamatuoran magapahigawas kaninyo.” Pagkadakong kalipay nga mahigawas sa mga misteryo ug mga patuotuo sa bakak nga relihiyon! Pagkadili-ikabatbat ang kalipay nga makaila kang Jehova ug sa iyang Anak ug mahimong kaubang mga magbubuhat nila, uban ang palaabotong kinabuhing walay kataposan! (Juan 8:32; 17:3; 1 Corinto 3:9-11) Ang mga alagad sa Diyos nagapabili usab niini sa dihang kining “labawng mga pagbulot-an” niining kalibotana, nga ubos niana sila nagapuyo, magtahod sa ilang kagawasan sa pagmantala sa mahimayaong paglaom sa Gingharian ni Jehova ubos ni Kristo. Sila kinabubut-ong “nagabayad sa mga butang ni Cesar ngadto kang Cesar,” samtang sa samang panahon nagabayad sa “mga butang sa Diyos ngadto sa Diyos.”​—Roma 13:1-7; Lucas 20:25.

13. Giunsa pagpahayag sa mga Saksi ni Jehova ang ilang kalipay sa pagkagawas gikan sa pagpiot?

¹³ Bisan pa niana, kon sulayan sa tawhanong mga pagbulot-an ang pagpiot sa maong katungdanan ngadto sa Diyos, ang mga Saksi ni Jehova magatubag sama sa gitubag sa mga apostoles: “Kinahanglang sugton namo ang Diyos ingong magmamando inay ang mga tawo.” Niadtong okasyona, sa gibuhian sa mga magmamando ang mga apostoles, sila “nanglakaw . . . nga nagkalipay.” Giunsa nila pagpahayag ang maong kalipay? “Sa matag adlaw diha sa templo ug gikan sa balay-balay sila nagpadayon nga walay hunong sa pagtudlo ug pagpahayag sa maayong balita mahitungod kang Kristo, si Jesus.” (Buhat 5:27-32, 41, 42) Sa samang paagi, ang modernong-adlawng mga Saksi ni Jehova nagakalipay sa dihang mabatonan nila ang mas dakong kagawasan sa pagpadayon sa ilang ministeryo. Sa daghang kayutaan diin gibuksan ni Jehova ang dalan, sila nagapahayag sa dakong kalipay pinaagi sa paghatag ug bug-os nga pamatuod sa ngalan ni Jehova ug sa umaabot nga Gingharian pinaagi ni Kristo Jesus.​—Itandi ang Buhat 20:20, 21, 24; 23:11; 28:16, 23.

Pagkamainantoson Uban sa Kalipay

14. Sa unsang paagi kining kalipay nga usa ka bunga sa espiritu molabaw nianang gibatbat sa usa ka diksiyo­naryo?

¹⁴ Unsa ba kining dakong kalipay nga nasinati sa matuod nga mga Kristohanon? Kini labi pang dulot ug mas permanente kay sa umalaging kalipay sa usa ka mananaog sa Mga Dulang Olimpiada. Kini usa ka bunga sa balaang espiritu sa Diyos, nga ginahatag sa Diyos ngadto niadtong “nagasugot kaniya ingon nga magmamando.” (Buhat 5:32) Ang Webster’s nga diksiyonaryo nagabatbat sa kalipay ingong ‘mas lalom ug dulot kay sa kahimuot, mas sayag o mapasundayagon kay sa kasadya.’ Alang sa Kristohanon, ang kalipay labi pang dakog kahulogan. Kay naangkla diha sa atong pagtuo, kini gamhanan, makapalig-on nga hiyas. “Ang kalipay ni Jehova mao ang imong kuta.” (Nehemias 8:10) Ang kalipay ni Jehova, nga giugmad sa katawhan sa Diyos, molabaw pa sa pangibabawng kahinam nga mabatonan sa mga tawo gikan sa unodnon, kalibotanong mga kalingawan.​—Galacia 5:19-23.

15. (a) Sa kasinatian sa matinumanong mga Kristohanon, sa unsang paagi ang pagkamainantoson giubanan sa kalipay? (b) Paghatag ug pila ka kasulatan nga magahatag ug makapalig-ong pasalig kon bahin sa paghupot sa kalipay.

¹⁵ Tagda ang atong mga igsoon sa Ukraine. Sa dihang gipalagpot ang libolibo kanila sa ‘labawng pagbulot-an’ ngadto sa Siberia sa sinugdan sa katuigang 1950, naagoman nila ang dagkong kalisdanan. Sa ulahi, sa gihatagan sila sa awtoridad ug amnestiya, sila mapasalamaton, apan dili ang tanan kanila namalik sa ilang yutang-natawhan. Ngano? Ang ilang mga paghago sa Silangan nakapahinumdom kanila sa Santiago 1:2-4: “Isipa ang tanan nga kalipay, mga igsoon ko, sa dihang inyong masagubang ang nagkalainlaing mga pagsulay, kay nahibalo kamo nga kining sinulayang hiyas sa inyong pagtuo mosangpot sa pagkamainantoson.” Buot nilang magpadayon sa pag-antos sa maong makalipay nga pag-ani, ug dako gayong kalipay sa bag-o pang mga kombensiyon sa mga Saksi ni Jehova sa Polandiya ang pag-abiabi sa mga Saksi gikan sa halayong silangan sama sa mga komunidad sa baybayon sa Pasipiko. Ang pagkamainantoson ug kalipay nagkaduyog sa pagpatungha sa maong mga bunga. Sa pagkamatuod, kitang tanan nga malipayong nagaantos diha sa pag-alagad kang Jehova makaingon: “Apan, alang kanako, ako magkalipay diha kang Jehova mismo; ako magmalipayon diha sa Diyos sa akong kaluwasan. Si Jehova ang Soberanong Ginoo mao ang akong bililhong kusog.”​—Habakkuk 3:18, 19; Mateo 5:11, 12.

16. Sa unsang paagi ang maayong mga panig-ingnan ni Jeremias ug Job magadasig kanato sa atong buluhaton sa kanataran?

¹⁶ Apan, sa unsang paagi kita makapadayon sa paghupot sa atong kalipay sa dihang magsangyaw taliwala sa gahig-ulong mga magsusupak? Hinumdomi nga gihuptan sa mga propeta sa Diyos ang malipayong panglantaw diha sa susamang mga kahimtang. Si Jeremias miingon sa dihang ilalom sa pagsulay: “Ang imong mga pulong nakaplagan, ug ako kining gikaon; ug ang imong pulong alang kanako nahimong kalipay ug kasadya sa akong kasingkasing; kay ang imong ngalan gitawag diha kanako, Oh Jehova ang Diyos sa mga panon.” (Jeremias 15:16) Pagkadakong pribilehiyo nga tawgon sa ngalan ni Jehova ug pagpamatuod sa maong ngalan! Ang atong makugihong personal nga pagtuon ug bug-os nga pagpakig-ambit sa Kristohanong mga tigom magpalig-on kanato sa pagpadayon sa pagkalipay diha sa kamatuoran. Ang atong kalipay ibanaag diha sa atong gawi diha sa kanataran ug diha sa atong Gingharianong pahiyom. Bisan ubos sa mapait nga pagsulay, si Job nakaingon bahin sa iyang mga kaaway: “Ako mipahiyom kanila​—sila wala motuo​—ug ang kahayag sa akong nawong dili nila ikasalikway.” (Job 29:24) Sama sa matinumanong si Job, dili kinahanglang kita magmasulob-on sa dihang tamayon kita sa mga magsusupak. Magpadayon sa pagpahiyom! Ang atong dagway makabanaag sa atong kalipay ug mao nga maangkon ang mapatalinghogong mga igdulongog.

17. Sa unsang paagi mamunga ang pagkamainantoson uban ang kalipay?

¹⁷ Samtang atong balikbalikon pagkobre ang teritoryo, ang atong pagkamainantoson ug kalipay basin makapahingangha sa mga tawong mahiligon sa pagkamatarong ug magdasig kanila sa pagsusi sa mahimayaong paglaom nga atong nahuptan. Pagkamakalipay ang pagdumalang regular sa mga pagtuon sa Bibliya uban kanila! Ug samtang ibutang nila sa ilang mga kasingkasing ang bililhong mga kamatuoran sa Pulong sa Diyos, pagkadako sa kalipay ang atong bation sa dihang sila sa kataposan mahimong atong mga kauban sa pag-alagad kang Jehova! Unya kita makaingon, sama sa gisulti ni apostol Pablo sa bag-ong mga magtutuo sa iyang adlaw: “Kay unsa ba ang among paglaom o kalipay o purongpurong sa kalipay​—aw, dili ba sa pagkamatuod kamo​—sa atubangan sa atong Ginoong Jesus sa iyang presensiya? Kamo sa pagkamatuod mao ang among himaya ug kalipay.” (1 Tesalonica 2:19, 20) Sa pagkamatuod, ang makapatagbawng kalipay hikaplagan sa pag-agak sa mga bag-ohan ngadto sa kamatuoran sa Pulong sa Diyos ug sa pagtabang kanila nga mahimong dedikado, bawtismadong mga Saksi.

Kalipay nga Magpalig-on

18. Unsay motabang nato sa pagsagubang sa lainlaing modernong-adlaw nga mga pagsulay?

¹⁸ Sa atong adlaw-adlaw nga kinabuhi, daghang kahimtang ang tingali magkinahanglan sa pagkamainantoson. Ang pisikal nga sakit, depresyon, ug kalisod sa pangabuhi maoy pipila lamang. Sa unsang paagi mahuptan sa Kristohanon ang iyang kalipay aron makasagubang sa maong mga pagsulay? Kini mahimo pinaagi sa pagdangop sa Pulong sa Diyos alang sa paglipay ug giya. Ang pagbasa o pagpamati sa mga pagbasa sa mga salmo makahatag ug dakong kahupayan panahon sa pagsulay. Ug matikdi ang maalamong tambag ni David: “Itugyan ang imong palas-anon kang Jehova mismo, ug siya mismo magapalig-on kanimo. Dili gayod niya itugot nga ang matarong matarog.” (Salmo 55:22) Si Jehova sa pagkamatuod mao ang “Tigpatalinghog sa pag-ampo.”​—Salmo 65:2.

19. Sama kang David ug Pablo, unsang pagsalig ang mahimong atong nabatonan?

¹⁹ Ang organisasyon ni Jehova, pinaagi sa mga basahon niini ug sa mga ansiano sa kongregasyon, andam kanunay sa pagtabang kanato, kay kita mahuyang man nga mga tawo, sa pagsagubang sa atong mga suliran. Si David madasigong nagtambag: “Itugyan kang Jehova ang imong dalan, ug sumalig ka kaniya, ug siya mismo molihok.” Siya nakaingon usab: “Ako kaniadto usa ka batan-on, ako natigulang na, ug bisan pa niana ako wala makakita sa usa ka matarong nga gibiyaan sa bug-os, ni ang iyang kaliwat nga nangitag tinapay.” Sa pakig-uban sa Kristohanong kongregasyon, kita makaamgo nga “ang kaluwasan sa mga matarong nagagikan kang Jehova; siya mao ang ilang kuta sa panahon sa kagul-anan.” (Salmo 37:5, 25, 39) Sundon nato kanunay ang tambag ni Pablo: “Busa dili kita manghunong, . . . samtang atong itutok ang atong mga mata, dili diha sa mga butang makita, kondili diha sa mga butang dili makita. Kay ang mga butang makita maoy umalagi, apan ang mga butang dili makita maoy walay kataposan.”​—2 Corinto 4:16-18.

20. Unsay atong makita pinaagi sa mata sa pagtuo, ug sa unsang paagi kini magapalihok kanato?

²⁰ Pinaagi sa atong mga mata sa pagtuo, kita makakita sa bag-ong sistema ni Jehova nga anaa ra sa unahan. Pagkadili-ikatanding unya ang mga kalipay ug mga panalangin! (Salmo 37:34; 72:1, 7; 145:16) Sa pagpangandam alang nianang mahimayaong panahon, atong pamation ang mga pulong sa Salmo 100:2: “Sa kalipay panag-alagad kamo kang Jehova. Dumuol kamo sa iyang atubangan uban sa pag-awit.”

[Footnote]

Sa Pagsubli:

◻ Unsang makalipay nga pagbuntog sa rasismo ang makita karong adlawa?

◻ Nganong ang karaang katawhan sa Diyos miawit ug misinggit sa kalipay?

◻ Sa unsang paagi ang tinuod nga kalipay nagmausbawon sa modernong panahon?

◻ Sa unsang paagi ang pagkamainantoson ug kalipay magkaduyog?

◻ Sa unsang paagi makapadayon kita sa paghupot sa atong kalipay?